A suku di sma e suku bun rai

Fa mi kan sorgu taki mi e tan gosontu?

San mi kan du fu abi wan moro bun osofamiri libi?

San mi kan du so taki mi no e lasi mi wroko?

OITI yu aksi yusrefi den sani disi? Yu feni bun piki tapu den aksi disi? Ibri yari, sma e skrifi sowan 2000 difrenti buku di e sori san den musu du na ini den sortu afersi disi, noso na ini tra prenspari afersi. Te wi e luku na ini Ingrisikondre wawan, dan wi e si taki sma e pai sowan 120 milyun euro ibri yari fu bai buku di e sori den fa densrefi kan lusu den problema fu a libi. Na ini Amerkankondre, sma e pai sowan 480 milyun euro ibri yari fu bai den sortu buku disi. Sobun, a no yu wawan e suku bun rai fu kon sabi fa fu lusu den problema fu na aladei libi.

Disi na san wan skrifiman ben taki fu ala den rai di de fu feni na ini den dusundusun buku dati: „Furu fu den nyun buku e taki nomo san sma ben skrifi kaba.” Iya, furu fu den rai di de fu feni na ini den buku disi, na koni rai di ben skrifi kaba na ini wan fu den moro owru buku di de na grontapu. Fu tru, a buku disi na a wan-enkri buku di prati so furu na heri grontapu. A heri buku disi, noso pisi fu en, vertaal na ini sowan 2400 tongo. Ala nanga ala, moro leki 4,6 milyard fu a buku disi prati na heri grontapu. Iya, a buku disi na Bijbel.

Bijbel e taki krin: „Na Gado srefi ben meki sma skrifi ala den sani di de na ini Gado Buku; den sani disi bun fu gi leri, fu frumane sma, fu poti sani kon reti, fu gi trangaleri na wan regtfardiki fasi” (2 Timoteyus 3:16). A tru taki Bijbel no de leki den buku di skrifi spesrutu fu sori sma fa densrefi kan lusu den problema. A moro prenspari reide fu san ede Bijbel skrifi, na fu meki wi kon sabi san Gado o du gi libisma. Ma toku Bijbel e gi furu rai di e sori fa wi kan lusu den problema fu wi, èn a e pramisi taki wi sa kisi wini te wi e teki den rai dati (Yesaya 48:17, 18). Te wan sma e teki a rai fu Bijbel, dan a sa abi bun bakapisi ala ten, awansi fu sortu kondre a de, awansi sortu kulturu a abi, noso awansi o furu skoroleri a kisi. Grantangi, leisi na artikel di e kon, so taki yusrefi kan kon si efu Bijbel trutru e gi bun rai di abi fu du nanga sani soleki a gosontu fu yu, na osofamiri libi fu yu, èn nanga a wroko fu yu.