San yu kan leri fu pikin-nengre?

„YU E du leki wan pikin-nengre!” Kande wi no ben o lobi en te wan sma ben o taigi wi a sani dati. Aladi pikin-nengre e gi wi prisiri, toku a no de fu taki dati den no lepi ete, èn den no abi na ondrofeni nanga a koni di bigisma abi.—Yob 12:12.

Ma toku, Yesus ben taigi den disipel fu en wan leisi: „Fu tru mi e taigi unu: Efu unu no kenki a fasi fa unu e libi èn unu no tron leki yongu pikin, dan unu no sa go na ini a kownukondre fu hemel kwetikweti” (Mateyus 18:3). San Yesus ben wani taki nanga den wortu disi? Sortu fasi pikin-nengre abi di bigisma musu pruberi fu abi tu?

Kon abi a sakafasi di pikin-nengre abi

Luku fu san ede Yesus ben taki den wortu dati. Yesus nanga den disipel fu en ben waka wan langa pasi, èn baka di den doro na ini Kaperna-um, dan a aksi den: „Fu san unu ben e haritaki di wi ben de na pasi?” Den disipel no taki noti fu di den ben e syen taki den ben haritaki nanga makandra suma fu den na a moro bigiwan. Te fu kaba, den teki deki-ati èn den aksi Yesus: „Suma na trutru a moro bigiwan na ini a kownukondre fu hemel?”—Markus 9:33, 34; Mateyus 18:1.

Kande a e fruwondru wi taki baka di den disipel ben de nanga Yesus pikinmoro dri yari langa, den ben e haritaki ete suma ben o abi wan moro hei posisi. We, den ben kweki na ini a Dyu bribi, èn fu dati ede den ben e si den sani disi leki tumusi prenspari sani. Soleki fa a sori, dan den sani disi, èn sosrefi den swakifasi fu den, ben abi krakti tapu a fasi fa den ben e denki.

 Yesus go sidon, a kari den disipel kon na en, èn a taki: „Efu wan sma wani de a fosiwan, dan a musu de a lastiwan fu ala sma èn a musu dini ala sma” (Markus 9:35). A no de fu taki dati den wortu disi fruwondru den srefisrefi. A sani di Yesus ben taki, ben de tra fasi leki fa den Dyu ben e denki te a ben abi fu du nanga a bigi di wan sma bigi! Ne Yesus kari wan yongu pikin kon na en. A gi a boi wan waran brasa, èn a meki den dispel kon frustan san a ben wan leri den: „Fu tru mi e taigi unu: Efu unu no kenki a fasi fa unu e libi èn unu no tron leki yongu pikin, dan unu no sa go na ini a kownukondre fu hemel kwetikweti. Fu dati ede, efu wan sma abi sakafasi neleki a yongu pikin disi, dan a sma dati na a moro bigiwan na ini a kownukondre fu hemel.”—Mateyus 18:3, 4.

Disi na wan heri moi fasi fa a leri den fu abi sakafasi! Pruberi fu si a sani disi na yu fesi. Wan grupu bigibigi seryusu man-nengre e tanapu lontu wán pikin boi. Den man e piri den ai luku a pikin. A pikin no ben e meki bigi, èn a ben e frutrow den bigisma na en lontu! A pikin no ben e strei nanga trawan èn a no ben abi bita-ati! A no ben trangayesi èn a no ben e denki tumusi furu fu ensrefi! Iya, na wan heri moi fasi a yongu pikin sori taki a ben abi a fasi di Gado wani libisma fu abi, namku sakafasi.

A de krin fu si san Yesus wani leri wi. Efu wi wani kisi a Kownukondre fu Gado, dan wi alamala musu kon abi a sakafasi di pikin-nengre abi. Na ini na organisâsi fu Yehovah di de leki wan bigi osofamiri, nowan sma musu strei nanga trawan èn nowan sma musu abi bigifasi (Galasiasma 5:26). Fu taki en leti, na fu di Satan Didibri ben abi den fasi disi meki a opo ensrefi teige Gado. Fu dati ede, a no e fruwondru wi taki Yehovah no lobi den fasi disi kwetikweti!—Odo 8:13.

Tru Kresten no e suku fu abi makti tapu trawan, ma den e suku fasi fu dini trawan. Awansi wi no lobi fu du wan wroko, èn awansi a sma di wi e dini no abi wan hei posisi, te wi abi trutru sakafasi, dan wi sa de klariklari fu dini trawan. Te wi e dini sma na a fasi dati, dan wi sa kisi furu blesi. Yesus taki: „Efu wan sma e teki den sortu yongu pikin disi na ini mi nen, dan a sma dati e teki mi tu; a sma di e teki mi, no e teki mi wawan, ma a e teki a sma tu di seni mi kon” (Markus 9:37). Te wi e du muiti fu de leki pikin-nengre di de klariklari fu gi èn di abi sakafasi, dan wi sa de na ini wánfasi nanga a moro hei Sma fu hemel  nanga grontapu èn sosrefi nanga en Manpikin (Yohanes 17:20, 21; 1 Petrus 5:5). Wi sa de koloku fu di wi e gi sani (Tori fu den Apostel 20:35). Èn wi sa prisiri fu di wi e yepi fu meki taki a vrede nanga a wánfasi di de na mindri a pipel fu Gado, e tan.—Efeisesma 4:1-3.

Den e teki leri èn den e frutrow sma

Baka dati, Yesus e tyari wan tra sani kon na krin di bigisma kan leri fu pikin-nengre. A ben taki: „Efu wan sma no e teki a kownukondre fu Gado leki wan yongu pikin, dan a no sa go na ini a kownukondre kwetikweti” (Markus 10:15). Boiti taki pikin-nengre abi sakafasi, den de klariklari fu teki leri. „Neleki fa wan sponsu e soigi watra, na so den lobi fu kon sabi sani”, na so wan mama e taki.

Sobun, fu man kisi a Kownukondre fu Gado, wi musu teki a Kownukondre boskopu èn wi musu gi yesi na dati tu (1 Tesalonikasma 2:13). Neleki nyun-nyun pikin, wi musu „kweki wan lostu gi a soifri merki di de na ini a wortu fu Gado, so taki [wi] kan gro èn kisi frulusu nanga yepi fu dati” (1 Petrus 2:2). Ma fa a de dan, efu wan sani di Bijbel e leri muilek fu frustan? „Pikin-nengre gwenti fu tan aksi ’Fu san ede?’, teleki den kisi bun piki tapu den aksi fu den”, na so wan uma e taki di e sorgu gi pikin-nengre. A ben o bun te wi e teki na eksempre fu den. Fu dati ede, tan studeri. Taki nanga lepi Kresten. Aksi Yehovah fu gi yu koni (Yakobus 1:5). A no de fu taki dati te yu e tan begi fayafaya, dan yu sa kisi yepi te fu kaba.—Mateyus 7:7-11.

Ma kande son sma e aksi densrefi: ’Te wan sma de klariklari fu teki leri, dan trawan kan kori en makriki, a no so?’ Nôno, dati no o pasa efu a kan frutrow den sma di e gi en rai. Fu eksempre, pikin-nengre sabi taki den kan go suku rai nanga yepi na a papa nanga mama fu den. „Fu di papa nanga mama e kibri den pikin fu den èn e gi den san den abi fanowdu ibri dei, meki den e gi den pikin fu den reide fu frutrow den”, na so wan papa e taki. A no de fu taki dati na fu den srefi reide disi wi kan frutrow wi hemel Tata, Yehovah (Yakobus 1:17; 1 Yohanes 4:9, 10). Yehovah e gi wi bun rai nanga yepi fu en Wortu di a meki sma skrifi. A santa yeye nanga na organisâsi fu en e trowstu wi èn e horibaka gi wi (Mateyus 24:45-47; Yohanes 14:26). Te wi e gebroiki den sani disi di Yehovah seti gi wi, dan dati sa kibri wi gi sani di kan pori a yeye fasi fu wi.—Psalm 91:1-16.

Te wi abi frutrow na ini Gado neleki fa pikin e frutrow bigisma, dan wi sa abi wan korostu firi  tu. Wan Bijbel sabiman e taki: „Te wi pikin ete, dan wi e go na wan presi sondro taki wi abi moni fu pai fu go drape èn sondro fu sabi fa wi o doro drape, ma toku wi no e tweifri srefisrefi taki wi papa nanga mama o man tyari wi go drape sondro taki ogri miti wi.” Wi abi a srefi frutrow na ini Yehovah?—Yesaya 41:10.

Te wi e frutrow dorodoro tapu Gado, dan dati sa yepi wi fu no tyari wisrefi na wan fasi di kan pori a yeyefasi fu wi. Na presi fu dati, wi sa frutrow dorodoro tapu a sani di Yesus taki, namku taki wi hemel Tata sabi san wi e du, èn taki Gado sa sorgu gi wi solanga wi e suku a Kownukondre nanga Gado en regtfardikifasi fosi. A sani disi sa yepi wi fu no si gudu leki den moro prenspari sani na ini a libi, aladi wi e poti yeye afersi na wan sei.—Mateyus 6:19-34.

Den „de leki beibi te a abi fu du nanga ogridu”

Aladi yongu pikin gebore na ini sondu, toku den abi wan krin ati nanga wan krin denki. Na fu a sani disi ede meki Bijbel e gi Kresten a rai disi: „De leki beibi te a abi fu du nanga ogridu.”—1 Korentesma 14:20.

Luku na eksempre disi: Monique di abi feifi yari, ben e prisiri fu taigi en mama: „Sara, a nyun mati fu mi, en wiwiri krorukroru neleki di fu mi!” Monique no ben taki fu Sara en skin di abi wan tra kloru, èn a no taki tu dati Sara de fu wan tra ras. Wan mama e taki: „Pikin-nengre no e luku fu sortu ras wan sma de. Gi pikin-nengre, ala sma na a srefi, èn den no e denki takru fu tra sma.” Te a abi fu du nanga a tori disi, dan pikin-nengre e sori na wan heri moi fasi fa wi Gado e denki, fu di Gado no lobi a wan sma moro a trawan, ma a lobi ala sortu sma .—Tori fu den Apostel 10:34, 35.

Pikin-nengre no e hori trawan na ati tu. Wan papa e taki: „Te den pikin boi fu wi, Jack nanga Levi, e feti èn wi e taigi den fu aksi makandra pardon, dan syatu baka dati yu kan si fa den e prisiri fu prei baka nanga makandra. Den no e tan nanga atibron, den no e taki baka fu a sani di ben pasa, èn den no e fruwakti sani fu makandra fosi den e gi makandra pardon. Den e libi a sani, èn den e prei go doro.” A sani disi na wan moi eksempre di bigisma kan teki!—Kolosesma 3:13.

Boiti dati, pikin-nengre de klariklari fu bribi taki Gado de trutru (Hebrewsma 11:6). Fu di den gwenti fu taki krin san de na tapu den ati, meki den no frede fu gi kotoigi na trawan (2 Kownu 5:2, 3). Na opregti fasi fa den e taki sani te den e begi, kan naki srefi na ati fu sma di no abi firi gi trawan. Èn te sma e dwengi den fu du sani di no bun, dan den man sori taki den abi a fasti bosroiti fu tan du san bun. Iya, pikin-nengre na wan warti presenti trutru!—Psalm 127:3, 4.

Bigisma kan kon abi den moi fasi disi baka

Kande yu e aksi yusrefi: ’Bigisma kan kon abi den moi fasi disi baka di pikin-nengre abi?’ Iya, dati kan! A komando di Yesus gi wi fu „tron leki yongu pikin”, e sori taki bigisma kan kon abi den fasi disi.—Mateyus 18:3.

Luku na eksempre disi: Kande wan grupu sma di abi a wroko fu meki moimoi sani kon bun baka, e du san de fanowdu fu meki wan bun diri prenki kon bun baka. Den e puru ala doti di kon de na tapu a prenki disi, èn den e seti den pisi moro bun di tra sma ben pruberi kaba fu meki. Baka te den wrokoman disi wroko nanga ala pasensi, dan a prenki e kon kisi en moi kloru baka, so taki ala sma kan si fa a moi. Na so a de tu taki nanga yepi fu a santa yeye fu Yehovah èn a Kresten gemeente, wi kan kisi den moi fasi baka di wi ben abi di wi ben de pikin-nengre, te wi e tan meki muiti fu kon abi den.—Efeisesma 5:1.

[Prenki na tapu bladzijde 9]

Pikin-nengre abi sakafasi

[Prenki na tapu bladzijde 10]

Yongu pikin no e denki takru fu tra sma, èn den de gaw fu gi trawan pardon èn fu frigiti san ben pasa