Na ogri grontapu fu tide

MARÍA ben abi 64 yari èn a ben e libi en wawan. Wan dei, sma feni a dedeskin fu en na ini en oso. Sma ben fon en èn den ben yokro en kiri nanga wan pisi isri titei.

Wan grupu sma di ben e atibron fon dri skowtu, fu di den ben feni taki den skowtu ben teki tu pikin boi tyari gowe nanga tranga. Den sma fringi oli na tapu tu fu den skowtu, èn den leti faya gi den. Den tu skowtu bron teleki den dede. A tra skowtu ben man lowe gowe.

Sma feni fo dedeskin na ini wan dyari. Den dedeskin disi ben de fu man di ben go koiri na ini a kontren dati. Den ai fu den man ben tapu nanga wan duku èn den anu fu den ben tai nanga titei. Baka di datra ondrosuku a tori, dan den kon si taki sma ben beri den man disi libilibi.

Den ogri-ati sani disi no pasa na ini wan felem. Den sani disi pasa trutru, soleki fa skrifi no so langa pasa na ini wan koranti fu wan kondre fu Latino-Amerika. Ma na ini a ten disi, den sortu sani disi no e pasa na ini a kondre dati wawan.

Ibri dei ogri-ati sani e pasa. Sma e poti bom fu kiri trawan, den e du ogri-ati sani fu gens tirimakti, den e fon sma, den e sutu sma nanga gon, èn den e dwengi sma na wan ogri-ati fasi fu abi seks nanga den. Disi na wan tu sani nomo. Ma ibri tron baka, den ogri-ati sani disi de fu si krinkrin tapu telefisi, èn furu sma no e skreki moro te den e si den sortu sani disi, noso te den yere fu den.

Kande yu e aksi yusrefi: ’San e pasa nanga a grontapu disi? A de so taki sma no e broko den ede moro nanga den firi fu trawan? A de so taki sma no e lespeki a libi fu trawan moro? Fu san ede wi musu libi na ini so wan grontapu?’

Meki wi go luku a tori fu Harry, wan owru man fu 69 yari di ben abi kanker. A wefi fu en abi multiple sclerosis, wan siki di e meki sma kon lan safrisafri. Ma den birtisma nanga mati de klariklari fu yepi den te dati de fanowdu. Harry e taki: „Mi no sabi fa wi ben o du efu den sma disi no ben de fu yepi wi.” Na ini Kanada, a kondre pe Harry e libi, wan ondrosuku sori taki moro leki 50 procent fu den sma di e sorgu gi owrusma, e yepi wan sma di no de famiri fu den. Kande yu sabi sma tu di abi switifasi èn di abi a gwenti fu yepi den birtisma fu den. Iya, libisma man sori sari-ati gi trawan èn den man sori switifasi tu, na presi fu du ogri-ati sani.

Ma fu san ede den ogri-ati sani disi e pasa na grontapu? San e meki taki sma e du ogri-ati sani? Yu denki taki sma di e du ogri-ati sani nanga trawan man kenki? Oiti sma o kaba du ogri-ati sani? Èn efu dati de so, dan fa dati o pasa, èn o ten dati o pasa?

[Sma di abi a reti fu a prenki na tapu bladzijde 3]

Train: CORDON PRESS