Bun rai de fu feni!

NA INI a ten disi wi kan feni furu buku di skrifi spesrutu gi sma di abi problema. Bijbel de tra fasi leki den buku dati. Den rai fu Bijbel no e yepi sma soso te den de na ini problema, ma den rai e yepi sma tu fu no kon na ini problema, so taki den no e meki a libi fu den kon moro hebi.

Bijbel kan ’gi koni na a sma di no abi ondrofeni, èn a kan gi wan yonkuman sabi nanga frustan’ (Odo 1:4). Te yu e teki den rai fu Bijbel, dan ’yu frustan srefi sa kibri yu, èn a koni fu man si sani krin sa kibri yu, so taki yu kan komoto fu a takru pasi’ (Odo 2:11, 12). Luku wan tu eksempre di e sori fa den Bijbel rai kan yepi yu fu tan gosontu, fu kon abi wan moro bun osofamiri libi, èn fu kon tron wan moro bun wrokoman, noso wan moro bun wrokobasi.

No dringi tumusi furu sopi

Bijbel no e taki dati sma no mag dringi pikinso sopi. Na apostel Paulus ben sori taki win kan bun gi a gosontu, di a taigi a yonkuman Timoteyus: „Dringi pikinso win gi yu bere èn fu di yu e siki so furu” (1 Timoteyus 5:23). Tra bijbeltekst e sori taki Gado no ben wani taki sma gebroiki win leki dresi nomo. Bijbel e taki dati win „e meki na ati fu sondu libisma prisiri” (Psalm 104:15). Ma Bijbel e warskow taki wi no musu tron „sma di lobi dringi furu win” (Titus 2:3). Bijbel e taki: „No kon na mindri sma di e dringi win pasa marki, na mindri den wan di e nyan meti na wan gridi fasi. Bika wan drunguman nanga wan sma di e nyan tumusi furu, sa kon pôti” (Odo 23:20, 21). San na den bakapisi te sma no e teki den bun rai disi? Luku san e pasa na ini wan tu kondre.

Na organisâsi fu gosontu afersi na heri grontapu (WHO) e taki na ini wan raportu: „Den problema di kon fu di sma dringi tumusi furu sopi, meki taki sma na ini Ierland pai sowan 2,4 milyard euro ibri yari.” Disi wani taki dati den ben pai „279 milyun euro gi datrayepi, 315 milyun euro gi ongoloku di ben pasa na tapu strati, 100 milyun euro gi ogri di drunguman du, èn den ben pai 1034 milyun euro fu di sma no ben kon na wroko bika den ben drungu” (Global Status Report on Alcohol 2004).

Ma a sani di moro takru leki a moni di sma e pai fu di trawan dringi tumusi furu sopi, na a ogri di e miti sma leki bakapisi fu dati. Fu eksempre, na ini wán yari nomo, moro leki  500.000 sma na ini Australia kisi mankeri fu di wan drunguman du den ogri. Na ini Fransikondre, sowan 30 procent fu den ogri di ben du na ini osofamiri, ben pasa fu di trawan dringi tumusi furu sopi. Te yu e luku den sani disi di e pasa, dan yu no feni taki a rai di Bijbel e gi ini a tori disi, bun srefisrefi?

No kisi a gwenti fu du sani di kan doti a skin

Sensi 1942, di sma ben feni en wan modo ete fu smoko, dan a tijdschrift disi ben taki kaba dati a sani disi no e kruderi nanga Bijbel gronprakseri. Fu dati ede sma no musu smoko. Wan artikel di ben kon na doro a yari dati, ben sori taki wan sma di wani plisi Gado, musu gi yesi na a Bijbel komando disi: ’Krin yusrefi fu ibri sani di kan doti yu skin nanga yu denki’ (2 Korentesma 7:1). Now, sowan 65 yari baka dati, furu sma e agri taki a Bijbel rai disi bun srefisrefi.

Na ini 2006, na organisâsi fu gosontu afersi na heri grontapu taki dati „a di fu tu sani di e kiri moro furu sma, na a smoko di den e smoko tabaka”. Ibri yari, sowan feifi milyun sma e dede fu di den e smoko tabaka. Disi furu srefisrefi te yu e teki en gersi nanga sowan dri milyun sma di e dede ibri yari fu AIDS. Na ini a di fu 20 yarihondro, sowan 100 milyun sma dede fu di den smoko tabaka, èn a nomru disi de pikinmoro a srefi leki a nomru fu sma di dede na ini ala den orloku fu a yarihondro dati. Iya, furu sma e agri now taki a de wan koni sani fu no smoko tabaka.

„Lowe gi hurudu”

Ma furu sma no e agri nanga a Bijbel rai di abi fu du nanga seks. Furu sma e bribi taki Bijbel e taki dati libisma no mag abi seks firi kwetikweti. Ma dati no de so. Bijbel e gi bun rai di e sori sma san den musu du te den e kisi a firi fu abi seks. Bijbel e leri taki soso wan man nanga wan uma di trow nanga makandra, mag abi seks nanga makandra (Genesis 2:24; Mateyus 19:4-6; Hebrewsma 13:4). Te trowpatna abi seks nanga makandra, dan dati na wan fasi fa den e sori lobi gi makandra (1 Korentesma 7:1-5). Boiti dati, te papa nanga mama trow èn den lobi makandra, dan dati sa abi bun bakapisi gi den pikin fu den.—Kolosesma 3:18-21.

Bijbel e taigi den sma di e libi wan morsu sekslibi: „Lowe gi hurudu” (1 Korentesma 6:18). Fu san ede den musu du dati? A tekst e taki moro fara: „Ibri tra sondu di wan sma kan du, a no e du teige en skin; ma a sma di gwenti du hurudu, e sondu teige en eigi skin.” San na den bakapisi te sma no e teki den rai disi fu Bijbel?

Luku san e pasa na ini Amerkankondre. Moro leki iniwan tra gudu kondre, Amerkankondre abi moro furu tini now di de nanga bere, èn dati na sowan 850.000 ibri yari. Furu fu den tini disi e puru bere, èn den wan di no e  du dati, e kisi pikin sondro taki den trow. A no de fu taki dati furu fu den yongu mama disi e du ala san den man fu sori lobi gi den pikin fu den èn fu gi den trangaleri. Sani ben waka bun nanga sonwan fu den pikin disi. Ma a tru taki nofo tron, den boi fu tini mama e go na strafu-oso te den kon bigi, èn den umapikin e kisi pikin yonguyongu. Robert Lerman ben ondrosuku wan tu raportu di ben sori san ben pasa na ini den furu yari di pasa. A ben skrifi: „A kan taki moro problema kon de na ini a libimakandra fu di furu papa noso mama e kweki den pikin fu den sondro patna. Moro nanga moro pikin e gowe libi skoro, den e gebroiki sopi nanga drugs, den e kon de nanga bere èn e meki pikin yonguyongu, èn den e du ogri.”

Den sma di e libi wan morsu sekslibi kan kon siki èn den kan firi brokosaka. Fu eksempre, wan tijdschrift e taki: „Ondrosuku sori taki te yongusma abi seks, dan a e pasa nofo tron taki den e firi brokosaka èn taki den wani kiri densrefi” (Pediatrics). Wan organisâsi na Amerkankondre di e luku a gosontu fu sma, e taki fu den siki di den sma disi kan kisi: „Moro leki afu fu ala den sma na ini Amerkankondre sa abi siki di sma kan kisi te den abi seks nanga trawan.” Efu sma ben o teki a bun Bijbel rai disi di abi fu du nanga seks, dan furu fu den no ben o sari èn den no ben o abi so furu problema.

Kon kisi wan moro bun banti na ini na osofamiri

Bijbel no e warskow wi nomo gi sani di kan abi takru bakapisi gi wi. Luku a rai fu Bijbel di e sori wi fa wi kan meki wi osofamiri libi kon moro bun.

Gado Wortu e taki: „Den masra musu lobi den wefi leki den eigi skin” (Efeisesma 5:28). Masra no musu si den wefi fu den leki den no warti. Ma na presi fu dati, Bijbel e gi masra a deki-ati fu libi nanga a wefi fu den ’na wan fasi di e sori taki den abi sabi, aladi den e gi na uma grani fu di a de wan moro swaki prapi’ (1 Petrus 3:7). Te problema e kon na ini a trowlibi, dan masra e kisi a rai disi: „Tan lobi un wefi èn no abi bita-ati gi den” (Kolosesma 3:19). Yu no denki taki te wan masra e du san Bijbel e taki, dan en wefi sa lobi en èn lespeki en?

Bijbel e gi wefi a rai disi: „Meki den wefi saka densrefi na den masra ondro neleki fa den e saka densrefi na Masra ondro, bika wan masra na a ede fu en wefi neleki fa Krestes na a ede tu fu a gemeente . . . A wefi musu abi dipi lespeki gi en masra” (Efeisesma 5:22, 23, 33). Wan wefi di e teki a rai disi te a e taki nanga en masra, noso te a e taki fu en masra nanga trawan, sa meki taki en masra lobi en srefisrefi, a no so?

Un papa nanga mama, Bijbel e taigi unu fa fu kweki un pikin. A e taigi unu fu taki nanga den pikin ’te unu e sidon na ini un oso èn te unu e waka na pasi èn te unu e go didon èn te unu e opo’ (Deuteronomium 6:7). Spesrutu den papa abi a frantwortu fu leri den pikin fa den musu tyari densrefi na wan bun fasi, èn te den e piri-ai gi den pikin dan den musu du dati nanga lobi. Gado Wortu e taki: „Un papa, no tanteri den pikin fu unu, ma tan kweki den nanga a leri fu Yehovah èn frumane den, so taki den kan kisi a denki fu en” (Efeisesma 6:4). Boiti dati, Bijbel e taigi pikin fu ’gi yesi na den papa nanga mama èn fu lespeki den’. *—Efeisesma 6:1, 2.

Yu denki taki sani o waka moro bun na ini na osofamiri te sma e du den sani disi di skrifi na ini Bijbel? Kande yu e taki dati a moi fu yere den rai disi, ma yu no de seiker efu den abi trutru bun bakapisi gi sma. Grantangi, go na a Kownukondre zaal fu Yehovah Kotoigi na ini a birti fu yu. Drape yu sa miti osofamiri di e meki muiti fu gi yesi na a koni rai fu Bijbel. Taki nanga den, èn luku fa den sma na ini na osofamiri de nanga makandra. Yu sa si nanga yu eigi ai taki osofamiri kan de trutru koloku te den e libi akruderi Bijbel gronprakseri.

 Wrokoman musu wroko tranga èn wrokobasi no musu bedrigi sma

Sortu rai fu Bijbel kan yepi wan sma fu no lasi en wroko? Bijbel e taki dati nofo tron sma sa warderi wan wrokoman di sabi du en wroko bun, èn a wrokoman dati sa kisi wini. A koni Kownu Salomo ben taki: „Yu si wan man di sabi en wroko? Na fesi kownu a sa tanapu” (Odo 22:29). Wan wrokobasi sa fruferi fu wan ’wrokoman di lesi’, neleki fa „smoko” de wan fruferi sani te a kon ’na ini wan sma ai’ (Odo 10:26). Bijbel e taigi wrokoman fu wroko tranga èn fu no bedrigi den wrokobasi. „A sma di e fufuru, no musu fufuru moro, ma a musu wroko tranga, èn meki a du bun wroko nanga en anu” (Efeisesma 4:28). Srefi te a wrokobasi no e luku, toku a wrokoman musu wroko tranga. „Ala ten gi yesi na den wan di de un basi na grontapu, èn no du dati fu sma ai nomo, soleki fa sma di wani plisi trawan e du, ma du dati nanga wan opregti ati, èn nanga frede gi Yehovah” (Kolosesma 3:22). Efu yu na wan wrokobasi, dan yu ben o lobi en te wan wrokoman e du san Bijbel e taki, a no so?

Bijbel e memre wrokobasi na a sani disi: „A wrokoman warti fu kisi a moni di a wroko fu en” (1 Timoteyus 5:18). A Wet di Gado ben gi den Israelsma, ben sori taki wrokobasi musu pai den wrokoman biten, èn den musu pai den a moni fu a wroko di den du. Moses ben skrifi: „Un no musu bedrigi wan trawan, èn un no musu fufuru. Te un musu pai wan wrokoman fu a wroko di a du, dan un no musu hori en moni a heri neti teleki mamanten” (Lefitikus 19:13). Yu no ben o lobi fu wroko gi wan basi di e gi yesi na a rai fu Bijbel di e taki dati a musu pai yu biten gi a wroko di yu du?

A buku di abi a moro koni rai

A e fruwondru yu taki so wan owru buku leki Bijbel abi bun rai di wi kan gebroiki na ini a ten disi? A reide fu san ede wi kan gebroiki den rai na ini Bijbel te nanga now ete, aladi dati no de so nanga tra buku, na fu di a de „a wortu fu Gado”, èn a no de a wortu fu libisma.—1 Tesalonikasma 2:13.

Wi e gi yu a deki-ati fu teki ten fu kon sabi moro fu Gado Wortu. Te yu e du dati, dan yu o kon lobi a Skrifiman fu Bijbel, Yehovah Gado. Du san Gado e taki, dan yu sa si taki a rai fu en o yepi yu fu no kon na ini problema èn yu o kisi wan moro bun libi. Te yu e du dati, dan yu sa ’kon krosibei na Gado, èn a sa kon krosibei na yu’ (Yakobus 4:8). Nowan tra buku kan yepi yu na so wan bun fasi.

[Futuwortu]

[Prenki na tapu bladzijde 4]

Yu feni a Bijbel rai bun di e taki dati wi no musu dringi tumusi furu sopi?

[Prenki na tapu bladzijde 5]

Yu e agri nanga Bijbel te a e taki dati wi no musu smoko tabaka?

[Prenki na tapu bladzijde 7]

Wi sa abi wan moro bun osofamiri libi te wi e du san Bijbel e taki

[Sma di abi a reti fu a prenki na tapu bladzijde 5]

Globe: Based on NASA Photo