Nyan bun fu a libi na tapu a moi grontapu fu wi

SABIMAN di e ondrosuku den stari nanga tra sani na hemel, kon si taki grontapu, a presi pe libisma e tan, na wan pikin-noti presi nomo na ini a bun bigi universum. Den kon si taki na nowan enkri presi na ini na universum libisani de. Soso a planeiti Grontapu seti na so wan fasi taki libisani kan libi na tapu.

Boiti dati, wi kan nyan bun fu a libi na tapu a moi grontapu disi. A switi srefisrefi fu firi a waran fu a son tapu wan kowru dei! Suma fu wi no feni en moi fu si fa a son e opo noso e dongo? A no de fu taki dati a son no e gi wi prisiri wawan. Wi abi a son tranga fanowdu fu man tan na libi.

Milyunmilyun yari langa, a krakti di a son abi fu hari sani kon na en e meki taki grontapu nanga tra planeiti e drai doronomo lontu a son, sondro taki den e tuka nanga makandra. Èn soleki fa studenti e leri na skoro, dan wan grupu fu planeiti e drai lontu a son. A son nanga den planeiti disi e drai lontu a mindrisei fu a Melkwegstelsel, namku a stari sistema fu wi. Ma a son na wán fu den 100 milyard stari nomo, di e drai lontu a mindrisei fu a stari sistema fu wi.

A Melkwegstelsel abi en fasti presi na ini wan grupu fu sowan 35 stari sistema. Moro bigi grupu fu stari sistema abi dusundusun stari sistema na ini. Den planeiti no ben o drai na wan orga fasi lontu a son fu wi efu den ben de na ini wan moro bigi grupu fu stari sistema. Ma soleki fa a de, dan wan tu presi nomo na ini na universum „seti leti so bun leki a grontapu fu wi, so taki libisani kan libi na tapu”, na so Guillermo Gonzalez nanga Jay W. Richards e taki na ini a buku fu den di nen The Privileged Planet.

A de so taki libi kon de na tapu a planeiti disi fu di sani sutu opo wantronso na ini na universum? Noso wan moro prenspari reide de fu san ede libi de na tapu a moi grontapu disi?

Furu sma kon si taki a grontapu fu wi meki spesrutu so taki libisani kan libi na tapu. * Hondrohondro yari pasa, wan Hebrew puwema skrifiman ben poti prakseri na grontapu nanga hemel. A ben skrifi: „Te mi e si a hemel fu yu, den wroko fu yu finga, a mun nanga den stari di yu sreka, dan san na wan libisma di man dede?” (Psalm 8:3, 4) A puwema skrifiman disi ben bribi taki wan Mekiman musu fu de. A sani disi tru te wi e luku a ten disi pe sabiman kon sabi so furu sani?

[Futuwortu]

[Faki/​Prenki na tapu bladzijde 3]

„Te yu de na ini na universum èn yu e luku grontapu, dan a gersi wan blaw diriston di e brenki na ini a dungru”, na so wan buku e taki (The Illustrated Science Encyclopedia—Amazing Planet Earth).

[Sma di abi a reti fu a prenki]

Globe: U.S. Fish & Wildlife Service, Washington, D.C./NASA