San o pasa te Krestes kon?

„BIGI OGRIDU NA INI SÃO PAULO.” Na so a tijdschrift Veja ben kari den fo dei na ini mei 2006, di grupu ogriman tyari „bigi pori” kon na ini a moro bigi èn a moro gudu foto fu Brasyonkondre. Sowan 150 sma, namku skowtu, ogriman, nanga borgu, lasi den libi na ini den „moro leki 100 yuru” di bigi ogridu ben e pasa drape.

Na ala sei fu grontapu a de so taki a moro prenspari nyunsu di de fu yere, na nyunsu di abi fu du nanga ogridu. A gersi leki libisma tiriman no man tyari wan kaba kon na ogridu. A grontapu fu wi e kon ogri moro nanga moro. Kande yu e firi brokosaka fu di yu e si taki so furu takru sani e pasa na ala sei. Ma heri esi wan kenki o kon.

Yesus ben leri den bakaman fu en fu begi taki Gado Kownukondre kon èn taki a wani fu Gado pasa „na grontapu soleki fa a e pasa na hemel” (Mateyus 6:9, 10). Gado poti Krestes Yesus fu tiri leki Kownu fu a Kownukondre disi. A Kownukondre sa tyari wan kaba kon na ala den problema fu libisma. Ma efu Gado Kownukondre musu tyari wan kenki kon na grontapu, dan Krestes musu tiri na presi fu libisma tirimakti. Na disi o pasa te Krestes kon.

Wan kenki o kon sondro dyugudyugu?

Den pipel o de klariklari fu saka densrefi na a tirimakti fu Krestes ondro? Na apostel Yohanes ben kisi wan fisyun, èn a fisyun dati e gi wi piki tapu na aksi disi. Yohanes e fruteri: „Mi si na ogri meti [namku den politiek sistema fu a grontapu], den kownu fu grontapu, nanga den legre fu den; den ben kon makandra fu feti nanga a sma [namku Yesus] di ben e sidon na tapu na asi èn fu feti tu nanga a legre fu en” (Openbaring 19:19). San o pasa nanga den kownu fu grontapu? A Kownu di Yehovah poti fu tiri, sa „broko den nanga wan isri tiriman-tiki, [a] sa broko den na pisipisi, neleki den na wan tokotoko patu”, na so Bijbel e taki (Psalm 2:9). Den politiek sistema sa kisi pori krinkrin. A Kownukondre fu Gado „sa broko ala den [libisma] kownukondre disi na pisipisi èn a sa tyari wan kaba kon na den, èn ensrefi sa tan te ten di no skotu”.—Danièl 2:44.

Fa a de nanga den sma di e gens Gado Kownukondre? „Te Masra Yesus o komoto fu hemel fu sori ensrefi makandra nanga den tranga engel fu en na ini wan bigi faya,” dan a sa „puru atibron na tapu den sma di no sabi  Gado èn na tapu den sma di no e gi yesi na a bun nyunsu” (2 Tesalonikasma 1:7, 8). Odo 2:22 e taki: „Gado sa koti den ogrisma puru fu grontapu; èn den wan di e tori trawan, A sa hari den puru fu grontapu.”

Disi na san Bijbel e taki fu a kon di Krestes o kon: „Luku! A o kon nanga den wolku, èn ala ai o si en” (Openbaring 1:7). Sma no sa si en nanga den trutru ai. Sensi Yesus opo go na hemel, a de wan yeye di „e tan na ini wan leti pe sma no man go; nowan sma no si en, èn nowan sma man si en”.—1 Timoteyus 6:16.

Neleki fa Yehovah no ben abi fu meki sma si en di a tyari den Tin Rampu kon tapu den Egeptesma na ini a ten fu Moses, na so Yesus no abi fu kenki kon tron wan libisma so taki sma kan si en. Den sma na ini a ten fu Moses no ben e tweifri taki Yehovah ben e meki den rampu dati pasa, èn den sma dati ben musu erken taki Gado abi bigi krakti (Exodus 12:31). Na so a sa de tu, taki te Gado poti Krestes leki a Sma di o krutu libisma, dan den ogrisma sa musu „si”, noso den sa musu frustan taki Gado e gebroiki Yesus fu krutu den. Den ogrisma o sabi dati, fu di den ben kisi warskow na fesi kaba. Iya, „ala ai o si [Yesus], . . . ala den lo fu grontapu o sari fu en ede”.—Openbaring 1:7.

A de fanowdu trutru taki den ogrisma kisi pori èn taki wan kaba kon na den ogri tirimakti, so taki trutru vrede kan de èn so taki sani kan waka bun baka na grontapu. Krestes o du den sani dati. Baka dati, a sa tiri ala afersi na grontapu, èn bigi kenki sa kon leki bakapisi fu dati.

Sma o kisi wini fu den bigi kenki di o kon

Na apostel Petrus ben taki dati ’ala sani o meki kon bun baka, soleki fa Gado ben taki nanga yepi fu den santa profeiti fu en fu owruten’ (Tori fu den Apostel 3:21). Den wortu disi abi fu du nanga den kenki di o pasa na grontapu na a ten te Krestes o tiri. A profeiti Yesaya fu a di fu aiti yarihondro b.G.T., na wan fu den profeiti di Gado ben gebroiki fu taki fu ’ala den sani di o meki kon bun baka’. Yesaya ben taki dati Yesus Krestes, a „Granman fu Vrede”, sa sorgu taki vrede de baka na grontapu. Disi na san a profeititori fu Yesaya e taki fu a tirimakti fu Krestes: „Na a kownu tirimakti di de pasa marki èn na vrede, wan kaba no sa kon” (Yesaya 9:6, 7). Yesus sa leri sma na grontapu fa fu libi na ini vrede. Den sma di o libi na grontapu „sa prisiri srefisrefi fu di vrede sa de pasa marki”.—Psalm 37:11.

Pôtifasi sa de ete te Krestes o tiri, èn sma sa de ete nanga angribere? Yesaya ben taki: „Na tapu a bergi disi, Yehovah fu den legre trutru sa sreka wan fesa-nyanyan nanga den moro bun nyanyan, wan fesa-nyanyan nanga tumusi bun win, nanga tumusi bun èn gosontu nyanyan, èn nanga tumusi bun win” (Yesaya 25:6). A psalm skrifiman ben singi: „Aleisi sa de bogobogo na grontapu; na tapusei fu den bergi sani sa gro pasa marki” (Psalm 72:16). Boiti dati, Bijbel e taki disi fu den sma di o libi na grontapu: „Den sa bow oso trutru èn libi na ini, èn den sa prani droifidyari trutru èn den sa nyan fu den froktu fu den. Den no sa bow meki wan tra sma go libi na ini; den no sa prani meki wan tra sma nyan fu en. Bika den dei fu mi pipel sa de leki den dei fu wan bon; èn den sma di mi kari sa nyan bun dorodoro fu a wroko fu den eigi anu.”—Yesaya 65:21, 22.

Yesaya ben taki tu dati wan kaba o kon na siki nanga dede. Gado ben taki a sani disi nanga yepi fu a profeiti Yesaya: „Na a ten dati den ai fu den breniwan sa kon opo, èn srefi den yesi fu den dofuwan sa kon opo. Na a ten dati a malengriwan sa kren neleki wan dia, èn a tongo fu a babaw-wan sa bari fu prisiri ede” (Yesaya 35:5, 6). Na a ten dati „nowan sma di e libi drape sa taki: ’Mi siki’” (Yesaya 33:24). Gado „sa swari dede trutru fu têgo, èn a Moro Hei Masra Yehovah trutru sa figi den watra-ai puru fu ala den fesi”.—Yesaya 25:8.

 Fa a de nanga ala den dedewan „di de na ini den grebi”? (Yohanes 5:28, 29) Yesaya ben taki na fesi: „Den dedewan fu yu sa libi. . . . Den sa opo baka” (Yesaya 26:19). Iya, den sma di dede sa kon na libi baka!

„Gado gi yu a makti fu de kownu fu têgo”

Te Krestes kon, dan a heri grontapu o kon bun baka. Grontapu sa kenki kon tron wan tumusi moi paradijs, èn ala sma o dini a tru Gado na ini wánfasi. Wi kan abi a dyaranti taki Yesus Krestes o man puru ogridu na grontapu, èn taki a o man meki ala sani waka na wan regtfardiki fasi?

Prakseri suma gi Yesus a krakti nanga a makti di a abi. Disi na san Bijbel e taki fu a Manpikin: „Gado gi yu a makti fu têgo, iya, fu ala ten, èn a kownutiki fu yu kownukondre na fu tiri na wan reti fasi. Yu ben lobi regtfardikifasi, èn yu no ben lobi kruktudu kwetikweti” (Hebrewsma 1:8, 9). A makti di Yesus abi leki kownu, komoto fu Yehovah. Gado na a Sma fu pe a makti disi komoto èn en na a Sma di gi Yesus a makti. Nowan enkri problema bigi tumusi gi Yesus fu lusu.

Baka di Yesus kisi wan opobaka, dan a taigi den disipel fu en: „Mi kisi ala makti na ini hemel èn na grontapu” (Mateyus 28:18). „Den engel, den wan di abi makti, èn sosrefi den wan di abi krakti, saka densrefi na en ondro”, na so 1 Petrus 3:22 e taki. Nowan enkri krakti èn nowan enkri makti o man gens Yesus. Noti kan tapu en fu tyari têgo wini kon gi libisma.

Sma e kisi deki-ati fu di den sabi taki Krestes o kon

Na ini a brifi di na apostel Paulus ben skrifi gi den Tesalonikasma, a ben taki: „Doronomo wi e prakseri a wroko di unu e du fu di unu abi bribi, a muiti di unu e du fu di unu abi lobi, èn a fasi fa unu e horidoro fu di unu e howpu tapu wi Masra Yesus Krestes, na fesi fu wi Gado èn Tata” (1 Tesalonikasma 1:3). Paulus ben sori taki wan sma di e howpu tapu Yesus Krestes e wroko fayafaya èn a e horidoro. Wan sma di abi a howpu dati, e bribi tu taki Krestes o kon èn taki wan kenki o kon leki bakapisi fu dati. Tru Kresten di abi a howpu dati, e kisi deki-ati èn den e horidoro, srefi na ini heri muilek situwâsi.

Luku Carlos fu eksempre. A man disi e libi na ini São Paulo, na Brasyonkondre. Na ini augustus 2003, Carlos kon sabi taki a abi kanker. Sensi a ten dati, datra koti en aiti leisi, èn leki bakapisi fu dati a e kisi furu pen èn a e kon swaki. Ma toku a e tan gi tra sma deki-ati. Fu eksempre, di a ben e preiki na strati, na fesisei fu wan bigi ati-oso, dan a miti wan tra Kotoigi. Na a ten dati a masra fu a Kotoigi disi ben de na ati-oso fu kisi yepi fu di a abi kanker. Fu di Carlos ondrofeni den takru bakapisi fu kanker tu, meki a ben man gi a sisa nanga a masra fu en deki-ati èn a ben man trowstu den. Bakaten, a trowpaar disi taki dati den kisi deki-ati trutru fu a takimakandra di den ben abi nanga Carlos. Na so Carlos ondrofeni taki den wortu fu Paulus tru. Paulus ben taki: „[Gado] e trowstu wi na ini ala den banawtu fu wi, so taki nanga yepi fu a trowstu di wisrefi e kisi fu Gado, wi man trowstu den sma di de na ini iniwan sortu banawtu.”—2 Korentesma 1:4.

Fa Carlos man tan gi trawan deki-ati aladi a e siki? Fu di Carlos abi a howpu taki Krestes o kon èn taki a sani dati o tyari bigi kenki kon, meki a e tan „du san bun”.—Galasiasma 6:9.

Luku sosrefi na eksempre fu Samuel. Sma kiri en brada sowan 50 meter moro fara fu na oso fu a papa fu den. Sma sutu tin kugru go na ini a skin fu Samuel en brada. A dedeskin fu a brada tan aiti yuru langa na sei pasi, aladi skowtu ben e ondrosuku a tori. Samuel no man frigiti san pasa a dei dati. Ma a e tan horidoro fu di a abi a howpu taki Krestes sa puru ala ogridu na grontapu èn taki a regtfardiki fasi fa Krestes o tiri baka dati sa tyari blesi kon gi libisma. Nofo tron Samuel e prakseri fa a o  brasa en brada te a kisi wan opobaka na ini a Paradijs na grontapu.—Tori fu den Apostel 24:15.

San yu musu du?

Yu sa kisi furu trowstu te yu e howpu taki Krestes o kon èn te yu e howpu tapu den sani di o pasa leki bakapisi fu dati. Yesus Krestes sa tyari wan kaba kon na ala den sani di e meki taki libisma e kisi problema, èn sosrefi na ala ogri di abi krakti na wi tapu.

San yu musu du fu kisi den bogobogo blesi di Krestes o meki libisma kisi? Teki ten fu studeri Gado Wortu, Bijbel, bun. Wan leisi, Yesus ben taigi en Tata na ini begi: „Efu sma wani kisi têgo libi, dan den musu tan leri sabi yu, a wan-enkri tru Gado, èn a sma di yu seni kon, Yesus Krestes” (Yohanes 17:3). Du muiti fu ondrosuku san Bijbel e leri. Yehovah Kotoigi na ini a kontren fu yu sa de klariklari fu yepi yu fu kon sabi moro fu Bijbel. Grantangi, aksi den fu yepi yu, noso skrifi go na den sma di tyari a tijdschrift disi kon na doro.

[Prenki na tapu bladzijde 7]

Te Krestes kon, dan a heri grontapu o kon bun baka

[Sma di abi a reti fu a prenki]

Inset, background only: Rhino and Lion Park, Gauteng, South Africa