Fa wi kan feni a tru bribi

FURU kerki e taki dati den sani di den e leri sma, e kon fu Gado. Fu dati ede, wi musu gi yesi na a rai fu Yohanes, na apostel fu Yesus. A ben skrifi: „Un lobiwan, no bribi ala sani di gersi leki den e kon fu Gado en yeye, ma ondrosuku den sani disi fu si efu den e kon fu Gado trutru, bika furu falsi profeiti de na grontapu” (1 Yohanes 4:1). Fa wi kan ondrosuku wan sani fu kon sabi efu a kon fu Gado?

Na ini ala sani di e kon fu Gado, yu kan si fa Gado de. Yu kan si spesrutu a moro prenspari fasi fu en, namku lobi. Fu eksempre, wi man smeri wan switi nyanyan, bromki, èn waran brede. Wi man si moi sondongo, moi fowru, èn wi man si fa pikin-nengre e lafu. Wi man arki moi poku, wi man yere fa fowru e singi, èn wi man yere a sten fu wan sma di wi lobi. Ala den sani disi e sori taki Gado lobi wi. Srefi a fasi fa wi leki sondu libisma de, e sori taki Gado lobi wi. Dati meki furu tron wi e ondrofeni taki Yesus ben abi leti, di a taki: „Wan sma sa de moro koloku te a e gi sani, leki te a e kisi sani” (Tori fu den Apostel 20:35). Fu di wi meki „leki wan prenki fu [Gado]”, meki wi e prisiri tu te wi e sori lobi gi trawan (Genesis 1:27). Yehovah abi furu tra fasi tu, ma a moro moi wan na lobi.

Efu wan buku kon fu Gado, dan a musu sori taki Gado lobi wi. Den kerki fu grontapu abi furu owru buku. Ma den buku disi e sori trutru taki Gado lobi wi?

Fu taki en leti, wan lo fu den owru kerki buku no e taki so furu fu a lobi di Gado abi gi wi, noso fa wi kan lobi Gado. Dati meki milyunmilyun sma no sabi den piki tapu den aksi disi: „Efu wi e si a lobi fu Gado na ini den sani di a meki, dan fu san ede sma e tan pina èn fu san ede ogri de ete?” Ma Bijbel na a wan-enkri owru kerki buku di e taki finifini fu a lobi di Gado abi. A e leri wi tu fu sori lobi.

A buku di e taki fu lobi

Bijbel, a Wortu fu Gado, e taki dati Yehovah na „a Gado fu lobi” (2 Korentesma 13:11). Bijbel e sori taki fu di Yehovah abi lobi, meki a ben gi den fosi libisma, Adam nanga Eva, wan libi sondro siki nanga dede. Ma fu di den opo densrefi teige Gado, meki den nanga den bakapikin fu den bigin pina (Deuteronomium 32:4, 5; Romesma 5:12). Yehovah bigin du sani, so taki a libisma famiri kan kisi a switi libi baka di Adam nanga Eva ben lasi. Gado Wortu e taki: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi” (Yohanes 3:16). Den Santa Buku fu Bijbel e sori moro krin o furu lobi Gado abi, fu di a e fruteri wi taki Gado abi wan kefalek bun  tirimakti di de na ini a makti fu Yesus, èn a sa tyari vrede kon gi ala sma di e gi yesi na Gado.—Danièl 7:13, 14; 2 Petrus 3:13.

Bijbel e taki sortu frantwortu wi leki libisma abi: „’Yu musu lobi Yehovah yu Gado nanga yu heri ati, nanga yu heri sili, èn nanga yu heri frustan.’ Disi na a fosi èn a moro bigi komando. A di fu tu komando de leki a wan disi, èn dati na: ’Yu musu lobi tra sma leki fa yu lobi yusrefi.’ A heri Wet nanga den leri fu den Profeiti e anga na den tu komando disi” (Mateyus 22:37-40). Na ini Bijbel wi e leisi taki na Gado meki sma skrifi a Wortu fu en nanga yepi fu santa yeye. Fu di Bijbel e sori krin fa Gado de, meki wi kan de seiker taki Bijbel kon fu „a Gado fu lobi”.—2 Timoteyus 3:16.

Efu wi wani kon sabi sortuwan fu den owru buku kon fu Gado trutru, dan wi musu luku efu den e taki fu a lobi fu Gado. Tru anbegiman e sori lobi neleki fa Gado e sori lobi.

Fa wi kan kon sabi suma lobi Gado trutru?

Spesrutu na ini „den lasti dei” disi, meki wi kan si moro krin suma na den sma di lobi Gado trutru. Bijbel e taki dati na ini a ten disi, moro nanga moro ’sma ben o lobi densrefi nomo, den ben o lobi moni, èn den ben o lobi prisiri na presi taki den lobi Gado’.—2 Timoteyus 3:1-4.

Fa yu kan kon sabi suma na den sma di lobi Gado? Bijbel e taki: „Disi na san a lobi fu Gado wani taki, dati wi e hori wisrefi na den komando fu en” (1 Yohanes 5:3). Sma di lobi Gado, e hori densrefi na den komando na ini Bijbel di e sori fa sma musu tyari densrefi. Fu eksempre, a Wortu fu Gado abi wet di abi fu du nanga seks èn nanga a trowlibi. Tu sma kan abi seks soso te den trow nanga makandra.Te tu sma trow, den musu tan nanga makandra fu ala ten (Mateyus 19:9; Hebrewsma 13:4). Wan uma di e libi na ini Spanyorokondre èn di ben stuka kerkileri, ben go na wan fu den konmakandra fu Yehovah Kotoigi pe den ben e studeri Bijbel gronprakseri di e sori fa den musu tyari densrefi. Na uma ben taki: „Baka a konmakandra mi ben firi bun. Den lezing gi mi furu deki-ati, fu di den yepi mi fu frustan Bijbel moro bun. Mi kisi furu deki-ati tu fu di den sma disi abi wánfasi, den e tyari densrefi na wan bun fasi, èn den abi bun maniri.”

Boiti taki tru Kresten lobi Gado, den e sori lobi tu gi tra sma. A moro prenspari wroko fu den, na taki den musu fruteri trawan fu a wan-enkri sani di kan frulusu a libisma famiri. A sani dati na a Kownukondre fu Gado (Mateyus 24:14). A moro bun fasi fa tru Kresten kan yepi tra sma na fu yepi den fu kon sabi Gado so taki den kan kisi têgo libi (Yohanes 17:3). Tru Kresten e sori lobi na tra fasi tu. Den e yepi trawan di de na nowtu. Fu eksempre, baka di wan gronseki ben de na ini Italiakondre, dan wan koranti drape ben taki dati Yehovah Kotoigi „e du difrenti sani fu yepi trawan, èn taki den e yepi den sma di e pina, awinsi den de fu wan tra kerki”.

Tru Kresten no lobi Gado nanga tra sma wawan, ma den lobi makandra tu. Yesus ben taki: „Mi e gi unu wan nyun komando, taki un musu lobi makandra; neleki fa mi lobi unu, na so un musu lobi makandra tu. Na a fasi disi ala sma o sabi taki unu na mi disipel, te unu lobi makandra.”—Yohanes 13:34, 35.

A de krin fu si taki tru Kresten lobi makandra? Iya! Na dati Ema kon si. Na uma disi e krin oso gi sma na ini La Paz, wan foto na ini Bolifia, pe furu gudusma e desko pôtisma di de fu wan tra ras. Ema e taki: „A fosi leisi di mi go na wan konmakandra fu Yehovah Kotoigi, mi si fa wan man di weri diri krosi, e sidon taki nanga wan Ingi uma. Noiti ete mi ben si a sani dati. A dei dati mi si taki den sma disi musu de a pipel fu Gado.” Miriam, wan yongu Brasyon uma, ben taki tu: „Mi no ben de koloku, srefi na ini mi eigi osofamiri. A fosi leisi di mi si fa sma sori trutru lobi, na di mi  ben abi demakandra nanga Yehovah Kotoigi.” Na ini Amerkankondre, wan nyunsuman ben skrifi: „Efu moro sma ben e libi soleki fa a bribi fu unu e taki, dan a kondre disi no ben o de na ini a situwâsi disi. Mi na wan nyunsuman di sabi taki den sma na ini na organisâsi fu unu e sori lobi èn taki den e bribi trutru na ini a Mekiman.”

Suku a tru anbegi

Tru anbegiman e sori lobi gi makandra. Yesus ben agersi a tru anbegi nanga wan pasi di wan sma musu feni èn pe a musu waka na tapu. Dati na a wan-enkri pasi di kan meki sma kisi têgo libi. Yesus ben taki: „Pasa go na ini a smara doro; bika a pasi di e tyari sma go dede, bradi èn a bigi, èn furu sma e waka a pasi dati; ma a doro di e tyari sma go na libi, pikin èn a pasi fu en smara, èn wan tu sma nomo e feni en” (Mateyus 7:13, 14). Wán grupu nomo fu tru Kresten e dini Gado na a yoisti fasi. Dati meki a de prenspari na sortu kerki yu e go. Efu yu feni a yoisti pasi noso a tru anbegi, èn efu yu bosroiti fu waka a pasi dati, dan yu feni a moro bun fasi fu libi, bika den sma di e libi na a fasi dati e sori lobi gi makandra.—Efeisesma 4:1-4.

Te yu de na ini a tru anbegi, dan yu sa prisiri trutru! A de neleki yu e waka nanga Gado. Gado sa gi yu koni èn a sa leri yu fu sori lobi, so taki yu kan de bun mati nanga tra sma. Gado sa meki yu kon sabi fu san ede wi e libi, yu sa kon sabi san Gado pramisi libisma, èn yu sa abi howpu taki sani sa waka bun na ini a ten di e kon. Fu tru, a o tyari wini gi yu te yu e suku a tru anbegi.

[Prenki na tapu bladzijde 5]

Bijbel na a wan-enkri owru kerki buku di e taki fu a lobi fu Gado

[Prenki na tapu bladzijde 7]

Wi kan si krin suma na tru Kresten, bika tru Kresten e sori lobi