Meki a gemeente kon moro tranga

„Ala sani kon tiri baka na ini a gemeente, . . . èn a gemeente kon moro tranga.”—TORI FU DEN APOSTEL 9:31.

1. Sortu sani wi kan aksi wisrefi te a abi fu du nanga „a gemeente fu Gado”?

NA A dei fu a Pinksterfesa fu 33 G.T., Yehovah teki wan grupu disipel fu Krestes leki a nyun pipel fu en, namku „na Israel fu Gado” (Galasiasma 6:16). Den salfu Kresten disi kon tron „a gemeente fu Gado” tu, soleki fa Bijbel e sori (1 Korentesma 11:22). Ma san dati ben wani taki? Fa „a gemeente fu Gado” ben o orga. Fa sani ben musu waka na ini den gemeente na grontapu, awinsi pe den memre ben e libi? Sortu wini a gemeente e tyari kon gi wi? Èn fa a kan yepi wi fu de koloku?

2, 3. Fa Yesus sori taki sani ben o waka na wan orga fasi na ini a gemeente?

² Soleki fa wi ben si na ini a fosi artikel, dan Yesus ben taki dati a gemeente fu salfu Kresten ben o seti. A sani disi ben o pasa heri esi. A ben taigi na apostel Petrus: „Na tapu a bigi ston [Yesus Krestes] disi mi o bow mi gemeente, èn den doro fu Hades no sa wini en” (Mateyus 16:18). Di Yesus ben de ete nanga den apostel, dan a sori den tu fa a gemeente ben o wroko èn fa a ben o orga.

³ Yesus ben taki èn ben du sani fu sori taki wan tu sma ben o teki fesi na ini a gemeente. Den sma dati ben o dini den tra memre fu a grupu fu den. Krestes ben taki: „Unu sabi taki den wan di sma e si leki tiriman fu den grontapusma, e basi den èn den bigiman fu den abi makti na den tapu. A no so a de nanga unu, ma efu wan sma wani de wan bigiwan na un mindri, dan a musu de un dinari; efu wan sma wani de a fosiwan na un mindri, dan a musu de srafu fu un alamala” (Markus 10:42-44). A de krin taki „a gemeente fu Gado” no ben o de wan grupu sma di ben o wroko aparti fu makandra. Na presi fu dati, den ben o wroko na wan orga fasi nanga makandra.

4, 5. Fa wi du sabi taki a gemeente ben o musu kisi leri fu Gado?

⁴ Yesus, di ben o de Edeman fu „a gemeente fu Gado” ben sori taki den apostel fu en èn sosrefi tra sma di ben teki den leri fu en, ben o abi spesrutu frantwortu na ini a gemeente. San na den frantwortu dati? Wan prenspari frantwortu di den ben o abi, na taki den ben o leri a gemeente sani di abi fu du nanga Yehovah. Memre san ben pasa baka di Yesus kisi wan opobaka. Di a ben de makandra nanga wan tu apostel, dan a taigi Petrus: „Simon, manpikin fu Yohanes, yu lobi mi?” Petrus piki en: „Iya, mi Masra, yu sabi taki mi lobi yu.” Yesus taigi en: „Gi den pikin skapu fu mi nyanyan. . . . Luku den pikin skapu fu mi. . . . Gi den pikin skapu fu mi nyanyan” (Yohanes 21:15-17). Disi ben de wan bigi frantwortu trutru!

⁵ Soleki fa wi kan si, dan Yesus e agersi den memre fu a gemeente nanga skapu na ini wan skapu-pen. Den skapu disi, namku Kresten man, uma, nanga pikin, ben o musu kisi leri fu Bijbel èn sma ben o musu tiri den na wan yoisti fasi. Boiti dati, Yesus ben gi den bakaman fu en a komando fu gi trawan leri èn fu meki disipel. Dati meki a ben o de fanowdu fu leri den nyun skapu disi fa fu du a wroko di den kisi fu Gado.—Mateyus 28:19, 20.

6. Sortu sani ben seti na ini a nyun „gemeente fu Gado”?

⁶ Di „a gemeente fu Gado” seti, dan den memre fu a gemeente ben e kon makandra doronomo fu kisi leri èn fu gi makandra deki-ati. Bijbel e taki: „Den ben e tan poti prakseri na den leri fu den apostel, èn den ben e prati sani nanga  makandra; den ben e nyan èn den ben e begi tu nanga makandra” (Tori fu den Apostel 2:42, 46, 47). Wan tra prenspari sani di ben pasa na ini a ten dati, na taki wan tu lepi man ben kisi spesrutu frantwortu. Den no ben kisi den frantwortu disi fu di den ben kisi leri na heiskoro, noso fu di den ben man du spesrutu sani heri bun. Den man disi ben abi „santa yeye nanga koni”. Wán fu den man disi ben de Stefanus, èn Bijbel e taki dati a ben de „wan man di ben abi wan tranga bribi èn di ben abi santa yeye”. Fu di den gemeente ben seti, meki „moro nanga moro sma ben e kon yere a wortu fu Gado, èn moro nanga moro sma na ini Yerusalem ben e tron disipel”.—Tori fu den Apostel 6:1-7.

Man di Gado ben e gebroiki

7, 8. (a) Sortu frantwortu den apostel nanga den owruman na ini Yerusalem ben abi na ini a Kresten gemeente fu a fosi yarihondro? (b) San ben de a bakapisi di den brada nanga sisa kisi rai na ini a gemeente?

⁷ A no de fu taki dati den apostel ben e teki fesi na ini a gemeente fu a fosi yarihondro, ma a no den wawan ben e du dati. Wan leisi, Paulus nanga wan tu Kresten brada drai go baka na Antiokia na ini Siria. Tori fu den Apostel 14:27 e taki: „Di den doro drape, dan den tyari a gemeente kon makandra èn den bigin fruteri den sma den furu sani di Gado ben meki den du.” Di den ben de ete na ini a gemeente drape, dan wan aksi opo kon. Den brada nanga sisa ben wani sabi efu den sma di no ben de Dyu, ben musu besnèi. Fu lusu a problema, dan den seni Paulus nanga Barnabas „go na den apostel nanga den owru man na ini Yerusalem”. Den man dati ben e dini leki Tiri Skin.—Tori fu den Apostel 15:1-3.

⁸ A Kresten owruman Yakobus, di ben de wan brada fu Yesus, no ben de wan apostel. Toku a ben e teki fesi di „den apostel nanga den owru man kon makandra fu taki fu a tori disi” (Tori fu den Apostel 15:6). Den luku a tori finifini èn nanga yepi fu santa yeye, den teki wan bosroiti di ben e kruderi nanga den Buku fu Bijbel. Baka dati den seni wan brifi gi den gemeente fu fruteri den sortu bosroiti den teki (Tori fu den Apostel 15:22-32). Di den wan na ini a gemeente yere san skrifi na ini a brifi, dan den teki a rai dati. San ben de a bakapisi? A bribi fu den brada nanga sisa kon moro tranga. Bijbel e taki: „A sani dati ben tranga a bribi fu a gemeente trutru, èn dei fu dei moro nanga moro sma ben e tron bribiman.”—Tori fu den Apostel 16:5.

9. Sortu frantwortu lepi Kresten brada abi, soleki fa Bijbel e sori?

 ⁹ Ma fa sani ben musu waka na ini den gemeente? Fu eksempre, luku den gemeente di ben de na tapu na èilanti Kreita. Aladi furu fu den sma di ben e libi drape no ben e tyari densrefi na wan bun fasi, toku wan tu fu den kenki den libi èn den tron tru Kresten (Titus 1:10-12; 2:2, 3). Den ben e libi na ini difrenti foto, èn ala den foto disi ben de farawe fu a tiri skin di ben de na ini Yerusalem. Ma dati no ben de wan bigi problema, fu di lepi „owru man” ben e teki fesi na ini ibri gemeente fu Kreita èn na ini den gemeente na tra presi. Den man disi ben doro den markitiki di skrifi na ini Bijbel. Den ben e dini leki owruman di ben kan ’frumane sma nanga a bun leri èn di ben kan piri-ai gi den sma di e strei nanga a bun leri’ (Titus 1:5-9; 1 Timoteyus 3:1-7). Tra lepi man ben doro den markitiki fu man dini na ini a gemeente leki dinari ini a diniwroko.—1 Timoteyus 3:8-10, 12, 13.

10. Fa Kresten ben musu lusu seryusu problema, soleki fa Mateyus 18:15-17 e sori?

¹⁰ Yesus ben sori taki a seti disi ben o de na ini a gemeente. Memre san skrifi na ini Mateyus 18:15-17. Drape Yesus ben taki dati son leisi problema ben o de na mindri tu anbegiman fu Gado, fu di wán fu den ben o du wan ogri nanga a trawan. A sma di ondrofeni na ogri ben kan go na a trawan fu „sori en san na en fowtu”. A musu du dati sondro fu tyari trawan kon ini a tori. Efu a sani dati no lusu a problema, a kan aksi wán noso tu sma di sabi san ben pasa, fu go nanga en fu taki nanga a tra sma. Ma san a kan du te a problema no lusu ete? Yesus ben taki: „Efu a no e arki den, dan taki nanga a gemeente. Efu a no e arki a gemeente srefi, dan meki a de gi yu leki wan grontapusma èn leki wan sma di e teki belasting moni gi lanti.” Di Yesus taki den sani disi, dan den Dyu ben de „a gemeente fu Gado” ete, sobun, na a fosi presi den wortu disi ben abi fu du nanga den. * Ma di a Kresten gemeente seti, dan a rai fu Yesus ben abi fu du nanga a gemeente dati. Disi na ete wan sani di e sori taki a pipel fu Gado ben o de memre fu wan gemeente di ben o seti na so wan fasi taki ibri Kresten ben kan kisi deki-ati nanga rai.

11. Sortu frantwortu owruman ben o abi te problema ben o de na ini a gemeente?

¹¹ A fiti taki den owruman ben o abi a frantwortu fu lusu problema na ini a gemeente, noso fu yepi sma di ben du seryusu sondu. Den frantwortu disi e kruderi nanga den marki di owruman musu doro, soleki fa skrifi na Titus 1:9. A tru taki den owruman fu den gemeente dati ben de sondu libisma neleki Titus, di Paulus ben seni go na den gemeente fu „poti den sani reti di no ben bun ete” (Titus 1:4, 5). Bifo brada na ini a ten disi e tron owruman, dan sma musu kon sabi den leki brada di abi bribi èn di de klariklari fu dini trawan. A sani disi e gi trawan na ini a gemeente a dyaranti taki den brada disi sa gi bun rai èn taki den sa teki fesi na wan bun fasi.

12. Sortu frantwortu owruman abi na ini a gemeente?

¹² Paulus ben taigi den owruman na ini a gemeente fu Efeise: „Un luku unsrefi bun, èn sosrefi ala den skapu, bika santa yeye poti unu leki opziener fu luku a gemeente fu Gado di a bai nanga a brudu fu en eigi Manpikin” (Tori fu den Apostel 20:28). Na ini a ten disi, owruman e „luku a gemeente fu Gado” tu. Den musu du disi na wan lobi-ati fasi. Den no musu prei basi na ini a gemeente (1 Petrus 5:2, 3). Den owruman musu pruberi fu tranga a bribi fu „ala den skapu”, èn den musu yepi den.

Tan abi demakandra nanga a gemeente

13. San kan pasa na ini wan gemeente son leisi, èn fu san ede den sani disi e pasa?

¹³ Den owruman nanga ala tra sma na ini a gemeente, na sondu libisma. Dati meki ten na ten, den o meki fowtu èn problema o de. Na so a ben de tu na ini a fosi yarihondro di wan tu fu den apostel ben de na libi ete (Filipisma 4:2, 3). Kande wan owruman, noso wan tra sma e taki pikinso grofu nanga wi, noso kande a e taki  wan sani di no tru dorodoro. Noso kande wi feni taki wan sma na ini a gemeente e du wan sani di no e kruderi nanga Bijbel. Ma aladi den owruman sabi fu a tori, toku a gersi leki den no e du noti fu lusu a problema. A no de fu taki, dati kande den owruman luku a tori kaba, noso kande den e poti prakseri na a tori akruderi Bijbel gronprakseri. A kan de so tu taki den e hori sani na prakseri di wi no sabi. Ma efu a de so trutru taki sma e du sani di no e kruderi nanga Bijbel, dan san wi musu du? Luku na eksempre disi. Wan heri pisi ten, wan sma fu a gemeente fu Korente ben e du wan seryusu sondu, èn Yehovah ben e broko en ede nanga a gemeente dati. Baka wan pisi ten, Yehovah meki den owruman lusu a problema na wan yoisti fasi èn sondro fu draidrai (1 Korentesma 5:1, 5, 9-11). Wi kan aksi wisrefi: ’Efu mi ben de na ini a gemeente fu Korente na ini a ten dati, dan san mi ben o du te a problema no ben lusu ete?’

14, 15. Fu san ede son disipel no ben wani waka moro nanga Yesus? San wi kan leri fu a tori dati?

¹⁴ Luku ete wan sani di kan pasa na ini a gemeente. Kon meki wi taki dati wan sma no man frustan wan Bijbel leri èn taki a no man bribi a leri dati. Kande a go ondrosuku a tori moro fini na ini Bijbel èn na ini buku di a kan kisi na ini a gemeente. Kande a suku yepi na tra lepi Kresten noso na den owruman srefi. Toku a no man frustan a leri, èn a no man bribi en. San a sma disi kan du? Wan srefi sortu sani pasa wán yari bifo Yesus dede. Yesus ben taki dati en na „a brede di e gi libi” èn taki wan sma di ben wani kisi têgo libi ben musu ’nyan a skin fu a Manpikin fu libisma èn a ben musu dringi en brudu’. Wan tu fu den disipel fu en skreki di den yere dati. Furu fu den disipel no aksi Yesus san den wortu dati wani taki, èn den no wakti teleki Yehovah ben o meki den kon frustan a tori moro bun. Na presi fu dati den „no ben wani waka moro nanga [Yesus]” (Yohanes 6:35, 41-66). San wi ben o du efu wi ben e libi na ini a ten dati?

¹⁵ Na ini a ten disi, son sma tapu fu abi demakandra nanga a gemeente, fu di den feni taki den kan dini Gado sondro a gemeente. Kande den feni taki wan sma du den wan hati sani. Kande den feni taki den owruman e tapu den ai gi wan ogri di e pasa na ini a gemeente. Noso kande a muilek gi den fu bribi wan leri fu Bijbel. Den sma disi abi leti fu gowe libi a gemeente? A tru taki ibri Kresten musu abi  wan banti nanga Gado, ma wi musu hori na prakseri taki Gado e gebroiki a gemeente fu en di de na heri grontapu, soleki fa a ben e du dati na ini a ten fu den apostel. Boiti dati, Yehovah gebroiki den gemeente fu a fosi yarihondro èn a blesi den tu. Fu dati ede, a seti sani so taki lepi owruman nanga dinari ini a diniwroko ben kan dini a gemeente. Na so a de tu na ini a ten disi.

16. San wan sma musu hori na prakseri te a wani gowe libi a gemeente?

¹⁶ Efu wan Kresten feni taki a kan dini Gado sondro a gemeente, dan fu taki en leti, a e drai baka gi a gemeente fu a kontren pe a e tan, èn sosrefi gi Gado en gemeente di de na heri grontapu. Na Gado seti den gemeente disi. Kande a sma e anbegi Gado en wawan, noso kande a abi demakandra nanga wan tu brada nanga sisa nomo. Ma fa a sa du sondro a yepi fu owruman nanga dinari ini a diniwroko di Gado poti na ini a gemeente? Paulus ben skrifi wan brifi gi a gemeente na ini Kolose èn a taigi den fu leisi a brifi tu na ini a gemeente fu Laodisea. Na ini a brifi dati a ben taki dati den ben musu „tan meki rutu na ini [Krestes], èn [den ben musu] tan bow na tapu en”. Den sma di no ben abi demakandra nanga a gemeente no ben o kisi wini fu a rai disi. Soso den wan di ben de na ini a gemeente ben o kisi wini.—Kolosesma 2:6, 7; 4:16.

Wan pilari èn wan stonfutu fu a waarheid

17. San 1 Timoteyus 3:15 e leri wi fu a gemeente?

¹⁷ Na ini a fosi brifi di na apostel Paulus ben skrifi gi na Kresten owruman Timoteyus, a taki fu den markitiki di wan brada musu doro fu kan dini leki owruman, noso dinari ini a diniwroko na ini a gemeente. Syatu baka dati, Paulus taki dati „a gemeente fu a libi Gado” na „wan pilari èn wan stonfutu fu a waarheid” (1 Timoteyus 3:15). A no de fu taki dati a heri gemeente fu salfu Kresten ben de leki wan pilari na ini a fosi yarihondro. Èn wi kan de seiker taki a gemeente ben de a moro prenspari presi pe wan Kresten ben kan kon sabi a waarheid. Drape den ben kan leri den tru tori fu Bijbel, èn drape den ben e opo taki gi den leri fu Bijbel. Iya, na drape Kresten ben kan kisi deki-ati.

18. Fu san ede a de tumusi prenspari fu go na den gemeente konmakandra?

¹⁸ A Kresten gemeente di de na heri grontapu èn di de na osofamiri fu Gado, na „wan pilari èn wan stonfutu fu a waarheid” tu. A de tumusi prenspari taki wi e go na den konmakandra doronomo èn taki wi e teki prati na den konmakandra dati. Disi sa tranga a bribi fu wi, wi sa kisi wan moro bun banti nanga Gado, èn a sa yepi wi fu de klariklari fu du a wani fu en. Di Paulus ben skrifi wan brifi gi a gemeente na ini Korente, dan a taki fu den sani di sma ben e taki na den konmakandra disi. A ben skrifi taki den Kresten ben musu taki na so wan fasi taki ala sma ben kan frustan den, so taki a bribi fu den ben kan kon moro „tranga” (1 Korentesma 14:12, 17-19). Na ini a ten disi, a bribi fu wi sa kon moro tranga te wi e bribi taki na Yehovah Gado seti den gemeente èn taki a e horibaka gi den.

19. Fu san ede yu e warderi a gemeente fu yu?

¹⁹ Iya, efu wi leki Kresten wani kisi wan moro tranga bribi, dan wi musu tan abi demakandra nanga a gemeente. Langa ten kaba a gemeente e kibri Kresten gi falsi leri, èn Gado gebroiki a gemeente fu sorgu taki a bun nyunsu fu a Mesias Kownukondre e preiki na heri grontapu. Iya, Gado du furu sani nanga yepi fu a Kresten gemeente.—Efeisesma 3:9, 10.

[Futuwortu]

Yu kan memre disi ete?

• Fa wi du sabi taki Gado ben o gebroiki gemeente na grontapu?

• San owruman e du gi a gemeente, aladi den na sondu libisma?

• Fa a gemeente e tranga a bribi fu yu?

[Aksi fu a tori disi]

[Prenki na tapu bladzijde 26]

Den apostel nanga den owru man na ini Yerusalem ben e dini leki wan tiri skin

[Prenki na tapu bladzijde 28]

Owruman nanga dinari ini a diniwroko e kisi rai so taki den kan tyari den frantwortu di den abi na ini a gemeente