Fu san ede wi musu go na den Kresten konmakandra?

CHRISTINE ben trow 20 yari kaba, di en masra gowe libi en wantronso. Now Christine wawan ben abi fu kweki den aiti pikin fu en. A moro yonguwan ben abi 7 yari, èn a moro owruwan ben abi 18 yari. A e taki: „Now mi wawan musu teki ala den prenspari bosroiti. Mi ben e firi brokosaka fu di mi ben abi a frantwortu disi, èn mi ben e angri fu kisi yepi nanga rai.” Pe a feni yepi?

Christine e taki: „Den Kresten konmakandra yepi mi nanga mi osofamiri fu tan abi wan tranga bribi. Na den konmakandra, den mati fu wi gi wi deki-ati èn wi kisi rai fu Gado Wortu. Fu di wi e go na den konmakandra doronomo, meki ala sani e waka bun na ini wi osofamiri libi.”

Na ini den ’muilek ten disi di tranga fu pasa’, wi alamala abi difrenti problema (2 Timoteyus 3:1). A kan taki neleki Christine, yu e si den konmakandra fu Yehovah Kotoigi leki wan prenspari sani di e tranga a bribi fu yu. Iya, kande yu e si en leki wan tumusi prenspari sani fu go na den konmakandra disi fu di yu e anbegi Yehovah. A no de fu taki, dati den feifi konmakandra di e hori ibri wiki e meki yu kisi moro lobi gi Gado, den e tranga a howpu di yu abi, èn yu e kisi Bijbel rai di e sori fa fu lusu den problema fu yu.

Ma yu abi sma di feni en muilek fu go na den konmakandra doronomo. Den sma disi weri na a kaba fu a dei, èn soso a denki taki den musu sreka densrefi èn taki den musu go na den konmakandra, kan de wan hebi kaba gi den. Son sma feni taki den no man go na den konmakandra doronomo fu di den musu wroko. Efu den e go na ala den konmakandra, dan den no o meki a moni di den wani meki, noso den kan lasi den wroko. Kande wan tu sma e misi konmakandra fu di den e denki taki den sa firi moro bun te den e go meki prisiri, na presi fu go na den konmakandra.

Sobun, fu san ede a prenspari fu go na den Kresten konmakandra? Fa yu kan sorgu taki den konmakandra e gi yu krakti baka? Fu kan kisi piki tapu den aksi disi, meki wi go luku Mateyus 11:28-30, pe Yesus e kari wi na wan switi fasi: „Un kon na mi, un alamala di musu wroko hebi èn di musu tyari hebi lai, èn mi sa gi unu krakti baka. Teki mi tyatyari na un tapu èn leri fu mi, bika mi abi safri-ati nanga sakafasi, èn unu sa kisi krakti baka. Bika a tyatyari fu mi switi fu tyari èn mi lai lekti.”

„Un kon na mi”

Yesus ben taki: „Un kon na mi.” Wán fasi fa wi kan gi yesi na a kari  disi, na fu go na den konmakandra doronomo. A bun fu go na den konmakandra, bika Yesus ben taki na wan tra okasi: „Te tu, noso dri sma kon makandra na ini mi nen, dan mi de drape na den mindri.”—Mateyus 18:20.

Na ini a fosi yarihondro, Yesus srefi ben gi difrenti sma a kari fu tron bakaman fu en. Na so fasi a ben gi den na okasi fu tron bun mati fu en. Sonwan fu den teki a kari wantewante (Mateyus 4:18-22). Trawan no teki a kari, fu di gudu ben moro prenspari gi den (Markus 10:21, 22; Lukas 9:57-62). Den sma di teki a kari kisi deki-ati di Yesus taigi den: „A no unu teki mi, ma na mi teki unu.”—Yohanes 15:16.

Baka di Krestes kisi wan opobaka, a no ben de moro leki libisma na grontapu. Ma a ben de ete nanga den disipel fu en, fu di a ben e tiri a wroko fu den, èn a ben e luku fa den ben e fiti den rai fu en. Fu eksempre, sowan 70 yari baka di Yesus kisi wan opobaka, a gi den seibi gemeente na ini Pikin Asia rai nanga deki-ati. Den sani di a taigi den e sori taki a ben sabi heri bun sortu bun fasi nanga sortu swakifasi ibri sma na ini den gemeente dati ben abi.—Openbaring 2:1–3:22.

Te now ete Yesus e broko en ede trutru nanga ibriwan fu den disipel fu en. A e pramisi den: „Mi sa de nanga unu ala dei te na a kaba fu a grontapu sistema” (Mateyus 28:20). Wi e libi now na ini a ten fu a kaba, èn dati meki wi musu teki a kari di Yesus gi wi fu tron bakaman fu en. Wán fu den sani di wi leki bakaman musu du, na fu go na den konmakandra doronomo. Yesus wani taki wi musu arki en èn taki wi musu teki leri fu en. Wi kan du disi te wi e go na den konmakandra pe wi kan kisi wini fu a Bijbel leri di wi e kisi nanga yepi fu publikâsi nanga lezing (Efeisesma 4:20, 21). Yu e teki a kari di Yesus e gi wi fu ’kon na en’?

„Un alamala di musu wroko hebi èn di musu tyari hebi lai”

Wan prenspari reide fu san ede wi musu go na den Kresten konmakandra, na fu kisi deki-ati (Hebrewsma 10:24, 25). A no de fu taki dati furu fu wi ’musu wroko hebi èn musu tyari hebi lai’. A kan taki yu e broko yu ede fu di yu e siki, noso fu di yu abi tra problema. Te wi de na den Kresten konmakandra, dan wi kan gi makandra deki-ati (Romesma 1:11, 12). Fu eksempre, yu sa yere piki di e gi yu deki-ati, yu sa memre a howpu di Bijbel e gi, èn yu sa si a tranga bribi fu trawan di e horidoro aladi den e kisi tesi. Ala den sani disi kan yepi yu fu horidoro èn fu no broko yu ede tumusi nanga den problema fu yu.

Luku san wan Kresten uma e taki. A sisa disi no man du furu fu di a abi wan siki di no abi dresi. A e taki: „Fu di mi siki, meki mi musu go didon na ati-oso son leisi. A no makriki gi mi fu go na den konmakandra baka te mi komoto na ati-oso, ma na den konmakandra mi abi fanowdu. A switifasi èn a lobi di den brada nanga sisa e sori gi mi e meki mi firi bun baka èn den sani di Yehovah nanga Yesus e leri wi e gi mi wan trutru marki na ini mi libi.”

„A tyatyari fu mi switi fu tyari èn mi lai lekti”

Luku taki Yesus ben taki na ini Mateyus 11:29: „Leri fu mi.” Te wi e leri fu Yesus, dan wi e tron disipel fu en, èn wi e teki en tyatyari te wi e gi wisrefi abra na Gado èn e teki dopu (Mateyus 28:19, 20). Efu wi wani tan disipel fu Yesus, dan a de prenspari taki wi e teki prati na den konmakandra doronomo. Fu san ede? Fu di na den Kresten konmakandra wi e kon sabi moro fu Yesus, wi e kon sabi san a ben e leri sma, èn fa a ben e gi leri.

San na a lai di Krestes wani taki wi musu tyari? Dati na a srefi lai di ensrefi e tyari, namku a grani di wi abi fu du a wani fu Gado (Yohanes 4:34; 15:8). A tru taki wi musu meki muiti fu gi yesi na den komando fu Gado, ma a sani disi no hebi tumusi. A kan gersi leki a sani disi hebi tumusi, te wi e pruberi fu du dati sondro fu suku yepi. Ma te wi  e begi Gado fu gi wi en santa yeye èn te wi e teki a leri di wi e kisi na den konmakandra, dan Gado sa gi wi „krakti di bigi pasa marki” (2 Korentesma 4:7). Te wi e sreka wisrefi gi den konmakandra èn te wi e teki prati na den, dan a lobi di wi abi gi Yehovah sa kon moro tranga. Èn te wi e dini Gado nanga lobi, dan den komando fu en ’no sa de wan hebi’.—1 Yohanes 5:3.

Furu sma musu wroko tranga fu man tan na libi, sonwan fu den e siki, èn trawan abi tra problema. Ma fu man sabi san fu du na ini den situwâsi disi, dan wi no musu frutrow tapu a koni fu libisma. Den gemeente konmakandra e yepi wi fu „no broko wi ede moro”, bika Yehovah e gi wi den sani di wi abi fanowdu, èn a e leri wi san fu du te wi abi problema (Mateyus 6:25-33). Fu tru, den Kresten gemeente e sori wi taki Gado lobi wi.

„Mi abi safri-ati nanga sakafasi”

Yesus ben abi a gwenti fu go na a snoga, pe den Dyu ben e taki fu a Wortu fu Gado. Na wán fu den okasi dati, Yesus teki a bukulolo fu Yesaya èn a leisi: „A yeye fu Yehovah de na mi tapu, bika a salfu mi fu meki a bun nyunsu bekènti na den pôtisma; a seni mi go fu preiki taki den strafuman o kon fri, taki den breniwan o si baka, èn taki a o meki den sma di e kisi kwinsi gowe leki friman, fu meki a yari bekènti pe Yehovah o feni sma bun” (Lukas 4:16, 18, 19). A no de fu taki dati den sma drape ben breiti di den yere Yesus taki: „Tide den wortu di unu yere didyonsro kon tru!”—Lukas 4:21.

Yesus, „a gran skapuman” di abi sari-ati, e tiri den bakaman fu en ete (1 Petrus 5:1-4). Na ondro a tiri fu en, „a getrow èn koni srafu” gi brada a frantwortu fu dini leki owruman na ini den gemeente fu Yehovah Kotoigi na heri grontapu (Mateyus 24:45-47; Titus 1:5-9). Den man disi e „luku a gemeente fu Gado” na wan safri-ati fasi èn den de wan bun eksempre fu di den e go na den konmakandra doronomo. Te yu e go na den konmakandra, dan na so yu e sori warderi gi den ’libisma disi di Gado gi leki presenti’. Boiti dati, yu sa de wan deki-ati gi trawan te yu de na den konmakandra èn te yu e teki prati na den. —Tori fu den Apostel 15:30-33; 20:28; Efeisesma 4:8, 11, 12.

„Unu sa kisi krakti baka”

Fa yu kan sorgu taki yu e kisi krakti baka te yu e go na den Kresten konmakandra? Wán sani di yu musu du, na taki yu musu fiti a rai di Yesus gi wi. A ben taki: „Luku bun fa unu e arki” (Lukas 8:18). Sma di ben wani teki leri trutru, ben e arki bun te Yesus ben e taki. Den ben aksi en fu fruklari den agersitori fu en, èn leki bakapisi fu dati den kon frustan sani moro krin.—Mateyus 13:10-16.

Yu kan de leki den sma disi di ben abi a tranga winsi fu kon sabi moro fu Gado, te yu e arki bun te lezing e hori na den konmakandra fu wi (Mateyus 5:3, 6). Pruberi fu arki bun fa a takiman e tyari wan tori kon na krin. Disi sa yepi yu fu tan poti prakseri na san a takiman e taki. Aksi yusrefi den sani disi: ’Fa mi kan fiti den rai disi na ini mi libi? Fa mi kan gebroiki den rai disi fu yepi tra sma? Fa mi kan fruklari a tori disi?’ Wan tra sani di yu kan du, na fu leisi den tekst di a takiman e gebroiki te a e fruklari prenspari penti. O moro yu e pruberi fu arki bun, o moro den konmakandra sa gi yu krakti baka.

Na a kaba fu a konmakandra, yu kan taki nanga trawan fu den sani di yu leri na a konmakandra. Taki fu den sani di yu leri èn fa yu kan fiti den na ini yu libi. Te yu e taki fu sani di e gi deki-ati, dan den konmakandra sa tranga yu trutru.

A no de fu taki, dati a de wan koni sani fu go na den konmakandra. Now di yu si sortu wini yu sa kisi te yu e go na den konmakandra, dan a bun fu aksi yusrefi: ’Mi e teki a kari di Yesus gi wi fu ’kon na en’?’

[Prenki na tapu bladzijde 11]

Tra sani e tapu yu fu go na den konmakandra?