Heri esi nowan pina o de moro!
Heri esi nowan pina o de moro!
„A Klepston, den sani di a e du bun dorodoro.”—DEUTERONOMIUM 32:4.
1, 2. (a) Fu san ede yu e warderi a howpu di yu abi fu libi fu têgo? (b) Fu san ede furu sma no man bribi na ini a Gado di pramisi fu gi wi wan tumusi moi libi na ini a ten di e kon?
YU LOBI fu prakseri fa a sa de fu libi na ini a Paradijs? Kande yu e si kaba fa yu e go na ala sei fu a moi grontapu disi fu kon sabi en moro bun èn fa yu e leri sabi moro fu den someni difrenti sani di e libi na grontapu. Noso kande yu e prakseri fa yu sa prisiri te yu nanga tra sma sa wroko makandra fu sorgu grontapu èn fu meki a tron wan paradijs. Kande yu e prakseri fa yu o leri fu meki moi sani, fu bow kefalek moi sani, fu meki poku, noso fu du tra sani di yu no man du fu di yu no abi ten. Awinsi fa a no fa, yu breiti taki yu abi a howpu fu libi „a trutru libi”, soleki fa Bijbel e kari en. Dati na a libi di Yehovah abi na prakseri gi wi, iya têgo libi.—1 Timoteyus 6:19.
2 A de wan prisiri èn wan tumusi moi grani fu fruteri trawan fu a howpu disi di Bijbel e gi, a no so? Ma furu sma no wani bribi a sani disi. Den e si en leki wan anansitori, èn den feni taki sma di e bribi a sani disi, e kori densrefi. Kande a muilek srefi gi den fu bribi na ini a Gado di pramisi libisma taki a o gi den têgo libi na ini a Paradijs. Fu san ede? Nofo tron, a sani di e meki en muilek gi son sma fu bribi a tori dati, na a ogri di e pasa na heri grontapu. Den sma disi feni taki, efu wan almakti Gado de di abi lobi, dan fa a kan taki ogri nanga pina de na grontapu. Den e taki dati, efu wan Gado de, dan ogri no ben o de. Wan tra denki di den sma disi abi, na taki efu wan Gado de, dan a no de almakti, noso a no e broko en ede nanga wi. Son sma e agri nanga a denki disi. A de krin taki Satan sabi fa fu breni a frustan fu libisma.—2 Korentesma 4:4.
3. Sortu muilek aksi libisma abi, èn fu san ede wi kan taki dati wi abi a tumusi moi okasi fu yepi den sma disi fu kisi piki tapu na aksi disi?
3 Leki Yehovah Kotoigi, wi abi a tumusi moi okasi fu yepi sma di no e bribi den pramisi fu Gado, fu di Satan èn a koni fu grontapu kori den (1 Korentesma 1:20; 3:19). Wi e frustan fu san ede furu sma no e bribi na ini den pramisi di skrifi na ini Bijbel. Den sma disi no sabi Yehovah srefisrefi. A kan taki den no sabi a nen fu en, noso san a nen dati wani taki. Èn kande den no sabi notinoti fu den fasi fu en, noso den no sabi taki a de wan Sma di e du ala ten san a pramisi. A de wan bigi grani taki wi sabi den sani disi. Ten na ten, a bun fu luku fa wi kan yepi sma di de „na ini dungru na frustan sei”, fu kisi piki tapu wán fu den moro muilek aksi di e dangra libisma. Na aksi dati na: „Fu san ede Gado e gi pasi taki ogri nanga pina de na grontapu?” (Efeisesma 4:18). Wi sa go luku fosi fa wi kan piki na aksi disi na a yoisti fasi. Baka dati, wi sa luku fa den sani di Yehovah du fu tyari wan kaba kon na ogri, e tyari kon na krin sortu fasi a abi.
A yoisti fasi fu gi piki tapu na aksi
4, 5. Te wan sma aksi wi fu san ede Yehovah Gado e gi pasi taki sma e pina, dan san wi kan du, fosi wi gi piki tapu na aksi dati? Fruklari dati.
4 San wi e piki wan sma te a e aksi wi fu san ede Gado e gi pasi taki sma e pina? Kande wi sa bigin fruteri en finifini san ben pasa na ini a dyari fu Eden. Son leisi, a bun fu du dati. Ma wi musu hori wan tu sani na prakseri. Kande wi musu du wan tu prenspari sani, fosi wi gi piki tapu na aksi (Odo 25:11; Kolosesma 4:6). Meki wi go luku dri sani di wi kan du, soleki fa Bijbel e leri wi, bifo wi piki na aksi fu a sma.
5 Efu a sma e broko en ede trutru nanga den ogri di e pasa na grontapu, dan a kan taki wan ogri pasa nanga en, noso nanga wan lobiwan fu en. Fu dati ede, a fosi sani di wi kan du, na fu sori a sma taki wi e broko wi ede nanga en. Na apostel Paulus ben gi Kresten a rai disi: „Krei nanga sma di e krei” (Romesma 12:15). Te wi e sori a sma taki wi ’e firi gi en’, dan dati kan naki en ati (1 Petrus 3:8). Te a sma e si taki wi e broko wi ede nanga en, dan kande a o wani arki wi.
6, 7. Fu san ede a bun fu prèise wan opregti sma di e poti wan muilek aksi gi wi di abi fu du nanga Gado?
6 A di fu tu sani di wi kan du, na fu prèise a sma fu di a aksi wi a sani disi. Son sma feni taki te den e broko den ede nanga den sortu aksi disi, dan dati e sori taki den no abi bribi, noso taki den no e lespeki Gado. Kande wan kerki fesiman srefi taigi den a sani dati. Ma te sma e poti den sortu aksi disi, dan a no abi fu de so taki a sma no abi bribi. Fu taki en leti, getrowsma na ini Bijbel ten ben poti den srefi sortu aksi disi. Fu eksempre, a psalm skrifiman David ben aksi: „Fu san ede, o Yehovah, yu e tan tanapu farawe? Fu san ede yu e kibri yusrefi te wi de na ini banawtu?” (Psalm 10:1) A profeiti Habakuk ben aksi tu: „O langa, o Yehovah, mi musu bari fu kisi yepi, sondro taki yu e yere? O langa mi sa kari yu fu yepi wi fu di sma e du ogri nanga wi, sondro taki yu e frulusu wi? Fu san ede yu e meki mi si san ogri, èn yu e tan luku ogridu nomo? Èn fu san ede pori nanga ogridu de na mi fesi, èn fu san ede trobi de, èn fu san ede strei e opo kon?”—Habakuk 1:2, 3.
7 Den man disi ben de getrow èn den ben abi bigi lespeki gi Gado. Yehovah piri-ai gi den di den poti den muilek aksi disi? Nôno, na presi fu dati Yehovah meki den man disi skrifi den opregti aksi fu den na ini en Wortu. Te wan sma e broko en ede nanga na ogri di e pasa na ini a ten disi, dan a kan taki a e angri fu kisi piki tapu den aksi di a abi, èn den piki dati de fu feni na ini Bijbel wawan. Memre taki Yesus ben prèise den sma di e angri fu kon sabi moro fu Gado, noso di „de na nowtu na yeye fasi” (Mateyus 5:3). A de wan grani trutru taki wi kan yepi den sma disi fu kon de koloku, soleki fa Yesus ben pramisi!
8. Sortu falsi leri gi sma a denki taki na Gado e meki taki sma e pina, èn fa wi kan yepi den sma disi?
8 A di fu dri sani, na taki a kan de fanowdu fu yepi a sma fu kon frustan taki a no Gado e meki taki so furu ogridu de na grontapu. Furu sma leri taki na Gado e tiri a grontapu disi. Den e bribi taki Gado bosroiti langa ten na fesi kaba fa wi libi ben o waka, èn den e bribi tu taki nowan sma no man kon sabi fu san ede a e meki sma pina. Den leri disi na falsi leri. Den leri disi e gi Gado porinen èn den e meki sma denki taki na Gado e meki taki ogridu nanga pina de na grontapu. Sobun, a kan de fanowdu taki wi e gebroiki Gado Wortu fu meki sma kon si san tru (2 Timoteyus 3:16). A no Yehovah e tiri a kruka sistema disi, ma na Satan Didibri (1 Yohanes 5:19). Yehovah no e bosroiti na fesi fa sani o waka nanga libisma. A e gi ibriwan fu den a reti fu bosroiti gi densrefi efu den o du bun, noso efu den o du ogri (Deuteronomium 30:19). Èn noiti wi kan taki dati na Yehovah e meki taki ogri de na grontapu. Fu taki en leti, a e tegu gi ogridu èn a e broko en ede nanga den wan di trawan e pina.—Yob 34:10; Odo 6:16-19; 1 Petrus 5:7.
9. San na wan tu publikâsi di „a getrow èn koni srafu” tyari kon na doro fu yepi sma fu kon frustan fu san ede Gado e gi pasi taki sma e pina?
9 Te yu du den prenspari sani disi di kari na fesi, dan kande a sma o wani sabi fu san ede Gado e gi pasi taki ogri e pasa. „A getrow èn koni srafu” tyari difrenti publikâsi kon na doro di wi kan gebroiki bun (Mateyus 24:45-47). Fu eksempre, na a „Gi yesi na Gado” Distrikt Kongres fu 2005, wan traktaat kon na doro di nen Heri esi nowan pina sa de moro! Efu a traktaat disi de fu kisi na ini a tongo fu yu, dan fu san ede yu no e leisi en? A buku San Bijbel e leri wi trutru?, di de fu kisi now na ini 157 tongo, abi wan kapitel tu di e poti prakseri na a prenspari aksi disi. Gebroiki den publikâsi disi bun. Den e sori krin sortu sani meki taki na aksi opo kon na ini Eden, di abi fu du nanga a reti di Gado abi fu tiri. Den e sori tu fu san ede Yehovah lusu a problema na a fasi fa a du dati. Hori na prakseri tu taki, te yu e taki fu a tori disi, dan yu e meki sma kon sabi den moro prenspari sani di wan sma kan kon sabi. Iya, yu e yepi den fu kon sabi Yehovah èn den moi fasi fu en.
Poti prakseri na den fasi fu Yehovah
10. Fa a du kon taki furu sma no man frustan fu san ede Gado e gi pasi taki sma e pina? Fa wi kan yepi den sma disi?
10 Te yu e yepi sma fu kon frustan fu san ede Yehovah e gi pasi taki libisma e tiri densrefi na ini a grontapu disi di de na ondro a makti fu Satan, dan pruberi fu poti prakseri na den tumusi moi fasi fu Yehovah. Furu sma sabi taki Gado abi makti, èn den gwenti fu yere sma e kari en na Almakti Gado. Ma kande den no man frustan fu san ede a no e gebroiki a bigi makti fu en fu tyari wan kaba kon wantewante na kruktudu nanga pina. A kan taki den no e frustan fa Yehovah e sori den tra fasi fu en, namku en santafasi, en regtfardikifasi, a koni fu en, nanga a lobi fu en. Yehovah e sori den fasi disi na a yoisti fasi. Dati meki Bijbel e taki: „Den sani di a e du bun dorodoro” (Deuteronomium 32:4). Fa yu kan meki sma kon sabi den fasi disi moro bun te yu e piki den aksi di furu sma abi fu a tori disi? Meki wi go luku wan tu eksempre.
11, 12. (a) Fu san ede Yehovah no ben kan gi Adam nanga Eva pardon? (b) Fu san ede Yehovah no sa gi pasi taki sma sondu fu ala ten?
11 Fu san ede Yehovah no gi Adam nanga Eva pardon? Gado no ben kan gi den sma disi pardon kwetikweti. Leki volmaakti libisma, Adam nanga Eva ben sabi heri bun san den ben e du di den bosroiti fu opo densrefi teige a tiri fu Yehovah, èn fu gi yesi na Satan na presi fu gi yesi na Gado. Fu dati ede, wi kan frustan taki den no sori berow. Ma te sma aksi fu san ede Gado no gi Adam nanga Eva pardon, dan fu taki en leti den wani sabi fu san ede Yehovah no tapu en ai gi a sondu fu Adam nanga Eva. A piki tapu na aksi dati abi fu du nanga wan tumusi prenspari fasi fu Yehovah, namku a santafasi fu en.—Exodus 28:36; 39:30.
12 Bijbel e taki fu a santafasi fu Yehovah hondrohondro leisi. Ma a sari fu si taki furu sma na ini a kruka grontapu disi no e frustan a fasi disi. Yehovah volmaakti, a no e sondu kwetikweti (Yesaya 6:3; 59:2). A seti sani so taki sma kan kisi pardon fu sondu, ma a no sa gi pasi taki sma sondu fu ala ten. Efu Yehovah ben o gi pasi taki sma sondu fu ala ten, dan wi no ben o abi wan howpu gi a ten di e kon (Odo 14:12). Na wan ten di Yehovah srefi feni bun, a sa meki ala den sani di a meki, kon santa baka. A sani disi o pasa trutru, fu di na dati a Santawan wani.
13, 14. Fu san ede Yehovah no kiri Adam, Eva, nanga Satan wantewante?
13 Fu san ede Yehovah no kiri Adam nanga Eva na ini Eden èn fu san ede a no meki tra libisma? A no de fu taki dati Yehovah abi a makti fu du dati. Heri esi a sa gebroiki en makti fu kiri ala ogrisma. Ma kande wan tu sma e aksi densrefi: ’Fu san ede a no du dati nanga den fosi sma di sondu? Efu a ben du dati, dan sondu nanga pina no ben o de na heri grontapu, a no so?’ Fu san ede Yehovah no lusu a problema na a fasi dati? Deuteronomium 32:4 e taki: „A e du ala sani na wan reti fasi.” Retidu prenspari srefisrefi gi Yehovah. Fu taki en leti, „Yehovah na wan sma di lobi retidu” (Psalm 37:28). Fu di Yehovah lobi retidu, meki a no kiri Adam, Eva, nanga Satan wantewante. Fu san ede?
14 Di Satan opo ensrefi teigi Gado, dan a sani dati meki wan aksi opo kon na ini Eden, di abi fu du nanga a reti di Gado abi fu tiri. Fu di Yehovah na wan Gado di lobi retidu, meki a ben wani buweisi na wan reti fasi efu den sani di Satan ben taki, ben tru. Gado ben o abi leti fu kiri den dri sma disi wantewante, ma efu a ben du dati, dan wi no ben o kon sabi efu den sani di Satan taki ben tru. Efu Yehovah ben kiri den wantewante, dan dati ben o sori moro krin taki en na a Almakti Gado, ma a tori disi no abi fu du nanga a makti fu en. Boiti dati, Yehovah ben taigi Adam nanga Eva san a ben wani den fu du. Den ben musu meki pikin teleki den kon lai na grontapu, den ben musu sorgu grontapu, èn den ben musu basi ala den meti na grontapu (Genesis 1:28). Efu Yehovah ben kiri Adam nanga Eva, dan a sani di a ben abi na prakseri gi libisma, no ben o kon tru. Ma fu di Yehovah lobi retidu, meki sani no waka so, bika ala ten a e du san a abi na prakseri.—Yesaya 55:10, 11.
15, 16. Fa wi kan yepi sma di feni taki wan tra fasi de fa Gado ben musu lusu a problema di opo kon na ini Eden?
15 Wan tra sma ben o sabi moro bun leki Yehovah fa fu lusu a problema di opo kon na ini Eden? Kande son sma feni taki Gado ben musu lusu a problema dati na wan tra fasi. Ma te sma e denki so, dan fu taki en leti, den e sori taki den sabi moro bun fa fu lusu a problema, a no so? A no abi fu de so taki den sma disi no abi lespeki gi Gado. Fu taki en leti, den no sabi Yehovah èn den no e frustan a bigi koni fu en. Di na apostel Paulus ben skrifi den Kresten na ini Rome, dan a taki finifini fu a koni fu Gado èn fu a „santa kibritori” di abi fu du nanga a Mesias Kownukondre. Yehovah o gebroiki a Kownukondre disi fu frulusu getrowsma èn fu krin a santa nen fu En. Fa Paulus ben e denki fu a koni fu a Gado di o meki a prakseri disi kon tru? Na a kaba fu a brifi fu en, na apostel ben taki: „Na a Gado disi, di abi ala koni, musu kisi glori fu têgo nanga yepi fu Yesus Krestes. Amen.”—Romesma 11:25; 16:25-27.
16 Paulus ben frustan taki Yehovah „abi ala koni”. Nowan sma koni moro En. Yu denki taki wan sondu libisma ben o sabi moro bun leki Gado fa fu lusu wan problema? A ben o sabi moro bun fa fu tyari kon na krin efu na Yehovah na a moro bun Tiriman fu hemel nanga grontapu? Fu dati ede, wi musu yepi sma fu kon abi a srefi lespeki di wi abi gi a Gado di „ati furu nanga koni” (Yob 9:4). O moro wi e frustan a koni fu Yehovah, o moro wi sa abi na overtoigi taki a sabi moro bun leki iniwan sma fa fu lusu problema.—Odo 3:5, 6.
Poti prakseri na a moro prenspari fasi fu Gado
17. Fa wi kan poti prakseri na a lobi fu Yehovah, fu yepi sma di wani sabi fu san ede Gado gi pasi taki sma e pina?
17 „Gado na lobi” (1 Yohanes 4:8). Na so Bijbel e sori san na a moro prenspari fasi fu Yehovah. A fasi disi na a moro moiwan fu ala den fasi fu Gado, èn moro leki ala tra fasi fu Gado, a fasi disi e trowstu den wan di e broko den ede nanga na ogri di de na grontapu. Ibri sani di Yehovah du fu tyari wan kaba kon na den takru bakapisi fu sondu, e sori taki a lobi libisma. Fu di Yehovah abi lobi, meki a gi den sondu bakapikin fu Adam nanga Eva wan howpu. Iya, a sorgu taki den kan kon krosibei na En fu kisi wan bun banti nanga En. Fu di Gado abi lobi, meki a sorgu gi wan lusu-paiman di ben o gi libisma na okasi fu kisi pardon fu sondu èn fu tron volmaakti libisma di sa libi fu têgo (Yohanes 3:16). Èn fu di Yehovah abi lobi, meki a abi pasensi nanga libisma, èn a gi bun furu sma na okasi fu kakafutu gi Satan èn fu teki Yehovah leki a Moro Hei Tiriman fu den.—2 Petrus 3:9.
18. San wi leki anbegiman fu Yehovah sabi, èn san wi sa luku na ini a tra artikel?
18 Di wan grupu sma ben kon makandra fu memre a dei di wan ogri-ati sani ben pasa, dan wan domri taigi den: „Wi no sabi fu san ede Gado e gi pasi taki ogri nanga pina de.” A de wan sari sani taki na wan domri taki a sani disi! Wi musu breiti taki wi sabi fu san ede pina nanga ogri de na grontapu, a no so? (Deuteronomium 29:29) Èn fu di Yehovah koni, fu di a de regtfardiki, èn fu di a lobi libisma, meki wi sabi taki heri esi wan kaba sa kon na pina. Fu taki en leti, a pramisi wi taki a o du dati (Openbaring 21:3, 4). Ma fa a de nanga ala den sma di dede na ini den hondrohondro yari di pasa? Yu denki taki a fasi fa Yehovah lusu a problema di opo kon na ini Eden, meki taki wan howpu no de gi den sma disi? Nôno. Fu di Yehovah abi lobi, meki a sorgu taki den sma disi o kisi wan opobaka. Wi sa taki fu a tori dati na ini a tra artikel.
San yu ben sa piki?
• San wi kan piki wan sma di aksi wi fu san ede Gado e gi pasi taki sma e pina?
• Fa a fasi fa Yehovah lusu a problema na ini Eden, e sori taki a santa èn taki a lobi retidu?
• Fu san ede wi musu yepi sma fu kon frustan moro bun fa Yehovah e sori lobi?
[Aksi fu a tori disi]
[Prenki na tapu bladzijde 21]
Meki muiti fu yepi den sma di e broko den ede nanga a pina di de na grontapu
[Prenki na tapu bladzijde 23]
David nanga Habakuk di ben de getrow, ben poti wan tu opregti aksi gi Gado