Wan sma di ben de opregti

NO SO LANGA PASA Nelma, di e wroko na wan presi pe sma e seti wiwiri na ini a foto Cruzeiro do Sul, na Brasyonkondre, ben musu sori efu a de wan opregti Kresten. Di a presi pe Nelma e libi kon sungu, dan a kisi wan tu krosi fu wan fu den klanti fu en. Di a ben e seti den krosi, dan a feni moni na ini den saka fu wan tu langa bruku, èn a moni ben abi a waarde fu 1000 Amerkan dala.

A moni di Nelma ben feni ben de leti so furu moni leki san a ben e meki na ini seibi mun, èn a ben abi a moni disi tranga fanowdu. A watra ben pori na oso fu en, èn en papa nanga den brada nanga sisa fu en lasi pikinmoro ala den gudu fu den. Nanga a moni di a ben feni a ben o man sreka en oso baka, èn moni ben o tan abra srefi fu yepi den famiriman fu en. Ma fu di a konsensi fu Nelma e wroko akruderi Bijbel gronprakseri, meki a no ben kan hori a moni.—Hebrewsma 13:18.

A tra dei fu en a go na wroko frukufruku èn a miti a bisnis-uma di ben gi en den krosi. Nelma taki en tangi gi den krosi, ma a taigi en tu taki a no ben man teki san a ben feni na ini den krosi. Na uma ben breiti srefisrefi di a kisi a moni. A ben poti en na wan sei fu pai den wrokoman fu en. „Na ini a ten disi, yu no e miti furu sma di opregti”, na so a bisnis-uma ben taki.

Iya, son sma kan feni taki a no abi wini fu de opregti. Ma toku den sma di e pruberi fu plisi a tru Gado, Yehovah, e si en leki wan tumusi prenspari sani fu de opregti (Efeisesma 4:25, 28). „Mi no ben o man sribi na neti efu mi ben teki a moni”, na so Nelma ben taki.