De nanga prisiri aladi yu e wakti Yehovah

OITI yu nyan wan froktu di no ben lepi ete? A no de fu taki dati yu no ben feni taki a switi. A e teki ten fosi wan froktu e kon lepi, èn sma no abi trobi fu wakti bika den sabi taki a o moro switi. Na ini tra situwâsi a e tyari wini kon tu te wi e wakti. Fu eksempre, Bijbel e taki: „A bun taki wan sma musu wakti, iya sondro fu taki wan sani, tapu a frulusu di e kon fu Yehovah” (Kragisingi 3:26; Titus 2:13). Na sortu fasi Kresten musu wakti Yehovah? Fa wi kan kisi wini te wi e wakti Yehovah?

San a wani taki fu wakti Gado?

Leki Kresten, wi e ’fruwakti a dei fu Yehovah èn wi e hori bun na prakseri taki a dei dati o kon’. Wi e howpu taki heri esi wan frulekti sa kon te Gado o „pori den ogrisma” (2 Petrus 3:7, 12). Yehovah srefi e angri fu tyari wan kaba kon na ala ogri, ma a e wakti so taki a kan frulusu den tru Kresten na wan fasi di o meki en nen kisi glori. Bijbel e taki: „Gado wani sori taki a e atibron srefisrefi èn taki a wani meki sma kon sabi a krakti fu en, ma fu di a abi langa pasensi, meki a frudrage den patu nanga san a e atibron srefisrefi, èn di a poti na wan sei fu broko den na pisipisi. Na so fasi a ben kan meki sma kon sabi san na a bigi glori di a o gi den patu nanga san a abi sari-ati” (Romesma 9:22, 23). Neleki na ini a ten fu Noa, na so Yehovah sabi tu san na a moro bun ten fu frulusu en pipel na ini a ten disi (1 Petrus 3:20). Sobun, te wi e wakti Gado, dan dati wani taki dati wi e wakti teleki en ten doro fu du wan sani.

Aladi wi e wakti a dei fu Yehovah, a kan taki son leisi wi e sari fu si fa sma na ini grontapu e tyari densrefi na wan ogri fasi moro nanga moro. Na den momenti dati, a bun fu prakseri san Mika a profeiti fu Gado, ben skrifi: „A loyaalwan no de moro na grontapu, èn no wan opregtiwan de na mindri libisma.” Baka dati a ben taki: „Ma fu mi sei, mi sa tan fruwakti Yehovah. Mi sa sori taki mi e tan wakti a Gado fu mi frulusu” (Mika 7:2, 7). Fa wi musu wakti Gado? Furu tron a no switi fu wakti, ma fa wi kan de nanga prisiri aladi wi e wakti Gado?

Abi prisiri aladi yu e wakti

Wi kan leri fu wakti te wi e luku fa Yehovah de. Yehovah na „a koloku Gado” ala ten (1 Timoteyus 1:11). Aladi a e wakti, toku a de koloku fu di a e tan wroko fu meki a wani fu en kon tru. Yehovah wani taki den sma di lobi en musu tron sma di no abi sondu moro, fu di na dati a ben abi na prakseri di a meki libisma (Romesma 5:12; 6:23). Yehovah e si taki a wroko fu en abi bun bakapisi. A si fa milyunmilyun sma kon na ini a tru anbegi. Yesus ben taki: „Mi Tata tan wroko teleki now èn misrefi e tan wroko tu” (Yohanes 5:17). Wan prenspari sani di wi kan du fu abi prisiri, na fu du sani gi trawan (Tori fu den Apostel 20:35). Na a srefi fasi, tru Kresten no e wakti sondro fu du sani. Na presi fu dati, den e tan wroko fu yepi trawan fu kon sabi san Gado wani gi a libisma famiri.

Ala ten getrow anbegiman fu Gado ben e wakti en fu du wan sani, aladi den ben e prisiri fu prèise En. Teki fu eksempre, a psalm skrifiman David. A kownu fu David ben e frufolgu en, wan bun mati fu en ben tori en, èn David en eigi manpikin ben tron wan feanti fu en. Yu denki taki David ben kan de nanga prisiri ini den situwâsi disi, aladi a ben e wakti a ten te Yehovah ben o frulusu en? Soleki fa a sori, dan David skrifi Psalm 71 pe a taki: „Mi fu mi sei,  mi sa wakti doronomo, èn mi sa prèise yu moro nanga moro. Nanga mi eigi mofo mi sa taki fu yu regtfardikifasi, èn heri dei mi sa taki fu yu frulusu” (Psalm 71:14, 15). Na presi taki David lasi-ati fu di a ben musu wakti, a ben e prisiri fu di a ben e prèise Yehovah èn a ben e gi trawan deki-ati fu tan anbegi En.—Psalm 71:23.

Te wi e wakti Yehovah, dan a no de leki te wi e fuga fu wakti wan bus di no man doro ete. Ma a de neleki te papa nanga mama e wakti nanga prisiri fu si fa a pikin fu den e gro kon tron wan bigisma di e tyari ensrefi na wan bun fasi. Ala den yari den e wroko fu doro a marki dati. Den e leri a pikin fu den fa fu du son sani, den e gi den rai, èn den e gi den trangaleri. Na a srefi fasi, wi e wakti Yehovah nanga prisiri te wi e yepi trawan fu kon krosibei na Gado. Wi wani tu taki Gado feni wi bun, èn te fu kaba wi wani kisi frulusu.

No lasi-ati

Te wi e wakti Yehovah, dan wi musu tan lobi en èn wi musu tan dini en sondro fu lasi-ati. A sani disi no makriki. Furu fu den futuboi fu Gado na ini a ten disi e libi na ini kontren pe sma e spotu iniwan sma di e bribi na ini den pramisi fu Gado. Ma luku na eksempre fu getrow Israelsma di tan abi wan tranga howpu di den ben de 70 yari na ini katibo na Babilon. San ben yepi den fu tan abi wan tranga howpu? A no de fu taki dati den ben kisi deki-ati fu den psalm di den ben e leisi. Wan psalm di kande ben skrifi na ini a ten dati èn di gi den deki-ati, na Psalm 130. Drape skrifi: „Mi wakti san en o taki. Mi wakti Yehovah, moro leki te wan waktiman e wakti a mamanten. Meki Israel tan wakti Yehovah.”—Psalm 130:5-7.

Den Dyu di ben e leisi a wortu fu Gado èn di ben e taki fu en, ben tan abi wan tranga howpu. Èn te fu kaba den kisi blesi, di feanti teki Babilon abra. Dusundusun Dyu drai go baka na Yerusalem. Psalm 126 e taki fu a ten dati: „Di Yehovah ben meki den katiboman fu Sion drai kon baka, . . . a mofo fu wi ben kon furu nanga lafu” (Psalm 126:1, 2). Den Dyu dati no ben lasi-ati, ma den tan tranga a bribi fu den. Èn noiti den tapu fu singi prèisesingi gi Yehovah.

Na a srefi fasi, tru Kresten di e wakti Gado na a ten fu „a kaba fu a grontapu sistema disi” e meki muiti doronomo fu tan abi wan tranga bribi. Den e studeri Gado Wortu, den e gi trawan deki-ati, èn den e tan prèise Yehovah fu di den e preiki a bun nyunsu fu a Kownukondre fu en.—Mateyus 24:3, 14.

Wakti Yehovah èn kisi wini fu trangaleri

Soleki fa wi si kaba, dan Yeremia, a profeiti fu Gado, ben skrifi: „A bun taki wan sma musu wakti, iya sondro fu taki wan sani, tapu a frulusu di e kon fu Yehovah” (Kragisingi 3:26). Nanga den wortu disi, Yeremia ben wani sori taki a ben o bun efu a pipel fu Gado no ben o krutukrutu a fasi fa Yehovah gi den trangaleri di A meki taki Yerusalem kisi pori. Na presi fu dati, den ben musu teki leri fu den sani di ben e miti den. Den ben musu prakseri fa den ben e trangayesi Gado èn taki  den ben musu kenki a fasi fa den ben e tyari densrefi.—Kragisingi 3:40, 42.

A fasi fa Yehovah e gi wi trangaleri e tyari wini kon gi wi. Yu kan agersi dati nanga a fasi fa wan froktu e kon lepi. Bijbel e taki fu a trangaleri di Gado e gi wi: „Gi den sma di e leri wan sani fu disi, a sa abi bun bakapisi di e tyari vrede kon, èn dati na regtfardikifasi” (Hebrewsma 12:11). A e teki ten fosi wan froktu kon lepi. Na so a de tu taki, te Gado e gi wi trangaleri, dan a e teki ten fu kenki a fasi fa wi e tyari wisrefi. Fu eksempre, efu wi lasi wan grani na ini a gemeente fu di wi tyari wisrefi na wan fowtu fasi, dan wi musu de klariklari fu wakti Gado, fu di dati o meki taki wi no o brokosaka èn lasi-ati. Na den momenti dati, den wortu fu David kan de wan deki-ati gi wi: „Efu [Gado] e atibron na wi tapu, dan dati na fu wan syatu pisi ten, ma a bun-ati fu en e tan fu têgo. Te neti wi kan krei, ma te mamanten wi sa bari fu prisiri” (Psalm 30:5). Efu wi e leri fu wakti èn efu wi e du san wi e leri na ini Gado Wortu èn fu na organisâsi fu en, dan a ten sa doro te wi o „bari fu prisiri”.

A e teki ten fu tron wan lepi sma

Efu yu yongu ete noso efu yu no dopu langa ete, dan kande yu e angri fu kisi frantwortu na ini a Kresten gemeente. Ma efu yu wani kisi frantwortu na ini a gemeente, dan yu musu tron wan lepi sma, èn dati e teki ten. Fu dati ede, gebroiki den fosi yari fu yu fu tron wan lepi Kresten. Fu eksempre, te yu yongu, dan dati na wan bun ten fu leisi a heri Bijbel, fu kisi moi Kresten fasi, èn fu leri fa fu meki disipel (Preikiman 12:1). Efu yu abi sakafasi fu wakti Yehovah, dan na a yoisti ten a sa meki taki yu kisi moro frantwortu na ini a gemeente.

Wi musu abi pasensi tu te wi e yepi sma fu tron disipel fu Yesus. Neleki fa wan gronman musu tan poti watra gi den siri teleki Gado e meki den gro, na so a de tu nanga a wroko di wi e du fu yepi sma tron disipel fu Krestes (1 Korentesma 3:7; Yakobus 5:7). Efu wi wani yepi sma fu bribi na ini Yehovah èn fu meki den kisi warderi gi den sani di A e du gi den, dan wi musu abi pasensi te wi e studeri Bijbel nanga den. Son leisi wi musu studeri Bijbel omeni mun langa nanga den sma, èn son leisi a e teki furu yari srefi. Te wi e wakti Yehovah, wi musu horidoro, srefi efu na a bigin a gersi leki den studenti no e du san den e leri. Efu den e sori pikinso warderi kaba, dan dati kan sori taki a yeye fu Yehovah abi krakti na den tapu. Efu yu abi pasensi, dan yu kan prisiri fu si fa Yehovah e meki a studenti fu yu go na fesi teleki a tron wan disipel fu Krestes.—Mateyus 28:20.

Sori lobi aladi yu e wakti

Luku wan eksempre fu wan owru sisa di e libi na a drei kontren fu na Andesbergi na ini Zuid-Amerika. En nanga wan tra Kresten sisa ben de den wan-enkri Kotoigi fu Yehovah na ini a dorpu fu den. Yu kan frustan fa den e breiti te den yere taki tra Kresten brada nanga sisa e kon fisiti den. Wan leisi, wan kring-opziener ben o fisiti den. A fasi fa na owru sisa disi sori pasensi, e sori taki a abi lobi èn taki a ben de seiker dati a brada ben o kon. A kring-opziener ben de na pasi fu go fisiti den a fosi leisi, ma a brada disi ben lasi pasi. A ben musu waka a srefi pasi go baka na a presi pe a ben bigin, èn dati meki a ben teki wan tu yuru moro langa fosi a doro na a dorpu. A ben de musudei mamanten kaba di a bigin si a dorpu wan pisi na en fesi. A brada ben sabi taki stroom no de na a kontren dati, èn dati meki a ben e fruwondru fu si taki wan faya ben leti. Di a doro a dorpu, a ben breiti trutru fu si taki na a owru sisa ben e wakti en nanga wan kokolampu na ini en anu! A sisa disi ben de seiker taki a brada ben o kon, èn dati meki a ben e wakti.

Neleki na owru sisa disi wi e sori pasensi, èn wi breiti fu wakti Yehovah. Wi de seiker taki a sa du san a pramisi wi. Èn neleki a kring-opziener dati, wi abi warderi gi den wan di e wakti wi fu di den lobi wi. Fu dati ede, a no e fruwondru wi taki Gado e prisiri nanga den wan di e wakti en. Bijbel e taki: „Yehovah e prisiri nanga . . . den wan di e wakti en bun-ati.”—Psalm 147:11.

[Prenki na tapu bladzijde 18]

Sma di e wroko tranga fu prèise Gado, e prisiri fu wakti Yehovah