Yehovah na wan Gado di abi warderi

„Gado no de onregtfardiki taki a sa frigiti den wroko fu unu èn taki a sa frigiti a lobi di unu sori gi a nen fu en.”​—HEBREWSMA 6:10.

1. Fa Yehovah sori taki a abi warderi gi Rut, wan uma di ben de fu a kondre Moab?

YEHOVAH abi bigi warderi gi a muiti di opregtisma e meki fu du a wani fu en, èn a e blesi den bogobogo (Hebrewsma 11:6). A getrow man Boas ben sabi taki Gado abi a tumusi moi fasi disi. Wi kan si dati te wi e luku san a ben taigi Rut, wan uma di ben de fu a kondre Moab. Na uma disi ben sorgu na wan lobi-ati fasi gi a mama fu en masra, namku Naomi di ben lasi en masra na ini dede. Boas ben taigi en: „Meki Yehovah pai yu fu den sani di yu du, èn meki a de so taki yu kisi blesi fu Yehovah” (Rut 2:12). Gado ben blesi Rut? Iya, seiker. Fu taki en leti, a tori fu Rut skrifi na ini Bijbel! Boiti dati, Rut trow nanga Boas èn a tron wan afo fu Kownu David èn fu Yesus Krestes (Rut 4:13, 17; Mateyus 1:5, 6, 16). Disi na wán fu den someni eksempre na ini Bijbel di e sori taki Yehovah abi warderi gi den futuboi fu en.

2, 3 (a) Fu san ede a de wan tumusi moi sani taki Yehovah e sori warderi gi den futuboi fu en? (b) Fu san ede Yehovah man sori trutru warderi gi den futuboi fu en? Gi wan eksempre fu dati.

² Gi Yehovah, a ben o de wan onregtfardiki sani fu no abi warderi gi den futuboi fu en. Hebrewsma 6:10 e taki: „Gado no de onregtfardiki taki a sa frigiti den wroko fu unu èn taki a sa frigiti a lobi di unu sori gi a nen fu en, fu di unu ben dini den santawan èn unu e tan dini den te now ete.” Den wortu disi na tumusi moi wortu, fu di den e sori wi taki Gado abi warderi gi sma di e dini en na wan getrow fasi, aladi den na sondu sma di no e doro a glori fu en.—Romesma 3:23.

³ Fu di wi na sondu sma, meki wi kan feni taki wi no e du nofo fu sori Gado taki wi lobi en, èn wi kan feni tu taki wi no e frudini en taki Gado blesi wi. Ma Yehovah e frustan taki wi e du ala san wi man fu tan getrow na en, èn a sabi na ini sortu situwâsi wi de. Boiti dati, a abi trutru warderi gi a diniwroko di wi e du nanga wi heri ati (Mateyus 22:37). Fu eksempre, kon meki wi taki dati wan mama feni wan kado na tapu tafra, namku wan bunkopu keti. A ben kan si a kado disi leki wan lawlaw sani, èn a ben kan poti en na wan sei. Ma a karta di de na a kado e sori taki na a pikin meisje fu en gi en a kado disi, èn a meisje gebroiki ala a moni di a ben poti na wan sei fu bai a kado. Now a mama e warderi a kado. Kande a e krei te a e brasa a meisje fu en fu sori en taki a e warderi a kado trutru.

4, 5. Fa Yesus sori warderi neleki fa Yehovah e du dati?

⁴ Fu di Yehovah sabi taki wi e dini en na wan opregti fasi èn fu di a sabi tu taki wi abi swakifasi, meki a e warderi en te wi e du ala san  wi man fu dini en, awansi dati no furu. Te a abi fu du nanga a tori disi, dan Yesus ben de soifri leki en Tata. Prakseri a Bijbel tori fu na uma di lasi en masra na ini dede èn di ben poti tu sensi na ini a monikisi. „Yesus opo en ai luku èn a si fa den guduman ben e poti moni na ini den monikisi. Ne a si fa wan pôti uma di ben lasi en masra na ini dede poti tu sensi di no ben warti furu, na ini a kisi; fu dati ede Yesus taki: ’Fu tru, mi e taigi unu: Aladi na uma disi pôti, toku a poti moro leki ala den sma disi. Bika ala den sma disi poti san ben tan abra fu a moni fu den, ma aladi na uma disi ben pôti, toku a teki ala san a ben abi fu sorgu ensrefi, èn a poti en na ini a kisi.’”—Lukas 21:1-4.

⁵ Iya, fu di Yesus ben sabi a situwâsi fu na uma, namku taki a ben de wan pôti uma di lasi en masra na ini dede, meki a ben frustan taki na uma ben gi a moni nanga en heri ati, èn fu dati ede Yesus ben abi trutru warderi gi en. Wi kan taki a srefi fu Yehovah (Yohanes 14:9). Iya, a Gado fu wi di abi warderi, èn a Manpikin fu en, kan feni yu bun awansi na ini sortu situwâsi yu de. A sani dati e gi yu deki-ati, a no so?

Yehovah e blesi wan Etiopiaman di ben abi frede gi en

6, 7. Fu san ede Yehovah sori warderi gi Ebed-meilèk, èn fa a du dati?

⁶ Furu tori na ini Bijbel e sori taki Yehovah abi warderi trutru gi den sma di e du a wani fu en. Luku fa a ben handri nanga na Etiopiaman Ebed-meilèk di ben abi frede gi en. A man disi ben e libi na ini a ten fu Yeremia èn a ben e wroko gi a kownu fu Yuda, namku Kownu Sedekia di no ben de getrow. Ebed-meilèk ben kon sabi taki den granman fu Yuda ben taki dati a profeiti Yeremia ben opo ensrefi teige a kownu, aladi dati no ben tru, èn den ben trowe Yeremia na ini wan peti fu dede fu angri (Yeremia 38:1-7). Ebed-meilèk ben sabi taki sma no ben lobi Yeremia kwetikweti fu a boskopu ede di a ben preiki, ma toku a go suku yepi na a kownu aladi ogri ben kan miti en. Na Etiopiaman ben taki sondro fu frede: „O mi kownu, den man  disi du furu takru sani nanga a profeiti Yeremia di den trowe na ini a peti, fu dede drape fu angri.” Ebed-meilèk gi yesi na a komando fu a kownu, èn a teki 30 man fu go puru a profeiti fu Gado na ini a peti.—Yeremia 38:8-13.

⁷ Yehovah ben si taki Ebed-meilèk ben abi bribi, èn a bribi dati yepi en fu no frede gi sma. Sobun, Yehovah sori taki a ben abi warderi gi Ebed-meilèk èn a meki Yeremia taigi en: „Luku mi e meki den wortu di mi ben taki fu a foto disi, kon tru, so taki a foto disi kisi pori èn so taki sani no waka bun nanga en . . . Èn mi sa frulusu yu a dei dati, . . . èn den man di yu e frede, no sa wini yu. Bika mi sa frulusu yu seiker . . . èn yu sa tan na libi seiker fu di yu poti yu frutrow na mi tapu” (Yeremia 39:16-18). Iya, Yehovah frulusu Ebed-meilèk nanga Yeremia fu den ogri granman fu Yuda, èn bakaten a frulusu den fu den Babilonsma di pori Yerusalem. „[Yehovah] e kibri a sili fu den loyaalwan fu en; fu na anu fu na ogriwan a e frulusu den”, na so Psalm 97:10 e taki.

„Yu Tata di e si ala sani, sa pai yu baka”

8, 9. Sortu begi Yehovah e warderi, soleki fa Yesus ben sori?

⁸ Wan tra sani di e sori taki Yehovah abi warderi gi wi fu di wi e sori en taki wi lobi en, na a sani di Bijbel e taki fu begi. „A begi fu den opregtiwan e plisi [Gado]”, na so wan koniman ben taki (Odo 15:8). Na ini a ten fu Yesus, furu kerki fesiman ben e begi na presi pe furu sma ben kan si den. Den no ben e du dati fu di den ben abi trutru bribi, ma den ben du dati fu sma ai. Yesus ben taki: „Den kisi den pai krinkrin kaba.” Yesus ben gi den bakaman fu en a rai disi: „Ma te yu e begi, dan go na ini yu kamra, èn baka te yu tapu yu doro, begi yu Tata di sma no man si; dan yu Tata di e si ala sani, sa pai yu baka.”—Mateyus 6:5, 6.

⁹ A no de fu taki dati Yesus no ben e krutu a begi di sma e begi na publiki, bika ensrefi ben begi na publiki son leisi (Lukas 9:16). Yehovah e warderi en trutru te wi e begi en nanga wan opregti ati, sondro taki wi e du dati fu sma ai. Fu taki en leti, te wi e begi te wi de wi wawan, dan dati na wan bun fasi fu sori o tranga wi lobi Gado èn o tranga wi e frutrow na en tapu. Fu dati ede, a no e fruwondru wi taki nofo tron Yesus ben e suku wan presi pe a ben kan de en wawan fu begi. Wan leisi a ben begi „frukufruku mamanten di a ben dungru ete”. Wan tra leisi „en wawan kren na tapu a bergi fu go begi”. Èn fosi Yesus ben teki den 12 apostel fu en, a ben begi en wawan a heri neti.—Markus 1:35; Mateyus 14:23; Lukas 6:12, 13.

10. Sortu dyaranti wi kan abi te wi e begi na wan fasi di e sori taki wi wani plisi Gado nanga wi heri ati?

¹⁰ Prakseri fa Yehovah ben e arki nanga ala en prakseri di en Manpikin ben e begi nanga en heri ati! Iya, son leisi te Yesus ben e begi „a ben e bari tranga, èn a ben e krei watra-ai, èn na fu di a ben frede Gado, meki Gado arki a begi fu en” (Hebrewsma 5:7; Lukas 22:41-44). Te wi e begi tu na wan fasi di e sori taki wi wani plisi Gado nanga wi heri ati, dan wi kan abi a dyaranti taki wi hemel Tata e arki nanga ala en prakseri èn taki a abi warderi gi wi. Iya, „Yehovah de krosibei fu ala den wan . . . di e kari en nanga wan krin ati”.—Psalm 145:18.

11. Fa Yehovah e si den sani di wi e du te wi de wi wawan?

¹¹ Efu Yehovah e warderi en te wi e begi en na ten te wi de wi wawan, dan a no de fu taki dati a e warderi en tu te wi e gi yesi na en te wi de wi wawan! Iya, Yehovah e si san wi e du te wi de wi wawan (1 Petrus 3:12). Fu tru, te wi de getrow èn te wi e gi yesi na ten te wi de wi wawan, dan dati e sori krin taki wi e dini Yehovah nanga wi „heri ati”, iya, a e sori taki wi e dini en nanga wan krin ati èn taki wi sa tan du san bun (1 Kroniki 28:9). Te wi e tyari wisrefi na so wan fasi, dan dati e meki Yehovah en ati prisiri fu tru!—Odo 27:11; 1 Yohanes 3:22.

12, 13. San wi kan du fu sorgu taki noti no e pori a denki nanga na ati fu wi, so taki wi kan de leki a getrow disipel Natanael?

¹² Fu dati ede, getrow Kresten e luku bun fu  no du sondu na wan kibri fasi, iya, den no e luku felem noso prenki di abi fu du nanga doti sekstori noso nanga ogridu, fu di den sani disi kan pori a denki nanga na ati fu den. Aladi wan sma kan du son sondu sondro taki trawan sabi dati, toku wi e frustan taki „den ai fu a sma di wi musu gi frantwortu, e si ala sani krin èn nowan sani kibri gi en” (Hebrewsma 4:13; Lukas 8:17). Te wi e meki muiti fu wai pasi gi sani di Yehovah no feni bun, dan wi sa abi wan krin konsensi èn wi sa prisiri fu di wi sabi taki Gado feni wi bun. Iya, tweifri no de taki trutru Yehovah e warderi a sma „di e waka sondro fowtu, di e du retidu, èn di e taki san tru na ini en ati”.—Psalm 15:1, 2.

¹³ Ma san wi kan du fu sorgu taki noti no e pori a denki nanga na ati fu wi aladi wi e libi na ini wan grontapu di lai nanga ogridu? (Odo 4:23; Efeisesma 2:2) Boiti taki wi musu gebroiki ala den sani di Yehovah gi wi fu tranga a bribi fu wi, wi musu meki tranga muiti tu fu wai pasi gi ogri èn fu du san bun. Iya, te wi e si taki wi abi takru lostu, dan wi musu handri wantewante fu sorgu taki a lostu dati no e kon lepi so taki a e meki wi sondu (Yakobus 1:14, 15). Prakseri fa yu ben o breiti efu Yesus ben taki fu yu san a ben taki fu Natanael. Yesus ben taki: „Luku! A man disi . . . no e bedrigi sma” (Yohanes 1:47). Natanael, di sma ben kari Bartolomeyus tu, kisi a grani bakaten fu tron wán fu den 12 apostel fu Yesus.—Markus 3:16-19.

„Wan granpriester di abi sari-ati èn di de getrow”

14. Fa Yesus ben e denki tra fasi fu a sani di Maria du?

¹⁴ Fu di Yesus na „a prenki fu a Gado [Yehovah] di sma no man si”, meki ala ten a e handri soifri leki en Tata, fu di a e sori warderi gi den sma di e dini Gado nanga wan krin ati (Kolosesma 1:15). Fu eksempre, feifi dei bifo Yesus gi en libi fu a bun fu sma, dan en nanga wan tu fu den disipel fu en ben de na a oso fu Simon fu Betania. Na mofoneti, Maria, a sisa fu Lasarus nanga Marta, „teki so wan afu liter switismeri oli; a ben de trutru nardus-oli di ben diri srefisrefi” (a ben abi pikinmoro a waarde fu a moni di wan sma e wroko na ini wán yari), èn a kanti na oli dati na tapu Yesus en ede nanga en futu (Yohanes 12:3). Sonwan fu den disipel ben taki: „Fu san ede a e frumorsu na oli so?” Ma Yesus ben denki heri tra fasi fu a sani di Maria du. Yesus ben feni taki Maria ben sori trutru switifasi èn taki a ben du wan tumusi prenspari sani sosrefi, bika syatu baka dati Yesus ben o dede èn sma ben o beri en. Fu dati ede, Yesus no krutu Maria, ma na presi fu dati a gi en grani. Yesus ben taki: „Na ala sei fu grontapu pe sma o preiki a bun nyunsu disi, den o fruteri tu san na uma disi du, so taki sma kan memre en.”—Mateyus 26:6-13.

15, 16. Fa a de wan wini gi wi taki Yesus dini Gado leki libisma?

¹⁵ A de wan grani trutru taki wan sma leki Yesus, di abi so furu warderi gi trawan, na wi Fesiman! Fu taki en leti, di Yesus ben de wan libisma, dan a libi fu en sreka en gi a wroko di Yehovah ben o gi en. Iya, a ben o dini leki Granpriester nanga Kownu fu a gemeente fu salfuwan fosi, èn baka dati leki Granpriester nanga Kownu fu grontapu.—Kolosesma 1:13; Hebrewsma 7:26; Openbaring 11:15.

¹⁶ Bifo Yesus kon na grontapu, a ben poti bun furu prakseri kaba na libisma èn a ben lobi den trutru (Odo 8:31). Fu di a ben tron wan libisma, meki a kon frustan moro bun sortu tesi wi e kisi fu di wi e dini Gado. Na apostel Paulus ben skrifi: „[Yesus] ben musu kon de leki den ’brada’ fu en na ala fasi, so taki a ben kan tron wan granpriester di abi sari-ati èn di de getrow . . . Bika fu di ensrefi nyan pina di a ben e kisi tesi, meki a man kon yepi den sma di e kisi tesi.” Yesus kan „frustan den swakifasi fu wi”, fu di a ’kisi tesi na ala fasi neleki wi, ma a no ben abi sondu’.—Hebrewsma 2:17, 18; 4:15, 16.

17, 18. (a) Fa den brifi gi den seibi gemeente na ini Pikin Asia e sori taki Yesus abi trutru warderi gi sma? (b) Gi sortu sani den salfu Kresten dati ben e sreka densrefi?

¹⁷ Baka di Yesus kisi wan opobaka, a ben de  krin fu si taki a ben kon frustan moro bun sortu tesi den bakaman fu en ben e kisi. Luku den brifi di a meki na apostel Yohanes skrifi gi den seibi gemeente na ini Pikin Asia. Yesus ben taigi a gemeente na ini Smirna: „Mi sabi taki yu e nyan pina èn taki yu poti.” Fu taki en leti, Yesus ben wani taki: ’Mi e frustan heri bun sortu problema yu abi; mi sabi heri bun san yu e ondrofeni.’ Fu di Yesus srefi ben nyan pina teleki a dede, meki a ben man taki moro fara nanga sari-ati èn nanga wan moro tranga overtoigi: „Tan getrow srefi te na dede, dan mi o pai yu nanga libi.”—Openbaring 2:8-10.

¹⁸ Den brifi gi den seibi gemeente lai nanga wortu di e sori taki Yesus ben e frustan heri bun sortu tesi den disipel fu en ben e kisi, èn den e sori tu taki a ben abi trutru warderi gi den fu di den ben de getrow (Openbaring 2:1–3:22). Hori na prakseri taki den sma di Yesus ben taigi den sani disi ben de salfu Kresten di abi a howpu fu tiri makandra nanga en na ini hemel. Neleki a Masra fu den, den sma disi ben e sreka densrefi fu tyari a bigi frantwortu di den ben o kisi. Iya, den ben o yepi fu meki a libisma famiri di e nyan pina, kisi wini fu a frulusu-ofrandi fu Krestes, èn den ben o abi sari-ati nanga a libisma famiri.—Openbaring 5:9, 10; 22:1-5.

19, 20. Fa den sma fu a „bigi ipi” e sori taki den abi warderi gi Yehovah nanga en Manpikin?

¹⁹ A no de fu taki dati neleki fa Yesus lobi den salfu bakaman fu en, na so a lobi den getrow „tra skapu”. Den tra skapu disi na den milyunmilyun sma fu a „bigi ipi” di „komoto fu ala kondre” èn di o pasa a „bigi banawtu” libilibi (Yohanes 10:16; Openbaring 7:9, 14). Bun furu sma e teki a sei fu Yesus fu di den abi warderi gi a frulusu-ofrandi fu en èn gi a howpu di den abi fu libi fu têgo. Fa den sma disi e sori taki den abi warderi? Den e du dati fu di den e „du santa diniwroko gi [Gado] dei nanga neti”.—Openbaring 7:15-17.

²⁰ A raportu fu heri grontapu gi a dienstyari 2006, di de fu feni na tapu bladzijde 27 te go miti 30, e sori krin taki trutru den getrow futuboi disi e du „santa diniwroko gi [Yehovah] dei nanga neti”. Fu taki en leti, na ini a yari dati wawan, den nanga a pikin grupu fu salfu Kresten di tan abra, preiki sowan 1.333.966.199 yuru, èn dati de moro leki 150.000 yari!

Tan sori taki yu abi warderi!

21, 22. (a) Fu san ede Kresten musu sori warderi spesrutu na ini a ten disi? (b) San wi sa luku na ini na artikel di e kon now?

²¹ Yehovah nanga en Manpikin sori trutru warderi gi sondu libisma, èn a sani dati e naki wi ati. Ma a de wan sari sani taki bun furu libisma no e poti prakseri na Gado, ma na den eigi afersi. Disi na san Paulus ben taki fu den sma di ben o libi na ini „den lasti dei”: „Sma sa lobi densrefi nomo, den sa lobi moni . . . den no sa de nanga tangi” (2 Timoteyus 3:1-5). Den sma disi de heri tra fasi leki tru Kresten di e sori taki den abi warderi gi ala sani di Gado du gi den. Iya, den e begi Gado fayafaya, den de klariklari fu gi yesi na En, èn den e dini En nanga den heri ati!—Psalm 62:8; Markus 12:30; 1 Yohanes 5:3.

²² Na ini na artikel di e kon, wi sa luku baka san na wan tu fu den someni sani di Yehovah gi wi na wan lobi-ati fasi, so taki wi kan tranga a bribi fu wi. Meki a de so taki wi e kisi moro warderi te wi e poti prakseri na den „bun presenti” disi.—Yakobus 1:17.

San yu ben sa piki?

• Fa Yehovah sori taki en na wan Gado di abi warderi?

• Fa wi kan meki Yehovah en ati prisiri te wi de wi wawan?

• Na sortu fasi Yesus ben sori taki a abi warderi gi trawan?

• Fa a libi fu Yesus leki libisma yepi en fu de wan tiriman di abi sari-ati nanga warderi gi sma?

[Aksi fu a tori disi]

[Prenki na tapu bladzijde 17]

Neleki fa wan mama lobi en te a pikin fu en e gi en wan kado, na so Yehovah e warderi en te wi e du ala san wi man fu plisi en