Yu kan abi wan howpu na ini wan grontapu di lai nanga problema

„NOITI ete sma ben kan du so furu fu yepi trawan èn fu lusu den problema di wi alamala abi.” Disi na san Bill Clinton, di ben de presidenti fu Amerkankondre, ben taki na wan konmakandra di ben hori na ini Ottawa, na Kanada, na ini maart 2006. Na a kaba fu a taki fu en, a taigi den arkiman taki sensi a tsunami fu 2004, moro nanga moro sma de klariklari fu yepi trawan na tra kondre. A sori tu taki na ini a ten disi sma na heri grontapu „abi makandra fanowdu moro leki oiti bifo”, èn a ben gersi leki a ben abi a howpu taki sani ben o waka bun na ini a ten di e kon.

Wi kan fruwakti taki rampu o tyari sma na heri grontapu kon na wán, fu pruberi fu sorgu taki sani waka moro bun na ini a ten di e kon? Wi kan abi a dyaranti taki vrede sa de na ini a ten di e kon èn taki sani sa waka bun nanga wi, soso fu di „sma abi makandra fanowdu moro leki oiti bifo”?

A sma di e gi wi trutru howpu

Den sani di libisma du na ini den dusundusun yari di pasa, sori  ibri tron baka taki den no e du san den e pramisi. Dati meki a fiti taki Bijbel e gi wi a rai disi: „No poti un frutrow tapu heihei-sma, noso tapu a manpikin fu libisma, di no man frulusu unu” (Psalm 146:3). Efu wi e poti wi frutrow tapu den organisâsi, den gudu, nanga den prakseri fu grontapu, dan wi o lasi-ati. Fu san ede dati de so? Fu di „grontapu e pasa gowe nanga den lostu fu en”.—1 Yohanes 2:17.

Ma na ini den hondrohondro yari di pasa, regtfardiki libisma howpu tapu Gado, èn a no meki den fesi fadon. Bijbel e taki dati Gado na „a howpu fu Israel [fu owruten]” èn „a howpu fu den fositen tata [fu Israel]”. Èn wi kan leisi furu tron na ini Bijbel fa sma ben e howpu tapu Yehovah èn fa den ben e frutrow na en tapu (Yeremia 14:8; 17:13; 50:7). Iya, den Buku fu Bijbel e gi wi deki-ati fu „howpu tapu Yehovah”.—Psalm 27:14.

Na ini Odo 3:5, 6 wi e kisi a rai disi: „Frutrow tapu Yehovah nanga yu heri ati èn no frutrow tapu yu eigi frustan. Poti prakseri na en na ini ala san yu e du, èn ensrefi sa meki yu pasi kon reti.” Yu no abi fu tweifri na den wortu disi, fu di Yehovah Gado no e kenki, yu kan frutrow na en tapu, èn ala ten a e du san a taki (Maleaki 3:6; Yakobus 1:17). Yehovah wani taki sani e go bun nanga yu, èn efu ala ten yu e du san skrifi na ini en Wortu, Bijbel, dan yu o man pasa den muilek ten disi di e meki sma frede.—Yesaya 48:17, 18.

Wan sma di e gi yesi na Gado nanga en heri ati, kan bribi a pramisi disi: „No frede, bika mi de nanga yu. No luku lontu, bika mi na yu Gado. Mi wani tranga yu. Mi sa yepi yu trutru. Mi sa hori yu steifi trutru nanga mi reti-anu fu regtfardikifasi” (Yesaya 41:10). Te ala den sma di lobi Yehovah Gado trutru e begi fayafaya èn e denki dipi fu a pramisi disi, dan den sa feni trowstu fu di den o sabi san fu du te den e kisi problema nanga broko-ede.

Luku a tori fu Andrea di de wan Yehovah Kotoigi èn wan mama fu tu pikin. A e taki: „Na fu di mi e begi Yehovah èn e denki dipi fu den pramisi fu En, meki mi no e lasi-ati te mi e frede son leisi taki sani no sa waka bun nanga mi. Te mi e frutrow doronomo tapu Yehovah, dan a moro makriki gi mi fu no broko mi ede nanga sani.”

Frutrow tapu Yehovah dorodoro

Wan fu den psalm skrifiman ben sori o prenspari a de fu howpu tapu Yehovah. A ben taki: „Den wan di lobi yu wet sa kisi vrede pasa marki, èn nowan sani sa meki den naki futu” (Psalm 119:165). Te yu e studeri Gado Wortu na wan opregti fasi, dan dati sa yepi yu fu prakseri ’sani di tru, sani di seryusu, sani di regtfardiki, sani di krin, sani di bun fu lobi, sani di sma e taki bun fu den, sani di Gado feni bun èn sani di warti fu sma prèise den’. Disi sa tranga a bribi fu yu, èn yu sa de koloku. Te yu e meki tranga muiti fu yere, fu kon sabi, fu bribi, èn fu du den sortu sani disi, dan ’a Gado fu vrede sa de nanga yu’.—Filipisma 4:8, 9.

John, di leri sabi Yehovah furu yari kaba, e taki: „Fu man denki tra fasi fu a tamara, mi ben musu kon frustan fosi taki mi ben musu kenki den fasi nanga a denki fu mi dorodoro. Dan fosi, mi ben o man tron wan mati fu wan volmaakti Gado di mi no man si. A wan-enkri fasi fa mi ben o man tron wan mati fu Gado, na te mi ben abi a srefi denki leki En. Dati meki mi ben musu leisi Gado Wortu èn mi ben musu denki dipi fu den sani di mi ben leisi.”

Te yu e kon sabi den tru tori na ini Bijbel di e gi sma libi, dan neleki furu tra sma, yu no sa broko yu ede tumusi nanga den takru sani di de fu si doronomo tapu telefisi. Te yu e du san Bijbel e taki, dan yu nanga den famiriman fu yu sa man libi bun nanga makandra, èn yu no sa broko yu ede so furu moro. Boiti dati, Gado pramisi taki a de klariklari fu „sori en krakti fu a bun fu den sma di lobi en nanga den heri ati” (2 Kroniki 16:9). A sa meki sani waka na so wan fasi, taki yu no sa abi fu frede noti.

Phinehas, na wan man di ben e libi na ini wan kontren pe feti ben de, èn a si fa sma kiri ipi-ipi trawan. A e taki: „Mi leri fu frutrow tapu Yehovah dorodoro. Fu di mi hori misrefi na Bijbel gronprakseri, meki mi ben kan wai pasi gi furu problema.” Efu yu e frutrow tapu Yehovah Gado trutru, dan a kan yepi yu fu pasa iniwan  problema (Psalm 18:29). Wan yongu pikin di lobi en papa nanga mama, e frutrow den dorodoro èn te a de nanga den, dan a abi a dyaranti taki sani sa waka bun nanga en, awinsi a kon siki, noso awinsi a e broko en ede nanga wan sani. Yu kan abi a firi disi tu te yu e meki muiti fu frutrow tapu Yehovah dorodoro.—Psalm 37:34.

Wan sani di e gi trutru howpu

Yesus Krestes ben taigi den bakaman fu en: „Un musu begi so: ’Wi Tata na hemel, meki yu nen kon santa. Meki yu kownukondre kon. Meki yu wani pasa na grontapu soleki fa a e pasa na hemel’” (Mateyus 6:9, 10). A Kownukondre dati na wan tirimakti na hemel èn a abi Yesus Krestes leki Kownu. Nanga yepi fu a Kownukondre disi, Gado e sori taki na En abi a reti fu tiri heri grontapu.—Psalm 2:7-12; Danièl 7:13, 14.

Den difrenti sani di e meki sma frede na ini a ten disi, e sori krin taki Gado musu du wan sani fu tyari wan kenki kon. Koloku taki dati o pasa heri esi! Now Gado poti Yesus Krestes leki Mesias Kownu, èn a gi Yesus a makti fu sori sma taki na Yehovah abi a reti fu tiri hemel nanga grontapu, èn Yesus musu santa a nen fu En tu (Mateyus 28:18). Heri esi, a Kownukondre o bigin tiri grontapu, èn a sa tyari wan kaba kon na ala sani di e meki sma frede èn di e gi den broko-ede. Yesaya 9:6 e taki fu sani di e sori taki Yesus na trutru wan Tiriman di kan sorgu taki wi no e frede moro. Fu eksempre, a tekst e kari en „Têgo Tata”, „Tumusi Bun Raiman”, nanga „Granman fu Vrede”.

Poti prakseri na den moi wortu „Têgo Tata”. Leki wi „Têgo Tata”, Yesus abi a makti fu gi getrow libisma têgo libi na grontapu, nanga yepi fu a frulusu ofrandi fu en. Èn a wani du dati tu. Disi wani taki dati den sma disi sa kon fri fu a sondu di den kisi fu a fosi man, Adam (Mateyus 20:28; Romesma 5:12; 6:23). Boiti dati, Krestes sa gebroiki a makti di a kisi fu Gado fu gi libi na den sma di dede.—Yohanes 11:25, 26.

Di Yesus ben de na grontapu, dan a sori taki a de a „Tumusi Bun Raiman”. Fu di Yesus sabi Gado Wortu, èn fu di a e frustan heri bun fa libisma de, meki a ben sabi fa fu lusu den problema di sma ben abi na ini na aladei libi. Sensi di Krestes tron kownu na hemel, a tan dini leki a „Tumusi Bun Raiman”, fu di en na a moro prenspari sma di Gado e gebroiki fu meki libisma kon sabi san a abi na prakseri. Den rai fu Yesus, di skrifi na ini Bijbel, na koni rai ala ten èn den e tyari wini kon gi wi doronomo. Te yu sabi disi èn te yu e bribi en tu, dan yu o man libi sondro fu frede taki sani no o waka bun nanga yu, èn yu no sa bruya.

Boiti dati, Yesaya 9:6 e kari Yesus „Granman fu Vrede”. Leki Granman fu Vrede, Krestes sa gebroiki en krakti heri esi fu tyari wan kaba kon na iniwan sani di e tyari pratifasi kon. Iya, politiek no sa de moro, sma no sa desko makandra moro, èn pôtisma no sa de moro tu. Fa Krestes sa du disi? A sa tiri a heri libisma famiri nanga yepi fu wán tirimakti nomo, namku a Mesias Kownukondre di sa tyari vrede kon.—Danièl 2:44.

Te a Kownukondre dati o tiri, dan vrede sa de fu têgo na heri grontapu. Fu san ede yu kan de seiker taki dati o pasa? Yesaya 11:9 e sori fu san ede wi kan bribi dati. Drape skrifi: „Sma [di e saka densrefi na ondro a Kownukondre] no sa du no wan enkri ogri èn den no sa pori no wan enkri sani na tapu heri mi santa bergi; bika grontapu sa kon furu trutru nanga a sabi fu Yehovah, soleki fa watra e tapu se.” Te fu kaba, ibri sma na grontapu o abi soifri sabi fu Gado èn den o gi yesi na en. A sani dati e meki yu firi prisiri, a no so? Efu a e meki yu e firi prisiri, dan no draidrai fu teki „a sabi fu Yehovah”.

Te yu e ondrosuku san Bijbel e leri trutru fu den sani di e pasa na ini a ten disi èn fu den moi pramisi di skrifi na ini Bijbel, dan yu sa feni a sabi fu Gado. A sabi disi sa tranga yu bribi èn a kan meki yu kisi têgo libi. Fu dati ede, wi e gi yu deki-ati fu meki ten fu studeri Bijbel nanga Yehovah Kotoigi na ini yu birti. Den de klariklari fu yepi yu, sondro taki yu sa abi fu pai den. A sani disi sa yepi yu fu no frede moro, èn yu sa abi wan trutru howpu na ini wan grontapu di lai nanga problema.

 [Faki/​Prenki na tapu bladzijde 7]

Fu san ede a Kownukondre fu Gado e gi sma howpu?

Yesus Krestes, a Kownu fu Gado Kownukondre, kisi a makti nanga a reti fu tiri hemel nanga grontapu (Mateyus 28:18). A sa seti a grontapu kon bun baka. A abi a makti tu fu dresi ala siki. Den wondru di Yesus du na grontapu ben sori taki a ben o du moro bigi wondru te a ben o tiri leki kownu. Fu dati ede a de a moro bun Kownu di wi kan abi, èn wi kan frutrow na en tapu. Luku wan tu fu den fasi di a Mesias Kownu disi abi. Sortuwan fu den yu lobi moro?

▪ A abi switifasi.—Markus 10:13-16.

▪ A e hori na prakseri taki sma abi swakifasi, èn a no e teki sei.—Markus 10:35-45.

▪ Sma kan frutrow na en tapu èn a no e prakseri ensrefi nomo.—Mateyus 4:5-7; Lukas 6:19.

▪ A de regtfardiki èn a lobi retidu.—Yesaya 11:3-5; Yohanes 5:30; 8:16.

▪ A e hori den firi fu trawan na prakseri èn a abi sakafasi.—Yohanes 13:3-15.

[Prenki na tapu bladzijde 4]

Te wi e leisi Bijbel èn te wi e denki dipi fu den sani di wi e leisi, dan dati sa yepi wi fu howpu tapu Yehovah