Iya, a makriki fu leisi, ma a soifri?

NA INI september 2005, na Anglikan Kerki ben breiti taki a Bijbel di nen The 100-Minute Bible (100-Miniti Bijbel) tyari kon na doro. A Bijbel disi di meki na so wan fasi taki sma kan leisi en na ini 100 miniti, e taki syatu fu Bijbel tori. Den tori fu den Hebrew Buku fu Bijbel prati na ini 17 pisi. Ibriwan fu den pisi disi e teki wán bladzijde, èn den Griki Buku fu Bijbel prati na ini 33 pisi. Soleki fa wan man di leisi a Bijbel disi e sori, dan nowan fu den „soi pisi” fu Bijbel no de na ini. Iya, a makriki fu leisi, ma a soifri?

Boiti taki a nen fu Gado, Yehovah, no de na ini a Bijbel disi, sma di e studeri Bijbel seryusu sa si taki tra sani na ini a Bijbel disi no soifri tu (Psalm 83:18). Fu eksempre, a fosi pisi e taki dati Gado „meki hemel nanga grontapu na ini wan pisi ten fu siksi dei”. Ma Genesis 1:1 e taki: „Na a bigin Gado meki hemel nanga grontapu.” Baka dati, a Wortu fu Gado soleki fa a ben skrifi na ini a bigin, e taki fu den tra sani di Gado meki na grontapu, èn dati ben teki siksi „dei” noso siksi difrenti pisi ten. Baka dati, Genesis 2:4 e kari a heri pisi ten di Gado meki sani, „a dei di Yehovah Gado meki hemel nanga grontapu”.

Soleki fa The 100-Minute Bible e taki, dan „wan fu den futuboi fu [Gado], namku Satan, . . . di ben abi a frantwortu fu taki ogri fu libisma”, ben tesi Yob, wan man di ben de getrow. Yu no e si taki den sani disi no soifri? A wortu „Satan” wani taki „Gensman”. Satan a no wan futuboi fu Gado, ma na presi fu dati a de a moro bigi feanti fu Gado èn na ensrefi bosroiti fu taki ogri fu libisma.—Openbaring 12:7-10.

Fa a de dan nanga a pisi fu den Kresten Griki Buku fu Bijbel na ini The 100-Minute Bible? Na ini na agersitori fu den skapu nanga bokoboko, a Bijbel disi e taki dati Yesus lobi den sma di ben e yepi „iniwan sma, awansi suma na dati”. Ma Yesus ben taki trutru dati a sa blesi den sma di e du bun gi den wan di e libi akruderi den leri fu en, iya gi den „brada” fu en (Mateyus 25:40). Na ini a buku Openbaring di skrifi syatu, a Bijbel disi e taki dati „Rome, a bigi Babilon, ben o kisi pori krinkrin”. Ma sma di e ondrosuku Bijbel sabi taki Gado Wortu no e taki srefisrefi dati Rome na „Babilon a Bigiwan”.—Openbaring 17:15–18:24.

Gi den sma di e meki muiti fu kon sabi wi Mekiman èn fu frustan san A abi na prakseri, Bijbel na a wan-enkri buku di kan yepi den fu doro a marki dati. Iya, a sa teki moro leki 100 miniti fu leisi Bijbel, ma te wan sma e du dati, dan a sa abi bun bakapisi trutru (Yohanes 17:3). Sobun, meki muiti fu leisi Bijbel, so taki yusrefi kan kisi wini fu dati.—2 Timoteyus 3:16, 17.