Wi musu de klariklari fu saka wisrefi na den lobi-ati skapuman ondro
Wi musu de klariklari fu saka wisrefi na den lobi-ati skapuman ondro
„Gi yesi na den wan di e teki fesi na un mindri èn saka unsrefi na den ondro.”—HEBREWSMA 13:17.
1, 2. Sortu bijbeltekst e sori taki Yehovah nanga Yesus na lobi-ati Skapuman?
YEHOVAH GADO nanga en Manpikin, Yesus Krestes, na lobi-ati Skapuman. Yesaya ben taki na fesi: „Luku! A Moro Hei Masra Yehovah srefi sa kon leki wan tranga man, èn a sa gebroiki en anu fu tiri gi en. . . . Leki wan skapuman a sa tiri en eigi ipi. Nanga en anu a sa tyari den pikin skapu kon na wán, èn na en borsu a sa tyari den. Den wan di de na bobi, a sa tiri nanga koni.”—Yesaya 40:10, 11.
2 A profeititori disi kon tru a fosi leisi na a ten di wan Dyu fikapisi drai go baka na Yuda na ini 537 b.G.T. (2 Kroniki 36:22, 23). A profeititori disi ben kon tru tu na ini 1919 di a moro Bigi Sirus, Yesus Krestes, meki a salfu fikapisi kon fri fu „Babilon a Bigiwan” (Openbaring 18:2; Yesaya 44:28). Yesus de leki na „anu” di Yehovah e gebroiki fu tiri, èn na so Yesus e tyari den skapu kon makandra èn a e sorgu den na wan switi fasi. Yesus ben taki: „Mi na a tumusi bun skapuman; mi sabi mi skapu èn mi skapu sabi mi.”—Yohanes 10:14.
3. Fa Yehovah e sori taki a e broko en ede nanga a fasi fa sma e sorgu den skapu fu en?
3 A profeititori na ini Yesaya 40:10, 11 e sori krin taki Yehovah di de leki wan skapuman, e tiri a pipel fu en na wan switi fasi (Psalm 23:1-6). Di Yesus ben de na grontapu, dan ensrefi ben e sori switifasi gi den disipel fu en èn gi tra sma, èn a ben e broko en ede nanga den tu (Mateyus 11:28-30; Markus 6:34). Yehovah nanga Yesus no ben lobi en kwetikweti taki den skapuman, noso den fesiman fu Israel, no ben e broko den ede nanga den skapu. Den skapuman disi no ben e syen srefisrefi taki den no ben e poti prakseri na a ipi èn taki den ben e kwinsi den (Esekièl 34:2-10; Mateyus 23:3, 4, 15). Yehovah ben pramisi: „Mi sa frulusu den skapu fu mi, èn sma no sa fufuru den moro; èn mi sa koti krutu na mindri den skapu. Èn mi sa meki wán skapuman tiri den, èn a musu gi den nyanyan, iya, mi futuboi David sa du dati. Ensrefi sa gi den nyanyan èn ensrefi sa tron a skapuman fu den” (Esekièl 34:22, 23). Na ini a ten disi fu a kaba, Yesus Krestes, a Moro Bigi David, na a „wán skapuman” di Yehovah poti fu luku ala den futuboi fu En na grontapu, iya, a musu luku ala den salfu Kresten nanga den „tra skapu”.—Yohanes 10:16.
Yehovah gi a gemeente presenti
4, 5. (a) Sortu warti presenti Yehovah gi a pipel fu en na grontapu? (b) Sortu presenti Yesus gi a gemeente fu en?
4 Soleki fa wi si kaba, dan Yehovah gi den futuboi fu en na grontapu „wán skapuman”, namku Yesus Krestes, èn en na trutru wan warti presenti di a Kresten gemeente kisi. Yesaya 55:4 ben taki na fesi dati Yehovah ben o gi den futuboi fu en wan Fesiman di de na hemel. Drape skrifi: „Luku! Mi gi en leki wan kotoigi gi den pipel, leki wan fesiman nanga kapten gi den pipel.” Yesus e tyari den salfu Kresten nanga den memre fu a „bigi ipi” kon na wán, èn den e komoto fu ala kondre, lo, pipel, nanga tongo (Openbaring 5:9, 10; 7:9). Aladi den na fu difrenti kondre, toku den na wán gemeente, iya, den na „wán ipi” èn na „wán skapuman” e tiri den, namku Yesus Krestes.
5 Yesus ben gi a gemeente fu en na grontapu wan warti presenti tu. A presenti dati na den getrow skapuman di e sorgu na ipi na wan switi fasi, neleki fa Yehovah nanga Yesus e du dati. Na apostel Paulus ben taki fu a moi presenti disi di a ben skrifi den Kresten na ini Efeise. A ben skrifi: „’Di a opo go na loktu, dan a tyari strafuman gowe; a gi libisma leki presenti.’ Son sma a poti leki apostel, son sma leki profeiti, son sma leki preikiman fu a bun nyunsu, son sma leki skapuman nanga leriman. A du disi fu poti den santawan na tapu a reti pasi baka, fu du diniwroko, èn fu meki a skin fu Krestes kon tranga.”—Efeisesma 4:8, 11, 12.
6. Fa Openbaring 1:16, 20 e agersi den salfu brada di ben e dini leki owruman? San wi kan taki fu den brada di poti leki owruman èn di de memre fu den tra skapu?
6 Den man disi di de „leki presenti”, na den opziener, noso owruman, èn nanga yepi fu santa yeye Yehovah nanga en Manpikin poti den man disi fu sorgu den skapu na wan switi fasi (Tori fu den Apostel 20:28, 29). Na ini a fosi Kresten gemeente, ala den opziener disi ben de salfu Kresten. Na ini Openbaring 1:16, 20, den „stari” noso den „engel” di de na ini Krestes en reti-anu, noso di de na ondro a tiri fu en, e agersi den brada di ben e dini leki owruman na ini a gemeente fu salfu Kresten. Ma fu di furu salfu opziener no de moro na grontapu na ini a ten disi fu a kaba, meki moro furu fu den Kresten owruman na ini den gemeente na memre fu den tra skapu. Den brada di e teki presi gi a Tiri Skin, e poti den owruman disi nanga yepi fu santa yeye. Fu dati ede wi kan taki dati den owruman disi de na ondro a tiri tu fu a Tumusi Bun Skapuman, Yesus Krestes (Yesaya 61:5, 6). Fu di den owruman na ini den gemeente fu wi e saka densrefi na Krestes ondro, na Edeman fu a gemeente, meki wi musu wroko makandra nanga den.—Kolosesma 1:18.
Wi musu gi yesi na den owruman èn saka wisrefi na den ondro
7. Fa wi musu si den Kresten opziener, soleki fa na apostel Paulus ben taki?
7 Yehovah Gado nanga Yesus Krestes, den Skapuman fu wi di de na hemel, wani taki wi musu gi yesi na den owruman èn taki wi musu saka wisrefi na den ondro. Na den gi den brada frantwortu na ini a gemeente (1 Petrus 5:5). Gado meki na apostel Paulus skrifi: „Memre den wan di e teki fesi na un mindri, di fruteri unu a wortu fu Gado, èn un musu waka baka a bribi fu den, aladi unu e luku finifini fa a libi fu den e waka. Gi yesi na den wan di e teki fesi na un mindri èn saka unsrefi na den ondro, bika den e sorgu unu; den e du disi leki sma di sa musu gi frantwortu fu dati; na so fasi den kan du disi nanga prisiri èn den no sa du dati nanga geme, bika disi no ben o bun gi unu.”—Hebrewsma 13:7, 17.
8. San wi musu „luku finifini” soleki fa Paulus taki, èn san a wani taki fu „gi yesi”?
8 Na ini a tekst disi Paulus e taigi wi fu „luku finifini” noso fu „poti prakseri” na a getrow fasi fa den owruman e tyari densrefi, èn a e taigi wi fu waka baka a bribi fu den. Boiti dati, a e taigi wi fu gi yesi na den owruman disi èn fu saka wisrefi na den ondro. A Bijbel sabiman R. T. France, e taki dati a Griki wortu di vertaal dyaso nanga „gi yesi”, a no wan wortu di „sma ben gwenti gebroiki te den ben e taki dati wan sma musu gi yesi. A wortu disi wani taki trutru, ’kisi na overtoigi’, èn disi e sori taki wan sma de klariklari fu gi yesi na wan trawan.” Wi e gi yesi na den owruman fu di Gado Wortu e taigi wi fu du dati. Boiti dati, wi e gi yesi na den fu di wi abi na overtoigi taki den e du ala san den man fu sorgu taki sani e waka bun nanga Kownukondre afersi, èn sosrefi nanga ibriwan fu wi. A no de fu taki dati wi sa de koloku te wi de klariklari fu gi yesi na den.
9. Boiti taki wi musu gi yesi na den owruman, dan fu san ede wi musu ’saka wisrefi na den ondro’ tu?
9 Ma san wi musu du efu wi e tweifri na wan bosroiti di den owruman teki? Na den momenti disi a de fanowdu fu saka wisrefi na den ondro. A makriki fu gi yesi te wi e frustan fu san ede den teki wan spesrutu bosroiti èn te wi e agri nanga a bosroiti di den teki. Ma te wi e du san den e taki, aladi wi no e frustan fu san ede den teki wan spesrutu bosroiti, dan wi e sori taki wi e saka wisrefi na den ondro trutru. Petrus di ben tron wan apostel bakaten, ben saka ensrefi na a fasi dati.—Lukas 5:4, 5.
Fo reide fu san ede wi musu de klariklari fu wroko makandra nanga den owruman
10, 11. Na sortu fasi owruman ’fruteri den fosi yarihondro Kresten a wortu fu Gado’, èn fa den e du dati na ini a ten disi?
10 Na ini Hebrewsma 13:7, 17, Paulus e gi wi fo reide fu san ede wi musu gi yesi na den Kresten owruman èn fu san ede wi musu saka wisrefi na den ondro. A fosi reide na taki den ’fruteri wi a wortu fu Gado’. Memre taki Yesus gi a gemeente „libisma leki presenti” fu „poti den santawan na tapu a reti pasi baka” (Efeisesma 4:11, 12). Yesus ben gebroiki getrow owruman fu kenki a fowtu denki fu den fosi yarihondro Kresten, èn fu sori den fa den ben musu tyari densrefi na wan bun fasi. Wan tu fu den owruman disi ben skrifi brifi gi den gemeente nanga yepi fu santa yeye. Yesus ben gebroiki den brada disi di Gado poti leki owruman, fu tiri den fosi Kresten èn fu gi den deki-ati.—1 Korentesma 16:15-18; 2 Timoteyus 2:2; Titus 1:5.
11 Na ini a ten disi, Yesus e tiri wi nanga yepi fu a Tiri Skin èn nanga den owruman di e teki presi gi „a getrow èn koni srafu” (Mateyus 24:45). Fu di wi e lespeki „a gran skapuman”, Yesus Krestes, meki wi e gi yesi na a rai fu Paulus: „Abi lespeki gi den sma di e wroko tranga na un mindri èn di e teki fesi na un mindri na ini a wroko fu Masra, èn di e frumane unu.”—1 Petrus 5:4; 1 Tesalonikasma 5:12; 1 Timoteyus 5:17.
12. Fa den owruman ’e sorgu wi’?
12 A di fu tu reide fu san ede wi musu wroko makandra nanga den Kresten owruman, na taki ’den e sorgu wi’. Efu den e si taki wi e tyari wisrefi na wan fasi di kan pori a matifasi di wi abi nanga Yehovah, dan den no sa draidrai fu gi wi rai di de fanowdu so taki wi kan tyari wisrefi na wan bun fasi baka (Galasiasma 6:1). A Griki wortu di vertaal nanga „sorgu” wani taki dati den brada e broko den ede so te nanga wi, taki den e lasi sribi srefi, iya, „den e tan na ai”. Wan Bijbel sabiman e taki dati a wortu disi e sori taki „a skapuman e tan na ai doronomo”. Den owruman musu sorgu taki densrefi tan bun mati fu Yehovah. Ma boiti dati, den wani taki wi musu abi wan bun banti nanga Yehovah tu. A sani disi e meki taki son leisi den no man sribi na neti fu di den e broko den ede nanga wi. Den lobi-ati skapuman disi e du ala san den man fu sorgu wi na wan switi fasi neleki Yesus Krestes, „a bigi skapuman fu den skapu”. Yu no feni taki wi musu de klariklari fu wroko makandra nanga den?—Hebrewsma 13:20.
13. Na suma èn fu sortu sani den owruman nanga ala tra Kresten musu gi frantwortu?
13 A di fu dri reide fu san ede wi musu de klariklari fu wroko makandra nanga den owruman, na taki den ’sa musu gi frantwortu fu a fasi fa den e sorgu wi’. Den owruman no e frigiti taki den na skapuman di de na ondro a tiri fu Yehovah Gado nanga Yesus Krestes, den Skapuman di de na hemel (Esekièl 34:22-24). Yehovah na a Sma di abi den skapu. ’A bai den nanga a brudu fu en eigi Manpikin’, èn A e aksi frantwortu fu den owruman fu a fasi fa den e sorgu na ipi fu En. A wani taki den musu sorgu na ipi „na wan switi fasi” (Tori fu den Apostel 20:28, 29). Sobun, wi alamala musu gi frantwortu na Yehovah te wi no e gi yesi na en (Romesma 14:10-12). Te wi e gi yesi na den owruman, dan wi e sori taki wi e saka wisrefi tu na Krestes ondro, di de na Edeman fu a gemeente.—Kolosesma 2:19.
14. San kan meki taki Kresten owruman e „geme” te den e du a wroko fu den, èn san kan de a bakapisi?
14 Paulus ben tyari kon na krin san na a di fu fo reide fu san ede wi musu de klariklari fu saka wisrefi na den Kresten owruman ondro, di a taki: „Na so fasi den kan du disi nanga prisiri èn den no sa du dati nanga geme, bika disi no ben o bun gi unu” (Hebrewsma 13:17). Kresten owruman abi bigi frantwortu fu di den musu gi leri, den musu luku den skapu, den musu teki fesi na ini a preikiwroko, den musu sorgu gi den osofamiri, èn den musu lusu problema na ini a gemeente (2 Korentesma 11:28, 29). Te wi no e wroko makandra nanga den, dan wi e meki en moro muilek gi den fu tyari a frantwortu di den abi. A bakapisi fu dati o de taki den o „geme”. Yehovah no feni en bun te wi no e wroko makandra nanga den owruman, èn a sani dati no ben o abi bun bakapisi gi wi. Na presi fu dati, te wi e sori lespeki gi den owruman èn te wi e wroko makandra nanga den, dan den kan du a wroko fu den nanga prisiri, èn disi sa meki taki wánfasi de na ini a gemeente èn taki wi sa du a Kownukondre preikiwroko nanga prisiri.—Romesma 15:5, 6.
Wi musu sori taki wi e saka wisrefi
15. Fa wi kan sori taki wi e gi yesi na den owruman èn taki wi e saka wisrefi na den ondro?
15 Difrenti fasi de fa wi kan wroko makandra nanga den owruman. A kan taki den owruman poti den preikiwroko konmakandra na wan tra ten, so taki wi kan miti moro sma na ini a kontren fu wi. Kande disi wani taki dati wi musu kenki wan tu sani na ini wi schema fu man go na den preikiwroko konmakandra. Meki wi du muiti fu horibaka gi den sani di den seti. Te wi e du dati, dan wi kan kisi blesi di wi no ben fruwakti. A de so taki a dienst-opziener o kon na a Gemeente Bukustudie fu wi? Meki wi du ala san wi man fu go na ini a preikiwroko a wiki dati. Wi musu hori wan lezing na a Theokrasia Diniwroko-skoro? Wi musu meki muiti fu de na a konmakandra fu hori a lezing fu wi. A de so taki a Gemeente Bukustudie opziener taki dati a bukustudie fu wi musu krin a Kownukondre zaal? Efu wi man èn efu wi abi a krakti fu du dati, dan a ben o bun fu yepi en. Na den difrenti fasi disi, èn na tra fasi tu, wi e sori taki wi e saka wisrefi na den man disi ondro, di Yehovah nanga en Manpikin poti fu sorgu na ipi.
16. Fu san ede wi no abi reide fu opo wisrefi teige wan owruman te a no e du san a Tiri Skin taki?
16 Son leisi a kan taki wan owruman no e du sani soleki fa a Tiri Skin nanga a getrow srafu-grupu wani. Efu a e tan du sani na a fasi disi, a sa musu gi frantwortu na Yehovah ’di de wi skapuman èn di e luku taki sani e waka bun nanga wi’ (1 Petrus 2:25). Ma awinsi son owruman e meki fowtu, toku wi musu tan saka wisrefi na den ondro. Yehovah no sa blesi sma di no e gi yesi na en èn di e opo densrefi teige en.—Numeri 12:1, 2, 9-11.
Yehovah e blesi sma di de klariklari fu wroko makandra nanga den owruman
17. Fa wi musu si den owruman fu wi?
17 Yehovah Gado sabi taki den man di a poti leki owruman, e meki fowtu. Ma toku a e gebroiki den, èn nanga yepi fu en yeye a e tiri a pipel fu en na grontapu. A tru taki den owruman, ma sosrefi wi alamala, e kisi „krakti di bigi pasa marki”, èn a krakti disi no e kon fu wisrefi ma a e kon fu Gado (2 Korentesma 4:7). Fu dati ede wi musu taki Yehovah tangi taki a e gebroiki den getrow opziener disi fu du a wroko fu en, èn wi musu de klariklari fu wroko makandra nanga den.
18. Te wi e saka wisrefi na den owruman ondro, dan gi suma wi e sori warderi trutru?
18 Owruman e du ala san den man fu libi akruderi den markitiki di Yehovah poti gi skapuman di musu luku na ipi fu en na ini den lasti dei. Na ini Yeremia 3:15, Yehovah e taki: „Mi sa gi unu skapuman di mi feni bun, èn den sa sorgu taki unu kisi sabi èn a koni fu man si sani krin.” A no de fu taki dati wi musu prèise den owruman na ini den gemeente fu wi, fu di den e gi den skapu fu Yehovah bun leri èn fu di den e kibri den. Meki wi tan sori taki wi e warderi a tranga wroko di den e du, fu di wi de klariklari fu wroko makandra nanga den, fu di wi e gi yesi na den, èn fu di wi e saka wisrefi na den ondro. Te wi e du dati, dan wi e sori warderi gi den Skapuman fu wi di de na hemel, namku Yehovah Gado nanga Yesus Krestes.
Luku baka san wi leri
• Na sortu fasi Yehovah nanga Yesus Krestes sori taki den na lobi-ati Skapuman?
• Boiti taki wi musu gi yesi na den owruman, dan fu san ede wi musu saka wisrefi na den ondro tu?
• Na sortu difrenti fasi wi kan sori taki wi e saka wisrefi na den owruman ondro?
[Aksi fu a tori disi]
[Prenki na tapu bladzijde 27]
Kresten owruman e saka densrefi na Krestes ondro
[Prenki na tapu bladzijde 29]
Wi kan sori na difrenti fasi taki wi e saka wisrefi na den skapuman ondro di Yehovah poti na wroko