A fasi fa Hana kisi wan korostu firi

WAN getrow uma e begi Yehovah nanga tranga sten fu prèise En. Na uma disi ben e firi sari fosi, ma now a e firi prisiri. A de neleki Gado opo en puru na ini a doti.

Na uma disi na Hana. Fa a du kon taki a e firi heri tra fasi? Fu san ede a e firi prisiri now? San wi kan leri fu a tori fu en? Meki wi go luku a Bijbel tori fu Hana, fu kisi piki tapu den aksi disi.

Wan osofamiri di abi problema

Hana na wán fu den tu wefi fu Elkana, wan Leifisma di e libi na ini a kontren fu Efraim (1 Samuel 1:1, 2a; 1 Kroniki 6:33, 34). Gado noiti no ben wani taki wan man ben musu abi moro leki wán wefi. Ma toku a Wet di Gado ben gi Moses ben gi pasi taki dati pasa, èn a Wet disi ben e sori krin fa sani ben musu waka na ini so wan osofamiri. Na osofamiri fu Elkana e anbegi Yehovah. Ma nofo tron te wan man abi moro leki wán wefi, dan a sani dati e tyari trobi kon. Disi de krin fu si na ini na osofamiri fu Elkana.

Hana no man kisi pikin, ma Penina, a tra wefi fu Elkana, abi wan tu pikin. Penina e tanteri Hana.—1 Samuel 1:2b.

Te den uma fu Israel no man kisi pikin, dan den e si en leki wan syen, èn den e firi srefi leki den no warti na ini Gado ai. Ma noti no e sori taki Gado no lobi Hana fu di a no man kisi pikin. Ma na presi taki Penina e trowstu Hana, a e tanteri Hana fu di a no man kisi pikin.

Den e go na a santapresi fu Yehovah

Aladi problema de na ini na osofamiri fu Elkana, toku ala yari den e go na a santapresi fu Yehovah na ini Silo, fu tyari srakti-ofrandi. Soleki fa a sori, dan den e waka sowan 60 kilometer go-kon. A no de fu taki dati a hebi srefisrefi gi Hana fu de na den okasi disi, fu di Penina nanga den pikin fu en e kisi wan tu pisi fu a meti di den e tyari leki ofrandi, ma Hana e kisi wán pisi nomo. Penina e teki den okasi disi fu tanteri Hana, èn leki bakapisi fu dati Hana e sari fu di a gersi leki Yehovah „tapu en bere”. Fu di Hana musu teki a pina disi ibri yari, meki a e krei èn a no wani nyan. Na presi taki Hana e firi prisiri na den okasi disi, a e sari. Ma toku a e tan go na a santapresi fu Yehovah.—1 Samuel 1:3-7.

Yu e si a bun eksempre di Hana e gi wi? Te yu e firi brokosaka, dan san yu e du? A de so taki yu e tapu fu abi demakandra nanga tra bribiman? Hana no du dati. A tan abi demakandra nanga den tra anbegiman fu Yehovah. Awinsi wi abi problema, toku wi musu tan abi demakandra nanga den brada nanga sisa fu wi.—Psalm 26:12; 122:1; Odo 18:1; Hebrewsma 10:24, 25.

Elkana pruberi fu trowstu Hana, èn fu kon sabi san e trobi en. A taki: „Hana, fu san ede yu e krei, èn fu san ede yu no e nyan, èn fu san ede yu ati e firi sari? Mi no bun moro leki tin manpikin gi yu?” (1 Samuel 1:8) Kande Elkana no sabi taki Penina e libi takru nanga Hana, èn a kan taki Hana no wani taki sma kon sabi sortu problema a abi. Awinsi fa no fa,  Hana ben abi bribi èn dati meki a begi Yehovah fu gi en wan korostu firi.

Hana e pramisi Gado wan sani

Na a santapresi fu Yehovah, den Israelsma abi a gwenti fu nyan a meti di den ben tyari leki ofrandi. Te Hana komoto na ini a kamra pe den sma e nyan, dan a e begi Gado (1 Samuel 1:9, 10). A e begi: „Ke Yehovah fu den legre, efu trutru yu e prakseri a nowtu fu yu umasrafu èn efu yu e memre mi trutru, efu yu no e frigiti yu umasrafu èn efu trutru yu e gi yu uma srefi wan manpikin, dan mi sa gi yu, Yehovah, a manpikin disi. Ala den dei fu en libi a sa dini yu, èn nowan sma sa koti en edewiwiri.”—1 Samuel 1:11.

Hana e aksi Yehovah wan spesrutu sani. A e aksi Yehovah fu gi en wan pikin, èn a e pramisi Gado taki a pikin o dini En leki wan Nasireisma en heri libi langa (Numeri 6:1-5). Aladi Hana pramisi Gado a sani disi, toku en masra musu agri nanga en tu, èn a fasi fa Elkana handri bakaten e sori taki a ben agri nanga en.—Numeri 30:6-8.

A fasi fa Hana e begi, e meki Granpriester Eli denki taki a drungu. A e si fa Hana en mofo e beifi, ma a no e yere noti, fu di Hana e begi na ini en ati. A e begi fayafaya (1 Samuel 1:12-14). Prakseri fa Hana e firi te Eli e bari en fu di a feni taki a drungu! Ma toku a e taki na wan lespeki fasi nanga a granpriester. Te Eli kon frustan taki Hana ben e begi ’fu di a e broko en ede, èn fu di wan sani e trobi en’, dan a e taki: „Meki a de so taki a Gado fu Israel gi yu san yu aksi en na ini begi” (1 Samuel 1:15-17). Ne Hana e go nyan baka, èn ’en fesi no e sori moro taki a e broko en ede nanga a problema fu en’.—1 Samuel 1:18.

San wi kan leri fu a tori disi? Te wi e taki nanga Yehovah fu den problema fu wi, dan wi kan fruteri en fa wi e firi, èn wi kan aksi en nanga wi heri ati fu yepi wi. Efu wi no man du noti moro fu lusu a problema, dan wi musu libi a tori gi Yehovah. Disi na a moro bun sani di wi kan du.—Odo 3:5, 6.

Te den futuboi fu Yehovah e begi En fayafaya, dan a no de fu taki dati neleki Hana, den sa kisi wan korostu firi. Paulus ben taki disi fu a begi di wi musu begi: „No broko un ede nanga nowan sani, ma begi Gado ala san unu wani, èn du dati fayafaya sosrefi, èn taki en tangi tu; èn a vrede fu Gado di bigi moro leki san libisma man frustan, sa kibri un ati èn un frustan nanga yepi fu Krestes Yesus” (Filipisma 4:6, 7). Te wi e trowe wi hebi tapu Yehovah, dan wi musu libi den gi En. Te wi du dati, dan neleki Hana, wi no sa abi fu broko wi ede moro nanga a tori.—Psalm 55:22.

A leni Yehovah en manpikin

Now Gado e poti prakseri na Hana. Hana e kon de nanga bere, èn a e kisi wan manpikin (1 Samuel 1:19, 20). Dyaso Gado srefi e meki wan sma gebore di sa tron wan futuboi fu en, èn soleki fa Bijbel e sori, dan a sani disi no pasa furu leisi. Samuel, a manpikin fu Elkana nanga Hana, ben o tron wan profeiti. A ben o du prenspari sani fu seti a kownu-oso fu Israel.

A no de fu taki dati Samuel de yonguyongu ete te Hana e bigin leri en sani fu Yehovah. Ma yu denki taki a frigiti san a pramisi Gado? Nôno, kwetikweti! Hana e taki: „So esi leki mi puru a boi na bobi, mi musu tyari en go, èn a musu kon na fesi Yehovah èn a musu tan drape te ten di no skotu.” A kan taki Samuel ben abi sowan dri yari di Hana puru en na bobi, èn a tyari en go na a santapresi fu Yehovah, neleki fa a ben pramisi.—1 Samuel 1:21-24; 2 Kroniki 31:16.

Baka te Hana nanga en masra tyari wan ofrandi gi Yehovah, den e tyari Samuel gi Eli. A musu de so taki Hana e hori na anu fu a boi fu en, te a e taigi Eli: „Mi e begi yu pardon,  mi masra! Mi e sweri na yu, mi masra, mi na a uma di ben e tanapu nanga yu dyaso fu begi Yehovah. Na fu a boi disi mi begi Yehovah, di mi ben e begi en fu du san mi aksi. Èn mi fu mi sei, leni en na Yehovah. Ala den dei fu en libi, a sa de wan sma di mi begi Yehovah fu gi mi.” Na so Samuel bigin du spesrutu diniwroko gi Gado, èn a ben o du dati en heri libi langa.—1 Samuel 1:25-28; 2:11.

A no de fu taki, dati bakaten Hana no e frigiti Samuel. Bijbel e taki: „En mama ben gwenti meki wan dyakti sondro mow gi en, èn ala yari a ben e tyari dati gi en te a ben e go makandra nanga en masra fu tyari wan ofrandi ibri yari” (1 Samuel 2:19). A no de fu taki dati Hana e tan begi gi Samuel. Te a e go luku en ibri yari, dan a musu de so taki a e gi en deki-ati fu tan dini Gado na wan getrow fasi.

Na wan fu den okasi dati, Eli e blesi a papa nanga mama fu Samuel, èn a e taigi Elkana: „Meki Yehovah gi yu wan pikin fu a wefi disi na presi fu a sani di leni, èn di unu ben leni Yehovah.” Na so a pasa tu, taki Hana nanga Elkana kisi ete dri manpikin nanga tu umapikin.—1 Samuel 2:20, 21.

Elkana nanga Hana de wan moi eksempre gi Kresten papa nanga mama! Fu taki en leti, furu papa nanga mama ben de klariklari fu leni Yehovah den manpikin nanga umapikin fu den. Den gi den pikin fu den deki-ati fu go du furuten diniwroko farawe fu a presi pe den e tan. Den papa nanga mama disi musu kisi prèise gi a muiti di den e meki. Èn Yehovah sa blesi den.

Hana e taki Yehovah tangi fu di a breiti

Hana di no ben man kisi pikin fosi, breiti trutru now! Aladi furu begi fu umasma no skrifi na ini Bijbel, toku tu begi fu Hana skrifi na ini Bijbel. Na ini a fosi begi, a e taki fa Penina ben e tanteri en, èn na ini a di fu tu begi, a e taigi Yehovah tangi fu di a breiti. Na so Hana e bigin a begi fu en: „Yehovah meki mi ati prisiri.” A breiti fu di „srefi a sma di no man kisi pikin, kisi wan pikin”, èn a e prèise Yehovah leki „a Sma di e hei sma, èn a Sma di e opo den mofinawan puru na ini a doti”. Fu tru, „a e puru a pôtiwan na ini na asisi peti”.—1 Samuel 2:1-10.

A Bijbel tori fu Hana e sori wi taki den hati sani di trawan e du nanga wi, kan meki wi firi sari. Ma den tesi disi no musu meki wi lasi a prisiri di wi abi na ini a diniwroko fu Yehovah. Yehovah na a Yereman fu begi, a Sma di e yepi a getrow pipel fu en te den e suku yepi na en. Na en e frulusu den te den de na nowtu, a e meki den firi korostu trutru, èn a e blesi den na tra fasi tu.—Psalm 22:23-26; 34:6-8; 65:2.

[Prenki na tapu bladzijde 17]

Hana leni Yehovah en manpikin Samuel