Aksi fu leisiman

Odo 22:6 e gi Kresten papa nanga mama a dyaranti taki den pikin sa tan waka na tapu a pasi fu Yehovah te den kisi a yoisti leri?

A vers disi e taki: „Leri wan boi fu waka na tapu a yoisti pasi, srefi te a kon bigi a no sa komoto na tapu a pasi.” Neleki fa wan pikin bon e gro na a sei pe yu boigi en go, na so a de taki efu pikin e kisi a yoisti leri, dan nofo tron den sa dini Yehovah te den kon bigi. Ibri papa nanga mama sabi taki a e teki ten èn den musu meki tranga muiti fu gi den pikin a leri disi. Te papa nanga mama wani taki den pikin fu den e tron disipel fu Krestes, dan den musu gi den pikin bun leri, den musu frumane den, den musu gi den deki-ati, den musu gi den trangaleri, èn den musu de wan bun eksempre gi den pikin tu. Den musu tan du disi doronomo èn na wan lobi-ati fasi.

Ma disi wani taki dati te wan pikin no wani dini Yehovah moro, dan en papa nanga mama no gi en bun leri? Son leisi a de so taki papa nanga mama no meki nofo muiti fu kweki den pikin nanga a leri fu Yehovah èn fu frumane den, so taki den kan kisi a denki fu En (Efeisesma 6:4). Na a tra sei, na odo disi no e gi a dyaranti taki pikin o tan getrow na Gado te den kisi bun leri. Papa nanga mama no kan meki a pikin fu den tron san den wani. Neleki bigisma, pikin kan bosroiti san den o du nanga den libi (Deuteronomium 30:15, 16, 19). Aladi papa nanga mama meki tranga muiti fu gi den pikin bun leri, toku sonwan fu den pikin no tan dini Gado, neleki fa a ben pasa nanga Salomo di skrifi a tekst disi di wi e luku. Yehovah srefi ben abi manpikin di no tan getrow na en.

Sobun, a bijbeltekst disi no e sori taki wan pikin „no sa komoto na tapu a pasi” awansi san e pasa, ma a e sori taki nofo tron wan pikin o tan na tapu a pasi fu Yehovah te a kisi bun leri. A sani disi e gi papa nanga mama deki-ati trutru! A e gi papa nanga mama deki-ati fu sabi taki den o abi bun bakapisi te den e du tranga muiti fu gi den pikin bun leri, so taki den kan tan na tapu a pasi fu Yehovah. Fu di a frantwortu di papa nanga mama abi de prenspari èn fu di den kan abi furu krakti tapu a libi fu den pikin, meki Bijbel e gi den a deki-ati fu si a frantwortu fu den leki wan seryusu sani.—Deuteronomium 6:6, 7.

Srefi te pikin no e dini Yehovah moro, toku papa nanga mama di du tranga muiti fu gi den pikin fu den bun leri, kan abi a howpu taki wan dei den pikin o kisi densrefi. Bijbel abi krakti, èn a leri di pikin kisi fu den papa nanga mama, na sani di den pikin no sa frigiti so gaw.—Psalm 19:7.