Wi musu gi yesi na Krestes nanga en getrow srafu
Wi musu gi yesi na Krestes nanga en getrow srafu
„En masra . . . sa poti a srafu fu luku ala den sani di a abi.”—MATEYUS 24:45-47.
1, 2. (a) Suma na wi Fesiman, soleki fa Bijbel e taki? (b) San e sori taki Krestes e tiri a Kresten gemeente trutru?
„UN NO musu meki sma kari unu ’fesiman’ . . . , bika wán sma nomo na un Fesiman, dati na Krestes” (Mateyus 23:10). Nanga den wortu disi Yesus ben sori den bakaman fu en krin taki nowan sma na grontapu ben o de den fesiman. A wan-enkri Fesiman fu den ben o de na hemel, èn dati na Yesus Krestes. Na Gado poti Yesus leki Fesiman. Yehovah gi en „wan opobaka . . . èn a meki a tron edeman fu ala sani gi a bun fu a gemeente di de en skin”.—Efeisesma 1:20-23.
2 Fu di Krestes na a „edeman fu ala sani” na ini a Kresten gemeente, meki a e tiri ala sani na ini a gemeente. Boiti dati, a e si ala sani di e pasa na ini a gemeente. A e luku efu ibri Kresten gemeente e hori ensrefi na Bijbel gronprakseri, èn a e luku efu den sma na ini den gemeente na bun mati fu Gado. Disi e kon na krin na ini a fisyun di na apostel Yohanes ben kisi na a kaba fu a fosi yarihondro G.T. Feifi leisi Yesus taigi den seibi gemeente taki a sabi san den ben e du. A ben sabi den bunfasi fu den nanga den swakifasi fu den, èn fu dati ede a ben gi den rai nanga deki-ati di den ben abi fanowdu (Openbaring 2:2, 9, 13, 19; 3:1, 8, 15). Wi kan bribi taki Krestes ben sabi tu efu den sma na ini den gemeente na ini Pikin Asia, Palestina, Siria, Babilonia, Grikikondre, Italiakondre èn na tra presi, ben de bun mati fu Gado (Tori fu den Apostel 1:8). Fa a de na ini a ten disi?
Wan getrow srafu
3. Fu san ede a fiti fu agersi Krestes nanga wan ede, èn a gemeente fu en nanga wan skin?
3 Baka di Yesus kisi wan opobaka èn syatu bifo a go na en Tata na hemel, a taigi den disipel fu en: „Mi kisi ala makti na ini hemel èn na grontapu.” A ben taki sosrefi: „Unu o si taki mi sa de nanga unu ala dei te na a kaba fu a grontapu sistema” (Mateyus 28:18-20). Yesus ben o de doronomo nanga den disipel fu en, fu di a ben o tiri den leki Edeman. Na ini den brifi di na apostel Paulus ben skrifi gi den Kresten na ini Efeise nanga Kolose, a ben e agersi a Kresten gemeente nanga wan „skin”, èn a ben agersi Krestes nanga na ede fu a skin (Efeisesma 1:22, 23; Kolosesma 1:18). Wan buku e taki dati na agersitori disi e sori „taki a de tumusi prenspari taki a skin e wroko makandra nanga na ede, èn taki na ede e tiri den memre fu a skin. Na ede e gebroiki den memre fu a skin fu yepi en” (The Cambridge Bible for Schools and Colleges). Sortu grupu Krestes gebroiki sensi a ten di a tron Kownu na ini 1914?—Danièl 7:13, 14.
4. Soleki fa a profeititori fu Maleaki e taki, dan san Yehovah nanga Yesus Krestes si di den kon fu luku fa sani e waka na ini a tempel?
4 A profeititori na ini Maleaki e taki dati Yehovah, „a tru Masra”, ben o kon fu luku fa sani e waka na ini En „tempel” di e agersi na anbegi fu en. A ben o du dati makandra nanga en „boskopuman fu a frubontu”, namku Yesus Krestes, a Manpikin fu en di a poti leki Kownu. Soleki fa a sori, dan ’a reti ten fu krutu na oso fu Gado’ bigin na ini 1918 (Maleaki 3:1; 1 Petrus 4:17). * Gado ben luku finifini efu den sma di ben e taki dati den ben e anbegi en na a yoisti fasi, ben e du dati trutru. Hondrohondro yari langa den kerki fu Krestenhèit leri sma sani di e gi Gado porinen, èn den ben abi furu fu du nanga a kiri di sma kiri dusundusun trawan na ini a Fosi Grontapufeti. Fu dati ede Gado no ben feni den kerki disi bun. Wan getrow fikapisi fu salfu Kresten ben kisi tesi, den ben kon soifri neleki fa faya e meki gowtu kon soifri, èn Gado ben kon feni den bun. Na so den tron ’sma di e tyari wan presenti gi Yehovah nanga wan krin ati’.—Maleaki 3:3.
5. Soleki fa Yesus ben taki na ini a profeititori fu en di a ben taki fu en „denoya”, dan suma ben de a getrow „srafu”?
5 Yesus gi den disipel fu en a marki di ben o meki den frustan o ten ’a denoya fu en ben o de èn o ten a kaba fu a grontapu sistema disi ben o de’. A marki disi ben sori den sosrefi suma ben o de a „srafu”. Disi abi fu du nanga a profeititori fu Maleaki. Yesus ben taki: „Suma na trutru a getrow èn koni srafu di en masra poti fu luku den futuboi fu en, fu kan gi den nyanyan na a reti ten? Koloku fu a srafu te en masra doro èn a si taki a srafu e du dati! Fu tru mi e taigi unu: A sa poti a srafu fu luku ala den sani di a abi” (Mateyus 24:3, 45-47). Di Krestes „doro” na ini 1918 fu luku efu a „srafu” ben e du en wroko, dan a si taki wan salfu fikapisi fu getrow disipel ben e du dati. Sensi 1879 a salfu fikapisi disi ben tyari a tijdschrift disi kon na doro èn sosrefi tra Bijbel publikâsi, fu sorgu taki sma e kisi „nyanyan na a reti ten”. Yesus ben feni a „srafu” grupu disi bun nofo fu yepi en, èn na ini 1919 a poti den fu luku ala den sani fu en na grontapu.
Den e luku ala den sani di Krestes abi na grontapu
6, 7. (a) Sortu tra wortu Yesus gebroiki di a ben taki fu a getrow „srafu” fu en? (b) San a wortu „futuboi” wani taki, soleki fa Yesus gebroiki en?
6 Wan tu mun bifo Yesus ben taki fu a marki fu en denoya èn fu wan „srafu” di ben o teki presi gi en na grontapu, a ben gebroiki tra wortu fu tyari kon na krin sortu frantwortu a srafu ben o abi. Yesus ben taki: „Suma na trutru a getrow futuboi, a koniwan, di en masra sa poti fu luku ala den futuboi fu en, so taki a kan tan gi den a nyanyan fu den na a reti ten? Fu tru, mi e taigi unu: A sa poti a srafu fu luku ala den sani di a abi.”—Lukas 12:42, 44.
7 Na ini a tekst disi, Bijbel e kari a srafu wan futuboi, èn na ini Grikitongo a wortu disi abi fu du nanga „a sma di e luku wan oso noso wan gron fu wan tra sma”. A futuboi, noso a grupu sma disi, a no wan grupu koniman di e fruklari moi tori fu Bijbel. Boiti taki „a getrow futuboi” disi ben o gi Bijbel leri „na a reti ten”, a ben o kisi a wroko tu fu tiri ala den futuboi fu Krestes, èn a ben o sorgu tu taki ala sani waka bun na ini den gemeente fu Krestes na grontapu. Iya, a ben o sorgu gi ’ala den sani di Krestes abi’. San na ala den sani disi?
8, 9. San na ’den sani di Krestes abi’, di a srafu musu tiri?
8 Wan fu den frantwortu fu a srafu na fu sorgu gi den sani di den bakaman fu Krestes e gebroiki fu du a diniwroko fu den. Den sani disi na a edekantoro nanga den bijkantoro fu Yehovah Kotoigi, èn den presi pe den e anbegi Gado, soleki Kownukondre zaal nanga kongreshal di de na heri grontapu. Ma san moro prenspari, na taki a srafu e sorgu taki wi e kisi Bijbel leri di e tranga a bribi fu wi. Wi e kisi a Bijbel leri disi ibri wiki na den gemeente konmakandra, èn na den kring konmakandra nanga den kongres di e hori ibri yari. Na den konmakandra disi wi e leri fa Bijbel profeititori e kon tru, èn na a yoisti ten wi e kisi rai di e sori wi fa fu gebroiki Bijbel gronprakseri na ini wi aladei libi.
9 A futuboi abi a frantwortu tu fu tiri a moro prenspari wroko, namku fu preiki ’a bun nyunsu fu a kownukondre’ èn fu „go na sma fu ala kondre èn meki den tron disipel”. Disi wani taki tu dati den e leri sma fu du ala den sani di Krestes, na Edeman fu a gemeente, taigi den fu du na ini a ten disi fu a kaba (Mateyus 24:14; 28:19, 20; Openbaring 12:17). Fu di a preikiwroko nanga a leriwroko disi du, meki „wan bigi ipi” sma kon de di e horibaka gi a salfu fikapisi na wan getrow fasi. Den sma disi na „den warti sani fu ala den pipel”, èn a no de fu taki dati den na wan fu ’den sani di Krestes abi’ di a getrow srafu e tiri.—Openbaring 7:9; Hagai 2:7.
Wan Tiri Skin di e teki presi gi a srafu-grupu
10. Sortu grupu sma ben e teki bosroiti na ini a fosi yarihondro, èn fa a sani disi ben abi krakti tapu den gemeente?
10 A getrow srafu abi bigi frantwortu, èn disi wani taki dati den musu teki furu bosroiti tu. Na ini a fosi Kresten gemeente, den apostel nanga den owruman na ini Yerusalem ben e teki presi gi a srafu-grupu, èn den ben e teki bosroiti gi a heri Kresten gemeente (Tori fu den Apostel 15:1, 2). A tiri skin fu a fosi yarihondro ben seni brifi èn den ben seni opziener go na den gemeente fu meki den tra Kresten kon sabi sortu bosroiti den teki. Den fosi Kresten ben breiti fu kon sabi sortu bosroiti a tiri skin ben teki, èn fu di den ben de klariklari fu wroko makandra nanga a tiri skin, meki den ben abi vrede èn den ben de na ini wánfasi.—Tori fu den Apostel 15:22-31; 16:4, 5; Filipisma 2:2.
11. Suma na den sma di Krestes e gebroiki na ini a ten disi fu tiri a gemeente fu en, èn fa wi musu si a grupu disi fu salfu Kresten?
11 Neleki fa a ben de na ini a ten fu den fosi Kresten, na so a de tu na ini a ten disi taki wan pikin grupu fu opziener di salfu nanga santa yeye, e tiri den bakaman fu Krestes na grontapu. A grupu disi na a Tiri Skin. Krestes, na Edeman fu a gemeente, e gebroiki en „reti-anu”, noso en makti fu tiri den getrow man disi di e teki fesi fu preiki a bun nyunsu fu a Kownukondre (Openbaring 1:16, 20). Albert Schroeder, di ben e dini furu yari langa leki memre fu a Tiri Skin èn di kaba en diniwroko dyaso na grontapu no so langa pasa, ben skrifi na ini na ondrofenitori fu en: „Ibri dridewroko a Tiri Skin e kon makandra. Den e bigin a konmakandra nanga wan begi, èn den e aksi Yehovah fu meki en santa yeye tiri den. Den e du ala san den man fu sorgu taki ibri bosroiti di den e teki de akruderi Gado Wortu, Bijbel.” * Wi kan frutrow den getrow salfu Kresten disi. Spesrutu te a abi fu du nanga a Tiri Skin, wi musu du san na apostel Paulus taki: „Gi yesi na den wan di e teki fesi na un mindri èn saka unsrefi na den ondro, bika den e sorgu unu.”—Hebrewsma 13:17.
Wi musu sori lespeki gi a getrow srafu
12, 13. Fu san ede wi musu sori lespeki gi a srafu-grupu, soleki fa Bijbel e taki?
12 A de tumusi prenspari fu sori lespeki gi a getrow srafu, bika te wi e du dati, dan wi e sori lespeki gi a Masra, Yesus Krestes. Paulus ben taki fu den salfuwan: „Wan sma di ben de wan friman di a kisi a kari, na wan srafu fu Krestes. Gado bai unu fu di a pai gi unu” (1 Korentesma 7:22, 23; Efeisesma 6:6). Fu dati ede, te wi e tan du san a Tiri Skin di de wan pisi fu a getrow srafu, e taigi wi fu du, dan wi e teki a tiri fu Krestes, a Masra fu a srafu. Te wi e sori lespeki gi a srafu di Krestes e gebroiki fu luku den sani fu en na grontapu, dan na so fasi wi e „taki krin dati Yesus Krestes na Masra, so taki Gado a Tata kan kisi glori”.—Filipisma 2:11.
13 Bijbel e sori san na wan tra reide fu san ede wi musu sori lespeki gi a getrow srafu. Gado Wortu e taki dati den salfu Kresten na grontapu de wan „tempel”, èn taki drape „a yeye” fu Yehovah e tan. Fu dati ede, den salfuwan disi „santa” (1 Korentesma 3:16, 17; Efeisesma 2:19-22). Na a grupu disi, di Bijbel e kari wan santa tempel, kisi a wroko fu Yesus fu luku den sani fu en na grontapu. Disi wani taki dati a srafu-grupu disi wawan abi a reti nanga a frantwortu fu du son sani na ini a Kresten gemeente. Fu dati ede, ala sma na ini a gemeente e frustan taki na Gado wani taki den musu gi yesi na a Tiri Skin di de wan pisi fu a getrow srafu, èn taki den musu horibaka gi den. Iya, den „tra skapu” e si en leki wan bigi grani fu yepi a srafu-grupu nanga a wroko di den abi fu sorgu gi den sani fu a Masra.—Yohanes 10:16.
Horibaka gi a srafu-grupu na wan getrow fasi
14. Fa den tra skapu e waka baka a salfu srafu-grupu èn fa den e dini leki „wrokoman di no kisi pai”, soleki fa Yesaya ben taki?
14 Yesaya taki na fesi dati den tra skapu ben o de klariklari fu teki a tiri fu den salfu memre fu „na Israel fu Gado”. A ben taki: „Disi na san Yehovah taki: ’Den wrokoman fu Egepte di no kisi pai èn den seriman fu Etiopia èn den langa man fu Seiba, iya, ala den sma dati sa kon na yu, èn den sa kon de fu yu. Den sa waka baka yu; den sa de na ini bui te den kon na yu, èn den sa boigi gi yu. Den sa begi yu, èn den sa taki: „Fu tru, Gado de nanga yu, èn nowan tra sma de; nowan tra Gado de”’” (Yesaya 45:14). Na agersifasi, den tra skapu na ini a ten disi e waka baka a Tiri Skin di de wan pisi fu a salfu srafu-grupu, èn den e teki a tiri fu den. Den tra skapu na den „wrokoman di no kisi pai”, èn den de klariklari fu gebroiki a krakti fu den nanga den gudu fu den fu horibaka gi a preikiwroko na heri grontapu. Disi na a wroko di Krestes gi den salfu bakaman fu en fu du.—Tori fu den Apostel 1:8; Openbaring 12:17.
15. Fa den tra skapu nanga na Israel fu Gado ben o wroko makandra, soleki fa a profeititori na ini Yesaya 61:5, 6 e taki?
15 Den tra skapu breiti èn den de nanga tangi taki den kan dini Yehovah na ondro a tiri fu a Tiri Skin di de wan pisi fu a srafu-grupu. Den e frustan taki den salfuwan na memre fu „na Israel fu Gado” (Galasiasma 6:16). Na agersifasi den tra skapu na „freimdesma” nanga „trakondre sma” di abi demakandra nanga na Israel fu Gado. Nanga prisiri den e wroko leki „gronman” nanga „droifidyari-man” na ondro a tiri fu den salfuwan, di de „priester fu Yehovah” èn ’dinari fu Gado’ (Yesaya 61:5, 6). Den e preiki a bun nyunsu fu a Kownukondre fayafaya èn den e meki disipel fu sma fu ala kondre. Nanga den heri ati den e yepi a srafu-grupu fu tiri èn fu sorgu den nyun skapu.
16. Fu san ede den tra skapu e horibaka na wan getrow fasi gi a getrow èn koni srafu?
16 Den tra skapu sabi taki den e kisi furu wini fu di a getrow srafu e du tranga muiti fu gi den Bijbel leri na a reti ten. Den e agri taki den no ben o sabi noti, noso den ben o sabi pikinso nomo fu den tumusi moi tru tori fu Bijbel, efu a getrow èn koni srafu no ben meki den kon sabi den sani dati. Fu eksempre, den no ben o sabi taki Yehovah abi a reti fu tiri ala sani, èn taki a nen fu en musu kon santa. Boiti dati, den no ben o sabi san Bijbel e leri fu a Kownukondre, fu a nyun hemel nanga a nyun grontapu, fu a sili, fu den dedewan, èn den no ben o sabi tu suma na Yehovah, en Manpikin, nanga a santa yeye. Fu di den tra skapu de nanga tangi srefisrefi èn fu di den de getrow na den salfu „brada” fu Krestes di de na grontapu, meki den e horibaka gi den na ini a ten disi fu a kaba.—Mateyus 25:40.
17. Sortu prenspari sani a Tiri Skin du, èn san wi sa go luku na ini na artikel di e kon?
17 Fu di furu salfuwan no de moro na grontapu, meki den no man de na ini ala gemeente fu luku den sani di Krestes abi. Fu di dati de so, meki a Tiri Skin e poti mansma di de memre fu den tra skapu, fu luku fa sani e waka na den bijkantoro, den distrikt, den kring, nanga den gemeente fu Yehovah Kotoigi. Te wi e gi yesi na den brada disi, dan wi e sori taki wi de getrow na Krestes èn na a getrow srafu. Wi sa luku a tori disi na ini na artikel di e kon now.
[Futuwortu]
^ paragraaf 4 Fu kon sabi moro fu a tori disi, luku A Waktitoren fu 1 maart 2004, bladzijde 13-18, nanga a di fu 1 december 1992, bladzijde 13.
^ paragraaf 11 Na ondrofenitori fu en skrifi na ini De Wachttoren fu 1 maart 1988, bladzijde 10-17.
Luku baka san wi leri
• Suma na a Fesiman fu wi, èn san e sori taki a sabi san e pasa na ini den gemeente?
• Di Krestes ben luku fa sani e waka na ini a „tempel”, dan suma ben e tyari ensrefi leki a getrow srafu, èn san a srafu disi ben musu luku?
• Fu san ede wi musu horibaka gi a getrow srafu èn fu san ede wi musu gi yesi na den, soleki fa Bijbel e sori?
[Aksi fu a tori disi]
[Prenki na tapu bladzijde 23]
Den ’sani di Krestes abi’ èn di a „futuboi” musu luku, na sani soleki den bijkantoro. A futuboi musu gi Bijbel leri tu, èn a musu tiri a preikiwroko
[Prenki na tapu bladzijde 25]
Den tra skapu e horibaka gi a getrow srafu-grupu fu di den e preiki fayafaya