„A ben wani nomonomo taki wi kon tan na en”

SWITIFASI na wan sani di sma fu den kondre na Owstusei gwenti fu sori gi trawan. Fu eksempre, te wan sma e kon fisiti wan osofamiri na ini India sondro taki den fruwakti dati, dan nofo tron den e gi a fisitiman a nyanyan di densrefi abi fanowdu. Na ini Iran, mama abi a gwenti fu lai den ijskasi fu den nanga furu nyanyan ala ten, so taki den kan sori switifasi gi sma di e kon fisiti den sondro taki den fruwakti dati.

Furu sma di kari na ini Bijbel, ben lobi fu gi sani bogobogo. Wan tumusi moi eksempre na a di fu na uma Lidia di ben e libi na ini Filipi, a moro prenspari foto fu a distrikt Masedonia. A kan taki na uma disi ben teki a Dyu bribi. Tapu wan Sabatdei, na apostel Paulus nanga den sma di ben e teki waka nanga en, si Lidia nanga wan tu tra uma e tanapu na a syoro fu wan liba dorosei fu Filipi. Yehovah opo Lidia en ati so taki a ben kan poti prakseri na den sani di Paulus ben taki drape. Leki bakapisi fu dati, Lidia nanga wan tu memre fu en osofamiri teki dopu. Baka dati a begi Paulus nanga den trawan: „Efu un feni taki mi na wan sma di de getrow na Yehovah, dan kon tan na ini mi oso.” Lukas, di ben e teki waka makandra nanga Paulus, ben taki: „A ben wani nomonomo taki wi kon tan na en.”—Tori fu den Apostel 16:11-15.

Neleki Lidia, Kresten na ini a ten disi e sori switifasi gi den brada nanga sisa fu den. Iya, den e sori switifasi tu gi kring-opziener nanga a wefi fu den. Den Kresten dati trutru wani taki den kring-opziener nanga a wefi fu den e ’kon tan nanga den’. Boiti dati, den Kresten di e sori switifasi gi trawan e kisi deki-ati fu den takimakandra di den abi nanga den brada nanga sisa disi di de den mati. Aladi furu Yehovah Kotoigi no gudu, toku den „abi a gwenti fu gi sma wan switikon” (Romesma 12:13; Hebrewsma 13:2). Fu di den lobi fu gi sani, meki den de koloku. Yesus ben abi leti di a taki: „Wan sma sa de moro koloku te a e gi sani, leki te a e kisi sani.”—Tori fu den Apostel 20:35.