Oiti wan kaba sa kon na ogridu?

FURU sma e agri taki a moro prenspari reide fu san ede sma na ini a ten disi e du ogri-ati sani, na fu di den e suku wini gi densrefi nomo. Furu yari pasa, sma kon kisi a gwenti fu denki densrefi nomo, èn dati meki sma na ini a ten disi no e broko den ede nanga trawan. Furu sma sa du iniwan sani di de fanowdu fu kisi san den wani, èn nofo tron dati e meki den du ogri-ati sani. A no wan tu sma nomo e du den sani disi, ma sosrefi heri-heri kondre.

Sma no abi lespeki moro gi a libi fu trawan. Yu abi son sma srefi di lobi fu du ogri-ati sani. Den e firi prisiri te den e du dati, èn den de neleki den ogriman di e taki dati den e du ogri-ati sani nanga trawan fu di a sani dati e meki den firi switi. Ma fa a de nanga den milyunmilyun sma di lobi fu luku felem di lai ogridu? A sani disi e meki taki den felem bisnis e meki moro nanga moro fu den felem disi, soso fu meki moni. Furu sma no e skreki moro te den e si fa trawan e du ogri-ati sani, fu di den gwenti si den sortu sani disi na ini felem èn na ini a nyunsu.

Te ogri-ati sani e pasa nanga wan sma, dan nofo tron dati kan pori a denki fu a sma dati èn a kan du ogri-ati sani tu nanga trawan. Noemí Díaz Marroquín na wan uma di e gi leri na wan heiskoro na ini Meksikow. Disi na san a taki fu sma di e du ogri fu di trawan du ogri nanga den: „Sma e leri fu du ogri, fu di trawan na ini a libimakandra e du ogri . . . Te ogri-ati sani e pasa ala dei na ini a libimakandra fu wi, dan wi e leri fu du ogri-ati sani tu.” Sobun, te ogri-ati sani pasa nanga wan sma, dan nofo tron a sma dati sa du ogri tu nanga tra sma, èn kande a sa du den srefi ogri-ati sani di pasa nanga en.

Sma di e dringi furu sopi èn sma di e gebroiki furu drugs, kan du ogri-ati sani tu. Boiti dati, yu abi sma tu di no lobi fa den tiriman e tiri a kondre fu den, fu di den feni taki den tiriman disi no e gi a pipel san den abi fanowdu. Wan tu fu den sma disi e du ogri-ati sani fu di den de nomonomo fu sori den tiriman taki den no e agri nanga den, èn nofo tron sma di no abi noti fu du nanga a tori, e lasi den libi.

Kande yu e aksi yusrefi: ’Na libisma wawan e meki taki ogri-ati sani e pasa? San e meki taki sma e du ogri-ati sani na ini a ten disi?’

Suma e meki taki sma e du ogri-ati sani?

Bijbel e taki dati Satan Didibri abi furu krakti tapu a grontapu disi, èn Bijbel e kari en „a  gado fu a grontapu sistema disi” (2 Korentesma 4:4). Fu ala den sma di e du ogri èn di e prakseri densrefi nomo, Satan na a moro ogriwan. Yesus ben abi leti fu kari en „wan kiriman” èn „a tata fu ala lei”.—Yohanes 8:44.

Di Adam nanga Eva trangayesi Gado, dan a libisma famiri kon de na ondro a makti fu Satan (Genesis 3:1-7, 16-19). Sowan 15 yarihondro baka di den fosi libisma drai baka gi Yehovah, dan den engel di opo densrefi teige Gado, teki libisma skin, den ben abi seks nanga umasma, èn den kisi basra pikin di Bijbel e kari Neifilim. Fa den man disi ben de? A nen fu den e sori wi kaba fa den ben de. A nen dati wani taki „den wan di e du ogri nanga trawan”. Soleki fa a sori, dan den Neifilim ben de ogri-ati man di ben e gi sma deki-ati fu du ogri, èn den ben e du wan lo sani di no fiti. Soso a bigi Frudu ben kan tyari wan kaba kon na a situwâsi dati (Genesis 6:4, 5, 17). Den Neifilim dede na ini a Frudu, ma den papa fu den drai go baka na hemel leki ogri yeye.—1 Petrus 3:19, 20.

Na ini a ten fu Yesus yu ben abi wan boi di ben abi wan ogri yeye na en tapu. Den sani di na ogri yeye ben e du nanga a boi, e sori taki den ogri yeye lobi fu du ogri-ati sani nanga sma. Ibri tron baka, na ogri yeye ben e meki a boi kisi stoipi èn a ben e trowe en go na ini faya èn na ini watra, fu di a ben wani kiri en (Markus 9:17-22). A de krin taki den „ogri yeye” disi de leki Satan Didibri, na edeman fu den di no abi sari-ati nanga sma.—Efeisesma 6:12.

Na ini a ten disi, den ogri yeye e tan gi sma deki-ati fu du ogri-ati sani. Bijbel ben taki na fesi: „Na ini den lasti dei muilek ten o de di tranga fu pasa. Bika sma sa lobi densrefi nomo, . . . den sa denki tumusi furu fu densrefi, den sa abi heimemre, . . . den no sa de nanga tangi, den no sa de loyaal; den no sa lobi trawan, den no sa wani meki kruderi, den sa de sma di e fruteri ogri-ati lei fu trawan, den no sa man dwengi densrefi, den sa du sani nanga trawan na wan ogri-ati fasi, den no sa lobi san bun; den sa de sma di e tori trawan, den sa du san densrefi wani, den sa abi bigimemre, den sa de sma di lobi prisiri na presi taki den lobi Gado; a o gersi leki den e dini Gado na wan getrow fasi, ma a libi fu den o sori taki dati no de so.”—2 Timoteyus 3:1-5.

Bijbel profeititori e sori taki a ten fu wi o muilek srefisrefi, fu di Krestes Yesus trowe Satan nanga den ogri yeye fu en komoto na hemel, di a tron kownu fu Gado Kownukondre na ini 1914. Bijbel e taki: „Helu fu grontapu èn fu a se, bika Didibri saka kon na unu èn a abi bigi atibron fu di a sabi taki en ten syatu.”—Openbaring 12:5-9, 12.

A sani disi wani taki dati wan kenki no man kon? Díaz Marroquín, di wi ben kari kaba, e taki dati „sma man leri” fu no du ogri moro. Ma fu di Satan abi krakti tapu heri grontapu, meki libisma abi wan moro bigi krakti fanowdu fu kenki a fasi fa den e denki èn e handri. San na a krakti dati?

San kan yepi wan sma fu kenki?

Koloku taki a santa yeye fu Gado na a moro bigi krakti di de, èn aladi den ogri yeye abi krakti tapu sma, toku a santa yeye kan yepi wan sma fu kenki. A e gi sma deki-ati fu sori lobi èn fu du bun gi trawan. Efu wan sma wani taki Yehovah feni en bun, dan a no musu du no wan ogri èn na so fasi a sa kisi a yeye fu Gado. A sma disi sa musu tron wan nyun sma di e du a wani fu Gado. San na a wani fu Gado? Gado wani taki wi musu du ala muiti fu de leki en. Disi wani taki dati wi musu si trawan soleki fa Gado e si den.—Efeisesma 5:1, 2; Kolosesma 3:7-10.

Te wi e ondrosuku fa Gado e du sani, dan wi sa kisi na overtoigi taki Yehovah noiti no sori taki a no e broko en ede nanga trawan, èn noiti a e handri takru nanga sma. A no e du dati nanga meti srefi (Deuteronomium 22:10; Psalm 36:7; Odo 12:10). * A no lobi ogridu èn a  no lobi sma di e du ogri-ati sani (Odo 3:31, 32). Te Kresten e tron nyun sma soleki fa Yehovah wani, dan dati sa yepi den fu si trawan moro hei leki densrefi èn fu lespeki den (Filipisma 2:2-4). Wan tu fu den fasi di Kresten musu abi na „sari-ati, bun-ati, sakafasi, safri-ati, nanga langa pasensi”. Boiti dati, den musu abi lobi, „bika lobi na wan volmaakti banti di e meki sma kon de wán” (Kolosesma 3:12-14). Grontapu ben o de heri tra fasi efu furu sma ben abi den fasi disi, a no so?

Ma kande yu e aksi yusrefi efu wan sma man kenki trutru. We, luku wan ondrofenitori. Martín * ben gwenti bari en wefi leti na fesi den pikin fu den èn a ben e fon en. Wan leisi, a fon en so te taki den pikin ben musu lon go suku yepi na den birtisma. Baka wan tu yari, na osofamiri bigin studeri Bijbel nanga Yehovah Kotoigi. Martín leri fa a ben musu tyari ensrefi èn fa a ben musu handri nanga tra sma. A ben man kenki? En wefi e piki: „Fosi, mi masra ben e tyari ensrefi na wan heri tra fasi te a ben atibron. Dati meki wan heri pisi ten, a libi fu wi ben bruya srefisrefi. Mi no sabi fa fu taigi Yehovah tangi fu di a yepi Martín fu kenki. Now a de wan bun papa èn wan tumusi bun masra.”

Disi na wán ondrofenitori nomo. Na heri grontapu, milyunmilyun sma di studeri Bijbel nanga Yehovah Kotoigi, tapu fu du ogri-ati sani. Iya, wan sma man kenki.

Heri esi nowan ogri sa de

Heri esi, a Kownukondre fu Gado sa tiri heri grontapu. A Kownukondre disi e tiri now na hemel èn a Tiriman fu en, namku Krestes Yesus, abi sari-ati gi sma. Gado Kownukondre puru den ogri yeye kaba na hemel, èn sosrefi Satan, a sma di e meki taki ogri-ati sani e pasa. Heri esi, a Kownukondre fu Gado sa sorgu taki sma di lobi vrede èn di e saka densrefi na a Kownukondre ondro, e kisi ala sani di den abi fanowdu (Psalm 37:10, 11; Yesaya 11:2-5). Dati na a wan-enkri fasi fa wan kaba kan kon na den problema fu grontapu. Ma san yu musu  du efu ogri-ati sani pasa nanga yu, aladi yu e wakti a Kownukondre?

Te yu e pai ogri nanga ogri, dan dati no o yepi. Dati o tyari moro ogri kon. Bijbel e gi wi deki-ati fu frutrow tapu Yehovah, fu di a sa „gi ibriwan sma akruderi den pasi fu en, akruderi a bakapisi fu den sani di a e du”. Ma Yehovah sa du dati na en eigi ten (Yeremia 17:10). (Luku a faki, „San fu du te ogri-ati sani pasa nanga wi”.) A kan taki yu e sari fu di wan ogri-ati sani pasa nanga yu (Preikiman 9:11). Ma awinsi san pasa nanga wan sma, Gado kan kenki a situwâsi dati, srefi te a sma dede. Gado e memre sma di dede na wan ogri-ati fasi, èn a pramisi taki den wan di a e memre, sa kisi libi baka.—Yohanes 5:28, 29.

Aladi ogri-ati sani kan pasa nanga ibriwan fu wi, toku wi kan feni trowstu te wi abi wan bun banti nanga Gado èn te wi e bribi trutru taki a sa du san a pramisi. Luku na eksempre fu Sara di no ben abi wan masra. En wawan kweki den tu boi fu en èn a sorgu taki den kisi bun skoroleri. Di a kon owru, den boi fu en gowe libi en. Den no e sorgu gi en èn den no ben e luku en te a ben e siki. Ma Sara, di de wan Kresten now, e taki: „Aladi mi e sari, toku Yehovah no gowe libi mi. Mi e firi taki a e yepi mi, fu di den Kresten brada nanga sisa fu mi e sorgu gi mi ala ten. Mi abi na overtoigi taki heri esi a sa lusu den problema fu mi, nanga di fu ala sma di e du a wani fu en èn di e frutrow na en tapu.”

Den Kresten brada nanga sisa fu Sara na Yehovah Kotoigi. Den safri-atisma disi na memre fu wan organisâsi di de na heri grontapu, èn den abi na overtoigi taki heri esi wan kaba sa kon na ogri (1 Petrus 2:17). Satan, a moro prenspari sma di meki taki ogri-ati sani e pasa, èn den sma di e handri neleki en, sa kisi pori. Wan skrifiman taki dati a ten fu wi na wan „ten pe furu ogri-ati sani e pasa”. Ma den sani disi sa kon na wan kaba. Fu san ede yu no e suku fu miti Yehovah Kotoigi, so taki den kan fruteri yu moro fu a howpu disi?

[Futuwortu]

[Faki na tapu bladzijde 6]

San fu du te ogri-ati sani pasa nanga wi

Gado Wortu e gi wi bun rai di kan sori wi san fu du te ogri-ati sani pasa nanga wi. Luku den koni rai disi:

„No taki: ’Mi sa pai ogri nanga ogri!’ Howpu tapu Yehovah, èn a sa frulusu yu.”—Odo 20:22.

„Te unu e si taki sma e kwinsi a mofinawan èn taki den e du ogri nanga sma, na presi fu du san reti èn san regtfardiki . . . , dan no fruwondru fu a sani disi, bika wan sma di hei moro a heiwan e luku, èn sma de di hei moro den.”—Preikiman 5:8.

„Koloku fu den safri-ati sma, bika den o kisi grontapu.”—Mateyus 5:5.

„Fu dati ede, ala sani di unu wani meki sma du gi unu, na dati un musu du gi den tu.”—Mateyus 7:12.

„Te wan sma du unu wan ogri, dan no du a sma dati ogri baka. Du sani di ala sma feni bun. Efu a kan, efu a e didon na unu, dan libi na ini vrede nanga ala sma. No teki refensi, mi lobiwan, ma libi en gi na atibron fu Gado; bika Gado Buku taki: ’Na mi o teki refensi; mi o pai den baka gi den ogri di den du, na so Yehovah taki.’”—Romesma 12:17-19.

„Srefi Krestes ben nyan pina gi unu èn a libi wan eksempre gi unu, so taki unu kan waka soifri na en baka. . . . Te sma ben e kosi en, dan a no ben e kosi den baka. Te a ben e nyan pina, dan a no ben e taigi den sma taki a ben o du den ogri, ma a ben tan saka ensrefi na ondro a sma di e krutu sani na wan regtfardiki fasi.”—1 Petrus 2:21-23.

[Prenki na tapu bladzijde 7]

Yehovah leri furu sma fu no du ogri-ati sani moro