Meki a gemeente prèise Yehovah
Meki a gemeente prèise Yehovah
„Mi o meki yu nen bekènti na den brada fu mi; na mindri fu a gemeente mi o prèise yu.”—HEBREWSMA 2:12.
1, 2. Fu san ede a gemeente na wan bun seti, èn san na a moro prenspari reide fu san ede a gemeente seti?
HONDROHONDRO yari kaba, na osofamiri de wan seti pe sma e libi bun nanga makandra èn pe den e firi koloku. Ma Bijbel e taki fu wan moro bun seti di e gi milyunmilyun sma na heri grontapu a dyaranti taki den no de den wawan, èn taki sani sa waka bun nanga den. A seti disi na a Kresten gemeente. Awinsi yu na wan memre fu wan osofamiri pe sma e libi bun nanga makandra, noso awinsi dati no de so, toku yu kan sori warderi gi den sani di Gado seti nanga yepi fu a gemeente. Fu taki en leki, yu musu sori warderi gi den sani disi. Efu yu abi demakandra kaba nanga Yehovah Kotoigi, dan a no de fu taki dati yu e firi a waran lobi di den e sori gi makandra, èn yu abi a dyaranti taki sani sa waka bun nanga yu.
2 A gemeente no de wan seti nomo pe sma e kon makandra fu du spesrutu sani fu a bun fu a birti fu den. A no de wan grupu fu sma di e kon makandra fu di den abi den srefi gwenti, fu di den e du wan spesrutu sport noso wan sani di den lobi. Na presi fu dati, a moro prenspari reide fu san ede a Kresten gemeente seti, na fu prèise Yehovah Gado. Disi ben de so langa ten kaba, soleki fa a e kon na krin na ini a buku Psalm. Na ini Psalm 35:18, wi e leisi: „Mi sa prèise yu na ini a bigi gemeente; na mindri wan bigi grupu fu sma mi sa prèise yu.” Psalm 107:31, 32 e gi wi deki-ati fu du a srefi sani: „O, meki sma gi tangi na Yehovah fu di a sori lobi bun-ati gi libisma èn fu di a du wondruwroko gi den. Èn meki den gi glori na en na ini a gemeente fu a pipel.”
3. San na ete wan reide fu san ede a gemeente seti, soleki fa Paulus e sori?
3 A Kresten apostel Paulus ben taki fu „na osofamiri fu Gado, di de a gemeente fu a libi Gado, wan pilari èn wan stonfutu fu a waarheid” (1 Timoteyus 3:15). Nanga disi a ben poti prakseri na ete wan prenspari reide fu san ede a gemeente seti. Fu sortu gemeente Paulus ben e taki? San a wortu „gemeente” wani taki na ini Bijbel? Sortu wini a gemeente e tyari kon gi wi? Fu kisi piki tapu den aksi disi, dan meki wi go luku fosi san a wortu „gemeente” wani taki na ini Gado Wortu.
4. San a wortu di vertaal nanga „gemeente” wani taki na ini den Hebrew Buku fu Bijbel?
4 A Hebrew wortu di vertaal nanga „gemeente”, abi fu du nanga wan grupu sma di „kari kon na wán” (Deuteronomium 4:10; 9:10). A psalm skrifiman gebroiki a wortu disi di a ben taki fu a grupu fu engel na ini hemel, èn a wortu disi abi fu du tu nanga wan grupu ogriman (Psalm 26:5; 89:5-7). Ma furu tron, te den Hebrew Buku fu Bijbel e gebroiki a wortu disi, dan a abi fu du nanga a pipel fu Israel. Gado ben sori Yakob taki den bakapikin fu en ben o „tron wan bigi pipel”, noso wan bigi grupu sma. Na dati pasa tu (Genesis 28:3; 35:11; 48:4). Fu di Yehovah ben tyari den Israelsma kon na wán, èn fu di a ben teki den leki en pipel, meki Bijbel e kari den Israelsma „a pipel fu Yehovah”, noso „a pipel fu a tru Gado”.—Numeri 20:4; Nehemia 13:1; Yosua 8:35; 1 Samuel 17:47; Mika 2:5.
5. Sortu Griki wortu vertaal nanga „gemeente” nofo tron, èn san a wortu disi wani taki?
5 A Griki wortu di vertaal nanga „gemeente”, na ek·kle·siʹa. A komoto fu tu Griki wortu di wani taki „kon” èn „kari”. Son leisi a wortu disi abi fu du nanga wan grupu di e kon makandra fu du sani di no abi fu du nanga kerkitori. Fu eksempre, Bijbel e taki fu a grupu sma na ini Efeise di Demetrius ben kari kon na wán fu gens Paulus (Tori fu den Apostel 19:32, 39, 41). Ma nofo tron te Bijbel e gebroiki a Griki wortu disi, dan dati abi fu du nanga a Kresten gemeente. Na ini son Bijbel a Griki wortu disi vertaal nanga „kerki”, ma wan wortubuku e taki dati a wortu „noiti . . . abi fu du nanga a presi pe Kresten e kon makandra fu anbegi Gado” (The Imperial Bible-Dictionary). Ma a moi fu si taki na ini den Kresten Griki Buku fu Bijbel, a wortu di vertaal nanga „gemeente” abi fu du nanga fo difrenti sani.
A salfu gemeente fu Gado
6. San David nanga Yesus du na ini a gemeente?
6 Na apostel Paulus ben sori taki den sani di David taki na ini Psalm 22:22, abi fu du nanga Yesus. A ben taki: „’Mi o meki yu nen bekènti na den brada fu mi; na mindri fu a gemeente mi o prèise yu nanga singi.’ Dati meki [Yesus] ben musu kon de leki den ’brada’ fu en na ala fasi, so taki a ben kan tron wan granpriester di abi sari-ati èn di de getrow na ini a diniwroko fu Gado” (Hebrewsma 2:12, 17). David ben prèise Gado na mindri fu a gemeente fu den Israelsma fu owruten (Psalm 40:9). Ma san Paulus ben wani tyari kon na krin di a taki dati Yesus ben e prèise Gado „na mindri fu a gemeente”? Sortu gemeente na dati?
7. San a wortu „gemeente” wani taki na a fosi presi?
7 Den sani di skrifi na ini Hebrewsma 2:12, 17 de prenspari. Den tekst disi e sori taki Krestes na wan memre fu wan gemeente, èn na ini a gemeente dati a meki a nen fu Gado bekènti na den brada fu en. Suma na den brada fu en? Dati na den „pikin fu Abraham”, sobun den salfu brada fu Krestes „di kisi a kari tu fu go na hemel” (Hebrewsma 2:16–3:1; Mateyus 25:40). Iya, na a fosi presi a wortu „gemeente” abi fu du nanga a grupu salfu bakaman fu Krestes. Den 144.000 salfuwan disi na „a gemeente fu den fosi pikin di nen skrifi na ini hemel”.—Hebrewsma 12:23.
8. Fa Yesus ben sori taki a Kresten gemeente ben o seti?
8 Yesus ben taki dati a Kresten „gemeente” disi ben o seti. Pikinmoro wán yari bifo a dede, a taigi na apostel Petrus: „Yu na Petrus, èn na tapu a bigi ston disi mi o bow mi gemeente, èn den doro fu Hades no sa wini en” (Mateyus 16:18). Petrus nanga Paulus ben frustan heri bun taki Yesus srefi na a bigi ston disi. Petrus ben skrifi taki den wan di de leki „libilibi ston”, kon tron wan oso na yeye fasi di meki na tapu a bigi ston, namku Krestes. Den sma disi na „wan pipel di de wan spesrutu gudu, [di musu] fruteri ala sma fu den kefalek moi fasi” fu a Sma di kari den.—1 Petrus 2:4-9; Psalm 118:22; Yesaya 8:14; 1 Korentesma 10:1-4.
9. O ten a gemeente fu Gado seti?
9 O ten ’a pipel disi di de wan spesrutu gudu’ tron a Kresten gemeente? Disi pasa na a Pinksterfesa fu 33 G.T., di Gado gi santa yeye na den disipel di ben kon makandra na ini Yerusalem. Moro lati a dei dati, Petrus taki nanga den Dyu èn nanga den sma di ben teki a Dyu bribi, èn den sani di a taki ben abi krakti na den tapu. Furu fu den kisi konsensi fonfon di den yere fu a dede fu Yesus. Dati meki den sori berow èn den teki dopu. Bijbel e sori taki dri dusun sma du dati, èn baka dati den tron memre fu a nyun gemeente fu Gado di ben e gro moro nanga moro (Tori fu den Apostel 2:1-4, 14, 37-47). A gemeente ben e gro, fu di moro nanga moro Dyu nanga sma di ben teki a Dyu bribi, kon frustan taki a nâsi Israel no ben de a gemeente fu Gado moro. Na presi fu dati, den salfu Kresten, noso na „Israel fu Gado”, kon tron a trutru gemeente fu Gado.—Galasiasma 6:16; Tori fu den Apostel 20:28.
10. Sortu frantwortu Yesus abi na ini a gemeente fu Gado?
10 Nofo tron, Bijbel e sori taki wan difrenti de na mindri Yesus nanga den salfuwan. Fu eksempre, na ini Efeisesma 5:32, Paulus e taki „fu Krestes èn fu a gemeente”. Yesus na a Ede fu a gemeente fu salfu Kresten. Paulus ben skrifi taki Gado „meki [Yesus] tron edeman fu ala sani gi a bun fu a gemeente di de en skin” (Efeisesma 1:22, 23; 5:23, 32; Kolosesma 1:18, 24). Na ini a ten disi, wan pikin grupu salfu memre fu a gemeente disi de ete na grontapu. Ma wi kan de seiker taki na Edeman fu den, Yesus Krestes, lobi den. Efeisesma 5:25 e taki sortu firi a abi gi den. Drape skrifi taki ’Krestes lobi a gemeente èn a gi ensrefi gi a gemeente’. A lobi den, fu di den e gi Gado „wan srakti-ofrandi fu prèise, . . . namku den froktu fu a mofo di e meki en nen bekènti na trawan”. Yesus ben e du disi tu di a ben de na grontapu.—Hebrewsma 13:15.
Tra grupu di Bijbel e kari wan „gemeente”
11. San a wortu „gemeente” wani taki na a di fu tu presi?
11 Son leisi, te Bijbel e gebroiki a wortu „gemeente”, dan dati no abi fu du nanga a grupu fu 144.000 salfuwan di de „a gemeente fu Gado”. Fu eksempre, luku san Paulus ben skrifi wan grupu Kresten: „Un no musu du nowan sani di e meki Dyu, Grikisma, noso a gemeente fu Gado fadon” (1 Korentesma 10:32). Soleki fa a sori, dan efu wan Kresten na ini Korente fu owruten ben du wan sani di no fiti, dan a ben kan meki wan tu sma fadon. Ma a ben o meki ala Grikisma, Dyu, noso salfuwan fadon, teleki a dei fu tide? Nôno, kwetikweti. Soleki fa wi e si, dan na ini a tekst disi den wortu „a gemeente fu Gado” abi fu du nanga Kresten di ben e libi na wan spesrutu pisi ten. Dati meki te wan sma e taki dati Gado e tiri, e yepi, noso e blesi a gemeente, dan a e taki fu ala Kresten di e libi na wan spesrutu pisi ten, awinsi pe den de. Noso te wi e taki dati den sma na ini a gemeente fu Gado de koloku, dan wi e taki fu ala brada nanga sisa na heri grontapu.
12. San a wortu „gemeente” wani taki na a di fu dri presi?
12 Na a di fu dri presi, a wortu „gemeente” wani taki, ala Kresten di e libi na ini wan spesrutu kontren. Bijbel e taki: „Ala sani kon tiri baka na ini a gemeente na ini heri Yudea, Galilea, nanga Samaria” (Tori fu den Apostel 9:31). Moro leki wán grupu Kresten ben de na ini a bigi kontren dati. Ma a tekst disi e kari ala den Kresten na ini Yudea, Galilea, nanga Samaria „a gemeente”. Te wi e luku omeni sma teki dopu na a Pinksterfesa fu 33 G.T. èn sosrefi syatu baka dati, dan a kan taki moro leki wán grupu Kresten ben e kon makandra doronomo na ini a kontren fu Yerusalem (Tori fu den Apostel 2:41, 46, 47; 4:4; 6:1, 7). Herodes Agrepa I ben e tiri Yudea te na a dede fu en na ini 44 G.T., èn 1 Tesalonikasma 2:14 e sori krin taki na a ten fu a yari 50 G.T., wan tu gemeente ben de na ini Yudea. Sobun, te wi e leisi taki Herodes ben e „du wan lo ogri nanga wan tu sma fu a gemeente”, dan a kan taki a ben e du ogri nanga moro leki wán grupu Kresten di ben e kon makandra na ini Yerusalem.—Tori fu den Apostel 12:1.
13. San a wortu „gemeente” wani taki na a di fu fo presi?
13 Na a di fu fo presi, a wortu „gemeente” abi fu du nanga wan moro pikin grupu di furu fu wi sabi. Dati na wan grupu fu Kresten di de memre fu wan gemeente na ini wan birti, soleki wan grupu Kresten di e kon makandra na ini wan oso. Paulus ben taki fu „den gemeente fu Galasia”. Na ini a bigi distrikt fu Rome yu ben abi wan tu fu den gemeente dati. Tu tron Paulus taki fu „den gemeente” na ini Galasia, namku den gemeente na ini Antiokia, Derbe, Listra, nanga Ikonium. Lepi Kresten brada ben e tron owruman na ini den gemeente dati (1 Korentesma 16:1; Galasiasma 1:2; Tori fu den Apostel 14:19-23). Bijbel e sori taki ala den grupu disi ben de „gemeente fu Gado”.—1 Korentesma 11:16; 2 Tesalonikasma 1:4.
14. San a wortu „gemeente” wani taki na ini son bijbeltekst?
14 A ben musu fu de so taki sonwan fu den Kresten grupu ben pikin, èn dati meki den ben man hori konmakandra na ini sma oso. Ma toku Bijbel e kari wan tu fu den grupu disi „gemeente”. Bijbel e taki fu den gemeente di ben e kon makandra na ini na oso fu Akwila nanga Preska, na ini na oso fu Nimfa, èn na ini na oso fu Fileimon (Romesma 16:3-5; Kolosesma 4:15; Fileimon 2). A sani disi musu de wan deki-ati gi den pikin gemeente na ini a ten disi di e hori konmakandra tu na ini sma oso. Yehovah, ben e si den pikin grupu disi fu a fosi yarihondro, leki gemeente, èn na so a e si den pikin gemeente na ini a ten disi tu. A e tiri den gemeente disi nanga yepi fu en santa yeye.
Den gemeente e prèise Yehovah
15. Fa sma na ini sonwan fu den fosi gemeente ben e sori taki den abi santa yeye?
15 Soleki fa wi si kaba, dan leki wan kontru fu Psalm 22:22, Yesus ben e prèise Gado na mindri fu a gemeente (Hebrewsma 2:12). Den getrow bakaman fu en ben musu du a srefi sani. Na ini a fosi yarihondro, di Gado gi tru Kresten santa yeye so taki den ben kan tron manpikin fu Gado nanga brada fu Krestes, dan sonwan fu den Kresten disi kisi a krakti tu fu du spesrutu sani. Den ben kisi a krakti fu du wondru. Fu eksempre, wan tu fu den ben man taki nanga koni, trawan ben man dresi sikisma, trawan ben man taki profeititori, èn trawan ben man taki tongo di den no ben gwenti taki.—1 Korentesma 12:4-11.
16. Fu san ede son Kresten ben kisi a presenti fu a yeye fu du wondru?
16 Paulus ben taki disi fu a presenti di sma ben abi fu taki na ini tongo: „Mi sa singi prèisesingi nanga a presenti fu a yeye, ma mi sa singi prèisesingi sosrefi nanga mi frustan” (1 Korentesma 14:15). A ben sabi taki efu a ben wani leri trawan wani sani, dan den ben musu man frustan san a ben e taki. Paulus ben wani prèise Yehovah na ini a gemeente. A ben gi trawan di ben abi a presenti fu a yeye, a rai disi: „Du muiti fu kisi furu fu den presenti dati, so taki unu kan gi a gemeente tranga.” Paulus ben taki fu den gemeente pe Kresten ben de di ben abi den sortu presenti disi (1 Korentesma 14:4, 5, 12, 23). A de krin taki Paulus ben wani taki sani musu waka bun na ini den gemeente, fu di a ben sabi taki na ini ibriwan fu den gemeente disi Kresten ben o abi na okasi fu prèise Gado.
17. San Yehovah sa tan du nanga den gemeente na ini a ten disi?
17 Yehovah e tan gebroiki a gemeente fu en èn a e tan horibaka gi en. Na ini a ten disi, a e blesi a grupu fu salfu Kresten di de na grontapu. Wi kan si dati, fu di a pipel fu Gado e kisi bun furu leri fu Bijbel (Lukas 12:42). Gado e blesi ala den brada nanga sisa na heri grontapu. Èn a e blesi den difrenti gemeente pe wi e prèise wi Mekiman nanga yepi fu den sani di wi e du, èn nanga yepi fu den sani di wi e taki fu gi trawan deki-ati. Na ini den gemeente disi, wi e kisi leri so taki wi kan prèise Gado tu te wi no de na den konmakandra.
18, 19. San getrow Kresten na ini den gemeente musu du?
18 Memre a rai di na apostel Paulus ben gi den Kresten fu a gemeente Filipi, na Masedonia. A ben taki: „Disi na san mi e tan begi, . . . taki na ini un heri libi unu kan tyari unsrefi na wan regtfardiki fasi nanga yepi fu Yesus Krestes, èn na so fasi unu kan gi Gado glori nanga prèise.” Disi wani taki tu dati den ben musu taki nanga tra Kresten brada nanga sisa fu a bribi di den ben abi na ini Yesus èn fu a tumusi moi howpu di den ben abi. Den ben musu taki fu den sani disi tu nanga sma di no de Kresten (Filipisma 1:9-11; 3:8-11). Paulus ben taigi tra Kresten wan srefi sortu sani: „Meki wi, nanga yepi fu [Yesus], gi Gado wan srakti-ofrandi fu prèise ala ten, namku den froktu fu a mofo di e meki en nen bekènti na trawan.”—Hebrewsma 13:15.
19 Yu lobi fu prèise Gado „na mindri fu a gemeente”, neleki fa Yesus ben lobi fu du dati? Èn yu lobi fu gebroiki yu mofo fu prèise Yehovah na fesi den sma di no sabi Gado ete èn di no e prèise en? (Hebrewsma 2:12; Romesma 15:9-11). A piki di wi e gi tapu den aksi disi, sa sori fa wi denki fu den sani di Gado e du nanga yepi fu a gemeente. Meki wi go luku a di fu tu studie-artikel, fu si fa Yehovah e tiri èn e gebroiki a gemeente fu wi. Èn wi sa go luku sortu wini a gemeente e tyari kon gi wi ini a ten disi.
Yu e memre disi ete?
• Fa den salfu Kresten kon tron „a gemeente fu Gado”?
• San na den dri tra sani di a wortu „gemeente” wani taki na ini Bijbel?
• San David, Yesus, nanga den fosi Kresten ben wani du na ini a gemeente? San wi kan leri fu a sani disi?
[Aksi fu a tori disi]
[Prenki na tapu bladzijde 21]
Fu sortu gemeente Yesus na a Edeman?
[Prenki na tapu bladzijde 23]
Grupu Kresten fu wan spesrutu birti ben e kon makandra leki „gemeente fu Gado”
[Prenki na tapu bladzijde 24]
Neleki den Kresten na ini Benin, wi kan prèise Yehovah tu na ini a gemeente