Yu e si a marki di e sori san o pasa?

PIKINMORO ala pipel abi odo di abi fu du nanga a weer. Wán fu den odo taki so: Redi loktu te neti e gi wan sipiman prisiri. Redi loktu na mamanten na wan warskow gi wan sipiman. Na ini a ten disi, sma di e ondrosuku fa a weer o de, e taki fu san ede a weer e kenki, soleki fa na odo e taki.

Na ini a ten fu Yesus, sma ben abi a gwenti tu fu ondrosuku fa a loktu tan, èn na so den ben man taki fa a weer ben o de. Yesus ben taigi wan tu Dyu: „Te a e kon dungru, dan unu gwenti taki: ’A o de wan moi neti, bika hemel redi’; na mamanten unu e taki: ’Tide a sa de wan kowru dei èn alen o fadon, bika hemel redi, ma a dungrudungru.’ Unu sabi fruklari fu san ede a loktu tan wan fasi.” Ma Yesus ben taki wan sani di den no ben fruwakti: „Unu no sabi fruklari san den marki fu a ten disi wani taki.”—Mateyus 16:2, 3.

San ben de „den marki fu a ten disi”? Dati ben de den furu buweisi di e sori krin taki Yesus ben de a Mesias di Gado seni. Sma ben man si krin na den sani di Yesus du taki en na a Mesias trutru, neleki fa den ben kan si fa a weer o de te a loktu redi. Ma furu fu den Dyu no ben e poti prakseri na den marki di ben sori taki a Mesias ben kon kaba. Iya, a kon di a Mesias ben kon, de moro prenspari leki a weer.

Tide na a dei a de so tu taki wan marki de di wi musu frustan, èn dati de moro prenspari leki fu frustan san a kloru fu a loktu wani taki. Yesus ben taki dati na ogri grontapu disi o kon na wan kaba, èn taki wan moro bun grontapu o kon. A ben taki dati wan tu sani ben o pasa èn den sani disi ben o sori o ten a kenki disi ben o kon. Tu fu den sani disi na orloku nanga angriten di ben o de na heri grontapu. Yesus ben taki dati te wi e si den sani disi e pasa, dan heri esi Gado o tyari a kenki kon.—Mateyus 24:3-21.

Yu e si „den marki fu a ten disi”?