Sma e tan na libi te den e poti bribi na ini Bijbel profeititori

YESUS e gowe libi a tempel na ini Yerusalem fu a lasti leisi, èn wan fu den disipel fu en e taki: „Leriman, luku fa den ston disi bigi èn luku fa den oso moi!” A tempel na a moro warti èn a moro prenspari sani fu a Dyu pipel. Ma Yesus e piki en: „Yu e si den bigi oso disi? Nowan ston sa tan na tapu a trawan kwetikweti, ma den sa broko den puru.”—Markus 13:1, 2.

Te yu e prakseri a sani disi, dan a gersi leki a no kan kwetikweti! Sonwan fu den ston fu a tempel bigi srefisrefi. Boiti dati, a sani di Yesus taki fu a tempel, di de a moro prenspari presi pe den Dyu e kon anbegi Gado, e sori taki Yerusalem èn kande srefi a Dyu pipel o kisi pori. Dati meki den disipel e aksi Yesus moro fara: „Taigi wi: O ten den sani disi o pasa, èn san o de a marki di sa sori taki ala den sani disi o kon na wan kaba?”—Markus 13:3, 4.

Ma Yesus e warskow den taki „a kaba no de ete”. A fosi sani di o pasa, na taki den disipel o yere taki orloku, gronseki, nanga angriten o de, èn taki na difrenti presi takru siki o de di e kiri ipi-ipi sma. Baka dati, kefalek ogri sani o pasa di sa meki taki bigi rampu miti a Dyu pipel, iya, „wan bigi banawtu” o kon tapu a pipel. Ma Gado sa frulusu „den sma di a kari”, namku den getrow Kresten. Fa a o du dati?—Markus 13:7; Mateyus 24:7, 21, 22; Lukas 21:10, 11.

Den Dyu e opo densrefi teige Rome

Twenti na aiti yari e pasa, èn den Kresten na ini Yerusalem e wakti ete fu a kaba kon. Orloku, gronseki, angriten, nanga siki e meki taki sani no e go bun kwetikweti nanga a Gran Kownukondre Rome (Luku a faki na tapu bladzijde 9). Furu sma na ini Yudea e opo densrefi teige a tirimakti, èn sma fu difrenti kulturu e feti nanga makandra. Ma na ini Yerusalem, pe den skotu fu a foto e kibri sma, sani no de so ogri ete. Den sma e du den sani di den gwenti du ibri dei, iya, den e nyan, den e wroko, den e trow, èn den e meki pikin. Fu di a bigi tempel de drape, meki den Dyu no e frede èn den e denki taki noti no kan pasa nanga a foto.

Na wan pisi ten fu 61 G.T., den Kresten na ini Yerusalem e kisi wan brifi fu na apostel Paulus. A e prèise den fu di den e horidoro, ma a e broko en  ede taki son sma na ini a gemeente no e hori na prakseri taki den e libi na ini wan tumusi prenspari ten. A bribi fu son Kresten kon swaki èn sonwan fu den no tron lepi Kresten (Hebrewsma 2:1; 5:11, 12). Paulus e gi den a rai disi: „Fu dati ede, un musu tan taki sondro frede . . . Bika ete ’wan syatu pisi ten’, dan ’a sma di e kon, o doro èn a no sa draidrai’. ’Ma a regtfardikiwan fu mi o libi fu di a abi bribi’, èn ’efu a e hari ensrefi puru fu di a frede, dan mi no sa prisiri nanga en’” (Hebrewsma 10:35-38). Fu tru, a rai disi kon na a yoisti ten! Ma den Kresten sa bribi san Yesus taki, èn den sa tan na ai fu si fa a profeititori fu Yesus o kon tru? A de so trutru taki Yerusalem o kisi pori heri esi?

Na ini den feifi yari baka dati, a situwâsi na ini Yerusalem e kon moro ogri dei fu dei. Te fu kaba na ini a yari 66 G.T., Florus, a kruka Granman fu Rome, teki 17 talenti na ini a monikisi fu a santa tempel, di den Dyu musu pai leki belasting. Disi meki taki den Dyu atibron srefisrefi èn den e opo densrefi teige a tirimakti fu Rome. Wan bigi grupu fu den e go na ini Yerusalem èn den e kiri den srudati fu Rome drape. Sondro fu frede den e taki dati Yudea no de na ondro a tiri fu Rome moro. Now a feti e bigin na mindri Yudea nanga Rome!

A no doro dri mun ete, di a granman fu Siria, namku a Romesma Cestius Gallus, e hari go na a zuidsei nanga 30.000 srudati fu feti nanga den Dyu di e opo densrefi teige Rome. A legre fu en e doro na ini Yerusalem na a ten di a Wiwirikampu-fesa e hori, èn heri esi den e teki den presi lontu Yerusalem abra. Den Dyu di e opo densrefi no furu, èn den e go kibri na ini a tempel di de leki wan fortresi. A no e teki langa fosi den srudati fu Rome e bigin broko a skotu fu a tempel. Den Dyu e skreki srefisrefi. Den no man bribi san den e si. Den heiden srudati e prefuru fu doti a moro santa presi pe den Dyu e anbegi Gado! Ma den Kresten na ini a foto e memre san Yesus ben taki: ’Te unu e si taki a tegu sani di e tyari pori kon, e tanapu na wan santa presi, dan meki den sma di de na Yudea, bigin lowe go na den bergi’ (Mateyus 24:15, 16). A de so taki den Kresten o sori bribi na ini a profeititori di Yesus ben taki, èn den o du san a taigi den? Te wi e luku fa sani e waka, dan wi e si taki den musu du san Yesus taki efu den wani tan na libi. Ma fa den o lowe?

Wantronso, sondro taki den fruwakti en, Cestius Gallus e hari gowe nanga den srudati fu en go na a sesyoro, èn den Dyu e lon na den baka. Den sma na ini a foto no man bribi taki a foto no de na ini problema moro! Den Kresten e bribi san Yesus taki, èn dati meki den e gi yesi na a warskow fu lowe komoto na Yerusalem go na a foto Pela. A foto disi de na a bergi kontren abrasei fu Yordanliba, èn den sma na ini a foto disi no e teki sei na ini a feti. Den Kresten e lowe gowe na a yoisti ten. Heri esi, den Dyu di lon baka den srudati fu Rome drai kon baka na Yerusalem, èn den e  dwengi den sma na ini a foto fu kon feti tu nanga den Romesma. * Den Kresten di e kibri na Pela, e luku san o pasa now.

A kondre e kon bruya moro nanga moro

Baka wan tu mun nomo, wan tra legre fu Rome e hari go na Yerusalem. Na ini a yari 67 G.T., a legre-edeman Vespasianus nanga en manpikin Titus, e seti wan bigi legre fu 60.000 srudati. Tu yari langa a tranga srudati legre disi e hari go na Yerusalem, èn den e kiri ala den sma di e gens den. Na a srefi ten, difrenti grupu Dyu na ini Yerusalem e bigin feti nanga makandra na wan ogri-ati fasi. Den e pori ala a nyanyan di den sma ben abi na ini a foto. Den e broko den oso di ben de lontu a tempel, èn moro leki 20.000 Dyu lasi den libi. Vespasianus no e hari go wantewante na ini Yerusalem, èn a taki: ’A gado fu mi na wan moro bun legre-edeman leki mi, bika a e meki den feanti fu wi kiri makandra.’

Di Kèiser Nero fu Rome dede, dan Vespasianus drai go baka na Rome fu tron Kèiser. A e libi Titus na baka fu feti go doro nanga den sma fu Yudea. Na a Paskafesa fu 70 G.T., Titus e doro na Yerusalem èn a e lontu a foto so taki den sma di e libi na ini a foto, ma sosrefi den sma di kon na a fesa, no man lowe moro. Den srudati fu Titus e koti furu bon fu Yudea puru, èn den e gebroiki dati fu meki wan skotu nanga srapu postu. A skotu langa sowan 7 kilometer èn a de lontu a heri mamafoto. Disi e pasa soleki fa Yesus ben taki: „Yu feanti o bow wan skotu nanga srapu postu na yu lontu èn den o lontu yu èn na ala sei sma o pina yu.”—Lukas 19:43.

A no e teki langa fosi den sma e dede fu angri. Bigi grupu fu sma di abi fetisani, e fufuru ala den sani na ini den oso fu den sma di dede, èn fu den wan di kisi hebi mankeri. Wan uma e bruya so te taki a e kiri en beibi èn e nyan en. Na so a e meki a sani disi di Bijbel taki, kon tru: „Un sa abi fu nyan un eigi pikin, iya, un sa abi fu nyan un manpikin nanga un umapikin . . . bika unu sa de na ini bigi banawtu èn den feanti fu unu sa kwinsi unu srefisrefi te den lontu unu.”—Deuteronomium 28:53-57.

Te fu kaba, di den feanti lontu Yerusalem feifi mun langa, dan den e teki a foto abra. Den feanti  e fufuru ala sani na ini a foto èn na ini a bigi tempel, den e bron ala sani plata, èn den e broko ala sani (Danièl 9:26). Sowan 1.100.000 sma dede, èn den Romesma tyari sowan 97.000 sma na ini katibo (Deuteronomium 28:68). * Pikinmoro nowan enkri Dyu de moro na ini Yudea. Iya, disi na trutru wan bigi rampu di noiti no pasa ete na ini a foto. A sani disi e tyari wan bigi kenki kon na ini den politiek afersi fu den Dyu, na ini na anbegi fu den, èn na ini a kulturu fu den. *

Ma na a tra sei, den Kresten na ini Pela e taki Gado tangi taki den de na libi ete. Fu di den poti bribi na ini Bijbel profeititori, meki den tan na libi!

Te wi e luku den sani disi di pasa, dan ibriwan fu wi musu aksi ensrefi: ’A bribi di mi abi o meki taki mi tan na libi te a bigi banawtu kon?’ Mi ’na wan sma di abi bribi, èn di sa tan na libi leki bakapisi fu dati’?—Hebrewsma 10:39; Openbaring 7:14.

[Futuwortu]

[Faki na tapu bladzijde 9]

A marki kon tru na ini a fosi yarihondro

ORLOKU:

Galia (39-40 G.T.)

Noord Afrika (41 G.T.)

Ingrisikondre (43, 60 G.T.)

Armeinia (58-62 G.T.)

Na ini Yudea feti ben de na mindri borgu nanga sma fu difrenti kulturu (50-66 G.T.)

GRONSEKI:

Rome (54 G.T.)

Pompeyi (62 G.T.)

Pikin Asia (53, 62 G.T.)

Kreita (62 G.T.)

ANGRITEN:

Rome, Grikikondre, Egepte (na wan ten fu 42 G.T.)

Yudea (na wan ten fu 46 G.T.)

TAKRU SIKI DI KIRI IPI-IPI SMA:

Babilonia (40 G.T.)

Rome (60, 65 G.T.)

FALSI PROFEITI:

Yudea (na wan ten fu 56 G.T.)

[Karta/​Prenki na tapu bladzijde 10]

(Efu yu wani si pe den sani disi skrifi, luku a tijdschrift)

Den presi na ini Palestina pe den Romesma go feti, na ini a pisi ten fu 67-70 G.T.

Petolemais

Se fu Galilea

Pela

PEREA

SAMARIA

Yerusalem

Sowtu Se

YUDEA

Sesarea

[Sma di abi a reti fu a karta]

Map only: Based on maps copyrighted by Pictorial Archive (Near Eastern History) Est. and Survey of Israel

[Prenki na tapu bladzijde 11]

’Den feanti fu wi e kiri makandra.’—Vespasianus

[Prenki na tapu bladzijde 11]

Na ini 70 G.T., den legre fu Rome pori Yerusalem

[Sma di abi a reti fu a prenki na tapu bladzijde 11]

Relief: Soprintendenza Archeologica di Roma; Vespasian: Bildarchiv Preussischer Kulturbesitz/Art Resource, NY