Yefta e du san a sweri na Yehovah

WAN fetiman di wini wan feti, e drai go baka na oso, baka di a frulusu a pipel fu en fu a nâsi di ben e kwinsi den. Na umapikin fu en e lon kon miti en aladi a e dansi fu prisiri, èn a e prei wan sekiseki. Te a fetiman e si en, dan a no breiti, ma a e priti en krosi. Fu san ede a e du dati? Fu san ede a man disi no breiti neleki na umapikin fu en, taki a drai kon baka na oso libilibi? Sortu feti a wini? Suma na a fetiman disi?

A man disi na Yefta, wan fu den krutuman fu owruten Israel. Fu kisi piki tapu den tra aksi, èn fu kon frustan san wi kan leri fu a tori disi, dan wi musu luku sortu sani ben pasa fosi a man disi miti na umapikin fu en baka.

Israel de na ini problema

Yefta e libi na ini wan muilek ten. Den Israelsma drai baka gi a tru anbegi èn den e anbegi den gado fu den Sidonsma, den Moabsma, den Amonsma, nanga den Filisteasma. Fu dati ede, Yehovah e gi pasi taki den Amonsma nanga den Filisteasma e kwinsi a pipel fu en 18 yari langa. Spesrutu den sma fu Gilead, na a owstusei fu Yordanliba, e kisi furu problema. * Te fu kaba, den Israelsma kon frustan taki den no handri bun, èn fu di den abi berow meki den e aksi Yehovah fu yepi den. Den e bigin dini en baka, èn den e puru den gado fu den trakondre sma na den mindri.—Krutuman 10:6-16.

Den Amonsma seti kampu na ini Gilead, èn den Israelsma kon miti den. Ma Israel no abi wan legre-edeman (Krutuman 10:17, 18). Na a srefi ten, Yefta abi en eigi problema. Den gridi afu-brada fu en dwengi en fu gowe, so taki den kan fufuru a famirigudu di a ben o kisi. Sobun, Yefta e froisi go na a kondre Tob di de na a owstusei fu Gilead, èn di feanti kan teki abra makriki. Wan grupu fu „wisiwasi man”, e kon na Yefta. A kan taki den man disi ben lasi den wroko, noso kande den no ben wani wroko moro gi den basi fu den di ben e kwinsi den. Den „go na feti nanga en”, èn kande disi wani taki dati den go makandra nanga Yefta fu feti teige den pipel fu a kontren dati, di ben wani du ogri nanga den. Kande na fu di Yefta na wan tumusi bun fetiman, meki Bijbel e kari en „wan tranga man di abi deki-ati” (Krutuman 11:1-3). Ma suma sa de a fesiman fu den Israelsma te den sa go feti nanga den Amonsma?

„Kon nanga wi èn tron wi legre-edeman”

Den owru man fu Gilead e aksi Yefta: „Wi e begi yu. Kon nanga wi èn tron wi legre-edeman.” Kande den denki taki Yefta o breiti taki a feni wan okasi fu drai go baka na en eigi kondre, ma dati no de so. A e piki den: „A no unu ben yagi mi komoto  na mi papa oso, fu di unu ben abi bita-ati gi mi? Dan fu san ede unu kon na mi, now di unu de na nowtu?” Den owru man dati no ben handri na wan reti fasi kwetikweti! Fa den kan kon suku yepi na Yefta, baka di den drai baka gi en?—Krutuman 11:4-7.

Yefta sa tron fesiman fu den sma fu Gilead, soso te den du wan prenspari sani. A e taigi den: ’Efu a de so taki Yehovah e meki mi wini den Amonsma, dan mi sa tron un tiriman!’ Te a ben o wini a feti, dan dati ben o sori taki Gado ben o horibaka gi en, ma Yefta wani sorgu tu taki den Israelsma no e bigin trangayesi Gado, te sani e go bun baka nanga den.—Krutuman 11:8-11.

Yefta e taki nanga den Amonsma

Yefta e suku fu kruderi nanga den Amonsma. A e seni boskopuman go na a kownu fu den Amonsma fu kon sabi fu san ede den wani feti nanga Israel. Den Amonsma e taigi den Israelsma taki di den komoto na ini Egepte, dan den teki wan pisi kontren abra di ben de fu den Amonsma, èn den Amonsma wani a pisi kontren disi baka.—Krutuman 11:12, 13.

Fu di Yefta sabi heri bun fa sani ben waka na a ten dati, meki a man sori den Amonsma taki den no abi leti fu aksi so wan sani. A e taigi den taki, di den Israelsma komoto na ini Egepte, dan den no du nowan ogri nanga den Amonsma, den Moabsma, noso den Edomsma. Èn na a ten dati, a pisi kontren dati no ben de fu den Amonsma, ma a ben de fu den Amorietsma. Ma na di Gado meki Israel wini a feti teige Sihon, a kownu fu a pipel disi, ne Israel teki a kontren dati abra. Boiti dati, den Israelsma ben e libi sowan 300 yari kaba na ini a kontren dati. Fu san ede den Amonsma wakti so langa fu aksi den Israelsma fu gi den a kontren disi baka?—Krutuman 11:14-22, 26.

Yefta e poti prakseri tu na wan prenspari reide fu san ede Israel de na ini problema: Suma na a tru Gado? Na Yehovah na a tru Gado? Noso na den gado fu den sma di e libi na ini a kontren di Israel teki abra? Efu Kamos ben abi makti trutru, dan a ben o yepi a pipel fu en fu kisi a kontren disi baka, a no so? A sani disi na wan strei na mindri a falsi bribi fu den Amonsma, nanga a tru bribi. Sobun, wi kan frustan fu san ede Yefta e taki: „Meki a Krutuman Yehovah koti krutu na mindri den manpikin fu Israel nanga den manpikin fu Amon.”—Krutuman 11:23-27.

A kownu fu den Amonsma no e arki a boskopu fu Yefta di e sori krin taki den no sa kisi a kontren disi baka. Bijbel e taki: „A yeye fu Yehovah [e] kon na Yefta tapu. Ne Yefta [e] waka pasa na ini Gilead, èn na ini a kontren fu Manase.” A kan taki a e kari trangaman kon na wan fu go feti.—Krutuman 11:28, 29.

A sweri di Yefta meki

Fu di Yefta abi a yepi fu Yehovah tranga fanowdu, meki a e sweri na Gado: „Efu yu meki mi wini den manpikin fu Amon trutru, èn efu yu meki mi drai kon baka fu a feti sondro taki wan sani pasa nanga mi, dan mi o gi Yehovah a sma di o komoto na ini mi oso kon miti mi. A sma dati o de leki wan bron-ofrandi gi yu.” Gado e blesi Yefta fu di a e meki a pori 20 foto fu den Amonsma, iya „a kiri bun furu manpikin fu Amon”, èn na so a e wini den feanti fu Israel.—Krutuman 11:30-33.

Te Yefta drai go baka na oso, dan a sma di e kon miti en, na en umapikin di a lobi so te, iya, en wan-enkri pikin! Bijbel e taki: „Di Yefta si en, a priti en krosi na en skin, dan a taki: ’Ke, mi umapikin! Yu e meki mi sari fu tru. Mi tyari rampu kon na yu tapu. Mi opo mi mofo pramisi Yehovah wan sani èn now mi no man kenki moro san mi pramisi.’”—Krutuman 11:34, 35.

A tru taki Yefta o tyari na umapikin fu en leki wan srakti-ofrandi? Nôno. Yefta no ben abi a sani dati na prakseri. Yehovah no feni en bun srefisrefi taki sma e tyari libisma leki srakti-ofrandi. Na den Kanansma ben gwenti fu du na ogri-ati sani disi (Lefitikus 18:21; Deuteronomium 12:31). Boiti taki a yeye fu Gado ben de tapu Yefta di a meki a sweri fu en, Yehovah blesi a muiti di a meki tu. Bijbel e taki dati Yefta ben abi wan tranga bribi èn taki a du furu sani fu meki a wani fu Yehovah kon tru (1 Samuel 12:11; Hebrewsma 11:32-34). Sobun, a no de so kwetikweti taki a o tyari en umapikin leki wan srakti-ofrandi, bika dati ben o de a srefi leki te a ben o kiri en. We, san Yefta ben abi na prakseri di a sweri na Yehovah taki a ben o tyari wan libisma leki wan ofrandi na Yehovah?

 A de krin taki Yefta ben o meki a sma di ben e kon miti en, dini Gado en heri libi langa. A Wet di Gado ben gi Moses ben e gi pasi taki sma meki den sortu sweri disi. Fu eksempre, umasma ben gwenti fu wroko na a santa presi, èn a kan taki den ben e tyari watra (Exodus 38:8; 1 Samuel 2:22). Wi no sabi soifri sortu wroko den umasma disi ben e du, èn wi no sabi tu efu den ben e du den wroko disi den heri libi langa. Soleki fa a sori, dan Yefta ben abi a spesrutu diniwroko disi na prakseri di a sweri na Yehovah, èn na umapikin fu en ben o du a wroko disi en heri libi langa.

Na umapikin fu Yefta du san a getrow papa fu en ben pramisi Yehovah, èn bakaten a boi Samuel du a srefi sani tu (1 Samuel 1:11). Leki wan getrow anbegiman fu Yehovah, na umapikin fu Yefta ben feni tu taki en papa ben musu du san a ben pramisi Yehovah. A ben de wan bigi sani di na umapikin ben o du, fu di dati ben wani taki dati a no ben o man trow noiti. A krei fu di a ben o tan wan nyun-wenke, bika ibri uma fu Israel ben si en leki wan prenspari sani fu meki pikin. Na so fasi den ben o man abi bakapikin di ben o tyari a nen fu a famiri, èn a famirigudu fu den ben o tan na ini a famiri. Efu Yefta ben o du san a pramisi Gado, dan a no ben o man de makandra moro nanga en wan-enkri pikin di a ben lobi so te.—Krutuman 11:36-39.

Ma disi no ben wani taki dati a getrow yongu uma disi no ben abi wan marki na ini a libi. A wroko di a ben o du en heri libi langa na ini na oso fu Yehovah, ben de wan tumusi moi wroko, a ben e gi en prisiri, èn a ben de wan bun fasi fa a ben kan gi grani na Gado. Dati meki, „ibri yari den umapikin fu Israel ben e go prèise na umapikin fu Yefta, a Gileadsma, fo dei langa” (Krutuman 11:40). Èn a no de fu taki dati Yefta ben e prisiri fu di na umapikin fu en ben e dini Yehovah.

Na ini a ten disi, furu anbegiman fu Gado e du furuten diniwroko leki pionier, zendeling, opziener di e reis, noso den e wroko na Bethel. Disi wani taki dati son leisi den sma disi no kan de makandra nanga den famiriman fu den o ten den wani. Ma toku den sma disi di e du santa diniwroko gi Yehovah, èn den famiriman fu den, kan kisi wini fu a grani disi.—Psalm 110:3; Hebrewsma 13:15, 16.

Den Efraimsma e opo densrefi teige Yehovah

Te wi e luku fa sani ben waka na ini a ten fu Yefta, dan wi e si taki furu Israelsma no ben wani taki Yehovah tiri den. Aladi a de krin taki Yehovah e blesi Yefta, toku den Efraimsma bigin meki trobi nanga Yefta. Den wani sabi fu san ede a no kari den fu go feti. Den wani bron Yefta nanga ’a heri oso fu en’!—Krutuman 12:1.

Yefta e taigi den Efraimsma taki a ben kari den kon, ma den no ben wani kon. Awansi fa a no fa, Gado meki Yefta wini a feti. Ma fu san ede den e atibron trutru? Na fu di den Gileadsma no ben taigi den taki den ben o teki Yefta leki a legre-edeman fu den? Fu taki en leti, na atibron fu den Efraimsma e sori taki den opo densrefi teige Yehovah. Sobun a wan-enkri sani di Yefta kan du, na fu feti teige den. Den Efraimsma e lasi a feti dati. Den Efraimsma di e lowe gowe, no man taki a wortu „Syibolèt” na a yoisti fasi, te den Israelsma e dwengi den fu du dati. Na so a makriki gi den Israelsma fu kon sabi suma na wan Efraimsma. Ala nanga ala, 42.000 Efraimsma dede na ini a feti disi.—Krutuman 12:2-6.

Fu tru, dati ben de wan sari pisi ten na ini Israel! Den feti di den Krutuman Otnièl, Ehud, Barak, nanga Gideon ben wini, tyari vrede kon. Ma Bijbel no e taki dati a feti di Yefta ben wini tyari vrede kon. A Bijbel tori e taki nomo: „Siksi yari langa Yefta ben de krutuman na ini Israel. Baka dati a Gilead man disi dede. Ne den beri en na ini Gilead, a foto pe a ben e libi.”—Krutuman 3:11, 30; 5:31; 8:28; 12:7.

San wi kan leri fu a tori disi? Wi e leri taki aladi Yefta en libi ben lai nanga problema, toku a ben de getrow na Gado. A deki-ati man disi ben kari Yehovah en nen di a taki nanga den owru man fu Gilead, nanga den Amonsma, nanga en umapikin, èn nanga den Efraimsma. A no de fu taki dati a ben kari Yehovah en nen di a meki wan sweri na En (Krutuman 11:9, 23, 27, 30, 31, 35; 12:3). Gado blesi Yefta fu di a ben de getrow na En, èn a gebroiki en nanga en umapikin fu meki a tru anbegi go na fesi. Na ini wan ten di trawan ben e trangayesi Gado, Yefta tan gi yesi na En. Yu sa tan gi yesi na Yehovah, neleki fa Yefta ben e du dati?

[Futuwortu]