Luku! A leti moi srefisrefi!

EFU oiti yu ben musu feni yu pasi na ini a dungru, dan yu sa sabi fa a sani dati fruferi. A de wan yepi trutru te leti e skèin! Kande yu ben de tu na ini wan situwâsi di ben meki yu firi neleki yu de na ini bigi dungru. Kande yu ben e firi so di yu no ben man feni wan lusu gi wan problema. Ne, safrisafri yu si a leti, iya, yu feni wan lusu gi a problema. Te yu e komoto na ini wan muilek situwâsi fu di yu feni wan lusu, dan dati de neleki yu e komoto na ini a dungru kon na ini a leti.

Na ini a fosi yarihondro, furu sma ben de na dungru na yeye fasi. Disi na san na apostel Petrus ben taigi den sma di ben gowe libi a bribi fu den èn tron Kresten: „[Gado] kari unu komoto na ini a dungru fu kon na ini en tumusi moi leti” (1 Petrus 2:9). Gi den sma disi a ben de neleki den komoto na ini bigi dungru kon na ini a krin leti. Wi kan agersi a situwâsi disi nanga di fu wan sma di ben de en wawan èn sondro howpu, ma now a tron wan memre fu wan famiri di abi a dyaranti taki sani sa waka bun nanga den.—Efeisesma 2:1, 12.

„Yu lasi a lobi di yu ben abi biginbigin”

Den fosi Kresten ben feni „a waarheid”, iya, den ben feni a tru Kresten bribi (Yohanes 18:37). Den ben si a tumusi moi leti fu a waarheid èn den komoto na ini a dungru na yeye fasi kon na ini a leti. Ma baka wan pisi ten, sonwan fu den Kresten no ben de fayafaya moro. Fu eksempre, na a kaba fu a fosi yarihondro, wan seryusu problema kon de na ini a gemeente na Efeise. Yesus Krestes di kisi wan opobaka ben kon si san na a problema, èn a ben taki: „Mi si wan sani na yu di mi no feni bun, namku taki yu lasi a lobi di yu ben abi biginbigin. Fu dati ede, prakseri fu pe yu fadon komopo; abi berow èn du den sani di yu ben du fosi” (Openbaring 2:4, 5). Den Kresten na ini Efeise ben musu kon kisi a lobi baka di den ben abi fosi gi Gado èn gi a waarheid.

Fa a de nanga wi? Wi ben e prisiri tu di wi kon si a leti, iya, wi ben e prisiri di wi kon sabi den tumusi moi tru tori fu Gado Wortu. Wi kon lobi a waarheid. Ma den problema di wi leki libisma e kisi nofo tron, kan meki taki a lobi di wi abi gi a waarheid e kon kowru. A kan de so tu taki wi e kisi problema fu di wi e libi na ini „den lasti dei”. Wi e libi na ini ’muilek ten di tranga fu pasa’, iya, wi e libi na ini wan grontapu di lai nanga sma di ’lobi densrefi nomo, di lobi moni, di e denki tumusi furu fu densrefi, di abi heimemre, di e taki ogri fu trawan, di e trangayesi papa nanga mama, di no de nanga tangi, èn di no de loyaal’ (2 Timoteyus 3:1, 2). Den sma disi kan abi so wan krakti na wi tapu, taki wi e go na baka na yeye fasi èn taki a lobi di wi abi gi Yehovah e kon kowru.

Efu wi no abi a lobi moro di wi ben abi fosi, dan wi musu ’abi berow èn wi musu du den sani di wi ben du fosi’. Wi musu kisi a srefi tranga bribi baka di wi ben abi fosi. Boiti dati, wi musu luku bun taki wi no e lasi warderi gi a waarheid. A de tumusi prenspari taki wi alamala tan abi wan bun denki fu sani, èn taki wi tan lobi Gado nanga den tru tori di abi fu du nanga en!

 ’A waarheid di e meki wi kon fri’

A leti fu den tru tori fu Bijbel moi srefisrefi fu di Bijbel e gi piki tapu prenspari aksi di dangra libisma dusundusun yari langa. Wan tu fu den aksi disi na: Fu san ede wi de na libi? San na a marki fu a libi? Fu san ede ogri de? Wan sma e libi go doro baka te a dede? Yehovah meki wi kon sabi den tumusi moi tru tori fu Bijbel. Wi musu de nanga tangi gi den sani dati, a no so? Meki wi noiti lasi warderi gi den sani di wi leri!

Yesus ben taigi den disipel fu en: „Unu o sabi a waarheid èn a waarheid o meki unu kon fri” (Yohanes 8:32). A frulusu ofrandi fu Yesus gi wi na okasi fu kon fri fu sondu nanga dede. Boiti dati, den tumusi moi tru tori disi fu Bijbel meki taki wi no abi fu de leki den grontapusma di de na dungru, fu di wi abi sabi èn wi abi wan howpu. Te wi de nanga tangi gi den sani di wi leri, èn te wi e denki dipi fu den sani dati, dan dati sa yepi wi fu kisi moro lobi gi Yehovah èn gi a Wortu fu en.

Na apostel Paulus ben taigi den Kresten na ini Tesalonika: „Di unu yere Gado wortu di wi preiki gi unu, dan unu no ben teki a wortu leki a wortu fu libisma, ma leki a wortu fu Gado, èn na dati a de trutru; a wortu dati abi krakti tu tapu unu di e bribi” (1 Tesalonikasma 2:13). Den Tesalonikasma ben yere a wortu fu Gado, èn den ’teki a wortu dati nanga prisiri’. Den no ben „de na ini dungru” moro. Na presi fu dati den ben kon tron „manpikin fu a leti” (1 Tesalonikasma 1:4-7; 5:4, 5). Den Kresten dati ben kon sabi taki Yehovah na a Mekiman èn taki a abi ala makti, taki a abi koni, lobi, nanga sari-ati. Neleki den tra bakaman fu Krestes, den ben kon sabi tu taki Yehovah seti sani so taki den kan kisi pardon fu den sondu nanga yepi fu a frulusu-ofrandi fu en Manpikin, Yesus Krestes.—Tori fu den Apostel 3:19-21.

Aladi den Tesalonikasma no ben sabi ala sani fu Bijbel finifini, toku den ben sabi fa den ben kan kon sabi moro. Den Buku fu Bijbel di skrifi nanga yepi fu santa yeye, kan meki wan sma di e anbegi Gado ’kon bun dorodoro èn a kan de srekasreka fu du ibri bun wroko’ (2 Timoteyus 3:16, 17). Den Kresten na ini Tesalonika ben kan studeri Bijbel go doro, èn na so den ben o si ibri tron baka taki a leti fu Gado moi srefisrefi. Den ben abi reide fu de nanga prisiri ala ten (1 Tesalonikasma 5:16). Na so a de tu nanga wi.

Wan leti na tapu wi pasi

A psalm skrifiman ben taki fu san ede a leti moi srefisrefi. A ben skrifi: „Yu wortu na wan lampu gi mi futu, èn wan leti na tapu mi pasi” (Psalm 119:105). Den rai di wi e kisi fu Gado Wortu kan yepi wi fu kon sabi san na a yoisti pasi di wi kan teki na ini a libi, so taki wi kan abi wan marki na ini a libi. Wi no musu de leki wan sipi di de na se sondro taki wan sma e tyari en. Te wi sabi den tru tori fu Bijbel èn te wi e libi akruderi den sani dati, dan wi no sa ’degedege neleki te winti e naki skwala go na ala sei, èn sma no sa man bedrigi wi nanga ala sortu leri’.—Efeisesma 4:14.

Bijbel e taki: „No poti un frutrow tapu heiheisma, noso tapu a manpikin fu libisma, di no man frulusu unu.” Bijbel e taki sosrefi: „Koloku fu a sma di kan feni yepi na a Gado fu Yakob, di e howpu tapu Yehovah, en Gado” (Psalm 146:3, 5). Boiti dati, te wi e poti wi frutrow tapu Yehovah, dan dati e yepi wi fu no frede moro, èn fu no broko wi ede moro. Na apostel Paulus ben skrifi: „No broko un ede nanga nowan sani, ma begi Gado ala san unu wani, èn du dati fayafaya sosrefi, èn taki en tangi tu; èn a vrede fu Gado di bigi moro leki san libisma  man frustan, sa kibri un ati èn un frustan nanga yepi fu Krestes Yesus” (Filipisma 4:6, 7). Wi e kisi wini trutru te wi e meki a leti fu Gado Wortu tiri wi.

Wi musu de leki sma di e skèin leti na ini grontapu

Ma wan tra reide fu san ede a leti fu Gado Wortu moi srefisrefi, na taki a e gi wi na okasi fu du a moro prenspari wroko di libisma man du. Yesus ben taigi den bakaman fu en: „Go na sma fu ala kondre èn meki den tron disipel, èn dopu den na ini a nen fu a Tata, fu a Manpikin, èn fu a santa yeye. Leri den fu du ala san mi komanderi unu. Dan unu o si taki mi sa de nanga unu ala dei te na a kaba fu a grontapu sistema.” Fosi a ben gi a komando disi, a ben taki: „Mi kisi ala makti na ini hemel èn na grontapu.”—Mateyus 28:18-20.

Prakseri suma na a sma di e yepi tru Kresten na ini a wroko di den kisi fu preiki a bun nyunsu èn fu leri sma fu ala kondre den tru tori fu Bijbel. Yesus ben pramisi den bakaman fu en taki a ben o de nanga den. Iya, a e yepi den èn a e horibaka gi den aladi den ’e meki a leti fu den skèin’ na ini a diniwroko fu den èn fu di den ben e du tra ’bun sani’ (Mateyus 5:14-16). Den engel e yepi wi tu na ini a preikiwroko disi (Openbaring 14:6). Èn fa a de nanga Yehovah Gado? Na apostel Paulus ben skrifi: „Mi prani, Apolos gi watra, ma na Gado tan meki a sani gro.” A de wan bigi grani trutru fu de wan fu den sma di „e wroko makandra nanga Gado”!—1 Korentesma 3:6, 9.

Prakseri sosrefi fa Gado e blesi wi gi a muiti di wi e meki fu du a wroko disi di a gi wi fu du. Noti no de so prenspari leki a grani di Gado gi wi fu „de leki sma di e skèin leti na ini grontapu”. Te wi e taki èn e handri na wan fasi di e sori taki wi abi a leti fu Gado Wortu, dan wi sa man yepi opregtisma trutru (Filipisma 2:15). Èn wi sa prisiri te wi e preiki èn e gi sma leri fayafaya, ’bika Gado no de onregtfardiki taki a sa frigiti den wroko fu wi èn taki a sa frigiti a lobi di wi sori gi a nen fu en’.—Hebrewsma 6:10.

’Bai ai-salfu fu lobi gi yu ai’

Disi na san Yesus ben taigi a gemeente fu Laodisea fu a fosi yarihondro: „Bai ai-salfu na mi èn lobi dati gi yu ai, so taki yu kan si. Mi e piri-ai gi ala den wan di mi lobi, èn mi e strafu den” (Openbaring 3:18, 19). A yoisti sani di kan dresi wi te wi breni na yeye fasi, na „ai-salfu”, namku den leri nanga a trangaleri fu Yesus. Efu wi wani tan gosontu na yeye fasi, dan wi musu teki a rai fu en èn a di fu Bijbel. Boiti dati, wi musu kon kisi a srefi denki di Krestes ben abi èn wi musu teki na eksempre fu en (Filipisma 2:5; 1 Petrus 2:21). Na ai-salfu disi no de fu soso. Yesus ben taki: „Bai [en] na mi.” Iya, wi sa musu gebroiki wi ten èn wi sa musu meki muiti fu kon gosontu baka na yeye fasi.

Te wi e komoto na ini wan dungru presi èn e kon na ini wan kamra pe leti e skèin, dan a e teki ten fosi wi man si bun. Na so a de tu, taki a e teki ten fu studeri Gado Wortu èn fu kon si a leti fu a waarheid. A e teki ten fu denki dipi fu den sani di wi leri èn fu kon frustan fa a waarheid warti trutru. Ma Gado no e aksi tumusi furu fu wi. Fu san ede dati de so? Fu di a leti moi srefisrefi!

[Prenki na tapu bladzijde 14]

„Bai ai-salfu na mi èn lobi dati gi yu ai, so taki yu kan si”