Wi musu tyari ofrandi di e plisi Gado

„DEDE e tyari libi kon. Disi na san den Asteksma ben e bribi. Den sma disi ben e tyari libisma leki ofrandi, moro leki iniwan tra pipel di ben e libi na ini a pisi kontren fu Meksikow nanga Mindri-Amerika”, na so wan buku e taki. A buku disi e taki tu: „Di a kownukondre disi ben e kon moro bigi, dan den Asteksma ben e tyari moro nanga moro libisma leki ofrandi, soso fu meki sma bribi taki a kownukondre fu den ben tranga” (The Mighty Aztecs). Wan tra buku e taki dati den Asteksma ben e tyari sowan 20.000 libisma leki ofrandi ibri yari.

Sensi ten sma e tyari difrenti sortu ofrandi gi den gado fu den. Den e du disi fu di den frede, fu di den no sabi san o pasa na ini a ten di e kon, noso fu di den e firi sari gi wan ogri di den du. Tra fasi leki dati, Bijbel e sori taki na almakti Gado Yehovah wani taki sma musu tyari tra ofrandi. Fu dati ede a bun fu aksi wisrefi: Sortu ofrandi e plisi Gado? A de prenspari fu tyari ofrandi na ini a ten disi te wi e anbegi Gado?

Ofrandi di sma e tyari na ini a tru anbegi

Di Yehovah ben seti a pipel Israel, dan a ben taigi den Israelsma krinkrin fa a ben wani taki den musu anbegi en, èn sosrefi sortu ofrandi den ben musu tyari (Numeri kapitel 28 nanga 29). Sonwan fu den ofrandi ben de nyanyan di den ben koti na gron, èn tra ofrandi ben de mankaw, skapu, bokoboko, osodoifi, nanga stondoifi (Lefitikus 1:3, 5, 10, 14; 23:10-18; Numeri 15:1-7; 28:7). Den ben musu tyari ofrandi tu di den ben musu bron (Exodus 29:38-42). Boiti dati, den ben e tyari vrede-ofrandi. Te den ben tyari na ofrandi disi, dan densrefi ben e nyan fu den sani di den ben tyari gi Gado.—Lefitikus 19:5-8.

Ala den ofrandi di den Israelsma ben tyari gi Gado soleki fa a Wet ben taki, ben abi fu du nanga na anbegi fu den. Te den ben du dati, dan den ben sori taki den ben e si Yehovah leki a Moro Heiwan fu hemel nanga grontapu. Den ofrandi disi di den ben tyari, ben sori taki den ben de nanga tangi taki Yehovah blesi den èn taki a kibri den. Boiti dati, den ben kisi pardon fu den sondu di den du te den ben tyari ofrandi. Solanga den ben e anbegi Yehovah na a fasi fa a wani, den ben o kisi bun furu blesi.—Odo 3:9, 10.

Ma a sani di ben de moro prenspari gi Yehovah leki den ofrandi di sma ben e tyari, ben de a fasi fa den sma disi ben e tyari densrefi.  Yehovah ben meki a profeiti Hosea taki: „A no ofrandi mi feni bun, ma na lobi bun-ati; èn a moro bun fu sabi Gado na presi fu tyari bron-ofrandi” (Hosea 6:6). Sobun, te a pipel no ben anbegi Yehovah moro, te den ben e libi wan yayolibi, èn te den ben kiri sma di no du noti, dan den ofrandi di den ben tyari na tapu na altari fu Yehovah no ben warti noti. Fu dati ede Yehovah meki Yesaya taigi den Israelsma: „Sortu wini mi e kisi fu den furu srakti-ofrandi fu unu? . . . Mi weri kaba fu den heri bron-ofrandi fu den manskapu nanga a fatu fu den meti di kisi bun nyanyan; èn mi no prisiri nanga a brudu fu yongu mankaw nanga pikin manskapu nanga bokoboko.”—Yesaya 1:11.

„Mi no gi den a komando fu du a sani dati”

Ma den Kanansma ben de heri tra fasi leki den Israelsma. Den sma disi ben gi den pikin leki ofrandi na den eigi gado èn na Molek, a gado fu den Amonsma, di den ben kari sosrefi Molok (1 Kownu 11:5, 7, 33; Tori fu den Apostel 7:43). Wan buku e taki: „Te den Kanansma ben e anbegi den gado fu den, dan den ben gwenti fu abi seks na fesi den gado disi, èn den ben e kiri den fosi pikin fu den fu tyari den leki wan ofrandi gi den srefi gado dati” (Halley’s Bible Handbook).

Yehovah Gado ben feni den sortu sani disi bun? Nôno, kwetikweti. Di den Israelsma ben de fu go na ini a kondre Kanan, dan Yehovah gi den a komando di skrifi na ini Lefitikus 20:2, 3: „Taigi den manpikin fu Israel: ’Efu wan Israelsma noso wan trakondre sma di e tan na ini Israel, gi en pikin na Molek, dan un musu kiri a sma dati. Den sma fu a kondre musu ston en kiri. Misrefi sa drai baka gi a sma dati èn mi o kiri en, bika a gi en pikin na Molek fu doti a santa presi fu mi èn fu pori mi santa nen.’”

Kande yu e denki taki nowan Israelsma ben o du so wan sani, ma toku sonwan fu den di no ben dini Yehovah moro ben du a tumusi ogri sani disi fu gi den pikin leki ofrandi na den falsi gado. Psalm 106:35-38 e taki fu a tori disi: „Den ben go moksi densrefi nanga tra pipel èn den bigin leri den sani di den sma dati ben e du. Èn den ben e tan dini den gado fu den sma dati, èn den sani dati ben kon tron wan trapu gi den. Den ben e gi den manpikin nanga den umapikin fu den leki ofrandi na den ogri yeye. Na so den ben e tan kiri sma di no du noti, iya, den kiri den manpikin nanga umapikin fu den di den ben gi leki ofrandi na den kruktugado fu Kanan. Èn a kondre kon doti fu di den kiri sma.”

Yehovah ben e tegu gi a sani disi, èn fu dati ede a meki a profeiti Yeremia taigi den manpikin fu Yuda: „Den poti den tegu kruktugado fu den na ini na oso di e tyari a nen fu mi, so taki den kan doti en. Èn den bow den heipresi na Tofèt, di de na a lagipresi fu a manpikin fu Hinom, so taki den kan bron den manpikin nanga  den umapikin fu den. Mi no gi den a komando fu du a sani dati, èn mi no prakseri a sani dati srefi.”—Yeremia 7:30, 31.

Fu di den Israelsma ben e du den tegu sani disi, meki te fu kaba Gado no ben feni den bun moro. Yerusalem, a mamafoto fu den, kisi pori èn den Babilonsma ben tyari a pipel go na ini katibo (Yeremia 7:32-34). A de krin fu si taki a tru Gado no wani taki sma tyari tra libisma leki ofrandi, èn sma di de na ini a tru anbegi no e du den sani disi. Sma di e tyari tra libisma leki ofrandi e dini den ogri yeye, èn tru anbegiman fu Gado no abi noti fu du nanga a sani disi.

A frulusu-ofrandi fu Krestes Yesus

Ma kande son sma e aksi densrefi: ’Fu san ede Yehovah taigi den Israelsma na ini a Wet fu tyari meti leki ofrandi?’ Na apostel Paulus ben poti prakseri na a tori disi, èn a taki: „Ma fu san ede a Wet ben musu de dan? Gado ben gi den a wet tu fu tyari sondu kon na krin, teleki a pikin di kisi a pramisi ben o doro . . . Fu dati ede, a Wet kon tron wi leriman di e tyari wi go na Krestes” (Galasiasma 3:19-24). Den meti di den Israelsma ben musu tyari leki ofrandi soleki fa a skrifi na ini a Wet di Gado ben gi Moses, e prenki wan moro prenspari ofrandi di Yehovah Gado ben o gi so taki libisma kan feni wini fu dati. Na ofrandi dati na en Manpikin, Yesus Krestes. Yesus ben taki fu a lobi-ati sani disi di Yehovah du: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi.”—Yohanes 3:16.

Fu di Yesus lobi Gado èn libisma, meki a ben de klariklari fu gi en volmaakti libi leki wan lusu-paiman gi den bakapikin fu Adam (Romesma 5:12, 15). Yesus ben taki: „A Manpikin fu libisma no kon fu sma dini en, ma a kon fu dini sma èn fu gi en sili leki wan lusu-paiman fu frulusu furu sma” (Mateyus 20:28). Nowan enkri tra sma na grontapu ben man frulusu libisma fu sondu nanga dede, di kon leki bakapisi fu a sondu fu Adam (Psalm 49:7, 8). Fu dati ede Paulus ben taki dati Yesus „no go na ini a santa presi nanga a brudu fu krabita èn nanga a brudu fu yongu mankaw, ma a du dati nanga en eigi brudu wán leisi nomo, èn a meki taki wi kisi têgo frulusu” (Hebrewsma 9:12). Di Gado teki a brudu di Yesus trowe leki ofrandi, dan A „figi puru san ben skrifi nanga anu na ini a dokumenti”. Disi wani taki dati Yehovah puru a Wetfrubontu pe skrifi taki sma ben de fruplekti fu tyari ofrandi. Leki bakapisi fu dati, wi kan kisi ’têgo libi leki presenti’.—Kolosesma 2:14; Romesma 6:23.

Ofrandi di wi e tyari na ini na anbegi fu wi

Wi musu tyari ofrandi ete na ini a ten disi, aladi sma na ini a tru anbegi no de fruplekti fu tyari meti, noso tra sani leki ofrandi? Iya, wi musu du dati ete. Yesus Krestes ben gi ensrefi dorodoro na ini a diniwroko di a ben e du gi Gado, èn te fu kaba a gi en libi leki ofrandi gi libisma. Fu dati ede a ben taki: „Efu wan sma wani kon na mi baka, dan a no musu teri ensrefi moro, ma meki a teki en pina-postu èn tan waka na mi baka” (Mateyus 16:24). Disi wani taki dati ibri sma di wani tron bakaman fu Yesus, musu tyari son ofrandi, noso den musu du spesrutu sani. San na den sani disi?

Wán fu den sani di wan tru bakaman fu Krestes musu du, na taki a no musu libi gi ensrefi moro, ma na ini en heri libi a musu du a  wani fu Gado. Den sani di Gado wani taki a du, prenspari moro leki den sani di ensrefi wani du. Luku san na apostel Paulus e taki fu a tori disi: „Mi brada, fu di Gado abi sari-ati, meki mi e begi unu fu gi un skin na Gado leki wan srakti-ofrandi di e libi, di de santa èn di Gado feni bun. Na so fasi unu sa man du santa diniwroko gi en nanga un frustan. No libi moro leki fa a grontapu sistema disi wani taki un musu libi, ma un musu kenki fu di unu e teki wan nyun fasi fu denki, so taki unu kan kon sabi san na Gado en wani di bun, di e plisi en èn di de volmaakti.”—Romesma 12:1, 2.

Boiti dati, Bijbel e sori taki a prèise di wi e prèise Yehovah de leki wan ofrandi gi en. A profeiti Hosea ben gebroiki den wortu „den yongu mankaw fu wi mofo”, fu sori taki Gado e si a prèise di wi e prèise en nanga wi mofo leki wan fu den moro bun ofrandi (Hosea 14:2). Na apostel Paulus ben gi den Hebrew Kresten a deki-ati disi: „Gi Gado wan srakti-ofrandi fu prèise ala ten, namku den froktu fu a mofo di e meki en nen bekènti na trawan” (Hebrewsma 13:15). Na ini a ten disi, Yehovah Kotoigi e tan preiki a bun nyunsu fayafaya èn den de fayafaya fu meki disipel fu sma fu ala kondre (Mateyus 24:14; 28:19, 20). Kotoigi na heri grontapu e prèise Gado dei nanga neti, èn na so den e tyari ofrandi gi en.—Openbaring 7:15.

Boiti taki den e preiki, den e du bun gi trawan èn disi de leki wan ofrandi tu di e plisi Gado. Paulus ben taki: „No frigiti fu du bun èn fu prati sani nanga trawan, bika den sortu srakti-ofrandi dati e plisi Gado” (Hebrewsma 13:16). Fu taki en leti, den sma di e préise Gado musu tyari densrefi bun efu den wani taki Gado e prisiri nanga na ofrandi disi. Paulus ben gi a rai disi: „Un musu tyari unsrefi na wan fasi di fiti a bun nyunsu fu Krestes.”—Filipisma 1:27; Yesaya 52:11.

Neleki fa a ben de na ini owruten, na so ala den ofrandi di wi e tyari fu horibaka gi a tru anbegi, sa gi wi furu prisiri èn den sa meki taki wi kisi blesi fu Yehovah. Fu dati ede, meki wi du ala san wi man fu tyari ofrandi di e plisi Gado trutru!

[Prenki na tapu bladzijde 18]

’Den ben gi den manpikin nanga den umapikin fu den leki ofrandi na den kruktugado fu Kanan’

[Prenki na tapu bladzijde 20]

Te tru Kresten e preiki a bun nyunsu èn te den e yepi sma na tra fasi, dan den e tyari ofrandi di e plisi Gado