Fa wi kan kakafutu gi ogri yeye?
Fa wi kan kakafutu gi ogri yeye?
„Son engel no ben hori a presi di den ben abi na ini a bigin, ma den gowe libi a reti tanpresi fu den. Fu dati ede Gado tai den nanga banti fu têgo na ini deki dungru, fu krutu den na a bigi dei.”—YUDAS 6.
1, 2. Sortu aksi e opo kon di abi fu du nanga Satan Didibri nanga den ogri yeye?
NA APOSTEL Petrus gi wi a warskow disi: „Tan nanga krin frustan, de na ai. Didibri, a feanti fu unu, e waka lontu leki wan lew di e bari, fu di a e suku fu swari wan sma” (1 Petrus 5:8). Na apostel Paulus e taki: „Mi no wani taki unu abi demakandra nanga den ogri yeye. Unu no kan dringi fu a kan fu Yehovah èn fu a kan fu den ogri yeye; unu no kan nyan na ’a tafra fu Yehovah’ èn na a tafra fu den ogri yeye.”—1 Korentesma 10:20, 21.
2 Ma suma na Satan Didibri nanga den ogri yeye? Pe den komoto, èn o ten den kon de? Na Gado meki den? O furu krakti den abi tapu libisma? Fa wi kan kakafutu gi den?
Pe Satan nanga den ogri yeye komoto?
3. Fa wan engel fu Gado tron Satan Didibri?
3 Di den fosi libisma ben de na ini a dyari fu Eden, dan wan engel opo ensrefi teige Gado. Fu san ede? Fu di a no ben breiti nanga a frantwortu di a ben abi na ini a hemel organisâsi fu Yehovah. Di Gado meki Adam nanga Eva, dan Satan si wan okasi fu meki den trangayesi a tru Gado èn fu meki den drai baka gi En. A du dati fu di a ben wani taki den anbegi en. Fu di na engel disi opo ensrefi teige Gado èn fu di a kori Adam nanga Eva fu du sondu, meki a tron Satan Didibri. Bakaten, tra engel bigin opo densrefi tu teige Gado. Fa den du dati?—Genesis 3:1-6; Romesma 5:12; Openbaring 12:9.
4. Fa son engel opo densrefi teige Gado bifo a Frudu na ini a ten fu Noa?
4 Bijbel e sori taki bifo a bigi Frudu na ini a ten fu Noa, son engel bigin poti prakseri na den umasma na grontapu, aladi a sani disi no ben fiti. Bijbel e taki dati „den [hemel] manpikin fu a tru Gado bigin luku den umapikin fu libisma. Den ben si taki den uma ben moi srefisrefi. Dati meki den teki den leki wefi gi densrefi, iya, den teki iniwan uma di den ben wani”. A sani disi no ben bun kwetikweti. Gado no meki engel fu trow nanga libisma. Te fu kaba den kisi basra pikin di wi sabi leki Neifilim (Genesis 6:2-4). Na so fasi den engel trangayesi Gado, èn neleki Satan den opo densrefi teige Yehovah.
5. San pasa nanga den ogri engel, di Yehovah pori den ogri libisma nanga yepi fu wan Frudu?
5 Di Yehovah tyari wan bigi Frudu kon fu strafu a libisma famiri, dan den Neifilim dede makandra nanga den mama fu den di ben de libisma. Den engel di opo densrefi teige Gado, ben musu puru a libisma skin fu den èn den ben musu drai go baka na hemel. Ma den no ’hori a presi di Gado ben gi den na ini a bigin’. Na presi fu dati, Gado strafu den èn a poti den na ini „deki dungru”, di Bijbel e kari Tartarus.—Yudas 6; 2 Petrus 2:4.
6. Fa den ogri yeye e kori libisma?
6 Fu di den engel di opo densrefi teige Gado lasi „a presi di den ben abi na ini a bigin”, meki den tron ogri yeye di e yepi Satan fu du ogri-ati sani. Sensi a ten dati, den ogri yeye no man teki libisma skin moro. Ma den kan kori mansma nanga umasma fu du ala sortu morsu sani di abi fu du nanga seks. Den ogri yeye e kori sma tu fu du afkodrei. Dati meki sma e du sani soleki towfruwroko, den e bonu, èn den e go suku yepi na bonuman (Deuteronomium 18:10-13; 2 Kroniki 33:6). Neleki Didibri, den ogri yeye o kisi pori (Mateyus 25:41; Openbaring 20:10). Ma fosi a ten dati doro, wi musu kakafutu gi den. A ben o bun fu luku o furu makti Satan abi èn fa wi kan kakafutu gi en nanga den ogri yeye fu en.
O furu makti Satan abi?
7. Sortu krakti Satan abi tapu a libisma famiri?
7 Na ini a ten di pasa, Satan gi Yehovah porinen (Odo 27:11). Èn a kori bun furu sma. „Heri grontapu de na ini a makti fu na ogriwan”, na so 1 Yohanes 5:19 e taki. Dati meki Satan ben kan tesi Yesus, iya, a ben taigi en taki a ben o gi en a makti nanga a glori fu „ala den kownukondre fu heri grontapu” (Lukas 4:5-7). Na apostel Paulus ben taki fu Satan: „Efu trutru a de so, taki wan duku e tapu a bun nyunsu di wi e preiki, dan a tapu gi den sma di o dede, iya, gi den sma di no e bribi, fu di a gado fu a grontapu sistema disi breni den frustan, so taki a leti fu a tumusi moi bun nyunsu fu Krestes, di de a prenki fu Gado, no ben sa skèin go na ini” (2 Korentesma 4:3, 4). Satan na „wan leiman èn a tata fu ala lei”, ma a e du neleki en na „wan engel fu leti” (Yohanes 8:44; 2 Korentesma 11:14). A abi a makti èn a koni fu breni a frustan fu den grontapu tiriman èn a di fu den sma di de na den ondro. A kori a libisma famiri nanga leitori èn nanga falsi kerkileri.
8. San Bijbel e taki fu a makti di Satan abi?
8 Na ini a ten fu Danièl, a ben de krin fu si o furu makti Satan abi. Di Yehovah seni wan engel fu tyari wan boskopu gi Danièl fu gi en deki-ati, dan wan ogri yeye, namku „a granman fu a kownu kontren fu Persia” ben e gens na engel fu Gado. Na ogri yeye disi gens a getrow engel 21 dei langa, teleki „Mikaèl, wan fu den moro prenspari granman”, kon fu yepi en. A tori e taki tu fu wan tra ogri yeye, namku „a granman fu Grikikondre” (Danièl 10:12, 13, 20). Openbaring 13:1, 2 e taki dati Satan na „a bigi kaiman” di gi a meti, noso den tiriman fu grontapu, ’krakti nanga bigi makti, èn a meki a meti tiri leki kownu’.
9. Nanga suma Kresten e feti?
9 Fu dati ede wi kan frustan fu san ede na apostel Paulus ben skrifi: „Wi no e feti nanga libisma, ma nanga den tirimakti, nanga den wan di abi makti èn nanga den tiriman fu a dungru disi, nanga den ogri yeye na hemel” (Efeisesma 6:12). Srefi na ini a ten disi, den ogri yeye di de na Satan Didibri ondro abi krakti tapu den tiriman fu grontapu èn tapu den tra sma na heri grontapu. Dati meki den sma disi e kiri ipi-ipi sma na wan tumusi ogri-ati fasi, èn den e du wan lo ogri-ati sani fu gens tirimakti. Meki wi go luku now fa wi kan kakafutu gi den makti ogri yeye disi.
Fa wi kan kakafutu gi den ogri yeye?
10, 11. Fa wi kan kakafutu gi Satan nanga den ogri yeye fu en?
10 Wi no kan kakafutu gi Satan èn den ogri yeye nanga wi eigi krakti. Paulus e gi wi a rai disi: „Meki Masra gi unu krakti, èn tranga unsrefi nanga a kefalek bigi krakti fu en.” Wi musu suku kibri na Gado. Paulus taki moro fara: „Un musu sorgu taki unu abi ala den sani di Gado gi unu fu feti, so taki unu kan tanapu kánkan gi den triki di Didibri e gebroiki fu kori sma . . . Un musu teki ala den sani di Gado gi unu fu feti, so taki unu sa man feti na tapu na ogri dei, èn baka te unu du ala sani finifini, dan unu sa man tanapu kánkan.”—Efeisesma 6:10, 11, 13.
11 Tu tron Paulus e gi tra Kresten deki-ati fu weri ’ala den sani di Gado gi den fu feti’. A wortu „ala” e sori taki wan sma no sa man kakafutu gi Satan nanga den ogri yeye, efu a no de srekasreka ala ten. Sobun, san na den prenspari fetisani di Kresten na ini a ten disi abi tranga fanowdu fu man kakafutu gi den ogri yeye?
Fa wi kan „tanapu kánkan”?
12. Fa Kresten kan weri a waarheid leki wan banti na den mindribere?
12 Paulus e fruklari: „Tanapu kánkan èn weri a waarheid leki wan banti na un mindribere, èn weri regtfardikifasi leki wan sani di musu kibri a borsu” (Efeisesma 6:14). Dyaso Paulus e taki fu tu sani, namku wan banti, èn wan sani di musu kibri a borsu. Wan srudati ben musu tai a banti fu en bun steifi, fu man kibri en mindribere nanga en ondrobere, èn fu man tyari a hebi feti-owru fu en. Na so a de tu taki wi musu tai den tru leri fu Bijbel steifi na wi lontu, so taki wi kan libi akruderi den leri disi. Wi e leisi Bijbel ibri dei? Wi e du dati nanga wi heri osofamiri? Wi abi a gwenti fu luku a deitekst makandra nanga wi osofamiri? Wi e leisi den publikâsi fu „a getrow èn koni srafu”, so taki wi kan sabi fa den e fruklari Bijbel? (Mateyus 24:45). Te wi e du dati, dan wi e meki muiti fu du san Paulus taki. Wi abi video nanga DVD tu di kan yepi wi fu frustan Bijbel moro bun. Te wi e tan du san Bijbel e leri, dan dati sa yepi wi fu teki koni bosroiti èn a sa tapu wi fu libi na wan fasi di no bun.
13. Fa wi kan kibri na agersi ati fu wi?
13 Wan srudati ben e weri wan sani na en borsu fu kibri en ati, èn sosrefi tra prenspari pisi fu en skin. Te wan Kresten e kon lobi a regtfardikifasi fu Gado èn te a e hori ensrefi na den regtfardiki markitiki fu Yehovah, dan dati sa yepi en fu kibri na agersi ati fu en, noso a sma di a de trutru na ini en ati. Te wi lobi regtfardikifasi, dan ala ten wi sa du san Gado Wortu e taki. Te wi e ’tegu gi san ogri, èn te wi lobi san bun’, dan wi no sa waka „nowan enkri takru pasi”.—Amos 5:15; Psalm 119:101.
14. San a wani taki fu ’weri a bun nyunsu fu vrede leki susu na wi futu’?
14 Furu tron, den srudati fu Rome ben e weri bun susu fu man waka hondrohondro kilometer go na den farawe presi na ini a gran kownukondre Rome. San a wani taki gi Kresten fu ’weri a bun nyunsu fu vrede leki susu na den futu’? (Efeisesma 6:15) Disi wani taki dati wi de srekasreka fu handri. Wi de srekasreka fu preiki a bun nyunsu fu Gado Kownukondre na ibri okasi di wi e kisi (Romesma 10:13-15). Te wi e du a Kresten diniwroko fayafaya, dan wi o man kakafutu gi den „triki” fu Satan.—Efeisesma 6:11.
15. (a) Fa Bijbel e sori taki a de tumusi prenspari fu abi wan tranga bribi di de leki wan bigi skelt? (b) San na wan tu fu den ’faya peiri’ di kan swaki a bribi fu wi?
15 Paulus e taki moro fara: „Teki spesrutu a bigi skelt, dati na a bribi, èn nanga dati unu sa man kiri a faya fu ala den peiri di na ogriwan e sutu kon na un tapu” (Efeisesma 6:16). Dyaso Paulus gebroiki a wortu „spesrutu”, fu sori taki a fetisani disi prenspari trutru. Wi musu abi wan tranga bribi ala ten. Neleki fa wan bigi skelt e kibri wan srudati, na so a bribi fu wi e kibri wi gi den ’faya peiri’ fu Satan. San den peiri disi e prenki na ini a ten disi? Wi kan agersi den peiri disi nanga den sani di feanti nanga sma di fadon komoto na bribi e du fu swaki a bribi fu wi. Den sma disi e spotu wi èn den fruteri lei fu wi. Wi kan agersi den peiri disi tu nanga den tesi di wi e kisi fu feti baka gudu. A kan taki wi o suku nomo fu bai ala sortu sani èn kande wi o streilibi nanga sma di lobi fu prodo nanga den gudu fu den. Kande den sma disi bai moro bigi èn moro bun oso nanga wagi, noso kande den e prodo nanga den diri gowtu sani èn den nyun krosi fu den. Awinsi san tra sma e du, a bribi fu wi musu tranga nofo fu man naki den ’faya peiri’ disi puru. Fa wi kan kisi wan tranga bribi èn fa wi kan sorgu taki a no e kon swaki?—1 Petrus 3:3-5; 1 Yohanes 2:15-17.
16. San kan yepi wi fu kisi wan tranga bribi?
16 Te wi e studeri Bijbel doronomo èn te wi e begi fayafaya, dan wi kan kon krosibei na Gado. Wi kan aksi Yehovah fu tranga a bribi fu wi èn wi musu handri akruderi den begi fu wi. Fu eksempre, wi e sreka wisrefi bun so taki wi kan gi piki na a Waktitoren-studie di e hori ibri wiki? Wi sa abi wan tranga bribi te wi e studeri Bijbel nanga den Bijbel publikâsi.—Hebrewsma 10:38, 39; 11:6.
17. Fa wi kan ’teki a helm di e gi frulusu’?
17 Di Paulus ben e taki fu den fetisani di Gado gi wi, dan a tapu nanga den wortu disi: „Teki sosrefi a helm di e gi frulusu, nanga a feti-owru fu a yeye, dati na Gado wortu” (Efeisesma 6:17). A helm ben e kibri na ede èn na edetonton fu wan srudati. Wan sma e gebroiki en edetonton fu teki bosroiti. Na so a de tu taki a howpu di wi abi leki Kresten, e kibri wi frustan (1 Tesalonikasma 5:8). Na presi taki wi e prakseri soso grontapu sani nanga gudu, wi musu poti prakseri na a howpu di Gado gi wi, neleki fa Yesus ben du dati.—Hebrewsma 12:2.
18. Fu san ede wi musu leisi Bijbel doronomo?
18 A lasti fetisani di Paulus taki fu en, na a wortu fu Gado, noso Bijbel. A fetisani disi sa yepi wi tu fu kakafutu gi Satan nanga den ogri yeye fu en. Disi e sori wi tu fu san ede a prenspari fu leisi Bijbel doronomo. Te wi sabi Gado Wortu bun, dan Satan nanga den ogri yeye no o man kori wi nanga den lei fu den. Boiti dati, den ogri-ati sani di sma di fadon komoto na bribi e taki fu wi, no sa abi krakti na wi tapu.
„Tan begi na ibri okasi”
19, 20. (a) San o pasa nanga Satan nanga den ogri yeye fu en? (b) San kan tranga a bribi fu wi?
19 Heri esi Satan nanga den ogri yeye fu en o kisi pori. Satan sabi taki „en ten syatu”. A e atibron srefisrefi èn a e feti nanga den wan di ’e du san den komando fu Gado e taki èn di kisi a wroko fu kotoigi fu Yesus’ (Openbaring 12:12, 17). A de tumusi prenspari taki wi e kakafutu gi Satan nanga den ogri yeye fu en.
20 Wi kan de nanga tangi trutru gi a rai di wi kisi fu „teki ala den sani di Gado gi unu fu feti”! Te fu kaba, di Paulus kaba taki fu den sani di Gado gi wi fu feti, dan a gi a rai disi: „Tan begi na ibri okasi èn na ala fasi, èn du dati fayafaya nanga yepi fu a yeye. Dati meki un musu de na ai doronomo èn begi fayafaya gi den santawan” (Efeisesma 6:18). Te wi e begi, dan dati kan tranga a bribi fu wi èn a kan yepi wi fu tan na ai. Meki wi gi yesi na a rai fu Paulus èn meki wi tan begi, fu di dati sa yepi wi fu kakafutu gi Satan nanga den ogri yeye fu en.
San yu leri?
• Pe Satan nanga den ogri yeye fu en komoto?
• O furu makti Didibri abi?
• Fa wi kan kakafutu gi Satan nanga den ogri yeye fu en?
• Fa wi kan teki ala den sani di Gado gi wi fu feti?
[Aksi fu a tori disi]
[Prenki na tapu bladzijde 26]
„Den manpikin fu a tru Gado bigin luku den umapikin fu libisma”
[Prenki na tapu bladzijde 28]
Yu kan kari den siksi sani di Gado gi wi fu feti?
[Prenki na tapu bladzijde 29]
Fa den sani disi kan yepi wi fu kakafutu gi Satan nanga den ogri yeye fu en?