A wroko di Paulus du na ini Berea

Na a ten fu 50 G.T., Paulus nanga Silas ben e wroko leki zendeling na ini Tesalonika, wan foto na ini Masedonia. A wroko ben e waka heri bun, èn bun furu sma ben e tron bribiman. Ne wan bigi grupu sma ben wani du ogri nanga den. Sobun, den brada teki wan bosroiti. Fu di den no ben wani taki ogri miti a nyun gemeente èn den tu zendeling, meki den seni den tu brada disi gowe wantewante na mindrineti. Na so Paulus nanga Silas lowe gowe fu Tesalonika. Den go preiki na wan tra foto, èn a foto dati na Berea.

TE WAN sma ben o tanapu farawe e luku go na a owstusei fu a Bermiosbergi, dan a ben o si a foto Berea na a futu fu a bergi disi pe furu bon e gro na tapu. Na so a ben de tu na ini owruten. Berea de sowan 65 kilometer go na a zuid-westsei fu Tesalonika, èn a de sowan 40 kilometer fu na Egeus Se. Na a zuidsei fu Berea, yu abi Olympusbergi di den Grikisma fu owruten ben e si leki a tanpresi fu den prenspari gado fu den.

Fu di Paulus ben e preiki a bun nyunsu na ini Berea, èn fu di a ben yepi furu sma drape fu tron Kresten, meki sma di e studeri Bijbel wani sabi moro fu a foto disi (Tori fu den Apostel 17:10-15). Meki wi go luku fa sani ben de fosi na ini a foto disi pe Paulus ben preiki.

A historia fu Berea

Nowan sma sabi soifri o ten a foto Berea ben seti. A kan taki den Frigiasma ben de den fosi sma di ben e tan drape. Na ini a di fu seibi yarihondro b.G.T. den Masedoniasma yagi den komoto na ini a foto. Sowan dri hondro yari baka dati, Masedonia tron wan gudu kondre, baka di Aleksander a Bigiwan wini furu feti. Den meki kefalek moi gebow nanga skotu na ini a foto, èn den meki tempel gi Griki gado soleki Zeus, Artemis, Apolo, Atena, nanga tra Griki gado.

Wan historia buku e taki dati hondrohondro yari langa, Berea „ben de wan prenspari foto gi den kondre na ini a kontren drape èn gi den kondre na a noordsei fu Grikikondre”. A foto kon prenspari spesrutu di den lasti kownu fu Masedonia, namku den bakapikin fu Antigonus, ben e tiri a kondre (306-168 b.G.T.). Bakaten, den Romesma teki a foto abra.

Di den Romesma wini a feti teige Kownu Filipus V na ini 197 b.G.T., „dan den teki a makti abra, èn Rome tron a moro bigi tirimakti na ini a kontren na a owstusei fu a Mindrikondre Se”, na so wan buku e taki (Encyclopædia Britannica). Na ini 168 b.G.T., wan legre-edeman fu Rome wini a prenspari feti teige Perseus, a lasti tiriman fu Masedonia fu owruten. Dati pasa na a presi Pydna, di de wan tu kilometer go na a zuidsei fu Berea. Soleki fa Bijbel profeititori ben taki, Rome  tron grontapumakti na ini a presi fu Grikikondre (Danièl 7:6, 7, 23). Baka a feti dati, Berea ben de wán fu den fosi foto fu Masedonia di gi ensrefi abra na Rome.

Na ini a fosi yarihondro b.G.T., a legre fu Pompeus èn di fu Julius Caesar ben e feti teige makandra na ini Masedonia. Fu taki en leti, Pompeus seti a legre kampu fu en krosibei fu Berea.

Sani e go bun na ondro a tiri fu Rome

Na a pisi ten fu a Pax Romana, noso a vrede fu Rome, sma di ben e go na Berea ben e si taki den pasi drape ben de ston pasi di ben abi pilari na ala tu sei fu den. A foto ben abi presi pe sma ben kan go wasi, a ben abi komedi-oso, presi pe sma ben kan go leisi buku, èn presi pe sma ben kan go luku fa ogri-ati fetiman ben e feti nanga makandra. A watra di den sma fu a foto ben e dringi, ben e pasa na ini peipi, èn sma ben meki gotro na ondro a gron fu meki doti watra lon komoto na ini a foto. Berea ben kon tron wan presi pe furu sma ben e du bisnis, èn seriman, sma di e meki moi sani, nanga sportman ben lobi fu go drape. Boiti dati, sma ben lobi fu go na den wega di ben e hori drape èn den ben lobi fu go drape tu fu du tra prisiri sani. Te sma fu tra kontren ben e go na Berea, dan den ben kan go na anbegi presi fu den eigi gado. Iya, na ini a foto disi yu ben abi sma fu ala difrenti bribi na ini Rome.

Wan tu fu den gado di den sma na ini Berea ben e anbegi, ben de den kèiser fu Rome di dede kaba. Kande den Bereasma no ben abi muiti nanga a sani dati, fu di den ben e anbegi Aleksander a Bigiwan kaba, fosi den bigin anbegi den kèiser. Den Bereasma ben e si Aleksander leki wan gado.  Wan Griki buku e taki: „Fu di den Grikisma na a owstusei fu a Gran Kownukondre ben abi a gwenti fu anbegi kownu, meki a no ben de wan problema gi den fu anbegi den kèiser fu Rome tu . . . Tapu a moni fu den, a kèiser ben de fu si leki wan gado di e weri wan kownu-ati di e gi leti. Den ben e begi den kèiser disi neleki fa den ben e begi wan gado, èn den ben e prèise den nanga singi.” Den ben e meki altari nanga tempel gi den, èn den ben e tyari ofrandi gi den. Srefi kèiser ben e go na den fesa pe sma ben e anbegi kèiser. Na den fesa dati sma ben e du sport, èn den ben e strei nanga makandra fu luku suma ben meki a moro moi sani, èn suma ben skrifi a moro moi buku noso puwema.

Fu san ede Berea ben de wan foto pe furu sma ben e anbegi falsi gado? Fu di a Koinon fu Masedonia ben de drape. Disi ben de wan grupu man di ben komoto fu den difrenti foto na ini Masedonia. Den man disi ben e kon makandra doronomo na ini Berea fu taki fu afersi di abi fu du nanga den foto èn nanga den distrikt. Den ben e sorgu gi den afersi disi na a fasi fa Rome ben wani den fu du dati. A Koinon ben abi a prenspari wroko fu sorgu taki sma ben e anbegi den kèiser na a yoisti fasi.

Sobun, na so sani ben e waka na ini a foto pe Paulus nanga Silas ben go, baka di den lowe komoto na ini Tesalonika. Na a ten dati, Berea ben de na ondro a makti fu Rome tu hondro yari kaba.

Den e preiki a bun nyunsu na ini Berea

Di Paulus go preiki na ini Berea, a bigin fosi na ini a snoga fu a foto. San sma du di a go drape? Bijbel e taki dati den Dyu na ini a foto dati „ben de klariklari fu teki leri, bika den ben teki a wortu nanga den heri ati, èn den ben e ondrosuku Gado Buku finifini ibri dei fu si efu den sani disi ben tru” (Tori fu den Apostel 17:10, 11). Fu di den ben de „klariklari fu teki leri”, meki den no tan hori densrefi na den gwenti fu den. Aladi den sani di Paulus ben e fruteri ben de nyun sani, toku den ben de klariklari fu arki èn den no ben e atibron. Den no weigri fu arki Paulus, ma na presi fu dati den poti bun prakseri na den sani di a ben e taki, èn den teki na okasi fu arki Paulus sondro fu krutu en.

Fa den Dyu dati ben man sabi taki Paulus ben e fruteri tru tori? Den luku efu den sani di den ben yere ben e kruderi nanga a Wortu fu Gado di no e lei. Fu dati ede den ondrosuku den Santa Buku fu Bijbel finifini, èn den du dati fayafaya tu. Bijbel sabiman Matthew Henry e taki: „Fu di Paulus gebroiki den Buku fu Bijbel fu taki-go-taki-kon nanga den sma, èn fu di a sori den taki den sani di a ben e taki e komoto fu na Owru Testamenti, meki den go luku efu den sani dati ben e kruderi nanga Bijbel. Den luku den Bijbel buku di Paulus  ben taki fu den, den leisi a tori, èn den luku san den sani dati wani taki trutru èn san tra Bijbel buku e taki fu a tori dati. Boiti dati, den ondrosuku efu Paulus ben fruklari den tekst na wan yoisti fasi. Den luku tu efu den ben kan bribi den sani di Paulus ben taki. Na fu di den du ala den sani disi, meki den ben man agri nanga Paulus.”

A no wan leisi nomo den Bereasma du dati. Den teki ten fu studeri Gado Wortu fayafaya èn den du dati doronomo. Den no du disi tapu a Sabat wawan, ma ibri dei.

San ben de a bakapisi? Furu Dyu na ini Berea gi yesi na a boskopu, èn den tron bribiman. Wan tu Grikisma teki a bribi tu. A kan taki sonwan fu den Grikisma disi ben teki a Dyu bribi kaba. Te fu kaba tra sma kon sabi san ben e pasa. Di den Dyu fu Tesalonika yere a tori, dan den kon na Berea esi-esi „fu tyari bruya kon èn fu sutu faya gi den sma drape”.—Tori fu den Apostel 17:4, 12, 13.

Paulus ben abi fu lowe gowe fu Berea, ma a tan preiki na tra presi. Disi leisi, a teki wan boto go na Ateine (Tori fu den Apostel 17:14, 15). Ma toku a ben breiti taki a wroko di a ben du na ini Berea, meki taki a Kresten bribi seti drape. Èn te now ete, sma na ini Berea e teki a Kresten bribi.

Iya, yu abi sma ete na ini Berea di e gebroiki den Buku fu Bijbel fu „ondrosuku ala sani finifini”, èn den e ’hori densrefi’ na den sani di tru (1 Tesalonikasma 5:21). Na ini a foto disi yu abi tu gemeente fu Yehovah Kotoigi di e gro moro nanga moro. Den gemeente disi e prati a Bijbel boskopu fayafaya nanga trawan, neleki fa Paulus ben du dati. Den e suku opregtisma èn den e gebroiki den Buku fu Bijbel fu taki-go-taki-kon nanga den sma disi. Na so den e meki a krakti di Bijbel abi tapu sma, yepi ala sma di wani kon sabi Yehovah, a tru Gado.—Hebrewsma 4:12.

[Karta na tapu bladzijde 13]

(Efu yu wani si pe den sani disi skrifi, luku a tijdschrift)

Wan tu presi pe Paulus go na a ten fu a di fu tu preikiwaka fu en

MISIA

Troas

Neapolis

Filipi

MASEDONIA

Amfipolis

Tesalonika

Berea

GRIKIKONDRE

Ateine

Korente

AKAYA

ASIA

Efeise

RODOS

[Prenki na tapu bladzijde 13]

Wan solfru pisi moni di e prenki Aleksander a Bigiwan leki wan Griki gado

[Sma di abi a reti fu a prenki]

Coin: Pictorial Archive (Near Eastern History) Est.

[Prenki na tapu bladzijde 14]

Wan fu den portu fu a kontren pe den Dyu ben e libi na ini Berea

[Prenki na tapu bladzijde 15]

Wan owruten snoga na ini Berea fu a ten disi