Tan kisi moro warderi
Tan kisi moro warderi
„Den prakseri fu yu warti trutru gi mi! O Gado, a moro bigi nomru fu den, bigi srefisrefi!”—PSALM 139:17.
1, 2. Fu san ede wi musu abi warderi gi a Wortu fu Gado, èn fa a psalm skrifiman ben sori taki a ben abi warderi gi dati?
DEN ben feni wan tumusi moi sani. Di sma ben e meki Yehovah en tempel na ini Yerusalem kon bun baka, dan Granpriester Helkia feni „a buku fu den wet fu Yehovah di Moses ben skrifi”. A no de fu taki dati disi ben de a buku di ben skrifi na a bigin, sowan 800 yari bifo! Yu kan frustan taki Kownu Yosia di ben abi frede gi Yehovah, ben breiti di den tyari a buku dati gi en, a no so? Iya, Yosia ben de nanga tangi taki a ben abi a buku disi, èn wantewante a meki Safan, a sekretarsi, leisi en nanga tranga sten.—2 Kroniki 34:14-18.
2 Na ini a ten disi, milyunmilyun sma man leisi a Wortu fu Gado, efu dati na a heri Bijbel, noso wan pisi fu en. A sani disi wani taki dati Bijbel no de so prenspari? Nôno, kwetikweti. Fu taki en leti, Bijbel abi den prakseri fu na Almaktiwan na ini, èn den prakseri disi skrifi fu a bun fu wi (2 Timoteyus 3:16). A psalm skrifiman David ben skrifi fa a ben feni a Wortu fu Gado: „Den prakseri fu yu warti trutru gi mi! O Gado, a moro bigi nomru fu den, bigi srefisrefi!”—Psalm 139:17.
3. San e sori taki David ben e frustan san a wani taki fu anbegi Gado?
3 David ben tan abi warderi gi Yehovah, gi a Wortu fu En, èn gi den sani di Yehovah seti gi a tru anbegi. Den furu moi psalm di David skrifi e sori fa a ben feni den sani dati. Fu eksempre, na ini Psalm 27:4 a ben skrifi: „Wán sani mi aksi Yehovah, èn na dati mi sa suku, namku taki mi kan tan na ini na oso fu Yehovah ala den dei fu mi libi, fu si fa Yehovah bun, èn fu warderi a tempel fu en.” Na ini a Hebrewtongo fu fositen, den wortu „fu warderi” wani taki fu denki dipi fu Gado Wortu, fu ondrosuku en finifini, fu kisi prisiri fu en, èn fu abi warderi gi en. A de krin fu si taki David ben de wan man di ben e frustan san a wani taki fu anbegi Gado, a ben abi warderi gi den sani di Yehovah ben e gi fu tranga a bribi fu en, èn a no de fu taki dati a ben e nyan bun fu ibriwan fu den tru tori di Gado tyari kon na krin. A ben o bun efu wi ben o abi so furu warderi tu gi a Wortu fu Gado, neleki David.—Psalm 19:7-11.
De nanga tangi taki yu sabi den tru tori fu Bijbel
4. San meki taki Yesus „prisiri pasa marki nanga yepi fu a santa yeye”?
4 A no de so taki wan sma musu kisi furu skoroleri fu man frustan Gado Wortu, bika nofo tron a koni dati e meki wan sma kisi bigi fasi. Na presi fu dati, a sani di wan sma musu abi, na a no-frudini bun-ati fu Yehovah, èn A e gi dati na opregtisma di abi sakafasi èn di sabi taki den de na nowtu na yeye fasi (Mateyus 5:3; 1 Yohanes 5:20). Di Yesus ben e denki dipi fu a grani di son Kresten abi taki a nen fu den skrifi na ini hemel, dan „a prisiri pasa marki nanga yepi fu a santa yeye, èn a taki: ’Mi e prèise yu na fesi ala sma, mi Tata, Masra fu hemel nanga grontapu, bika yu kibri den sani disi bun gi den koniman nanga den sabiman, ma yu meki den nyofiwan kon sabi disi.’”—Lukas 10:17-21.
5. Fu san ede den disipel fu Yesus no ben musu si en leki wan lawlaw sani taki den ben kon sabi den tru tori fu a Kownukondre?
5 Di Yesus kaba taki den wortu dati, dan a luku den disipel fu en èn a taigi den: „Koloku fu den ai di si den sani disi di unu e si. Bika mi e taigi unu: Furu profeiti nanga kownu ben wani si den sani di unu e si, ma den no si den, èn den ben wani yere den sani di unu e yere, ma den no yere den.” Iya, Yesus taigi den getrow bakaman fu en fu no si en leki wan lawlaw sani taki den ben kon sabi den prenspari tru tori fu a Kownukondre. Den fositen futuboi fu Gado no ben kon sabi den tru tori disi, èn a no de fu taki dati „den koniman nanga den sabiman” fu a ten fu Yesus no ben kon sabi den sani disi!—Lukas 10:23, 24.
6, 7. (a) Sortu reide wi abi fu warderi den tru tori fu Gado? (b) San na a difrenti na mindri a tru bribi nanga falsi bribi na ini a ten disi?
6 Na ini a ten disi wi abi moro reide srefi fu warderi den tru tori fu Gado, fu di Yehovah e meki a pipel fu en kon frustan a Wortu fu en moro bun srefi, èn a e du dati nanga yepi fu „a getrow èn koni srafu” (Mateyus 24:45; Danièl 12:10). Disi na san a profeiti Danièl ben taki fu a ten fu a kaba: „Furu sma sa go-kon, èn a tru sabi o lai srefisrefi” (Danièl 12:4). Yu no feni taki a sabi fu Gado „kon lai srefisrefi” na ini a ten disi, èn taki den futuboi fu Yehovah e kisi bogobogo yeye nyanyan?
7 Tra fasi leki a pipel fu Gado di e kisi bogobogo yeye nyanyan, den tra kerki fu Babilon a Bigiwan e leri sma sani di e bruya den! Leki bakapisi fu dati, furu sma kon na ini a tru anbegi fu di den sani di falsi kerki e leri kori den, èn fu di den e tegu gi den leri dati. Den sma disi di de leki skapu, „no wani abi prati nanga [Babilon a Bigiwan] na den sondu fu en” èn den ’no wani taki den rampu fu en kon na den tapu’. Yehovah nanga den futuboi fu en e gi ala den sma disi wan kari fu kon na ini a tru Kresten gemeente.—Openbaring 18:2-4; 22:17.
Furu sma di abi warderi e kon na Gado
8, 9. Fa den wortu na ini Hagai 2:7 e kon tru na ini a ten disi?
8 Disi na san Yehovah taki fu na anbegi fu en: „Mi sa seki ala den pipel, èn den warti sani fu ala den pipel musu kon na ini; èn mi sa furu na oso disi nanga glori” (Hagai 2:7). A tumusi moi profeititori disi kon tru na ini a ten fu Hagai, di wan fikapisi fu a pipel fu Gado drai go baka na Yerusalem fu meki a tempel baka. Sosrefi na ini a ten disi, den wortu fu Hagai e kon tru fu di moro nanga moro sma e teki prati na a anbegi fu Yehovah.
9 Milyunmilyun sma go kaba na ini na agersi tempel fu anbegi Gado „nanga yeye èn nanga waarheid”, èn ibri yari dusundusun fu „den warti sani fu ala den pipel” e tan kon na ini na ini a tempel disi (Yohanes 4:23, 24). Fu eksempre, a raportu fu a dienstyari 2006 e sori taki 248.327 sma teki dopu fu sori taki den gi den libi abra na Yehovah. Dati na sowan 680 sma ibri dei! A lobi di den abi gi a tru anbegi èn a winsi di den abi fu dini Yehovah leki Kownukondre preikiman, e sori taki Gado hari den kon trutru.—Yohanes 6:44, 65.
10, 11. Fruteri wan ondrofenitori di e sori fa sma kon kisi warderi gi den tru tori fu Bijbel.
10 Furu fu den opregti sma disi kon lobi a tru anbegi, fu di den kon si krin san na a „difrenti na mindri wan regtfardiki sma nanga wan ogri sma, na mindri wan sma di e dini Gado nanga wan sma di no dini en” (Maleaki 3:18). Luku na ondrofenitori fu Wayne nanga Virginia, wan trowpaar di ben de na ini wan Protestant kerki. Den sma disi no ben kisi bun piki tapu wan lo fu den aksi di abi fu du nanga a bribi fu den. Den ben e tegu gi orloku èn den no ben man bribi di den si taki kerki fesiman ben e blesi srudati èn sosrefi den fetisani fu den. Di den tu sma disi kon moro owru, den ben feni taki den sma na ini a kerki fu den no ben e poti prakseri na den, aladi Virginia ben e gi leri wan tu yari langa na a sonde-skoro fu a kerki. „Nowan sma ben e kon luku wi èn nowan sma ben e kon luku efu a bribi fu wi ben tranga ete”, na so den tu sma disi taki. „A wan-enkri sani di a kerki ben wani, na a moni fu wi. Wi no ben sabi san fu du.” Den tu sma disi ben brokosaka moro srefi di a kerki ben e feni en bun taki sma e libi wan homo-sekslibi.
11 Na a srefi ten, na umapikin nanga a granpikin fu Wayne nanga Virginia kon tron Yehovah Kotoigi. Aladi Wayne nanga Virginia no ben lobi a sani disi na a bigin, toku den kon kisi wan heri tra denki fu sani bakaten, èn den agri fu studeri Bijbel. Wayne ben taki: „Na ini dri mun nomo wi leri moro fu Bijbel leki san wi leri na ini den 70 yari di pasa! Noiti wi ben sabi taki a nen fu Gado na Yehovah, èn wi no ben sabi noti fu a Kownukondre noso fu a Paradijs di o de na grontapu.” Fosi yu denki, na opregti trowpaar disi bigin go na den Kresten konmakandra èn den bigin teki prati na a preikiwroko. Virginia e taki: „Wi wani fruteri ala sma fu a tru anbegi.” Den tu sma disi di pasa 80 yari kaba, teki dopu na ini 2005. „Wi feni wan tru Kresten famiri”, na so den taki.
Wi musu de nanga tangi taki wi de „srekasreka fu du ibri bun wroko”
12. San Yehovah e gi den futuboi fu en ala ten, èn san wi musu du fu kisi wini fu den sani dati?
12 Ala ten Yehovah e yepi den futuboi fu en fu du a wani fu en. Fu eksempre, Yehovah ben taigi Noa finifini fa a ben musu bow na ark, èn a ben musu du a wroko dati bun! Èn na dati pasa. Fu san ede? Fu di Noa „du ala san Gado taigi en fu du. Leti so a ben du” (Genesis 6:14-22). Sosrefi na ini a ten disi, Yehovah e gi den futuboi fu en ala san den abi fanowdu fu du a wani fu en. A no de fu taki dati a moro prenspari wroko fu wi na fu preiki a bun nyunsu fu a Kownukondre di seti èn fu yepi reti-atisma tron disipel fu Yesus Krestes. Neleki Noa, wi musu gi yesi na Gado efu wi wani taki sani waka bun gi wi. Wi musu gi yesi na den rai di Yehovah e gi nanga yepi fu en Wortu èn en organisâsi.—Mateyus 24:14; 28:19, 20.
13. Na sortu fasi Yehovah e gi wi leri?
13 Te wi wani du a wroko fu wi bun, dan wi musu leri fu gebroiki a moro prenspari wrokosani di wi abi, namku a Wortu fu Gado, na ’wan reti fasi’, fu di a Wortu dati „bun fu gi leri, fu frumane sma, fu poti sani kon reti, fu gi trangaleri na wan regtfardiki fasi, so taki a sma di de fu Gado kan kon bun dorodoro èn de srekasreka fu du ibri bun wroko” (2 Timoteyus 2:15; 3:16, 17). Neleki fa a ben de na ini a fosi yarihondro, na so Yehovah e gi wi leri nanga yepi fu a Kresten gemeente. Na ini a ten disi, a Theokrasia Diniwroko-skoro nanga a Diniwroko Konmakandra e hori ibri wiki na ini den 99.770 gemeente di de na heri grontapu, èn den konmakandra disi e yepi wi fu du a preikiwroko moro bun. Yu e sori warderi gi den prenspari konmakandra disi? Yu e go na den konmakandra dati doronomo èn yu e fiti den sani di yu e leri drape?—Hebrewsma 10:24, 25.
14. Fa den futuboi fu Yehovah e sori warderi gi a grani di den abi fu dini Gado? (Taki sosrefi fu a raportu na tapu bladzijde 27-30).
14 Milyunmilyun fu den futuboi fu Gado na heri grontapu e sori warderi gi a leri di den e kisi fu di den e du ala san den man na ini a preikiwroko. Fu eksempre, na ini a dienstyari 2006, dan 6.741.444 Kownukondre preikiman preiki ala nanga ala 1.333.966.199 yuru èn den du dati na difrenti fasi. Wan fu den fasi dati na a hori di den hori 6.286.618 oso-bijbelstudie. Disi na wan tu fu den moi sani di skrifi na ini a raportu fu a diniwroko di e du na heri grontapu. Grantangi luku a raportu disi èn meki a gi yu deki-ati, neleki fa den brada fu wi fu a fosi yarihondro ben kisi furu deki-ati di den yere fa a preikiwroko ben e go na fesi na ini a ten dati.—Tori fu den Apostel 1:15; 2:5-11, 41, 47; 4:4; 6:7.
15. Fu san ede nowan sma musu firi brokosaka te a sabi taki a e dini Yehovah nanga en heri ati?
15 A prèise di Yehovah e kisi bogobogo ibri yari, e sori taki den futuboi fu en e warderi en trutru taki den sabi en èn taki den kan gi kotoigi fu en (Yesaya 43:10). Iya, na ofrandi di sonwan fu den owru noso siki brada nanga sisa fu wi e tyari, namku a prèise di den e prèise Yehovah, de leki den tu sensi di na uma di lasi en masra na ini dede ben gi. Ma meki wi no frigiti taki Yehovah nanga en Manpikin trutru e warderi ala den sma di e dini Gado nanga den heri ati, fu di den e du ala san den man du.—Lukas 21:1-4; Galasiasma 6:4.
16. Sortu yepisani Gado gi wi na ini a ten di pasa, so taki wi kan gi sma leri?
16 Boiti taki Yehovah e leri wi fa fu du a diniwroko, a e gi wi tumusi bun yepisani di wi kan gebroiki fu gi sma leri, èn a e du dati nanga yepi fu na organisasi fu en. Na ini den yari di pasa, wi kisi den buku De waarheid die tot eeuwig leven leidt, Joe kan libi foe têgo na ini wan paradijs na grontapoe, Sabi di e tjari joe go na têgo libi, èn no langa pasa wi kisi a buku San Bijbel e leri wi trutru? Den sma di trutru e warderi den sani disi e gebroiki den na ini a diniwroko.
Gebroiki a Bijbel Leri-buku
17, 18. (a) Na sortu pisi fu a Bijbel leri-buku yu lobi fu poti prakseri na ini a diniwroko fu yu? (b) San wan kring-opziener ben taki fu a Bijbel leri-buku?
17 A buku San Bijbel e leri wi trutru? abi 19 kapitel, boiti dati a abi wan pisi na ini di e taki finifini fu prenspari sani, èn a skrifi na wan makriki fasi. A buku disi de wan heri bun yepisani na ini a preikiwroko. Fu eksempre, kapitel 12 e taki fu a tori „Fa fu libi na wan fasi di e plisi Gado”. A kapitel disi e sori a studenti fa a kan tron wan mati fu Gado. Furu sma no poti prakseri na a tori dati srefi, noso den feni taki a sani dati no kan (Yakobus 2:23). Fa sma e feni en fu studeri a buku disi?
18 Wan kring-opziener na ini Australia skrifi taki a Bijbel leri-buku e meki taki „ososma wani hori wan takimakandra nanga wi wantewante”. A e taki moro fara taki a makriki so te fu gebroiki a buku disi taki „a gi furu Kownukondre preikiman deki-ati nanga prisiri baka fu du a diniwroko. Fu dati ede a no e fruwondru wi taki son sma feni taki a buku disi warti leki gowtu!”
19-21. Fruteri wan tu ondrofenitori di e sori taki a Bijbel leri-buku e yepi sma trutru?
19 „A musu fu de so taki Gado seni yu”, na so wan uma na ini Gayana ben taki di wan pionier naki na en doro. No so langa pasa, a man di na uma ben libi nanga en, gowe libi en nanga den tu yongu pikin fu den. A pionier opo a Bijbel leri-buku na kapitel 1, na a ondro edeprakseri „Fa Gado e prakseri fu ala kruktudu di wi e ondrofeni?”, èn a leisi paragraaf 11 gi na uma. „Den sani dati naki na ati fu na uma trutru”, na so a pionier taki. „Fu taki en leti, na uma no ben man hori ensrefi, èn fu dati ede a opo go na bakasei fu a wenkri fu en fu krei langalanga watra-ai.” Na uma disi bigin studeri Bijbel doronomo nanga wan sisa fu a kontren drape, èn a e tan go na fesi na yeye fasi.
20 José e libi na ini Spanyorokondre, èn a wefi fu en kon lasi libi leki bakapisi fu wan ongoloku di ben pasa na strati. Fu di a man disi ben e suku trowstu, meki a bigin gebroiki drugs, èn a go suku yepi tu na wan datra. Ma a datra no ben man gi piki tapu a moro prenspari aksi di ben e trobi José, namku: „Fu san ede Gado gi pasi taki a wefi fu mi dede?” Wan dei José miti Francesc di ben e wroko na a srefi presi leki en. Francesc aksi en efu a wani abi wan takimakandra nanga en fu kapitel 11 fu a Bijbel leri-buku, èn a kapitel disi nen „Fu san ede Gado e gi pasi taki libisma e pina?” Den tori di tyari kon na krin nanga yepi fu Bijbel èn na agersitori fu wan leriman nanga wan studenti, naki na ati fu José trutru. José bigin studeri fayafaya, a go na wan kring konmakandra, èn now a e go na den konmakandra na a Kownukondre zaal drape.
21 Roman, wan bisnisman fu 40 yari di e libi na ini Polen, ala ten ben abi lespeki gi Gado Wortu. Ma fu di a wroko fu en e teki furu fu en ten, meki a go na fesi pikinso nomo nanga a bijbelstudie fu en. Ma toku, a go na wan distrikt kongres èn drape a kisi wan Bijbel leri-buku. Bakaten, a bigin si a bijbelstudie fu en leki wan prenspari sani. A e taki: „Nanga yepi fu a buku disi mi e kon frustan ala den prenspari leri fu Bijbel safrisafri.” Now Roman e studeri Bijbel doronomo èn a e go na fesi moi.
Tan kisi moro warderi
22, 23. Fa wi kan tan sori warderi gi a howpu di wi abi?
22 Soleki fa a kon na krin na a tumusi moi Distrikt Kongres di nen „Frulusu de krosibei!”, dan tru Kresten e angri fu kisi a „têgo frulusu” di Gado pramisi den èn di den sa kisi nanga yepi fu a brudu di Yesus Krestes trowe. A moro bun fasi fa wi kan sori trutru warderi gi a tumusi moi howpu disi, na fu sorgu taki wi tan krin wisrefi fu ’sani di e tyari dede kon, so taki wi kan du santa diniwroko gi a libi Gado’.—Hebrewsma 9:12, 14.
23 Iya, a de wan wondru trutru taki moro leki siksi milyun Kownukondre preikiman e tan horidoro na wan getrow fasi na ini a diniwroko fu Gado, aladi bun furu sma na den lontu e denki densrefi nomo. A sani disi e sori sosrefi taki den futuboi fu Yehovah trutru e warderi a grani di den abi fu dini Gado, fu di den sabi taki ’a wroko di den e du gi Masra no de fu soso’. Meki a de so taki wi e tan kisi moro warderi gi dati!—1 Korentesma 15:58; Psalm 110:3.
San yu ben sa piki?
• San wi kan leri fu a fasi fa a psalm skrifiman ben e sori warderi gi Gado èn gi den sani di A gi fu tranga a bribi fu wi?
• Fa den wortu fu Hagai 2:7 e kon tru na ini a ten disi?
• Sortu sani Yehovah gi den futuboi fu en so taki den kan dini en na a yoisti fasi?
• San yu kan du fu sori warderi gi a bun-ati fu Yehovah?
[Aksi fu a tori disi]
[Raportu na tapu bladzijde 27-30]
2006 DINIWROKO RAPORTU FU YEHOVAH KOTOIGI NA HERI GRONTAPU
(Luku a tijdschrift)
[Prenki na tapu bladzijde 25]
Yehovah e gi wi ala san wi abi fanowdu fu du a wani fu en