Aksi fu leisiman

Wan Kresten kan nyan noso dringi sani di abi cafeïne na ini, sani soleki kofi, nanga te?

Bijbel no e taki dati Kresten no musu dringi sani soleki kofi, te, nanga tra dringi di abi cafeïne na ini. Ma Bijbel abi gronprakseri di kan yepi wi fu teki koni bosroiti te a abi fu du nanga a tori disi. Meki wi go luku fosi, fu san ede son sma no e nyan noso dringi sani di abi cafeïne na ini.

Wan prenspari reide fu san ede sma no e du dati, na fu di cafeïne na wan sortu drugs di abi krakti tapu a fasi fa wan sma e firi èn tapu wan sma en frustan. Te wan sma gwenti fu gebroiki sani di abi cafeïne na ini, dan a kan taki te fu kaba a no o man tan sondro den sani disi. Wan prenspari buku di skrifi gi sma di e meki èn e seri dresi, e taki: „Te wan sma e gebroiki furu cafeïne wan langa pisi ten, dan dati kan meki taki a no o man tan sondro a sani dati moro. Efu a sma disi e tapu wantronso fu nyan noso dringi den sani dati, dan a kan kisi ede-ati, a kan senwe-senwe, èn a kan firi taki en ede e drai.” Wan tra buku e taki a srefi sani fu cafeïne èn a e taki tu san e pasa nanga sma te den e tapu wantronso nanga tra sortu drugs (Diagnostic and Statistical Manual of Mental Disorders). Dati meki wi kan frustan fu san ede son Kresten e broko den ede nanga a tori disi, bika den no wani tron srafu fu wan sani, èn den wani dwengi densrefi.—Galasiasma 5:23.

Son sma feni taki cafeïne kan siki wan sma, noso wan pikin di de na ini en mamabere. Kresten musu lobi Gado ’nanga den heri sili’, èn dati meki den no e du nowan sani di o meki den dede fruku. Èn fu di den kisi a komando fu lobi tra sma, meki wan mama di de nanga bere no sa du nowan sani di kan siki a pikin di de na ini en bere.—Lukas 10:25-27.

Sma abi leti fu broko den ede nanga den sani disi? A no ala sma e agri taki cafeïne kan meki sma kisi difrenti sortu siki. Son sabiman e taki srefi dati kofi bun gi a gosontu fu wi. Na ini 2006, wan tijdschrift ben taki: „Ondrosuku di sabiman ben du fosi, sori taki cafeïne kan meki wan sma kisi kanker na en pisisaka, a kan meki sma kisi hei-brudu, èn den kan kisi tra sortu siki tu. Ma no so langa pasa, sabiman kon si taki dati no de so ala ten, èn den kon si tu taki cafeïne bun gi a gosontu fu wi. Soleki fa a sori, dan cafeïne kan meki taki wi no e kon siki na wi lefre, èn a kan meki taki wi no e kisi a siki fu Parkinson, sukru-siki, a siki fu Alzheimer, nanga gariston. Boiti dati, cafeïne e sorgu taki wi no e firi brokosaka makriki, èn a kan kibri wi tu gi son kanker” (Times). Wan koranti e taki disi fu cafeïne: „Efu wi wani tan gosontu, dan wi no musu gebroiki tumusi furu cafeïne.”

Ibri Kresten musu bosroiti gi ensrefi efu a sa nyan noso dringi sani di abi cafeïne na ini. Den sani di a kon sabi fu cafeïne èn den Bijbel gronprakseri di abi fu du nanga a tori disi, kan yepi en fu teki wan koni bosroiti. Fu eksempre, wan Kresten uma di de nanga bere kan bosroiti fu no nyan noso dringi sani di abi cafeïne na ini, te a feni taki den sani dati kan siki a pikin. Efu wan Kresten feni taki a e atibron esi, noso taki a e kon siki pikinso te a e gebroiki cafeïne, dan a de wan koni sani fu no dringi èn fu no nyan sani di abi cafeïne na ini, awinsi na fu wan pisi ten nomo (2 Petrus 1:5, 6). Tra Kresten musu lespeki a bosroiti di wan trawan e teki, èn den no musu dwengi trawan fu denki soleki fa den e denki.

Son sma kan bosroiti fu dringi noso nyan sani di abi cafeïne na ini, èn trawan kan bosroiti fu no du dati. Ma awinsi san yu bosroiti, hori a rai fu Paulus na prakseri. A ben taki: „Awansi san unu e du, du ala sani fu gi Gado glori.”—1 Korentesma 10:31.