A winsi di Adryana ben abi

ADRYANA na wan meisje fu siksi yari, èn a e libi na ini a foto Tulsa, na Oklahoma, Amerkankondre. Adryana ben abi wan winsi. Fu taki en leti, a winsi fu en ben gersi a di fu a psalm skrifiman David, di ben skrifi: „Wán sani mi aksi Yehovah, èn na dati mi sa suku, namku taki mi kan tan na ini na oso fu Yehovah ala den dei fu mi libi, fu si fa Yehovah bun, èn fu warderi a tempel fu en.”—Psalm 27:4.

Di Adryana ben abi siksi mun nomo, dan datra kon si taki a ben abi wan sortu kanker. A takru siki disi meki taki den tu futu fu en kon lan. Adriana du furu operâsi, èn wan heri yari langa datra gi en spesrutu dresi so taki a ben kan kon betre.

A papa fu Adryana, di no abi a srefi bribi leki Adryana nanga en mama, meki kontakti nanga wan spesrutu organisâsi di e meki den winsi fu siki pikin kon tru. A aksi den sma fu na organisâsi efu den ben kan seti sani so taki a meisje fu en ben kan go na wan pôpi presi pe sma kan go meki prisiri. Bifo den sma fu na organisâsi du san a papa ben aksi den, dan den taki nanga Adryana. Adryana taigi den taki a ben e warderi en taki den ben wani tyari en go drape, ma a taigi den taki a ben wani go luku Bethel, na edekantoro fu Yehovah Kotoigi na ini New York. Baka di Adryana kon sabi san en papa ben aksi na organisâsi, dan a begi Yehovah fu gi en na okasi fu go luku Bethel. Na a bigin, den sma fu na organisâsi ben denki taki Bethel no de wan presi pe pikin-nengre kan go. Ma fu di a papa ben agri nanga Adryana, meki den seni Adryana go na Bethel.

Adryana, en mama, nanga en sisa go fu a fosi leisi na Bethel na ini New York. Adryana taki: „Yehovah piki a begi fu mi. Mi ben sabi taki a ben o gi wi na okasi fu go na Bethel. Mi si fa den e meki den buku, den tijdschrift, nanga den Bijbel. Mi ben lobi a presi dati moro leki a presi pe mi ben o go fu meki prisiri.”

Adryana ’si trutru fa Yehovah bun’, èn a ben de nanga tangi fu di a si fa na edekantoro fu a pipel fu Yehovah e wroko na ini a ten disi. Wi e gi yu wan kari tu fu kon na Bethel. Boiti na edekantoro fu Yehovah Kotoigi na ini New York, wi abi bijkantoro tu na ini difrenti kondre na grontapu.