Wi musu frede fu di Krestes o kon?

SAN yu denki o pasa te Yesus Krestes o kon? A sani dati o tyari pori, sari, nanga pina kon gi libisma? Noso a o tyari wan kaba kon na ala den problema fu wi? Wi musu frede fu di Krestes o kon? Noso wi musu breiti taki dati o pasa?

Bijbel e taki disi fu a kon di Krestes o kon: „Luku! A o kon nanga den wolku, èn ala ai o si en, . . . dan ala den lo fu grontapu o sari fu en ede” (Openbaring 1:7). Den wortu di skrifi dyaso abi fu du nanga Yesus di o kon fu blesi den regtfardikiwan èn fu strafu den ogrisma.

Na apostel Yohanes no ben e frede a kon di Krestes o kon, ma a ben breiti taki dati ben o pasa. Baka di Yohanes kisi wan fisyun di ben e sori taki Krestes o kon èn di ben e sori sosrefi san dati wani taki gi grontapu, dan a begi fayafaya: „Kon, Masra Yesus” (Openbaring 22:20). Ma fu san ede „ala den lo fu grontapu o sari fu en ede”? Fa „ala ai” o si en? San o pasa te Krestes kon? Sortu wini wi kan kisi nownow kaba te wi e bribi taki a o kon? Na artikel di e kon sa gi piki tapu den aksi disi.