A abi trobi na sortu kerki yu e go?

FURU fu wi lobi en te wan wenkri abi difrenti sani di wi kan bai. Te wan wenkri abi difrenti sortu froktu nanga gruntu, dan wi kan luku sortuwan wi lobi èn sortuwan bun gi na osofamiri fu wi. Efu wan krosi wenkri abi ala sortu krosi na ini difrenti kloru, dan wi kan luku sortuwan wi lobi. Son leisi wi kan bosroiti gi wisrefi san wi o bai, noso san wi o du. Ma son bosroiti di wi e teki, kan abi bun noso takru bakapisi gi wi. Fu eksempre, bosroiti di abi fu du nanga nyanyan, èn nanga den mati di wi e teki. Ma fa a de nanga kerki? Na wi musu bosroiti fa wi musu anbegi Gado? Noso a de so taki a bosroiti dati na wan seryusu sani di kan abi bun, noso takru bakapisi gi wi?

Bun furu difrenti kerki de pe sma kan go. Furu kondre e gi sma pasi fu bosroiti na sortu kerki den wani go, èn moro nanga moro sma no e frede moro fu gowe libi a kerki fu den papa nanga mama. Wan ondrosuku di ben du na ini Amerkankondre e sori taki sowan 80 procent fu den Amerkan „e bribi taki a no wán kerki nomo kan meki sma kisi frulusu”. Soleki fa na ondrosuku dati e sori, dan „wán fu ibri feifi sma bosroiti fu go na wan tra kerki di den kon bigi”. Wan tra ondrosuku di ben du na ini Brasyonkondre sori taki pikinmoro 25 procent fu den Brasyonsma go na wan tra kerki.

Fosi, sma ben e haritaki nanga makandra fu di den no ben abi den srefi kerkileri. Now, furu sma feni taki a no abi trobi sortu kerki wan sma e go. Ma a sani dati tru? Sortu bakapisi a kerki fu yu kan tyari gi yu?

Wan koni sma e aksi pe wan sani meki, fosi a bai en. Na so a de wan koni sani tu fu aksi yusrefi: ’Fa den difrenti kerki disi du kon, èn fu san ede son sma opo wan kerki?’ Bijbel e piki den aksi disi.

 Fa kerki bigin?

Sowan dusun yari bifo Yesus kon na grontapu, Kownu Yerobeam bigin wan nyun bribi na ini Israel fu owruten. Yerobeam ben de a fosi kownu fu a noordsei Kownukondre fu Israel. A ben wani meki sma horibaka gi en. Ma fa a ben o du dati? Bijbel e taki: „A kownu ben aksi rai èn ben meki tu gowtu pikin kaw èn a ben taigi a pipel: ’A hebi tumusi gi unu fu opo go na Yerusalem. Disi na yu Gado, o Israel’” (1 Kownu 12:28). A de krin taki a kownu ben wani gebroiki wan nyun bribi fu no meki den sma go moro na Yerusalem, pe den ben gwenti anbegi Gado. A nyun bribi di Yerobeam ben bigin, tan hondrohondro yari langa èn a meki taki Gado strafu den Israelsma di ben drai baka gi En. Na so fasi milyunmilyun sma dede, noso go na ini katibo. Yerobeam bigin a nyun bribi fu kisi moro makti. Son kondre abi den eigi kerki èn den kerki disi bigin na a srefi fasi. Den tiriman bigin den kerki disi fu kisi moro makti.

Na apostel Paulus ben kari ete wan sani fu san ede sma e bigin wan nyun kerki. A ben taki: „Mi sabi taki te mi gowe, dan ogri busidagu sa kon na un mindri èn den no sa handri na wan switi fasi nanga den skapu; sma sa opo na un mindri, èn den sa taki kruktu sani fu hari den disipel kon na den baka” (Tori fu den Apostel 20:29, 30). Furu tron, tiriman di abi heimemre e bigin nanga wan nyun kerki soso fu kon pôpi. Kerki di e taki dati den na bakaman fu Krestes, prati na ini wan lo pikinpikin grupu.

Suma den kerki wani plisi?

A kan taki son sma e opo wan nyun kerki soso fu plisi tra sma. Fu eksempre, wan tijdschrift ben e taki dati moro nanga moro sma e go na den bigi kerki na ini Amerkankondre, fu di den fesiman „e drai a kerki na a srefi fasi fa bisnisman e drai a bisnis fu den. Den bisnisman e du ala san den man fu plisi den klanti fu den”. Na den konmakandra fu wan tu fu den kerki disi, „sma e meki furu prisiri, den e sori kino, den e prei komediprei, èn den e meki poku di de neleki den poku fu a ten disi”. Sonwan fu den kerki fesiman e taki dati den e leri den memre fa den kan kon „gudu, fa den kan de gosontu, èn fa den kan abi wan switi libi”. A tijdschrift e taki dati son sma no lobi taki den kerki disi e seri poku nanga felem, èn taki den e „seri buku di e sori sma fa den kan yepi densrefi fu libi wan bun libi”. Ma a srefi tijdschrift disi e taki tu dati „den kerki e du nomo san furu sma wani”. A tijdschrift e tapu nanga den wortu disi: „A moksi di sma moksi bisnis nanga kerki, tyari bun furu wini kon” (Economist).

Aladi tra kerki no e du bisnis so krinkrin, toku den kerki di „e du san den memre fu den wani”, e memre wi na a warskow fu na apostel Paulus. A ben taki: „Wan ten o kon taki den no sa frudrage a bun leri, ma na fu di densrefi wani, meki den o suku leriman gi densrefi fu switi den yesi nanga sani di densrefi wani yere; den no sa wani arki a waarheid, ma den o arki leitori.”—2 Timoteyus 4:3, 4.

Wi si taki furu sma opo kerki fu kisi moro makti na politiek sei, fu kisi wan hei posisi, èn fu kon pôpi. Den no du dati fu di den wani plisi Gado. Dati meki wi kan frustan taki kerkisma e meshandri pikin-nengre, den e kori trawan, den e feti na ini orloku, èn den e du ogri-ati sani fu gens tirimakti. Sma kon si taki furu kerki falsi. Fa yu kan sorgu taki kerki no kori yu?

[Prenspari pisi na tapu bladzijde 4]

Furu sma opo kerki fu kisi moro makti na politiek sei, fu kisi wan hei posisi, èn fu kon pôpi. Den no du dati fu di den wani plisi Gado.