A rutu fu ogridu

NA INI a fosi yarihondro, furu fu den Dyu ben e wakti a Mesias di Gado ben pramisi (Yohanes 6:14). Di Yesus bigin en diniwroko, a ben e trowstu sma èn a ben e meki sma kon frustan den sani di Gado taki. A ben dresi den sikiwan, a ben gi nyanyan na den sma di abi angri, a ben abi makti tapu a winti nanga a se, èn a gi wan opobaka srefi na den dedewan (Mateyus 8:26; 14:14-21; 15:30, 31; Markus 5:38-43). A ben taki san Gado ben taki èn a pramisi sma taki den kan kisi têgo libi (Yohanes 3:34). Den sani di Yesus taki èn den sani di a du, ben sori krin taki en na a Mesias, iya, en na a sma di o frulusu libisma fu sondu èn fu ala den ogri sani di e pasa leki bakapisi fu dati.

A no de fu taki dati den Dyu kerki fesiman ben musu de den fosiwan di ben breiti taki Yesus kon, èn den ben musu de den fosiwan di ben de klariklari fu arki en èn fu du san a taigi den. Ma toku den no ben du dati. Na presi fu dati, den ben abi bita-ati gi en, den frufolgu en, èn den seti wan trapu fu kiri en!—Markus 14:1; 15:1-3, 10-15.

Yesus ben abi leti di a krutu den ogri man disi (Mateyus 23:33-35). Ma a ben sabi tu taki na wan tra sma ben meki taki den man dati ogri so. Yesus ben taigi den: „Unu na fu un tata Didibri èn unu wani du den sani di un tata wani. Di a bigin waka en eigi pasi, a ben de wan kiriman èn a no ben tanapu kánkan na ini a waarheid, fu di a waarheid no de na ini en. Te a e taki lei, dan a e taki soleki fa ensrefi de, fu di a de wan leiman èn a tata fu ala lei” (Yohanes 8:44). Aladi Yesus ben taki dati libisma man du ogri sani, toku a ben sori tu taki wan tra sma de di ben e meki den man disi du ogri. A sma dati na Satan Didibri.

Yesus taki dati Satan „no ben tanapu kánkan na ini a waarheid”. Disi e sori taki wan ten ben de di a yeye disi ben de wan getrow futuboi fu Gado, ma taki a komoto na tapu a yoisti pasi. Fu san ede Satan opo ensrefi teige Yehovah? Fu di a ben tan prakseri taki a prenspari srefisrefi, meki a ben wani taki sma musu anbegi en, aladi a ben sabi taki sma musu anbegi Gado wawan. *—Mateyus 4:8, 9.

Na ini a dyari fu Eden, a kon na krin taki Satan opo ensrefi teige Gado, di a kori Eva fu nyan a froktu di a no ben mag nyan. Fu di Satan ben de a fosiwan di taki wan lei èn fu di a ben taki ogri-ati lei fu Yehovah, meki a tron „a tata fu lei”. Boiti dati, fu di Satan kori Adam nanga Eva fu trangayesi Gado, meki den kon tron sondu libisma èn te fu kaba den dede, èn sosrefi den bakapikin fu den. Na so Satan meki ensrefi kon tron „wan kiriman” tu. Iya, en na a moro ogri-ati kiriman di de!—Genesis 3:1-6; Romesma 5:12.

Satan ben abi krakti srefi tapu tra engel na hemel èn a meki den opo densrefi teige Gado tu (2 Petrus 2:4). Neleki Satan, den ogri yeye disi ben wani wan sani fu libisma di no ben fiti kwetikweti. Ma a sani di den yeye disi ben wani, na fu abi seks nanga libisma. A bakapisi ben de taki kefalek furu ogri pasa.

 Grontapu kon lai nanga ogri

Bijbel e fruteri wi disi: „Di furu libisma ben kon de . . . èn di den kisi umapikin, dan den manpikin fu a tru Gado bigin luku den umapikin fu libisma. Den ben si taki den uma ben moi srefisrefi. Dati meki den teki den leki wefi gi densrefi, iya, den teki iniwan uma di den ben wani” (Genesis 6:1, 2). Suma ben de „den manpikin fu a tru Gado”? Den no ben de libisma, ma den ben de yeye (Yob 1:6; 2:1). Fa wi du sabi dati? Wan sani di wi sabi seiker, na taki sowan 1500 yari kaba libisma ben e trow nanga makandra, èn fu dati ede reide no de fu skrifi fu a tori disi neleki na fosi tron sma trow. Sobun, fu di a tori e taki dati „den manpikin fu a tru Gado” di ben teki libisma skin, ben abi seks demakandra nanga „den umapikin fu libisma”, meki a musu de so taki noiti ete a sani disi ben pasa.

A de krin fu si taki noiti ete so wan sani ben pasa, fu di den pikin fu den ben de tra fasi. Den pikin disi di Bijbel e kari Neifilim, ben de afu libisma èn afu engel, èn den ben gro kon tron bigiskin man. Den ben de ogri-ati man di ben e tapu skreki gi trawan. Fu taki en leti, a wortu „Neifilim” wani taki „falaman”, noso „den sma di e meki trawan fadon”. Bijbel e kari den ogri-ati man disi „den tranga man fu owruten, man di ben abi barinen”.—Genesis 6:4.

Den Neifilim nanga den papa fu den ben e du tumusi ogri-ati sani di no ben pasa noiti ete. Genesis 6:11 e taki: „Grontapu ben pori èn . . . grontapu ben lai nanga ogridu.” Iya, libisma ben bigin du den srefi ogri-ati èn takru sani fu den sma disi di ben kon de na den mindri.

Fa a du kon taki den Neifilim nanga den papa fu den ben abi so furu krakti tapu libisma? Na fu di den ben sabi taki libisma abi sondu, meki den ben abi krakti tapu den sondu firi fu den. San ben de a bakapisi? „Libisma ben e libi na wan tumusi ogri fasi.” Te fu kaba, Yehovah pori den sma fu a ten dati fu di a meki wan frudu kon na heri grontapu, èn soso a getrow man Noa nanga en osofamiri ben tan na libi (Genesis 6:5, 12-22). Ma den engel di ben teki libisma skin, drai go baka na hemel leki wisiwasi engel. Fu di den yeye disi no ben abi a grani moro fu dini Gado, meki den tron ogri yeye di e tan gens Gado nanga den getrow engel fu en. Soleki fa a sori, sensi a ten dati Gado ben sorgu taki den ogri yeye disi no man teki libisma skin moro (Yudas 6). Ma toku den yeye disi ben abi furu krakti tapu libisma.

A kon na krin suma na a ogriwan!

Satan abi bun furu krakti tapu libisma. A sani disi e kon na krin na ini 1 Yohanes 5:19, pe skrifi: „Heri grontapu de na ini a makti fu na ogriwan.” Didibri e meki libisma du ala sortu ogri sani so taki libisma e pina moro nanga moro. Fu taki en leti, moro leki iniwan ten na fesi, Satan e du ala san a man fu du sma ogri. Fu san ede? Fu di Yesus trowe en nanga den ogri yeye komoto fu hemel, di Gado Kownukondre bigin tiri na ini 1914. Bijbel ben taki na fesi fu a tori disi: „Helu fu grontapu . . . , bika Didibri saka kon na unu èn a abi bigi atibron fu di a sabi taki en ten syatu” (Openbaring 12:7-12). Ma fa Satan abi krakti tapu libisma na ini a ten disi?

A moro prenspari fasi fa Satan e du dati, na taki a e meki sma denki fa en wani, èn a e meki den du san en wani. Fu dati ede, Efeisesma 2:2 e kari Didibri „a sma . . . di abi makti na tapu a krakti di e tiri sma denki, namku a yeye [noso a fasi fa furu sma e tyari densrefi] di e wroko now na ini den sma di e trangayesi Gado”. Na presi fu gi sma deki-ati fu abi frede gi Gado èn fu du bun, a „krakti” disi di e komoto fu den ogri yeye e gi sma deki-ati fu opo densrefi teige Gado èn fu poti den markitiki fu en na wan sei. Sobun, Satan  nanga den ogri yeye fu en e gi libisma deki-ati fu du moro ogri-ati sani.

„Kibri yu ati”

Wán fu den fasi fa wi kan si taki Satan nanga den ogri yeye abi „krakti” tapu libisma, na taki moro nanga moro sma e luku doti seks prenki noso seks felem. Te sma e luku den sani disi, dan den e kisi seks firi di no fiti kwetikweti èn a e meki taki den wani du den morsu sani di trawan e du (1 Tesalonikasma 4:3-5). Sma e feni en wan prisiri sani fu luku doti seks felem pe sma e dwengi wan trawan fu abi seks, pe sma e prisiri fu gi trawan skin-ati te den abi seks nanga den, pe wan heri grupu sma abi seks nanga wán sma, pe sma abi seks nanga meti, èn pe bigisma abi seks nanga pikin-nengre. Srefi te sma e luku seks buku noso seks felem pe den sortu ogri sani dati no de na ini, toku den buku noso felem disi kan pori den denki. A kan meki tu taki den sma disi e kisi a gwenti fu luku seks prenki noso seks felem di e wiki den seks firi fu den. * Disi na wan ogri sani, fu di a e meki taki a matifasi na mindri libisma e pori èn a e pori a matifasi di a sma abi nanga Gado. Doti seks prenki noso seks felem na sani di komoto fu ogri yeye èn a sani dati no fiti kwetikweti. Iya, na den srefi ogri yeye disi ben du a takru sani fu abi seks nanga libisma na a ten fu Noa, fosi a Frudu kon na grontapu.

A no somarso a koniman Salomo ben gi a rai disi: „Kibri yu ati, moro leki ala tra sani di de fu kibri, bika na drape den rutu fu a libi de” (Odo 4:23). Sobun efu yu wani kibri yu ati gi sani di abi fu du nanga doti seks felem noso seks prenki, dan kande yu sa musu luku wan tra sani na telefisi noso yu musu tapu a computer te den e sori prenki noso felem di e wiki den seks firi fu sma. A de prenspari taki yu no e draidrai, ma taki yu musu du dati wantewante! Yu kan si yusrefi leki wan srudati di e pruberi fu kibri ensrefi te wan trawan wani sutu na tapu en ati. Na so a de tu taki Satan wani sutu na tapu yu ati, iya, a e suku fu pori den moro dipi firi fu yu.

Yu musu kibri yu ati tu, so taki yu no e kon lobi ogridu, fu di Didibri sabi taki „[Yehovah] kwetikweti no lobi wan sma di lobi ogri di e du nanga tranga” (Psalm 11:5). Satan no abi fu meki yu du tumusi ogri-ati sani so taki yu tron wan feanti fu Gado, ma san a wani du na taki yu e kon lobi ogri. Na fu dati ede yu kan si taki ogridu lai na ini felem noso tra pôpi programa di abi fu du nanga afkodrei. Den Neifilim dede, ma te now ete a de krin fu si taki sma e du den sani di den Neifilim ben e du èn sma e tyari densrefi na a srefi fasi leki den Neifilim! Den sani di yu e luku, noso e arki e sori taki yu no e gi pasi taki Satan kori yu?—2 Korentesma 2:11.

 San yu kan du fu no meki Satan abi krakti na yu tapu?

Kande a gersi leki a muilek tumusi fu kakafutu gi Satan nanga den ogri yeye fu en. Bijbel e taki dati den sma di e meki muiti fu plisi Gado, „e feti nanga . . . den ogri yeye na hemel”, èn den e feti tu nanga den eigi sondu skin. Efu wi wani wini a feti disi èn efu wi wani taki Gado feni wi bun, dan wi musu gebroiki den difrenti sani di Gado gi wi fu yepi wi.—Efeisesma 6:12; Romesma 7:21-25.

Wán fu den sani disi na Gado en santa yeye di de a moro tranga krakti na hemel nanga grontapu. Na apostel Paulus ben taki disi na ini a brifi di a ben skrifi gi den Kresten fu a fosi yarihondro: „Wi no kisi a yeye fu grontapu, ma wi kisi a yeye di komopo fu Gado” (1 Korentesma 2:12). Den sma di e meki a yeye fu Gado tiri den, e kon lobi den sani di Gado lobi, èn den e tegu gi den sani di Gado no lobi (Amos 5:15). Fa wan sma kan kisi a santa yeye? Wan sma kan kisi a santa yeye te a e begi, èn te a e studeri Bijbel, fu di Bijbel srefi skrifi nanga yepi fu santa yeye. A kan kisi a santa yeye tu te a abi demakandra nanga sma di lobi Gado trutru.—Lukas 11:13; 2 Timoteyus 3:16; Hebrewsma 10:24, 25.

Te yu e du den sani disi, dan yu sa ’abi ala den sani di Gado gi yu fu feti’. Iya, na disi wawan kan kibri yu teige „den triki di Didibri e gebroiki fu kori sma” (Efeisesma 6:11-18). A de tumusi prenspari moro leki iniwan ten na fesi, taki wi e gebroiki den sani di Gado gi wi fu kibri wisrefi. Fu san ede?

Heri esi ogri o kon na wan kaba!

A psalm skrifiman ben taki: „Te den ogriwan e sproiti leki grasi èn ala den sma di e du ogri e gi bromki, dan dati e pasa so taki den kan kisi pori fu têgo” (Psalm 92:7). Iya, neleki fa a ben de na ini a ten fu Noa, na so ala den ogri di e pasa moro nanga moro na wan buweisi taki heri esi Gado sa krutu den ogri libisma, ma sosrefi Satan nanga den ogri yeye fu en di a sa fringi go na ini wan dipi peti. Disi wani taki dati den no o man du ogri moro, èn te fu kaba den sa kisi pori krinkrin (2 Timoteyus 3:1-5; Openbaring 20:1-3, 7-10). Suma Yehovah poti fu krutu den sma dati? A sma di a poti fu du dati na Yesus Krestes. Bijbel e taki fu en: „Na fu dati ede meki a Manpikin fu Gado ben kon, namku fu tyari wan kaba kon na den wroko fu Didibri.”—1 Yohanes 3:8.

Yu e angri fu si taki wan kaba o kon na ogridu? Efu dati de so, dan den pramisi di skrifi na ini Bijbel o trowstu yu. Nowan enkri tra buku de di e sori krin taki ogri komoto fu Satan, èn nowan enkri tra buku de di e sori fa en nanga ala den ogri sani di a e du no o de moro. Wi e gi yu a deki-ati fu du tranga muiti fu teki soifri sabi fu Bijbel, so taki yu kan kibri yusrefi nownow kaba gi den ogri sani di Satan wani taki libisma du, èn so taki yu kan kisi a blesi fu libi na ini wan grontapu pe nowan ogri de.—Psalm 37:9, 10.

[Futuwortu]

[Faki na tapu bladzijde 6]

Anansitori di e fruteri son sani di pasa trutru

Na heri grontapu yu abi anansitori fu sensi owruten di e taki fu sma di ben de afu gado nanga afu libisma, den e taki tu fu bigiskin sma, èn fu wan frudu di ben de wan bigi rampu. Fu eksempre, wan anansitori di skrifi na ini Akadiatongo e taki fu a man Gilgamesj. A tori dati e taki fu wan frudu, wan sipi, èn fu sma di ben pasa a frudu libilibi. Soleki fa a tori e taki, Gilgamesj ben de afu gado nanga afu libisma. A man disi ben lobi seks èn a ben lobi fu du ogri. Den anansitori fu den Asteksma e taki fu wan grontapu fu owruten pe bigiskin sma ben e libi èn sosrefi tori di e taki fu wan bigi frudu. Owruten anansitori fu den sma fu Noorwegen e taki fu bigiskin sma, èn den e taki fu wan koniman di nen Bergelmir. A man disi ben meki wan bigi boto so taki en nanga en wefi ben kan tan na libi. Te yu e luku ala den pisi disi fu den tori, dan den e sori taki san skrifi na ini Bijbel tru, namku taki ala libisma na bakapikin fu den sma di pasa wan frudu libilibi, aladi den ogri sma fu a ten dati dede.

[Prenki]

A skrifiplanga pe den tori fu Gilgamesj skrifi na tapu

[Sma di abi a reti fu a prenki]

The University Museum, University of Pennsylvania (neg. # 22065)

[Prenki na tapu bladzijde 5]

Sma na ini a ten disi e tyari densrefi neleki den Neifilim

[Prenki na tapu bladzijde 7]

Soifri sabi kan yepi wi fu kakafutu gi den ogri sani di Satan wani taki wi musu du