Aksi fu leisiman

O ten Gado no o gi Kresten wan kari moro fu tron memre fu a grupu di abi a howpu fu go na hemel?

Bijbel no e taki krin o ten dati no o pasa moro. Wi sabi taki sensi 33 G.T. Yehovah salfu den disipel fu Yesus èn na so den kisi a howpu fu libi na ini hemel (Tori fu den Apostel 2:1-4). Boiti dati, wi sabi tu taki baka di den apostel dede, den tru salfu Kresten, noso „na aleisi”, ben „gro makandra” nanga den falsi Kresten, noso a „takru wiwiri” (Mateyus 13:24-30). Baka a yari 1850, a ben de krin fu si taki den salfu Kresten ben du a preikiwroko fayafaya baka. Na ini 1919 ’a nyanyan fu grontapu bigin koti’, èn Gado ben e tyari den lasti salfuwan kon na wán.—Openbaring 14:15, 16.

Na ini a pisi ten fu 1850 te go miti a yari 1931, a moro prenspari marki fu a preikiwroko ben de fu tyari den lasti memre fu a skin fu Krestes kon na wán. Na ini 1931 den Bijbel Ondrosukuman teki a nen Yehovah Kotoigi di komoto fu Bijbel. The Watchtower fu 15 november 1933, ben taki dati den brada ben denki taki na aparti nen disi na a „denari” di Yesus ben kari na ini na agersitori di skrifi na ini Mateyus 20:1-16. Den ben denki taki den 12 yuru di kari na ini na agersitori, na a srefi leki den 12 yari na mindri 1919 te go miti 1931. Furu yari baka 1933, den ben denki taki sensi 1931 Gado no ben e teki Kresten moro fu tiri na ini a hemel Kownukondre. Den ben denki taki den sma di kisi a kari na ini a pisi ten fu 1930 nanga 1931 fu tiri makandra nanga Krestes, ben de „den lastiwan” (Mateyus 20:6-8). Ma na ini 1966 den ben denki tra fasi fu a tori disi. A kon na krin taki na agersitori disi fu Yesus no ben sori o ten Gado no ben o gi sma wan kari moro fu go na hemel.

Na ini 1935 a ben kon na krin taki den „tra skapu”, namku den Kresten di abi a howpu fu libi na grontapu, ben o de na ini a „bigi ipi” di kari na ini Openbaring 7:9-15. Gado ben o tyari den Kresten disi kon na wán „na ini den lasti dei”, èn leki grupu den o pasa Armagedon libilibi (Yohanes 10:16; 2 Timoteyus 3:1; Openbaring 21:3, 4). Baka 1935, a moro prenspari marki fu a preikiwroko ben kenki, fu di now a marki ben de fu tyari a bigi ipi kon na wán. Sobun, spesrutu baka 1966 den ben e bribi taki sensi 1935 tra sma no ben e kisi a kari moro fu go na hemel. A kan taki den ben bribi dati fu  di pikinmoro ala den sma di dopu baka 1935, ben abi a howpu fu libi na grontapu. Bakaten, den ben bribi taki iniwan tra sma di kisi a kari fu go na hemel, ben de wan sma di teki a presi fu wan salfu Kresten di no ben de getrow.

A no de fu taki, dati efu wán fu den salfuwan fadon komoto na bribi sondro fu abi berow, dan Yehovah e meki wan tra sma teki a presi fu a salfuwan dati (Romesma 11:17-22). Ma soleki fa a sori, dan a no furu salfu Kresten fadon komoto na bribi. Na a tra sei, a kon na krin baka wan pisi ten, taki a santa yeye ben meki son Kresten di dopu baka 1935 sabi taki den abi a howpu fu go na hemel (Romesma 8:16, 17). Sobun, soleki fa a sori, wi no kan taki soifri o ten Gado no gi Kresten wan kari moro fu tron memre fu a grupu di abi a howpu fu go na hemel.

Fa wi musu si en na ini a ten disi te wan sma abi na overtoigi taki a tron wan salfuwan, èn a e bigin nyan fu a brede èn e dringi fu a win na a Memrefesa? Wi no musu krutu so wan sma. Disi na wan afersi na mindri en nanga Yehovah (Romesma 14:12). Ma Kresten di salfu trutru, no e fruwakti taki sma musu poti spesrutu prakseri na den. Den no e bribi taki den abi spesrutu koni fu di den na salfuwan, noso taki den sabi sani moro leki son lepi brada noso sisa fu a bigi ipi. Den no e bribi taki den e kisi moro santa yeye leki den brada nanga sisa fu den di de memre fu den tra skapu. Boiti dati, den no e fruwakti taki sma musu dini den, noso taki den de moro hei leki den owruman na ini a gemeente, soso fu di den e nyan a brede èn e dringi a win na a Memrefesa. Den salfuwan abi sakafasi èn den e hori na prakseri taki sonwan fu den salfu brada na ini a fosi yarihondro no ben doro den markitiki fu dini leki owruman noso dinari ini a diniwroko (1 Timoteyus 3:1-10, 12, 13; Titus 1:5-9; Yakobus 3:1). A bribi fu sonwan fu den salfu Kresten ben kon swaki srefi (1 Tesalonikasma 5:14). Aladi sisa salfu tu, toku den no e gi leri na ini a gemeente.—1 Timoteyus 2:11, 12.

Sobun, salfu Kresten èn sosrefi den tra brada nanga sisa di de fu den tra skapu, e meki muiti fu tan abi wan tranga bribi. Den e meki muiti tu fu abi den froktu fu a yeye, èn den e du ala san den man fu meki vrede de na ini a gemeente. Ala Kresten, awansi den salfu noso den na fu den tra skapu, e wroko tranga fu preiki a bun nyunsu èn fu meki disipel na ondro a tiri fu a Tiri Skin. Salfu Kresten e prisiri fu du disi, solanga Yehovah wani taki den tan na grontapu leki futuboi fu En.