Wi sa abi wan koloku libi te wi abi frede gi Yehovah
Wi sa abi wan koloku libi te wi abi frede gi Yehovah
„Frede Yehovah, un santawan fu en, bika den wan di e frede en, no sa mankeri noti.”—PSALM 34:9.
1, 2. (a) San den fesiman fu Krestenhèit e leri fu a frede di sma musu abi gi Gado? (b) Sortu aksi wi sa piki now?
FURU TRON, den kerki fesiman fu Krestenhèit e leri sma taki Gado e strafu sondusma na ini hel fu têgo. Den e du disi fu meki sma abi frede gi Gado. Ma a leri disi no tru, fu di Bijbel e taki dati Yehovah na wan Gado fu lobi èn fu retidu (Genesis 3:19; Deuteronomium 32:4; Romesma 6:23; 1 Yohanes 4:8). Yu abi tra kerki fesiman fu Krestenhèit di e leri sma taki den no abi fu frede Gado kwetikweti. Na presi fu dati, den e leri sma taki Gado no e span nanga den sani di wi e du, èn taki Gado feni pikinmoro ala sma bun awinsi fa den e libi. Ma a sani disi srefi no e kruderi nanga Bijbel.—Galasiasma 5:19-21.
2 Fu taki en leti, Bijbel e gi wi deki-ati fu abi frede gi Gado (Openbaring 14:7). A sani disi e meki wan tu aksi opo kon. Fu san ede wan lobi-ati Gado wani taki wi musu frede en? Fa Gado wani taki wi musu frede en? Fa wi kan kisi wini te wi abi frede gi Gado? Wi sa poti prakseri na den aksi disi te wi sa taki moro fara fu Psalm 34.
Fu san ede wi musu abi frede gi Gado
3. (a) Fa yu e denki fu a komando di wi kisi taki wi musu abi frede gi Gado? (b) Fu san ede den sma di abi frede gi Yehovah de koloku?
3 Fu di Yehovah na wi Mekiman èn a Tiriman fu hemel nanga grontapu, meki wi musu abi frede gi en (1 Petrus 2:17). Ma disi no wani taki dati wi musu beifi gi en, leki a de wan ogri-ati gado. Na presi fu dati, wi musu abi dipi lespeki gi Yehovah. Te wi abi frede gi Gado, dan wi no sa wani du sani di a no lobi. A de wan bun sani fu abi frede gi Gado èn a e tyari wini gi wi. A no e meki wi firi brokosaka, èn a no e meki wi beifi. Yehovah, „a koloku Gado”, wani taki libisma musu prisiri fu a libi (1 Timoteyus 1:11). Ma efu wi wani prisiri fu a libi, dan wi musu du san Gado e aksi fu wi. Gi furu sma, disi wani taki dati den musu kenki den libi. Ala sma di e tyari den kenki disi kon na ini den libi, sa si taki a psalm skrifiman David ben abi leti di a taki: „Tesi èn si taki Yehovah bun, o un pipel; koloku fu a tranga man di e suku kibri na en. Frede Yehovah, unu santawan fu en, bika den wan di e frede en no sa mankeri noti” (Psalm 34:8, 9). Den sma di e frede Yehovah no sa mankeri noti. Ma den sa kisi wini fu têgo, fu di den abi wan bun matifasi nanga Gado.
4. Sortu dyaranti David nanga Yesus gi den sma di ben e horibaka gi den?
4 Luku taki David gi grani na den man fu en fu di a kari den „santawan”. Disi ben fiti na ini a ten dati, fu di den ben de memre fu a santa pipel fu Gado. Den ben horibaka gi David, aladi den ben kan lasi den libi. Aladi den ben e lowe gi Kownu Saul, toku David no ben e tweifri taki Yehovah ben o tan gi den san den abi fanowdu. David ben skrifi: „Den yongu lew nanga neki wiwiri abi pikinso èn angri e kiri den; ma nowan bun sani no sa mankeri den wan di e suku Yehovah” (Psalm 34:10). Yesus ben gi den bakaman fu en a srefi dyaranti taki Yehovah o sorgu gi den.—Mateyus 6:33.
5. (a) Sortu libi furu fu den bakaman fu Yesus ben abi? (b) Fa Yesus sori den bakaman fu en suma den musu frede?
5 Furu fu den Dyu di ben e arki Yesus no ben abi en so bun, fu di den ben de pôtisma. Dati meki Yesus „ben sari den, bika sma ben pina den èn den ben waka bruyabruya leki skapu di no abi skapuman” (Mateyus 9:36). Yu denki taki den mofinawan disi ben o abi a deki-ati fu waka na baka Yesus? Fu man du dati, den no ben musu frede libisma, ma den ben musu abi frede gi Yehovah. Yesus ben taki: „No frede den sma di kan kiri yu èn baka dati den no man du noti moro. Ma mi o taigi unu suma un musu frede: Frede a sma di, te a kiri wan sma kaba, abi a makti fu trowe en go na ini Gehena. Iya, mi e taigi unu: na a Sma disi un musu frede. A no de so, taki sma e seri feifi pikin fowru gi tu sensi di no warti furu? Toku Gado no e frigiti nowan fu den. Ma a teri srefi ala den wiwiri na un ede. No frede; un warti moro leki furu pikin fowru.”—Lukas 12:4-7.
6. (a) Sortu sani di Yesus taki ben gi Kresten deki-ati? (b) Fu san ede wi kan taki dati Yesus gi wi a moro bun eksempre fa wi musu frede Gado?
6 Te sma di abi frede gi Yehovah e kisi gens fu feanti di wani tapu den fu dini Gado, dan den musu memre a rai fu Yesus, di a taki: „Efu wan sma e taigi trawan taki mi nanga en na wán, dan a Manpikin fu libisma o taigi den engel fu Gado tu taki en nanga a sma dati na wán. Ma efu wan sma e taigi trawan taki a no sabi mi, dan mi o taigi den engel fu Gado tu taki mi no sabi a sma” (Lukas 12:8, 9). Den wortu disi e gi Kresten deki-ati, spesrutu den brada nanga sisa na ini kondre pe den no mag preiki a bun nyunsu èn pe den no man hori konmakandra. Den sma disi e tan prèise Yehovah na Kresten konmakandra èn na ini a preikiwroko, ma den e du dati na wan kibri fasi (Tori fu den Apostel 5:29). Yesus gi wi a moro bun eksempre fu a fasi fa wi musu „frede Gado” (Hebrewsma 5:7). A profeititori na ini Yesaya ben taki fu Yesus: „A yeye fu Yehovah musu kon na en tapu, a yeye . . . fu a frede gi Yehovah; èn a frede gi Yehovah sa gi en prisiri” (Yesaya 11:2, 3). Sobun, Yesus na a moro bun sma di kan sori wi sortu wini a abi te wi abi frede gi Gado.
7. (a) Fa Kresten kan du san David taki na ini Psalm 34:11? (b) Fa papa nanga mama kan teki a bun eksempre fu David?
7 Kresten di e teki na eksempre fu Yesus èn di e gi yesi na den komando fu en, e du a srefi sani di David ben aksi den man fu en. David ben taki: „Kon, un manpikin, arki mi; mi sa leri unu fu abi frede gi Yehovah” (Psalm 34:11). David ben gwenti fu kari den man fu en „manpikin”, fu di den ben si en leki a fesiman fu den. David fu en sei, yepi den man fu en fu abi frede gi Gado. Na so fasi den ben o abi wánfasi èn den ben o prisiri Gado ati. Dati na wan moi eksempre gi Kresten papa nanga mama! Yehovah gi papa nanga mama a frantwortu fu ’tan kweki den manpikin nanga den umapikin fu den nanga a leri fu Yehovah èn fu frumane den, so taki den kan kisi a denki fu en’ (Efeisesma 6:4). Te papa nanga mama e taki nanga den pikin fu sani di abi fu du nanga na anbegi, èn te den e studeri Bijbel nanga den doronomo, dan na so fasi den e yepi den pikin fu frede Yehovah èn fu abi wan koloku libi.—Deuteronomium 6:6, 7.
Fa wi kan sori taki wi abi frede gi Gado?
8, 9. (a) Fu san ede a bun fu libi na wan fasi di e sori taki wi abi frede gi Gado? (b) Fa wi musu gebroiki wi tongo?
8 Soleki fa wi si kaba, te wi e frede Yehovah dan dati no wani taki dati wi no kan de koloku. David ben aksi: „Suma na a man di e prisiri fu a libi, di lobi nofo dei fu kan si san bun?” (Psalm 34:12) A de krin taki efu wan sma wani libi langa èn efu a wani taki sani waka bun nanga en, dan a musu abi frede gi Yehovah. A makriki fu taki: „Mi abi frede gi Gado.” Ma a no makriki fu tyari wisrefi na wan fasi di e sori taki wi abi frede gi Gado trutru. Dati meki David ben taki tu fa wi kan sori taki wi abi frede gi Gado trutru.
9 „Luku bun taki yu no e gebroiki yu tongo fu du ogri, èn no gebroiki yu mofo fu kori sma” (Psalm 34:13). Nanga yepi fu santa yeye, na apostel Petrus ben taki fu a pisi disi fu Psalm 34, baka di a gi Kresten a rai fu sori lobi gi makandra (1 Petrus 3:8-12). Te a psalm e taki dati wi no musu gebroiki wi tongo fu taki ogri, dan dati wani taki dati wi no musu taki takru fu tra sma. Na presi fu dati, wi sa pruberi fu taki nanga trawan fu sani di sa gi den deki-ati, èn wi no sa frede fu taki san tru.—Efeisesma 4:25, 29, 31; Yakobus 5:16.
10. (a) San na den ogri di wi no musu du? (b) Sortu bun sani wi kan du?
10 „No du ogri, èn du san bun; suku vrede, èn du muiti fu kisi en” (Psalm 34:14). Wi e tan fara fu sani di Gado no feni bun, soleki hurudu, seks buku nanga seks felem, fufuru, afkodrei, ogridu, drungufasi, nanga drugs. Wi no e luku noso arki sani di abi fu du nanga den ogri sani disi (Efeisesma 5:10-12). Na presi fu dati, wi e gebroiki wi ten fu du bun sani. A moro bun sani di wi kan du, na fu preiki a Kownukondre boskopu doronomo, èn fu meki disipel. Na so fasi wi e yepi tra sma fu kisi frulusu (Mateyus 24:14; 28:19, 20). A bun tu fu sreka wisrefi gi den Kresten konmakandra èn fu go na den. Wi kan gi moni fu horibaka gi a wroko di wi e du na heri grontapu, wi kan sorgu gi den Kownukondre zaal fu wi, èn wi kan poti prakseri na Kresten brada nanga sisa di no abi en so bun.
11. (a) Fa David srefi sori taki a ben e suku vrede? (b) San yu kan du fu ’suku vrede’ na ini a gemeente?
11 David de wan bun eksempre gi wi, fu di a ben e suku vrede. Tu leisi a kisi na okasi fu kiri Saul. Ma ala tu leisi, a no du Saul nowan ogri. Bakaten a ben e taki na wan lespeki fasi nanga a kownu fu di a ben e howpu taki en nanga Saul ben kan kon bun baka (1 Samuel 24:8-11; 26:17-20). San wi kan du te wan sani pasa di kan tyari trobi kon na ini a gemeente? Wi musu „suku vrede, èn du muiti fu kisi en”. Sobun, efu wi si taki wan problema de na mindri wi nanga wan tra bribiman, dan wi musu du san Yesus taki: „Go meki vrede nanga yu brada fosi.” Baka dati, wi kan du tra sani di abi fu du nanga a tru anbegi.—Mateyus 5:23, 24; Efeisesma 4:26.
Wi e kisi furu blesi te wi abi frede gi Gado
12, 13. (a) Sortu blesi sma e kisi na ini a ten disi, te den abi frede gi Gado? (b) Fa Yehovah o blesi den getrow anbegiman fu en heri esi?
12 „Den ai fu Yehovah e luku den regtfardikisma, èn den yesi fu en e yere te den e bari fu kisi yepi” (Psalm 34:15). Den sani di Gado du gi David e sori taki den wortu disi tru. Na ini a ten disi, wi de koloku trutru èn wi abi wan korostu firi, fu di wi sabi taki Yehovah e luku wi. Wi de seiker taki ala ten a sa gi wi den sani di wi abi fanowdu, srefi te wi abi bigi problema. Wi sabi taki heri esi, Gog fu Magog o kon fu feti nanga ala tru anbegiman, èn taki heri esi a „frede dei fu Yehovah” o kon (Yoèl 2:11, 31; Esekièl 38:14-18, 21-23). Awinsi san o miti wi na a ten dati, den wortu fu David sa kon tru, di a taki: „Den ben bari kari, èn Yehovah srefi ben yere den, èn a frulusu den fu ala den banawtu fu den.”—Psalm 34:17.
13 Na a ten dati, wi sa prisiri trutru fu si fa Yehovah o gi glori na a bigi nen fu en! Wi sa kisi lespeki gi Yehovah, iya moro leki oiti bifo, èn ala den feanti fu wi sa kisi pori. „Yehovah e atibron tapu den wan di e du ogri, èn a o meki taki ala sma na grontapu frigiti den” (Psalm 34:16). A sa de wan bigi blesi gi wi te wi kisi frulusu èn te wi sa libi na ini a regtfardiki nyun grontapu fu Gado!
Den pramisi fu Yehovah e yepi wi fu horidoro
14. San sa yepi wi fu horidoro te wi e kisi tesi?
14 Efu wi wani tan gi yesi na Yehovah na ini a kruka grontapu disi di lai nanga ogridu, dan wi musu horidoro. Te wi abi frede gi Gado, dan dati sa yepi wi fu gi yesi na Yehovah. Fu di wi e libi na ini den muilek ten disi, meki sonwan fu den futuboi fu Yehovah e kisi bigi problema di e meki den lasi-ati, èn di e meki den firi brokosaka. Ma den kan de seiker taki efu den e frutrow tapu Yehovah, a sa yepi den fu horidoro. Den wortu fu David e gi wi trowstu trutru. A ben taki: „Yehovah de krosibei fu den wan di lasi-ati; èn den wan di e firi brokosaka, a e frulusu” (Psalm 34:18). David e gi wi a deki-ati disi tu: „Den rampu fu a regtfardikiwan furu, ma Yehovah e frulusu en fu den alamala” (Psalm 34:19). Awinsi o furu tesi wi e kisi, Yehovah tranga nofo fu frulusu wi.
15, 16. (a) San David yere syatu baka di a skrifi Psalm 34? (b) Sortu dyaranti di Gado gi wi, sa yepi wi fu horidoro te wi e kisi tesi?
15 Syatu baka di David skrifi Psalm 34, a ben yere sortu ogri miti den sma na ini a foto Nob. A ben yere taki Saul kiri ala den sma èn taki a kiri furu fu den priester tu. Di David yere san pasa, a ben sari trutru. A ben sabi taki na fu di a go na Nob, meki Saul kiri den sma drape! (1 Samuel 22:13, 18-21) A no de fu taki dati David suku yepi na Yehovah, èn a kisi trowstu fu di a ben de seiker taki „den regtfardikiwan” sa kisi wan opobaka na ini a ten di e kon.—Tori fu den Apostel 24:15.
16 Na ini a ten disi, a howpu di wi abi na ini na opobaka e gi wi krakti tu. Wi sabi taki den feanti fu wi no o man du ogri nanga wi fu têgo, awinsi san den e du (Mateyus 10:28). David ben abi a srefi overtoigi di a skrifi: „A e kibri ala den bonyo fu [a regtfardikiwan]; nowan bonyo fu en broko” (Psalm 34:20). A vers disi ben kon tru di Yesus dede. Aladi sma kiri Yesus na wan ogri-ati fasi, toku nowan fu den bonyo fu en ben „broko” (Yohanes 19:36). Psalm 34:20 abi fu du tu nanga den salfu Kresten èn „den tra skapu” di e horibaka gi den. A tekst disi e gi den a dyaranti taki awinsi sortu tesi den e kisi, den no sa abi takru bakapisi fu ala ten. Na wan agersifasi, noiti den bonyo fu den sa broko.—Yohanes 10:16.
17. Sortu rampu o miti den sma di no lobi a pipel fu Yehovah èn di no abi berow?
17 Sani sa waka tra fasi gi den ogrisma. Heri esi ogri o miti den fu di den no du bun sani. „Rampu o miti den ogriwan, èn den o dede. Den sma di abi bita-ati gi den regtfardikiwan sa kisi krutu” (Psalm 34:21). Ala sma di wani gens a pipel fu Gado, sa ondrofeni a moro bigi rampu. Te Yesus Krestes o kon, dan „a strafu di den sma disi o kisi na taki den sa kisi pori fu têgo”.—2 Tesalonikasma 1:9.
18. Fu san ede wi kan taki dati a „bigi ipi sma” e kisi frulusu na ini a ten disi kaba, èn sortu blesi den o kisi na ini a ten di e kon?
18 A psalm fu David e tapu nanga den wortu disi: „Yehovah e frulusu a sili fu den dinari fu en; èn nowan sma di e suku kibri na en, sa kisi krutu” (Psalm 34:22). David ben tiri pikinmoro 40 yari leki kownu kaba, di a taki: „Gado frulusu mi sili fu ala den banawtu” (1 Kownu 1:29). Neleki David, dan heri esi den wan di abi frede gi Yehovah sa prakseri nanga prisiri fa Yehovah frulusu den fu sondu èn fu ala den tesi fu den. Furu fu den salfu Kresten go na hemel kaba. Na ini a ten disi, „wan bigi ipi sma” e dini Gado makandra nanga den brada fu Yesus di de na grontapu ete. Dati meki den abi wan bun banti nanga Yehovah. Disi de so fu di den e bribi taki a brudu fu Yesus kan frulusu den. Na a Dusun Yari Tiri fu Krestes, Gado sa gebroiki a frulusu-ofrandi fu Yesus fu blesi den dorodoro, teleki den tron volmaakti libisma.—Openbaring 7:9, 14, 17; 21:3-5.
19. Sortu fasti bosroiti den memre fu a „bigi ipi” abi?
19 Fu san ede a „bigi ipi” anbegiman fu Gado sa kisi ala den blesi disi? Fu di den abi a fasti bosroiti fu tan frede Yehovah, fu abi dipi lespeki gi en, èn fu gi yesi na en doronomo. Fu tru, te wi abi frede gi Yehovah, dan wi e prisiri fu a libi nownow kaba èn a e yepi wi fu „grabu a trutru libi hori bun steifi”. Iya, wi sa libi fu têgo na ini a nyun grontapu fu Gado.—1 Timoteyus 6:12, 18, 19; Openbaring 15:3, 4.
Yu e memre disi ete?
• Fu san ede wi musu abi frede gi Gado, èn san dati wani taki?
• Fa wi sa tyari wisrefi te wi abi frede gi Gado?
• Sortu blesi wi sa kisi te wi abi frede gi Gado?
• Sortu pramisi fu Gado e yepi wi fu horidoro?
[Aksi fu a tori disi]
[Prenki na tapu bladzijde 26]
Den wan di abi frede gi Yehovah, e du a diniwroko fu den na wan koni fasi te lanti tapu a preikiwroko
[Prenki na tapu bladzijde 28]
A moro bun sani di wi kan du, na fu preiki a bun nyunsu fu a Kownukondre gi tra sma