A malengri, ma toku a de fayafaya fu dini Gado
A malengri, ma toku a de fayafaya fu dini Gado
TE YU ben o miti Leonardo, dan yu ben o denki taki a e yepi fu bow konmakandra presi. A no abi anu, fu di a lasi den di a kisi wan mankeri na en wrokope. Ma aladi Leonardo malengri, toku a ben e wroko tranga fu yepi bow wan konmakandra presi na ini a foto Acajutla, na El Salvador, soleki fa yu kan si na tapu a fowtow.
Leonardo meki en eigi wrokosani so taki a kan yepi bow a Kownukondre zaal. A pisi di tan abra fu en reti-anu a e poti na ini na olo fu na isri pisi di fasi na a skopu, èn na wan koni fasi a e diki a santi poti na ini wan kroiwagi. A poti linga na den anu fu a kroiwagi so taki a kan pusu a kroiwagi ensrefi. Fu san ede Leonardo ben wani du a wroko disi?
Leonardo ben wani yepi bow wan Kownukondre zaal, noso wan konmakandra presi fu wan gemeente fu Yehovah Kotoigi na ini a kontren fu en. Someni sani ben de di ben kan tapu en fu no teki prati na a wroko disi. A ben e wroko heri wiki gi wan basi, a ben malengri, èn a ben e dini kaba leki dinari ini a diniwroko na ini a gemeente fu en. Ma a ben wani du ala san a ben man fu dini Gado tu na a presi pe den ben e bow a Kownukondre zaal.
Yu de klariklari fu dini Gado na a srefi fasi disi? Aladi Leonardo malengri, toku a no meki a sani dati tapu en fu yepi nanga a bow-wroko. Na presi fu dati, a gebroiki en frustan fu meki en eigi wrokosani so taki a ben man du a wroko dati. A ben e dini Gado ’nanga en heri frustan’ (Mateyus 22:37). Den sma di e yepi bow Kownukondre zaal fu Yehovah Kotoigi na heri grontapu e gi densrefi fu dini Gado, awinsi den malengri, noso den no malengri. Ala sma kan go na den konmakandra fu den, èn den e gi yu wan kari fu kon tu.