Yu e memre disi ete?

Yu ben prisiri fu leisi den Waktitoren di kon na doro no so langa pasa? We, luku efu yu kan gi wan piki tapu den aksi di e kon now:

• San wi kan leri fu na agersitori di Yesus ben gi fu wan man di ben e tan aksi en mati fu yepi en? (Lukas 11:5-10)

Na agersitori disi e sori sortu denki wi musu abi te wi e begi. Wan prenspari sani di wi musu tan aksi Gado doronomo, na fu gi wi a santa yeye fu En (Lukas 11:11-13).—15/12, bladzijde 20-22.

• San wi kan leri fu na agersitori di Yesus ben gi fu wan uma di lasi en masra na ini dede, èn wan krutuman? (Lukas 18:1-8)

Na agersitori e sori wi o prenspari a de fu begi Gado. Tra fasi leki a krutuman, Yehovah de regtfardiki èn a wani yepi wi. Boiti dati, wi musu abi a srefi bribi fu na uma na ini na agersitori.—15/12, bladzijde 26-28.

• Fu san ede na apostel Paulus ben taigi den Kresten fu Korente fu ’opo den ati’? (2 Korentesma 6:11-13)

Soleki fa a sori, dan wan tu sma fu a gemeente Korente no ben abi warderi gi den Kresten brada nanga sisa fu den, èn den no ben abi nofo lobi gi trawan. Wi musu meki muiti fu sori trutru warderi gi wi brada nanga sisa, èn fu meki nyun mati.—1/1, bladzijde 9-11.

• San na a marki di den srafu fu Gado e kisi na Openbaring 7:3?

A fosi leisi te Gado e marki son Kresten, na te A e salfu den nanga santa yeye. Ma Openbaring 7:3 e taki fu wan lasti leisi te Gado o marki den, èn dati na fu sori taki den salfuwan disi tan getrow dorodoro.—1/1, bladzijde 30, 31.

• San papa nanga mama kan leri fu a Bijbel tori fu Samuel?

Fu eksempre, den musu leri den pikin fu den san Gado wortu e taki, neleki fa a papa nanga mama fu Samuel ben e du dati. Boiti dati, a ben o bun te den e gi den pikin fu den deki-ati fu du furuten diniwroko gi Yehovah te den kon bigi.—15/1, bladzijde 16.

• Fa wi kan sori taki wi de nanga prisiri, aladi wi e wakti Yehovah?

Wi e ’wakti a dei fu Yehovah’ èn wi e fruwakti taki wan frulekti sa kon te Gado sa pori ala den ogrisma (2 Petrus 3:7, 12). Ma aladi Yehovah srefi e angri fu tyari wan kaba kon na ala ogri, toku a e hori ensrefi fu di a wani frulusu Kresten na wan fasi di o meki a nen fu en kisi glori. Wi musu abi a frutrow taki Yehovah sabi san na a moro bun ten fu handri. Na a srefi ten, wi musu prèise en fayafaya (Psalm 71:14, 15).—1/3, bladzijde 17, 18.

• Omeni fu den meti di krin Noa ben tyari go na ini na ark? Na seibi fu ibri meti di krin, noso seibi manwan nanga seibi umawan fu ibri meti?

Yehovah ben taigi Noa: „Fu ibri meti di krin yu musu teki seibi nanga yu” (Genesis 7:1, 2). Na ini Hebrewtongo, a wortu di wani taki seibi paar, trutru skrifi leki „seibi seibi”. Ma a no fu di wan nomru skrifi tu leisi baka makandra, meki dati wani taki den nomru disi musu teri kon na wan, soleki fa tra bijbeltekst e sori. Fu dati ede, Noa ben tyari seibi fu ibri meti di krin go na ini na ark, iya dri paar nanga ete wán meti, èn a ben kan tyari a di fu seibi meti leki ofrandi bakaten (Genesis 8:20).—15/3, bladzijde 31.

• Fu san ede Kresten musu „luku finifini” fa den owruman, iya den wan di e teki fesi na den mindri, e tyari densrefi na wan fasi di e sori taki den abi bribi?

Na apostel Paulus e taigi wi fu „luku finifini” noso fu luku bun fa den owruman e tyari densrefi na wan getrow fasi, èn a e taigi wi fu waka baka a bribi fu den (Hebrewsma 13:7). Wi e du disi fu di Gado Wortu e taigi wi fu du so. Boiti dati, wi abi na overtoigi taki den owruman wani taki sani waka bun nanga den afersi fu a Kownukondre, èn nanga ibriwan fu wi.—1/4, bladzijde 28.