A krakti di engel abi tapu a libisma famiri

„Baka dati mi si wan tra engel e saka komoto fu hemel, èn a ben abi furu makti . . . Ne a bari nanga wan tranga sten, taki: ’A fadon! Babilon a Bigiwan fadon!’”—OPENBARING 18:1, 2.

1, 2. Fa wi du sabi taki Yehovah e gebroiki engel fu du a wani fu en?

DI NA owru apostel Yohanes ben de na ini katibo na tapu na èilanti Patmos, dan a kisi wan fisyun. Nanga yepi fu „santa yeye” a si san ben o pasa na ini „a dei fu Masra”. A dei dati bigin di Yesus Krestes tron Kownu na ini 1914, èn a e go doro te na a kaba fu a Dusun Yari Tiri fu en.—Openbaring 1:10.

² Yohanes no ben kisi a fisyun disi langalanga fu Yehovah. Gado ben seni wan tra sma fu gi Yohanes a fisyun. Openbaring 1:1 e taki: „Wan openbaring fu Yesus Krestes, di Gado gi en, fu sori den srafu fu Gado den sani di musu pasa dyonsro. Èn Yesus seni en engel go fu sori Yohanes di de a srafu fu Gado.” Yehovah gi Yesus a boskopu, èn Yesus seni wan engel fu fruteri Yohanes den tumusi moi sani di ben o pasa na ini „a dei fu Masra”. Baka dati, Yohanes „si wan tra engel e saka komoto fu hemel, èn a ben abi furu makti”. Sortu wroko na engel dati ben kisi fu du? „A bari nanga wan tranga sten, taki: ’A fadon! Babilon a Bigiwan fadon!’” (Openbaring 18:1, 2) A makti engel disi ben abi a grani fu meki bekènti taki Babilon a Bigiwan, a grontapumakti fu falsi bribi, fadon. Sobun, a de krin taki Yehovah e gebroiki engel na wan prenspari fasi fu du a wani fu en. Fosi wi go luku finifini fa Gado e gebroiki engel èn sortu krakti den abi na wi tapu, dan meki wi go luku pe den yeye komoto.

Pe den engel komoto?

3. Sortu fowtu denki furu sma abi fu engel?

³ Milyunmilyun sma na ini a ten disi e bribi taki engel de. Ma den sani di furu fu den e bribi fu engel, no tru. Fu eksempre, son kerkisma e bribi taki te wan lobiwan fu den dede, dan na Gado kari a sma dati kon na hemel fu tron wan engel. Na dati Gado Wortu e leri trutru fu engel?

4. Pe den engel komoto, soleki fa den Buku fu Bijbel e sori?

⁴ A moro tranga èn a moro makti engel, namku na edeman fu den engel, na Mikael. En na a gran engel (Yudas  9). Na engel disi na Yesus Krestes (1 Tesalonikasma 4:16). Milyunmilyun yari pasa, na engel disi ben de a fosi sma di Yehovah meki (Openbaring 3:14). Bakaten, Yehovah meki ala den tra engel nanga yepi fu a fosi gebore Manpikin disi (Kolosesma 1:15-17). Yehovah ben kari den engel disi en manpikin, di a aksi a famiri-edeman Yob a sani disi: „Pe yu ben de di mi ben seti a fondamenti fu grontapu? Taigi mi, efu yu abi frustan trutru. . . . Suma ben seti na uku-ston fu en, di ala den mamanten stari makandra ben bari fu prisiri, èn ala den manpikin fu Gado ben bigin bari fu di den ben breiti srefisrefi?” (Yob 38:4, 6, 7) A de krin taki na Gado meki den engel langa ten bifo a meki libisma.

5. Fa Gado orga den engel?

⁵ „Gado a no wan Gado fu bruya, ma fu vrede”, na so 1 Korentesma 14:33 e taki. Dati meki, Yehovah orga den yeye manpikin fu  en na ini dri prenspari grupu, namku (1) den seraf, (2) den syerub, nanga (3) den tra engel. Den seraf e du diniwroko na a kownusturu fu Gado, den e meki bekènti taki Yehovah santa, èn den e sorgu taki a pipel fu en e tan anbegi Gado na a yoisti fasi. Den syerub e sorgu taki Yehovah e tan kisi glori leki na Almaktiwan. Èn den tra engel e du den sani di Gado e taigi den fu du (Psalm 103:20; Yesaya 6:1-3; Esekièl 10:3-5; Danièl 7:10). Sortu krakti den engel disi abi tapu libisma?—Openbaring 5:11.

Sortu wroko den engel e du?

6. Sortu wroko Yehovah gi den syerub, baka di a yagi Adam nanga Eva komoto na ini Eden?

⁶ Genesis 3:24 na a fosi tekst na ini Bijbel di e taki fu engel. Drape wi e leisi: „[Yehovah] yagi libisma komoto fu a dyari Eden, dan a poti engel na a owstusei fu a dyari. A poti wan feti-owru tu di ben e bron nanga faya èn di ben e drai lontu doronomo, so taki libisma no ben man go na a bon fu libi.” Den syerub disi ben e tapu Adam nanga Eva fu go baka na ini a dyari pe den ben e tan fosi. A sani disi pasa na a bigin fu a libisma historia. Sortu wroko den engel du sensi a ten dati?

7. Te wi e luku san a wortu „engel” wani taki, dan san na wán fu den wroko di engel e du?

⁷ Bijbel e taki fu engel pikinmoro 400 tron. A Hebrew wortu nanga a Griki wortu di vertaal leki „engel”, wani taki „boskopuman”. Sobun, Gado ben e seni engel fu tyari boskopu gi libisma. Soleki fa wi ben taki kaba na ini den fosi tu paragraaf fu na artikel disi, dan Yehovah seni wan engel fu tyari a boskopu fu En gi na apostel Yohanes.

8, 9. (a) San pasa di wan engel go na Manoa nanga en wefi? (b) San papa nanga mama kan leri fu a sani di Manoa ben aksi na engel fu Gado?

⁸ Gado e gebroiki den engel tu fu yepi den futuboi fu en na grontapu, èn fu gi den deki-ati. Fu eksempre, na a ten di den Krutuman ben e tiri Israel, yu ben abi wan man di nen Manoa. En nanga en wefi ben wani wan pikin trutru, ma en wefi no ben man kisi pikin. Yehovah seni en engel fu taigi a wefi fu Manoa taki a ben o kisi wan manpikin. Bijbel e taki: „Luku! Yu sa de nanga bere, èn fu tru yu sa kisi wan manpikin, èn nowan sma musu koti en wiwiri, bika na a momenti di a pikin komoto na ini a mamabere, a sa de wan Nasireisma fu Gado; èn na en sa teki fesi fu frulusu Israel fu na anu fu den Filisteasma.”—Krutuman 13:1-5.

⁹ Te fu kaba, a wefi fu Manoa kisi wan manpikin di den kari Simson, èn furu sma sabi a Bijbel tori fu en (Krutuman 13:24). Bifo Simson gebore, Manoa aksi Yehovah efu na engel ben kan kon baka na en fu fruteri den fa den ben musu kweki a boi. Manoa aksi na engel: „Na sortu fasi a pikin o libi, èn sortu wroko a o du?” Na engel fu Yehovah fruteri Manoa den srefi sani di a ben taigi en wefi kaba (Krutuman 13:6-14). A no de fu taki dati a sani disi gi Manoa furu deki-ati! Na ini a ten disi, engel no e go moro na sma na a fasi disi. Ma neleki Manoa, papa nanga mama kan suku rai na Yehovah fu kon sabi fa den musu kweki den pikin fu den.—Efeisesma 6:4.

10, 11. (a) San Elisa nanga a futuboi fu en du di a legre fu Siria ben kon fu teki Elisa? (b) Fa wi kan kisi wini te wi e prakseri a tori disi?

 ¹⁰ Na ini a ten fu a profeiti Elisa, wan tumusi moi sani pasa di e sori fa engel e yepi den futuboi fu Gado. Elisa ben e tan na ini Dotan, wan foto na ini Israel. Wan leisi, a futuboi fu Elisa wiki fruku mamanten èn a luku go na dorosei. A si taki asi nanga fetiwagi ben lontu a heri foto. A kownu fu Siria ben seni en makti legre fu kon teki Elisa. San a futuboi fu Elisa du? A ben frede, iya kande a ben bruya srefi, èn dati meki a bari: „Ke, mi masra! San wi sa du?” A futuboi ben lasi howpu kaba. Ma Elisa piki en: „No frede, bika den wan di de nanga wi lai moro den wan di de nanga den.” San Elisa ben wani sori en nanga den wortu disi?—2 Kownu 6:11-16.

¹¹ Elisa ben sabi taki wan bigi grupu fu engel ben de drape fu yepi en. Ma a futuboi fu en no ben e si noti. Dati meki ’Elisa bigin begi èn taki: „O Yehovah, grantangi, opo en ai, so taki a kan si.” Wantewante Yehovah opo den ai fu a futuboi, so taki a ben kan si; èn luku! a bergi kontren ben furu nanga asi èn nanga fetiwagi fu faya di ben de lontu Elisa’ (2 Kownu 6:17). Baka dati, a futuboi ben kan si a bigi grupu fu engel. Te wi sabi fa Gado e wroko, dan wi o frustan taki den engel di e gi yesi na Yehovah nanga Krestes, e yepi èn e kibri a pipel fu Yehovah.

Engel e yepi sma na ini a ten fu Krestes

12. Fa na engel fu Gado gi Maria deki-ati?

¹² Luku a deki-ati di Maria, wan Dyu nyunwenke, kisi di a yere a nyunsu disi: „Yu o de nanga bere èn yu o kisi wan manpikin di yu musu kari Yesus.” Gado ben seni na engel Gabriel fu gi Maria a tumusi moi boskopu disi. Ma fosi na engel gi Maria a boskopu dati, a ben taigi en: „No frede Maria, bika Gado feni yu bun” (Lukas 1:26, 27, 30, 31). A no de fu taki, dati a sani disi gi Maria furu deki-ati fu di den wortu disi ben gi en a dyaranti taki Gado ben feni en bun!

13. Fa engel gi Yesus deki-ati?

¹³ Yesus ben kisi deki-ati tu fu engel, baka di a kakafutu gi den dri tesi di Satan ben tyari kon na en tapu na ini a gran sabana. Bijbel e sori taki, baka di Yesus kakafutu gi den tesi dati, ’Didibri gowe libi en, èn den engel kon dini Yesus’ (Mateyus 4:1-11). A neti bifo Yesus dede, den engel kon gi en deki-ati tu. Fu di Yesus ben e sari srefisrefi, meki a saka go na tapu en kindi, èn a bigin begi: „’Mi Tata, efu yu wani, dan puru a kan disi na mi fesi. Ma a no mi wani musu pasa, ma yu wani.’ Ne  wan engel fu hemel kon na en èn a gi en krakti” (Lukas 22:42, 43). Ma fa den engel e yepi wi na ini a ten disi?

A yepi di den engel e gi na ini a ten disi

14. Fa Yehovah Kotoigi kisi frufolgu na ini a ten disi, èn san ben de a bakapisi?

¹⁴ Te wi e luku fa a preikiwroko fu Yehovah Kotoigi waka na ini den yari di pasa, dan wi e si taki engel yepi den, a no so? Fu eksempre, na a ten fu a di fu Tu Grontapufeti, a pipel fu Yehovah ben man horidoro ondro na ogri-ati tiri fu den Nazisma na ini Doisrikondre nanga West-Europa (1939-1945). Na a ten di den ogri-ati tirimakti ben e tiri na ini den Lomsu kondre soleki Italiakondre, Spanyorokondre, nanga Potogisikondre, dan den Kotoigi horidoro, aladi den kisi frufolgu wan moro langa pisi ten. Èn someni tenti yari langa, den horidoro di den kisi frufolgu na ini den kondre di ben de ondro a tiri fu a Sovyet-Unie. Den Kotoigi kisi frufolgu tu na ini sonwan fu den Afrikan kondre. * No so langa pasa, den futuboi fu Yehovah kisi bun hebi frufolgu na ini a kondre Georgia. Satan du ala san a man fu tapu a wroko fu Yehovah Kotoigi. Ma toku, leki organisâsi, den pasa den tesi disi èn a wroko fu den go na fesi tu. Wán fu den sani di yepi den, na a kibri di den kisi fu den engel.—Psalm 34:7; Danièl 3:28; 6:22.

15, 16. Fa engel e yepi Yehovah Kotoigi fu du a preikiwroko na heri grontapu?

¹⁵ Yehovah Kotoigi no e spotu nanga a wroko di den kisi fu preiki a bun nyunsu fu Gado Kownukondre na heri grontapu. Na ala sei den e leri sma den tru tori fu Bijbel, so taki den sma disi kan tron disipel fu Krestes  (Mateyus 28:19, 20). Ma den Kotoigi sabi heri bun taki den no o man du a wroko disi sondro a yepi fu den engel. Dati meki, den sani di skrifi na ini Openbaring 14:6, 7 e gi den deki-ati doronomo. Drape skrifi: „Mi [na apostel Yohanes] si wan tra engel e frei na loktu; a ben abi têgo bun nyunsu di a ben musu meki bekènti leki prisiri nyunsu na den sma di e libi na grontapu, èn gi ala kondre, lo, tongo, nanga pipel; nanga wan tranga sten a ben e taki: ’Un frede Gado èn gi en glori, bika a yuru doro kaba taki a o krutu sma; fu dati ede, anbegi a Sma di meki hemel, grontapu, a se, nanga ala den presi pe watra e komopo.’”

¹⁶ Den sani di skrifi na ini a tekst disi e sori krin taki den engel e horibaka gi a preikiwroko di Yehovah Kotoigi e du na heri grontapu, èn a e sori tu taki den e tiri a wroko disi. Yehovah e gebroiki den engel fu en fu meki reti-atisma miti nanga den Kotoigi fu en. Boiti dati, engel meki taki den Kotoigi miti nanga sma di warti fu yere a bun nyunsu. A sani disi e sori fu san ede a e pasa furu tron taki Yehovah Kotoigi e miti sma na a momenti te den abi bigi problema èn te den abi yepi fu Gado fanowdu.

Heri esi engel sa du wan tumusi prenspari sani

17. San wán engel nomo du nanga den Asiriasma?

¹⁷ Soleki fa wi si kaba, dan den engel e tyari boskopu gi den futuboi fu Yehovah èn den e yepi den anbegiman fu En. Ma den e du ete wan tra sani. Na ini a ten di pasa, Gado gebroiki den engel fu strafu sma. Fu eksempre, na ini a di fu aiti yarihondro b.G.T., wan bigi grupu srudati fu Asiria ben wani teki Yerusalem abra. San Yehovah du? A taki: „Mi sa feti gi a foto disi fu kibri en fu mi ede èn fu David ede, a futuboi fu mi.” Bijbel e sori san pasa: „A neti dati na engel fu Yehovah go na ini a kampu fu den Asiriasma, èn a kiri wán hondro aiti-tenti na feifi dusun man. Di den sma wiki fruku mamanten, dan den si den dedeskin fu ala den man dati” (2 Kownu 19:34, 35). Den legre fu libisma swaki trutru te yu e teki den gersi nanga a krakti di wán engel nomo abi!

18, 19. Sortu prenspari sani den engel sa du heri esi, èn sortu kenki dati sa tyari kon na grontapu?

¹⁸ Heri esi, Gado sa gebroiki den engel fu strafu ogri-atisma. A no o teki langa fosi Yesus kon „nanga den tranga engel fu en na ini wan bigi faya”. Den o kisi a wroko fu „puru atibron na tapu den sma di no sabi Gado èn na tapu den sma di no e gi yesi na a bun nyunsu fu wi Masra Yesus” (2 Tesalonikasma 1:7, 8). A wroko disi sa tyari bigi kenki kon na grontapu! Den sma di no wani teki a bun nyunsu fu Gado Kownukondre di den Kotoigi e preiki now na heri grontapu, sa kisi pori. Soso den wan di e suku Yehovah, èn di e suku regtfardikifasi nanga safri-atifasi, sa „kisi kibri na a dei fu Yehovah en atibron”.​—Sefania 2:3.

¹⁹ Wi kan de nanga tangi taki Yehovah e gebroiki den makti engel fu en fu horibaka gi den anbegiman fu en na grontapu, èn wi kan de nanga tangi tu taki a e gebroiki den engel disi fu gi den deki-ati. Te wi e frustan fa Gado e gebroiki den engel, dan dati e trowstu wi trutru, bika tra engel de di opo densrefi teige Yehovah èn di de ondro a makti fu Satan. Na artikel di e kon, o sori san tru Kresten kan du fu kakafutu gi Satan Didibri nanga den makti ogri yeye fu en.

[Futuwortu]

San yu leri?

• Pe engel komoto?

• Fa Gado gebroiki engel na ini Bijbel ten?

• San Openbaring 14:6, 7 e taki fu a wroko di engel e du na ini a ten disi?

• Sortu prenspari sani engel sa du heri esi?

[Aksi fu a tori disi]

[Prenki na tapu bladzijde 22]

Manoa nanga en wefi kisi deki-ati fu wan engel

[Prenki na tapu bladzijde 23]

„No frede, bika den wan di de nanga wi lai moro den wan di de nanga den”