Meki wi alamala gi Yehovah nen glori
Meki wi alamala gi Yehovah nen glori
„O prèise Yehovah makandra nanga mi, un pipel, èn meki wi alamala gi en nen glori.”—PSALM 34:3.
1. Sortu moi eksempre Yesus gi wi di a ben e du en diniwroko na grontapu?
NA A neti fu 14 Nisan, 33 G.T., Yesus nanga den apostel fu en ben e singi prèisesingi gi Yehovah. Den ben de na ini wan sodrokamra fu wan oso na ini Yerusalem (Mateyus 26:30). Dati ben de a lasti leisi taki Yesus ben o du dati nanga den apostel fu en. A ben fiti taki a tapu a konmakandra nanga singi. Sensi a bigin fu en diniwroko na grontapu, teleki a kaba fu a diniwroko fu en, Yesus ben e prèise en Tata èn a ben meki En nen bekènti fayafaya (Mateyus 4:10; 6:9; 22:37, 38; Yohanes 12:28; 17:6). Fu taki en leti, neleki a psalm skrifiman, a ben gi trawan a deki-ati fu du dati tu. A psalm skrifiman ben taki: „O prèise Yehovah makandra nanga mi, un pipel, èn meki wi alamala gi en nen glori” (Psalm 34:3). Dati na trutru wan moi eksempre gi wi!
2, 3. (a) Fa wi du sabi taki Psalm 34 na wan profeititori? (b) Na san wi sa poti prakseri na ini na artikel disi èn na ini a wan na en baka?
2 Wan tu yuru baka di na apostel Yohanes singi prèisesingi makandra nanga Yesus, dan a ben si wan heri tra situwâsi. A ben si fa sma ben spikri Yesus èn tu ogriman na pina-postu. Srudati fu Rome ben e broko den futu fu den tu ogriman so taki den ben kan dede moro esi. Ma Yohanes e taki dati den no broko den futu fu Yesus. Di den srudati ben kon fu broko Yesus futu, dan a ben dede kaba. Na ini na Evangelie di Yohanes skrifi, a ben sori taki a sani disi ben de wan kontru fu wan tra pisi fu Psalm 34. Drape skrifi: „Den no sa broko nowan bonyo fu en.”—Yohanes 19:32-36; Psalm 34:20.
3 Psalm 34 abi furu tra sani di prenspari gi Kresten. Dati meki, na ini na artikel disi èn na ini a wan na en baka, wi sa go luku na ini sortu situwâsi David ben de di a skrifi a psalm disi. Baka dati wi sa poti prakseri na den difrenti tekst na ini a Psalm 34 di sa gi wi deki-ati.
David e lowe gi Saul
4. (a) Fu san ede Gado poti David leki a nyun kownu fu Israel? (b) Fu san ede Saul „ben kon lobi” David srefisrefi?
4 Di David ben yongu, dan Saul ben de kownu na ini Israel. Ma Saul ben trangayesi Yehovah èn Yehovah no ben wani en moro leki kownu fu Israel. Dati meki, a profeiti Samuel ben taigi en: „Tide Yehovah teki a kownukondre fu Israel fu yu anu, èn fu tru a sa gi a kownukondre na wan tra sma di bun moro yu” (1 Samuel 15:28). Bakaten, Yehovah seni Samuel fu poti David, a moro yongu manpikin fu Isai, leki a nyun kownu fu Israel. Na a srefi ten dati, Gado ben puru en yeye fu Saul, èn dati meki ten na ten, Kownu Saul no ben firi prisiri srefisrefi. David ben de wan bun pokuman, èn dati meki den tyari en kon na Gibea fu prei poku gi a kownu. Den poku fu David ben meki Saul firi moro bun, èn dati meki Saul „ben kon lobi en srefisrefi”.—1 Samuel 16:11, 13, 21, 23.
5. Fu san ede Saul bigin kisi bita-ati gi David, èn san David ben musu fu du?
5 Bakaten Yehovah ben e horibaka gi David. Yehovah yepi en fu wini Goliat, a langa bigi-skin man fu den Filisteasma, èn a ben e horibaka gi David te a ben e go feti nanga tra kondre. Na so fasi David kisi furu grani na ini Israel. Ma Saul ben kon dyarusu tapu David fu di Yehovah ben blesi en, èn dati meki Saul kisi bita-ati gi David. Di David ben e prei tapu en harpu na fesi Saul, dan tu leisi a kownu fringi en lansri teki David. Ala tu leisi, David ben man skoifi komoto gi a lansri. Baka di Saul pruberi fu kiri David a di fu dri tron, dan David kon si taki a ben musu lowe fu kan tan na libi. Fu di Saul ben e tan suku fu kiri David, meki David bosroiti fu lowe komoto na Israel.—1 Samuel 18:11; 19:9, 10.
6. Fu san ede Saul gi den man fu en a komando fu kiri den sma na ini a foto Nob?
6 Di David ben de na pasi, dan a go na a foto Nob, krosibei fu Israel, pe a tabernakel fu Yehovah ben de. Soleki fa a sori, dan wan tu yonguman ben de nanga David di a ben e lowe gi Saul, èn David ben suku nyanyan nanga dringi gi ensrefi èn gi den man disi. Saul kon yere taki a granpriester ben gi David nanga den man fu en pikinso nyanyan èn sosrefi a feti-owru di David ben teki fu Goliat baka di a kiri en. Fu di Saul ben e atibron, meki a kiri ala den sma na ini a foto èn sosrefi 85 priester.—1 Samuel 21:1, 2; 22:12, 13, 18, 19; Mateyus 12:3, 4.
David ben man lowe ete wan leisi
7. Fu san ede Gat no ben de wan bun kibripresi gi David?
7 Baka di David komoto na Nob, dan a lowe go na a kontren fu den Filisteasma, sowan 40 kilometer fu Nob. Drape a suku kibri na Kownu Akis na ini a foto Gat, pe Goliat ben tan. Kande David ben e denki taki noiti Saul ben o prakseri fu kon suku en na ini Gat. Ma a no teki langa fosi den dinari fu a kownu fu Gat kon si taki David de na ini a foto. Di David yere taki den sabi taki a de na ini a foto, „dan a ben kon frede trutru gi Akis, a kownu fu Gat”.—1 Samuel 21:10-12.
8. (a) San miti David na ini Gat, soleki fa Psalm 56 e fruteri? (b) Di David ben de na ini Gat, dan pikinmoro a lasi en libi. Fa a komoto na ini a situwâsi dati?
8 Den Filisteasma grabu David hori. A kan taki na a ten dati David skrifi a psalm pe a e aksi Yehovah nanga en heri ati: „Grantangi, poti den watra-ai fu mi na ini a leer-saka fu yu” (Psalm 56:8; luku sosrefi vers 1 na ini Da Bijbel). Iya, David ben e frutrow taki Yehovah no ben o frigiti en na ini a muilek situwâsi fu en èn a ben sabi taki Yehovah ben o sorgu gi en na wan lobi-ati fasi èn taki A ben o kibri en. David ben prakseri wan triki tu fu kori a kownu fu Filistea. David ben e du leki wan lawman. Di Kownu Akis si David, dan a bari den dinari fu en fu di den tyari wan „lawman” gi en. A de krin taki Yehovah yepi David so taki a triki fu en ben wroko. Den yagi David komoto na ini a foto, èn na so fasi a ben kan lowe ete wan leisi.—1 Samuel 21:13-15.
9, 10. Fu san ede David skrifi Psalm 34, èn suma David ben kan abi na prakseri di a skrifi a psalm disi?
9 Bijbel no e sori efu den man di ben e horibaka gi David, ben lowe go na ini Gat makandra nanga en. Bijbel no e sori tu efu den ben e hori wakti gi en na ini den dorpu fu Israel di de krosibei fu Gat. Ma a no de fu taki, dati den ben breiti fu miti David baka èn fu yere fa Yehovah frulusu en ete wan tron. Na fu a situwâsi dati David skrifi na ini Psalm 34, soleki fa den biginwortu fu a psalm dati e sori. Na ini den fosi seibi vers fu a psalm, David e prèise Gado fu di a frulusu en. David e gi den wan di ben e horibaka gi en a deki-ati fu prèise Yehovah makandra nanga en, fu di Yehovah na a Bigi Frulusuman fu a pipel fu En.—Psalm 34:3, 4, 7.
10 David nanga den man di ben de nanga en, ben feni wan kibripresi na ini a birti fu Adulam, na a bergi kontren fu Israel di ben de sowan 15 kilometer na a owstusei fu Gat. Den Israelsma di no ben breiti nanga a fasi fa Kownu Saul ben e tiri a kondre, ben go drape na David (1 Samuel 22:1, 2). A kan taki David ben abi den sma disi na prakseri di a skrifi den wortu fu Psalm 34:8-22. Den sani di skrifi na ini den vers dati prenspari gi wi tu na ini a ten disi. A no de fu taki dati a sa tyari wini kon gi wi te wi sa taki finifini fu a moi psalm disi.
Yu abi a srefi denki neleki David?
11, 12. Fu san ede wi musu prèise Yehovah doronomo?
11 „Mi sa blesi Yehovah ala ten; mi sa prèise en nanga mi mofo ala ten” (Psalm 34:1). A pisi ten di David ben e lowe gi Saul, dan a no de fu taki dati a ben e broko en ede nanga den sani di a ben abi fanowdu fu kan tan na libi. Ma soleki fa den wortu disi e sori, dan den broko-ede di a ben abi ala dei no ben tapu en fu tan prèise Yehovah. Dati na trutru wan moi eksempre gi wi te wi abi problema! Te wi de na skoro, na wrokope, na ini a preikiwroko, noso nanga tra Kresten, dan a moro prenspari sani di wi wani du na fu prèise Yehovah. Wi abi so furu sani fu san ede wi musu prèise Yehovah! Fu eksempre, wi kan leri so furu fu den kefalek moi sani di Yehovah meki, èn wi kan prisiri fu den sani dati tu. Èn prakseri ala den sani di Yehovah du nanga yepi fu na organisâsi fu en dyaso na grontapu! Aladi wi na sondu libisma, toku Yehovah gebroiki getrow libisma fu du furu sani gi en na ini a ten disi. San wi kan taki fu den wroko fu Gado èn fu den wroko fu libisma di grontapu feni so kefalek? Na ini Psalm 86:8 David taki: „Nowan tra gado de leki yu, o Yehovah, èn nowan fu den wroko fu den de leki den wroko fu yu.” Yu no feni taki David abi leti?
12 Neleki David, wi e angri fu prèise Yehovah doronomo fu di a du sani di nowan sma man du. Boiti dati, wi breiti tu fu sabi taki a Kownukondre fu Gado de na ini a makti fu wan bakapikin fu David, namku Yesus Krestes di sa de Kownu fu ala ten (Openbaring 11:15). Disi wani taki dati a kaba fu a grontapu sistema disi de krosibei. Moro leki siksi milyard libisma kan kisi pori. Noiti ete a ben de so prenspari fu fruteri trawan fu a Kownukondre fu Gado èn san a sa du gi a libisma famiri heri esi. Èn disi na a ten fu yepi den fu prèise Yehovah makandra nanga wi. Fu tru, a moro prenspari sani di wi musu du na fu gebroiki ibri okasi fu yepi trawan so taki den kan gi yesi na a „bun nyunsu”, bifo a lati.—Mateyus 24:14.
13. (a) Gi suma David ben e meki bigi, èn sortu sma ben kisi deki-ati fu dati? (b) San e meki taki safri-ati sma e kon na ini a Kresten gemeente na ini a ten disi?
13 „Mi sa meki bigi gi Yehovah; den safri-ati sma sa yere, èn den sa prisiri” (Psalm 34:2). Na ini a tekst disi, David no e meki bigi gi den sani di ensrefi du. Fu eksempre, a no ben e skepi fu a fasi fa a kori a kownu fu Gat. A ben e frustan taki na Yehovah ben kibri en di a ben de na ini Gat èn taki a ben kan lowe fu di Yehovah yepi en (Odo 21:1). Dati meki David no ben e meki bigi gi ensrefi, ma a ben e meki bigi gi Yehovah. Fu di David gi glori na Yehovah, meki safri-ati sma ben wani kon dini Yehovah. Yesus ben e gi glori tu na a nen fu Yehovah, èn fu dati ede sakafasi sma di ben de klariklari fu teki leri, ben wani dini Yehovah. Na ini a ten disi, safri-ati sma fu ala kondre e kon na ini a gemeente fu salfu Kresten di de na heri grontapu, èn di abi Yesus leki Edeman (Kolosesma 1:18). Den safri-ati sma disi e kisi deki-ati te den e yere fa den dinari fu Gado di abi sakafasi, e prèise En nen. Den e kisi deki-ati tu te den e yere a Bijbel boskopu di den e kon frustan nanga yepi fu a santa yeye fu Gado.—Yohanes 6:44; Tori fu den Apostel 16:14.
Den Kresten konmakandra e tranga a bribi fu wi
14. (a) A de so taki David ben wani prèise Yehovah en wawan? (b) Sortu eksempre Yesus gi di a ben e kon makandra nanga tra bribiman?
14 „O prèise Yehovah makandra nanga mi, un pipel, èn meki wi alamala gi en nen glori” (Psalm 34:3). David no ben wani prèise Yehovah en wawan. Na wan switifasi, a ben gi den sma di ben de nanga en a kari fu gi glori na a nen fu Gado tu. Na a srefi fasi, Yesus Krestes, a Moro Bigi David, ben lobi fu prèise Yehovah makandra nanga trawan. A ben e du dati na ini den snoga, na den fesa di ben e hori na ini a tempel fu Gado di ben de na ini Yerusalem, èn te a ben de nanga den bakaman fu en (Lukas 2:49; 4:16-19; 10:21; Yohanes 18:20). Neleki Yesus, a e gi wi furu prisiri taki wi abi a grani fu prèise Yehovah na ibri okasi makandra nanga tra brada nanga sisa, spesrutu now di wi e „si a dei e kon krosibei”!—Hebrewsma 10:24, 25.
15. (a) Sortu krakti a ben abi tapu den man fu David, di a fruteri den san a ondrofeni? (b) Fa wi e kisi wini fu den konmakandra?
15 „Mi ben aksi Yehovah, èn a ben piki mi, èn a puru mi na ini ala den nowtu fu mi” (Psalm 34:4). A sani disi di ben miti David, ben prenspari gi en. Dati meki a taki moro fara: „Di mi ben nyan pina, mi kari Yehovah, èn a yere mi. Èn a frulusu mi fu ala den banawtu fu mi” (Psalm 34:6). Te wi abi demakandra nanga tra bribiman, dan wi kan fruteri den fa Yehovah yepi wi fu pasa muilek situwâsi, èn disi kan gi den deki-ati. A sani disi e tranga a bribi fu wi brada nanga sisa, neleki fa den sani di David ben e taki, ben tranga a bribi fu den sma di ben e horibaka gi en. Te David ben e fruteri den fa Yehovah yepi en, dan den sma disi ben ’howpu tapu [Yehovah] èn den ben e prisiri trutru, èn den fesi no ben sori srefisrefi taki den e firi syen’ (Psalm 34:5). Aladi den sma disi ben e lowe gi Kownu Saul, toku den no ben e firi syen. Den ben abi na overtoigi taki Gado ben e horibaka gi David, èn yu ben kan si na den fesi taki den ben e prisiri. Na a srefi fasi, sma di wani kon sabi moro fu a tru anbegi èn sosrefi sma di de na ini a tru anbegi wan langa pisi ten, e suku yepi na Yehovah. Fu di densrefi ondrofeni fa Yehovah yepi den, meki den abi a fasti bosroiti fu tan getrow na Gado.
De nanga tangi fu a yepi di den engel e gi
16. Fa Yehovah gebroiki den engel fu en fu kibri wi?
16 „Na engel fu Yehovah e seti ensrefi lontu den wan di e frede Gado, èn a e frulusu den” (Psalm 34:7). David no ben denki taki Yehovah ben o frulusu en wawan. A tru taki David ben de a salfuwan fu Yehovah, a wan di ben o tron kownu fu Israel. Ma a ben sabi tu taki Yehovah e gebroiki den engel fu en fu kibri ala den getrow anbegiman fu en, awinsi sortu posisi den abi. Na ini a ten fu wi, tru anbegiman ondrofeni tu taki Yehovah kibri den. Na a ten di den Nazisma ben e tiri Doisrikondre, èn sosrefi na ini Angola, Malawi, Mosambik, èn na ini furu tra kondre, den tiriman pruberi fu kiri ala den Kotoigi fu Yehovah. Den no ben man du dati. Na presi fu dati, a pipel fu Yehovah na ini den kondre dati tan prèise a nen fu Gado moro nanga moro. Fa den ben kan du dati? Fu di Yehovah e gebroiki den santa engel fu en fu kibri a pipel fu en èn fu tiri den.—Hebrewsma 1:14.
17. Na sortu fasi den engel fu Gado e yepi wi?
17 Boiti dati, den engel fu Yehovah kan meki sani waka na so wan fasi taki den wan di e meki trawan naki futu, e komoto na mindri a pipel fu Yehovah (Mateyus 13:41; 18:6, 10). Èn son leisi, sondro taki wi sabi, den engel e puru sani na wi pasi di ben kan gens a diniwroko di wi e du gi Gado, èn den e kibri wi gi sani di kan pori wi matifasi nanga Yehovah. San moro prenspari, na taki den e yepi wi te wi e preiki a „têgo bun nyunsu” gi ala sortu sma, srefi gi sma di e tan na presi pe ogri kan miti den Kotoigi di e du a preikiwroko (Openbaring 14:6). Na ini den buku di Yehovah Kotoigi tyari kon na doro, yu kan leisi someni ondrofenitori di e buweisi taki den engel e tiri a wroko trutru. * Den sortu ondrofenitori disi furu tumusi fu taki dati a no engel e horibaka gi a wroko.
18. (a) San wi musu du efu wi wani taki den engel yepi wi? (b) San wi sa go luku na ini a tra artikel?
18 Efu wi wani taki den engel tiri wi èn kibri wi doronomo, dan wi musu tan prèise a nen fu Yehovah awinsi sma e gens wi. Memre taki na engel fu Gado ’e seti ensrefi soso lontu den wan di e frede [Yehovah]’. San dati wani taki? San a wani taki fu frede Gado, èn fa wi kan kisi frede gi Gado? Fu san ede wan lobi-ati Gado wani taki wi frede en? Wi sa poti prakseri na den aksi disi na ini a tra artikel.
[Futuwortu]
^ paragraaf 17 Luku a buku Jehovah’s Getuigen— Verkondigers van Gods Koninkrijk, bladzijde 550; a Jaarboek van Jehovah’s Getuigen 2005, bladzijde 54; A Waktitoren fu 1 maart 2000, bladzijde 5, 6; De Wachttoren fu 1 yanuari 1991, bladzijde 27; nanga De Wachttoren fu 15 februari 1991, bladzijde 26.
San yu ben sa piki?
• Sortu tesi David ben kisi di a ben yongu?
• Te wi e luku na eksempre fu David, dan san musu de a moro prenspari sani gi wi?
• Fa wi e prakseri fu den Kresten konmakandra?
• Fa Yehovah e gebroiki den engel fu en fu yepi wi?
[Aksi fu a tori disi]
[Karta na tapu bladzijde 21]
(Efu yu wani si pe den sani disi skrifi, luku a tijdschrift)
Rama
Gat
Ziklag
Gibea
Nob
Yerusalem
Betlehem
Adulam
Kela
Hebron
Sif
Koresa
Karmel
Maon
En-gedi
Sowtu Se
[Sma di abi a reti fu a karta]
Map: Based on maps copyrighted by Pictorial Archive (Near Eastern History) Est. and Survey of Israel
[Prenki na tapu bladzijde 21]
Aladi David ben e lowe gi Saul, toku a ben gi glori na a nen fu Yehovah
[Prenki na tapu bladzijde 23]
A bribi fu wi e kon moro tranga te wi arki den moi ondrofenitori na den Kresten konmakandra fu wi