Yu e bribi na ini na opobaka howpu?
Yu e bribi na ini na opobaka howpu?
’Gado o gi sma wan opobaka.’—TORI FU DEN APOSTEL 24:15.
1. Fu san ede a gersi leki libisma no man wai pasi gi dede?
„NA INI a grontapu disi, tu sani de di libisma no man wai pasi gi. Wan fu den, na dede, èn a trawan na a pai di den musu pai belasting moni.” Disi na san Benjamin Franklin, wan politiekman fu Amerkankondre, ben skrifi na ini 1789. Son sma feni taki a ben abi leti trutru. Aladi furu sma e du kruka sani fu no pai a belasting moni di den musu pai, toku a gersi leki libisma no man wai pasi gi dede. Te fu kaba wi alamala sa dede efu wi no e kisi yepi. Syeol, a grebi fu ala libisma, abi bigi angri, èn a e swari den lobiwan fu wi (Odo 27:20). Ma luku wan sani di e trowstu wi.
2, 3. (a) Fu san ede son sma no sa abi fu dede? (b) Na sortu sani wi sa poti prakseri na ini na artikel disi?
2 A Wortu fu Yehovah e gi wi a dyaranti taki sma o kisi wan opobaka, iya den o kisi libi baka. Disi a no wan anansitori, èn nowan sma no man tapu Yehovah fu du san a abi na prakseri. Ma furu sma no sabi taki son sma no sa abi fu dede. Fu san ede son sma no sa abi fu dede? Fu di heri esi „a bigi banawtu” sa kon, èn „wan bigi grupu sma” sa pasa a ten dati libilibi (Openbaring 7:9, 10, 14). Den sma disi o tan na libi baka a ten dati, èn den o abi a howpu fu libi fu têgo. Boiti dati, „dede musu kon na wan kaba”.—1 Korentesma 15:26.
3 Neleki na apostel Paulus, wi musu abi na overtoigi taki libisma o kisi wan opobaka. Paulus ben taki: „Gado sa gi wan opobaka na den regtfardikiwan èn na den onregtfardikiwan” (Tori fu den Apostel 24:15). Meki wi poti prakseri na dri aksi di abi fu du nanga na opobaka: (1). Fu san ede wi kan bribi na ini na opobaka? (2). Fa a howpu disi kan de wan trowstu gi yu? (3). Sortu krakti a howpu disi kan abi tapu a fasi fa yu e libi now?
Sma sa kisi wan opobaka trutru
4. Fu san ede a de tumusi prenspari taki sma kisi wan opobaka?
4 Difrenti reide de fu san ede wi kan bribi taki sma o kisi wan opobaka. A moro prenspari reide, na taki sma musu fu kisi wan opobaka so taki a wani fu Yehovah kan kon tru. Memre taki Satan meki libisma sondu, èn na fu dati ede den e dede. Dati meki Yesus ben taki fu Satan: „Di a bigin waka en eigi pasi, a ben de wan kiriman” (Yohanes 8:44). Ma Yehovah ben pramisi taki na „uma” fu en, noso en organisâsi na hemel, ben o kisi wan „pikin” di ben o masi na ede fu a „fosi sneki” dati, iya a ben o kiri Satan (Genesis 3:1-6, 15; Openbaring 12:9, 10; 20:10). Safrisafri Yehovah tyari kon na krin san a „pikin” disi di ben o tron a Mesias, ben o du. Na so wi kon frustan taki a „pikin” no ben o kiri Satan nomo, ma a ben o du moro sani. Gado Wortu e taki: „Na fu dati ede meki a Manpikin fu Gado ben kon, namku fu tyari wan kaba kon na den wroko fu Didibri” (1 Yohanes 3:8). Wán fu den wroko disi fu Satan, na dede. Wi e dede leki bakapisi fu a sondu di wi kisi fu Adam. Dede na a moro prenspari sani di Yehovah wani puru na pasi, èn a sa du disi nanga yepi fu Yesus Krestes. Dati meki a frulusu-ofrandi fu Yesus èn na opobaka di sma o kisi, na tu seti di prenspari trutru.—Tori fu den Apostel 2:22-24; Romesma 6:23.
5. Fu san ede na opobaka o krin a nen fu Yehovah?
5 Yehovah abi a fasti bosroiti fu krin en santa nen. Satan gi Gado porinen èn a meki sma fruteri lei fu Gado. A lei gi Adam nanga Eva taki den ’no ben o dede kwetikweti’ te den ben o nyan a froktu di Gado no ben wani den fu nyan (Genesis 2:16, 17; 3:4). Sensi a ten dati, Satan meki sma bribi den srefi sortu lei disi. Wán fu den lei disi, na a falsi leri di e taki dati a sili fu wan sma e tan na libi baka te a sma dede. Ma te Yehovah o gi sma wan opobaka na ini a ten di e kon, dan a sa sori taki nowan fu den leri disi tru. A sa sori taki en na a wan-enkri Sma di man hori libisma na libi èn di man gi den libi baka.
6, 7. Fa wi du sabi taki Yehovah e angri fu gi libisma wan opobaka?
6 Yehovah e angri fu gi sma wan opobaka. Bijbel e sori wi taki Yehovah wani du disi trutru. Fu eksempre, luku san a getrow man Yob ben taki nanga yepi fu santa yeye: „Efu wan tranga man dede, a kan libi baka? Ala den dei di mi musu du fruplekti wroko mi sa wakti, teleki a frulusu fu mi kon. Yu sa kari, èn misrefi sa piki yu. Yu sa angri fu a wroko fu yu anu” (Yob 14:14, 15). San den wortu dati wani taki?
7 Yob ben sabi taki baka te a dede, a ben o sribi na ini dede teleki Gado gi en wan opobaka. A ben si a pisi ten dati leki „fruplekti wroko”, noso wan ten pe a ben o abi fu wakti teleki a kisi frulusu. A ben de seiker taki dati ben o pasa. Yob ben sabi taki a ben o kisi frulusu. Fu san ede? Fu di a ben sabi taki Yehovah ben o „angri” fu si a getrow futuboi fu en baka. Iya, Gado e angri fu gi ala regtfardikisma wan opobaka. Yehovah sa gi tra sma na okasi tu fu libi fu têgo na ini Paradijs na grontapu (Lukas 23:43; Yohanes 5:28, 29). Fu di Gado wani du a sani disi, meki nowan sma man tapu en fu du dati, a no so?
8. Fa Yehovah gi wi ’a dyaranti’ taki libisma o kisi wan opobaka?
8 Na opobaka fu Yesus e gi wi a dyaranti taki libisma o kisi wan opobaka. Di Paulus ben taki nanga wan grupu sma na ini Ateine, dan a taigi den: „[Gado] poti wan dei pe a o gi wan man a wroko fu krutu ala sma na grontapu na wan regtfardiki fasi, èn na opobaka fu en na wan dyaranti gi ala sma” (Tori fu den Apostel 17:31). Sonwan fu den sma di ben e arki Paulus, ben e spotu en di a fruteri den fu na opobaka howpu. Ma wan tu fu den tron bribiman. Kande den bigin poti bribi na ini a howpu disi fu di den kisi a dyaranti taki a sani dati o pasa trutru. A moro bigi wondru di Yehovah du, na di a gi Yesus wan opobaka. Di a Manpikin fu Gado kisi libi baka, a no tron wan makti yeye (1 Petrus 3:18). Baka di Yesus kisi wan opobaka, a ben abi moro makti leki san a ben abi bifo a kon na grontapu. Yesus no man dede, èn a abi makti moro ala sma, boiti Yehovah. Fu dati ede, en Tata kan gi en kefalek bigi frantwortu now. Nanga yepi fu Yesus, Yehovah sa gi ala tra sma wan opobaka fu libi na ini hemel, noso fu libi na grontapu. Yesus srefi ben taki: „Mi na a opobaka nanga a libi” (Yohanes 5:25; 11:25). Fu di Yehovah gi en Manpikin wan opobaka, meki ala getrowsma abi a dyaranti taki libisma sa kisi wan opobaka.
9. Fa Bijbel e sori taki libisma o kisi wan opobaka trutru?
9 Sma si fa trawan kisi wan opobaka, èn den tori dati skrifi na ini Gado Wortu. Bijbel e taki finifini fu na opobaka di aiti sma ben kisi na grontapu. Den wondru disi no pasa kibrikibri, ma nofo tron sma ben de drape te den sani disi ben e pasa. Lasarus ben dede fo dei kaba, èn di Yesus gi en wan opobaka, dan furu sma di ben e sari, si dati. A no de fu taki, dati den sma disi ben de famiriman, mati, nanga birtisma fu Lasarus. Na opobaka di a man disi kisi, ben sori taki na Gado ben seni Yesus. Na opobaka disi ben de so wan kefalek bigi wondru, taki den kerki fesiman di ben e gens Yesus, noiti no ben kan taki dati a no pasa trutru. Ma toku den meki mofo fu kiri Yesus nanga Lasarus! (Yohanes 11:17-44, 53; 12:9-11) Iya, wi kan bribi taki libisma o kisi wan opobaka trutru. Gado meki sma skrifi den tori fu sma di kisi wan opobaka, so taki den kan trowstu wi èn kan tranga a bribi fu wi.
Na opobaka howpu kan gi wi trowstu
10. San wi musu du fu man kisi trowstu fu den Bijbel tori di e taki fu sma di kisi wan opobaka?
10 Yu e suku trowstu fu di yu de na ini wan situwâsi di kan tyari dede kon gi yu? Den Bijbel tori di e taki fu sma di kisi wan opobaka, sa gi wi trowstu trutru. Te yu e leisi den sortu tori disi, te yu e denki dipi fu den, èn te yu e pruberi fu si na yu fesi san ben e pasa, dan yu sa kisi wan moro tranga overtoigi taki libisma o kisi wan opobaka (Romesma 15:4). Den tori disi a no anansitori, ma na sani di pasa trutru nanga sma di ben e libi na ini a ten di pasa. Meki wi poti prakseri syatu na wán eksempre. Dati na a fosi tori na ini Bijbel di e taki fu wan sma di kisi wan opobaka.
11, 12. (a) Sortu sari sani miti na uma fu Sarfat, èn san a taki di dati pasa? (b) Fruteri san Yehovah meki a profeiti Elia du gi na uma.
11 Pruberi fu si a situwâsi disi na yu fesi. Wan tu wiki kaba, a profeiti Elia de wan fisitiman na ini na oso fu wan uma fu Sarfat, èn a e tan na ini a sodrokamra. A masra fu na uma disi no de na libi moro. A libi tranga srefisrefi. Dreiten nanga angriten de na ini a heri kontren. Furu sma e dede. Yehovah ben meki Elia du wan wondru gi na uma disi kaba, fu di na uma abi bribi nanga sakafasi. En nanga a boi fu en abi pikinso nyanyan nomo, iya den o dede fu angri. Ne Yehovah meki Elia du wan wondru, èn a blon nanga na oli fu na uma no ben e kaba. Ma now, wan sari sani miti na uma disi. A boi fu en kon siki wantronso, èn fosi yu denki, a no e bro moro. Na uma e sari srefisrefi! A hebi kaba gi en fu libi sondro wan masra di e yepi en èn di e trowstu en, ma now a boi fu en dede. Fu di na uma disi e sari, meki a e taki dati na Elia nanga en Gado, Yehovah, meki a boi fu en dede! San a profeiti o du?
12 Aladi a sani di na uma taki no tru, toku Elia no e piri-ai gi en. Na presi fu dati, a e taki: „Gi mi yu manpikin.” Elia e tyari a dede pikin go na ini a sodrokamra, èn a e begi Yehovah wan tu leisi baka makandra fu gi a boi libi baka. Te fu kaba, Yehovah e piki a begi! Prakseri fa Elia breiti te a e si taki a boi e bigin bro. A boi e opo en ai, èn en ai e brenki fu di a e firi bun baka. Elia e tyari a boi go baka na en mama èn a e taki: „Luku, yu manpikin de na libi.” Na uma breiti srefisrefi. A e taki: „Now mi sabi trutru taki yu na wan man fu Gado, èn taki a wortu fu Yehovah di komoto fu yu mofo, de tru” (1 Kownu 17:8-24). A bribi di na uma abi na ini Yehovah èn na ini a profeiti fu En, kon tranga srefisrefi.
13. Fa a tori di e sori fa Elia gi a manpikin fu na uma wan opobaka, kan trowstu wi na ini a ten disi?
13 Te wi e denki dipi fu den sortu tori disi, dan dati sa trowstu wi trutru. A de krin taki Yehovah man puru dede, a feanti fu wi, na pasi! Prakseri fa milyunmilyun tra sma sa prisiri leki na uma fu Sarfat, te libisma o kisi wan opobaka! Boiti dati, den engel na hemel o prisiri trutru te Yehovah o meki en Manpikin gi sma na heri grontapu wan opobaka (Yohanes 5:28, 29). Wan lobiwan fu yu dede? A moi srefisrefi fu sabi taki Yehovah man gi sma wan opobaka èn taki a sa du dati tu!
A krakti di na opobaka howpu kan abi tapu a fasi fa yu e libi now
14. Fa na opobaka howpu kan abi krakti tapu yu libi?
14 Fa na opobaka howpu kan abi krakti tapu a fasi fa yu e libi nownowde? A howpu disi kan gi yu deki-ati te yu abi problema, te yu e kisi frufolgu, noso te ogri kan miti yu. Satan wani taki yu musu frede dede so te, taki yu no e tan getrow na Yehovah. Iya, a wani taki yu e bribi a lei di a e fruteri taki sani sa waka bun nanga yu. Memre taki Satan ben taigi Yehovah: „Ala san wan libisma abi, a sa gi fu kibri en sili” (Yob 2:4). Fu di Satan taki a sani dati, meki a lei gi wi alamala, èn gi yu tu. A tru taki yu sa tapu fu dini Gado te ogri miti yu? Te yu e denki dipi fu na opobaka howpu, dan yu sa abi a fasti bosroiti fu tan du a wani fu yu hemel Tata.
15. Fa den wortu fu Yesus di skrifi na Mateyus 10:28 kan trowstu wi te wi de na ini wan situwâsi pe ogri kan miti wi?
15 Yesus ben taki: „No frede den sma di kan meki a skin kisi pori, ma di no man kiri a sili; ma frede a sma di kan pori a sili èn a skin na ini Gehena” (Mateyus 10:28). Wi no abi fu frede Satan, noso den libisma di e horibaka gi en. A tru taki son sma kan du ogri nanga wi, iya den kan kiri wi. Ma awinsi san den e du nanga wi, dati no sa de fu ala ten. Awinsi sortu ogri miti den getrow futuboi fu Yehovah, A kan meki sani kon bun baka èn a sa du dati tu. Iya, Yehovah kan gi den sma dati wan opobaka srefi. Wi musu abi frede gi Yehovah wawan, èn gi en wawan wi musu abi bigi lespeki. En wawan kan pori a skin èn a sili na ini Gehena, iya, en wawan kan meki taki wi no e libi noiti moro. Koloku taki Yehovah no wani taki a sani dati pasa nanga yu (2 Petrus 3:9). Fu di wi leki futuboi fu Gado abi na opobaka howpu, meki wi abi a dyaranti ala ten taki sani sa waka bun nanga wi. Solanga wi de getrow na Gado, wi kan kisi têgo libi, èn Satan nanga den futuboi fu en no man du noti fu meki taki a sani disi no pasa.—Psalm 118:6; Hebrewsma 13:6.
16. Te wi e bribi taki libisma o kisi wan opobaka, dan sortu sani wi sa poti na fosi presi na ini wi libi?
16 Efu wi abi wan tranga bribi taki libisma sa kisi wan opobaka, dan dati sa abi krakti tapu a fasi fa wi e libi. Wi sabi taki „awinsi wi e libi noso wi e dede, wi na fu Yehovah” (Romesma 14:7, 8). Te wi e poti den moro prenspari sani na a fosi presi na ini wi libi, dan wi e fiti a rai fu Paulus di ben taki: „No libi moro leki fa a grontapu sistema disi wani taki un musu libi, ma un musu kenki fu di unu e teki wan nyun fasi fu denki, so taki unu kan kon sabi san na Gado en wani di bun, di e plisi en èn di de volmaakti” (Romesma 12:2). Furu sma e feti nomo fu meki ibri winsi fu den kon tru. Fu di den feni taki a libi syatu, meki a gersi leki a wan-enkri sani di den e prakseri, na fu meki prisiri, èn efu den e anbegi gado, dan den no e du dati na wan fasi di e kruderi nanga ’Gado en wani di de volmaakti’.
17, 18. (a) Fa a Wortu fu Yehovah e sori taki libisma no e libi langa, ma san Gado wani gi wi?(b) Fu san ede wi wani prèise Yehovah ibri dei?
17 A tru taki a libi syatu. „A musu pasa gowe esi, èn na so wi e frei gowe”, kande baka 70 noso 80 yari (Psalm 90:10). Libisma de neleki grun grasi di e gro kon èn di e dede baka wan syatu pisi ten. Iya, den e hari gowe neleki wan skaduw (Psalm 103:15; 144:3, 4). Ma Gado no ben wani taki wi libi wan tu yari nomo fu leri èn fu ondrofeni wan tu sani, èn fu kon siki bakaten èn pina teleki wi dede. Yehovah meki libisma nanga na angri fu libi fu têgo. Bijbel e taki: „Ten di no skotu a poti na ini den ati” (Preikiman 3:11). A de so taki Gado takru fu di a e gi pasi taki wi e dede, aladi wi abi na angri fu libi fu têgo? Nôno, kwetikweti, bika „Gado na lobi” (1 Yohanes 4:8). A sa gi den dedewan wan opobaka so taki den kan libi fu têgo.
18 Na fu di wi abi na opobaka howpu, meki wi kan abi a dyaranti taki sani sa waka bun nanga wi. Wi no abi fu feti fu meki ala den winsi fu wi kon tru nownowde. Wi no abi fu gebroiki den sani fu a grontapu disi „dorodoro” fu di grontapu o kisi pori (1 Korentesma 7:29-31; 1 Yohanes 2:17). Tra fasi leki den wan di no abi wan trutru howpu, wi abi a tumusi moi presenti disi: Wi sabi taki wi sa man prèise Yehovah Gado fu têgo èn wi sa libi wan koloku libi te wi e tan getrow na En. Fu dati ede, awansi san e pasa, meki wi prèise Yehovah ibri dei, fu di na en e gi wi a dyaranti taki libisma o kisi wan opobaka!
San yu ben sa piki?
• Fa wi musu denki fu na opobaka howpu?
• Fu san ede wi kan bribi taki libisma o kisi wan opobaka?
• Fa na opobaka howpu kan trowstu yu?
• Sortu krakti na opobaka howpu kan abi tapu a fasi fa yu e libi?
[Aksi fu a tori disi]
[Prenki na tapu bladzijde 28]
Yob ben sabi taki Yehovah e angri fu gi regtfardikisma wan opobaka
[Prenki na tapu bladzijde 29]
„Luku, yu manpikin de na libi”