Den owruwan na wan blesi gi den yonguwan

„Srefi te mi kon owru èn mi wiwiri kon weti, o Gado, no gowe libi mi, teleki mi kan fruteri den bakapikin den sani di yu du nanga yu krakti, iya, teleki mi fruteri ala den sma di sa kon ete, fu a makti fu yu.”​—PSALM 71:18.

1, 2. San den owru futuboi fu Gado musu frustan, èn san wi sa luku na ini na artikel disi?

WAN Kresten owruman na ini West Afrika ben go luku wan owru salfu brada, èn a aksi en: „Fa a e go nanga yu?” A brada taigi en: „Mi man lon, mi man dyompo, mi man tanapu na tapu wán futu”, aladi a ben e pruberi fu du den sani di a taki. A taki moro fara: „Ma mi no man frei.” Na owruman ben frustan san a brada disi ben wani taki. ’Mi e du san mi man. Ma san mi no man du, mi no e du.’ Now na owruman disi di ben go luku a brada, pasa 80 yari kaba. A man memre heri bun ete fa na owru brada dati ben lobi fu meki trawan lafu, èn taki a ben de getrow na Gado.

² Te wan owrusma e gi yesi na Gado, dan trawan e tan memre disi fu wan langa pisi ten. Ma a no de so ala ten taki o moro wan sma e owru, o moro a o koni èn o moro a o abi den fasi fu Krestes (Preikiman 4:13). Bijbel e taki: „Weti wiwiri de leki wan kownu-ati di e moi wan sma, te a sma dati e libi na wan regtfardikifasi” (Odo 16:31). Owruwan e frustan fa den sani di den e taki èn den sani di den e du kan abi bun krakti tapu trawan. Efu yu na wan owru sma, yu e frustan disi tu? Luku wan tu eksempre na ini Bijbel di e sori taki owruwan ben de wan trutru blesi gi den yonguwan.

A bribi fu den abi bun furu krakti tapu trawan

3. Fa ala sma di e libi na ini a ten disi kisi wini fu di Noa tan getrow?

³ Srefi na ini a ten disi wi e kisi wini fu di Noa  ben abi wan tranga bribi èn fu di a ben horidoro. Noa ben abi pikinmoro 600 yari di a bigin bow na ark. Na a ten dati a ben e tyari den meti go na ini na ark, èn a ben e preiki gi tra sma (Genesis 7:6; 2 Petrus 2:5). Fu di Noa ben abi frede gi Gado, meki en nanga en osofamiri pasa a bigi Frudu libilibi, èn a tron na afo fu ala sma di e libi na grontapu na ini a ten disi. A tru taki Noa ben e libi na ini wan ten di sma ben e libi moro langa. Ma aladi Noa ben owru so, toku a tan getrow, èn dati tyari tumusi moi blesi gi wi. Na sortu fasi?

4. Sortu wini den futuboi fu Gado na ini a ten disi kisi fu di Noa tan getrow?

⁴ Noa ben abi pikinmoro 800 yari di Nimrod bigin bow a Toren fu Babel, aladi a sani dati ben de teige a komando fu Yehovah di ben taki dati sma musu „kon lai na grontapu” (Genesis 9:1; 11:1-9). Ma Noa ben abi noti fu du nanga den sani di a trangayesi Nimrod du. Fu dati ede, a kan taki Noa ben tan taki a srefi tongo aladi Gado ben bruya a tongo fu den sma di ben trangayesi en. Noa ben sori na ini en heri libi èn srefi di a kon owru, taki a abi bribi èn taki a horidoro. Yonguwan nanga owruwan di e dini Gado kan waka baka a moi eksempre fu Noa.—Hebrewsma 11:7.

Den owruwan abi krakti tapu a famiri fu den

5, 6. (a) San Yehovah ben taigi Abraham fu du di a ben abi 75 yari? (b) San Abraham du di Gado gi en a komando dati?

⁵ Wi kan si taki owruwan kan abi krakti tapu a bribi fu den famiriman, te wi e luku na eksempre fu den famiri-edeman di ben e libi baka Noa. Abraham ben abi sowan 75 yari di Gado taigi en: „Gowe libi yu kondre, yu famiri èn na osofamiri fu yu papa, dan go na a kondre di mi sa sori yu. Mi sa meki yu tron wan bigi pipel, mi sa blesi yu èn mi sa gi yu biginen. Yu musu de wan blesi gi trawan.”—Genesis 12:1, 2.

⁶ San yu ben o du efu Gado ben o taigi yu fu gowe libi yu oso, yu mati, a kondre pe yu gebore, den famiriman fu yu di e libi krosibei fu yu, èn fu go na wan kondre di yu no sabi? We, na disi Gado ben taigi Abraham fu du. A „gowe soleki fa Yehovah ben taigi en”, a ben e libi na ini tenti leki wan freimdesma na ini a kondre Kanan èn a ben e froisi furu leisi (Genesis 12:4; Hebrewsma 11:8, 9). Aladi Yehovah ben taigi Abraham taki a ben o tron „wan bigi pipel”, toku Abraham dede langa ten fosi den bakapikin fu en ben kon furu. En wefi Sara meki wán pikin nomo, èn dati ben de Isak. Na a ten di Isak gebore, Abraham ben tan 25 yari langa kaba na difrenti presi na ini a Pramisi Kondre (Genesis 21:2, 5). Ma toku Abraham no ben lasi-ati èn a no ben drai go baka na a foto pe a ben komoto. A bribi di Abraham sori èn a fasi fa a horidoro, na wan moi eksempre trutru!

7. Fa a fasi fa Abraham ben horidoro ben abi krakti tapu en manpikin Isak, èn sortu bakapisi dati ben abi gi ala libisma?

⁷ A fasi fa Abraham horidoro ben abi furu krakti tapu en manpikin Isak. En manpikin ben de leki wan freimdesma en heri libi langa na ini a kondre Kanan, namku 180 yari langa. Isak ben e horidoro fu di a ben bribi a pramisi fu Gado. Na en owru papa nanga mama leri en fu abi so wan bribi, èn bakaten a bribi fu en ben kon moro tranga fu di Yehovah srefi pramisi en wan sani tu (Genesis 26:2-5). A ben de tumusi prenspari taki Isak horidoro, fu di na so fasi a pramisi fu Yehovah kon tru, namku taki wan „pikin” fu Abraham ben o kon, di ben o blesi ala libisma. Hondrohondro yari baka dati, Yesus Krestes, a „pikin” di Gado pramisi, meki taki sma kan abi wan bun matifasi baka nanga Gado èn taki den kan kisi têgo libi te den e poti bribi na ini Yesus.—Galasiasma 3:16; Yohanes 3:16.

8. Fa Yakob sori taki a bribi fu en tranga, èn san ben de a bakapisi?

⁸ Boiti dati, Isak yepi en manpikin Yakob fu abi wan tranga bribi so taki a ben kan tan horidoro srefi di a ben kon owru. Yakob ben abi 97 yari di a ben feti nanga wan engel wan heri neti langa, soso fu kisi wan blesi (Genesis 32:24-28). Yakob ben abi 147 yari di a dede, ma  bifo a dede a gebroiki ala en krakti di a ben abi ete fu blesi ibriwan fu den 12 manpikin fu en (Genesis 47:28). A profeititori di a taki èn di skrifi now na ini Genesis 49:1-28, de tru èn te now ete a e kon tru.

9. Na sortu fasi lepi Kresten di owru kaba, kan abi krakti tapu a famiri fu den?

⁹ A de krin fu si taki den getrow futuboi fu Gado di owru kaba, kan abi bun krakti tapu a famiri fu den. Te wan owruwan e gi rai di komoto fu Bijbel, te a e leri trawan den sani di a ondrofeni èn te a e horidoro, dan dati kan yepi wan yonguwan fu abi wan tranga bribi (Odo 22:6). Noiti den owruwan musu denki taki den no kan abi bun krakti tapu a famiri fu den.

Den abi krakti tapu den Kresten brada nanga sisa fu den

10. San Yosef ben ’taigi den manpikin fu Israel fu du nanga den bonyo fu en’, èn fa a sani di Yosef taki ben abi krakti tapu den?

¹⁰ Owruwan kan abi krakti sosrefi tapu tra Kresten brada nanga sisa. Di Yosef, a manpikin fu Yakob ben owru kaba, a aksi wan sani di ben gersi wan pikin sani, èn a sani dati ben sori taki a ben abi bribi. A sani dati ben abi krakti tapu milyunmilyun tru anbegiman di ben libi bakaten. Yosef ben abi 110 yari di ’a taigi den manpikin fu Israel san den ben musu du nanga den bonyo fu en’, namku taki te den Israelsma ben o gowe libi Egepte te fu kaba, den musu teki den bonyo fu en tyari gowe (Hebrewsma 11:22; Genesis 50:25). Baka di Yosef dede, den Israelsma ben musu wroko furu yari langa leki srafu na ini Egepte. A sani di Yosef ben taigi den Israelsma fu du, ben gi den a dyaranti taki den ben o kisi frulusu.

11. Sortu krakti na owru Moses ben abi tapu Yosua?

¹¹ Wan fu den sma di ben kisi deki-ati fu den wortu di Yosef taki, ben de Moses. Di Moses ben abi 80 yari, a ben abi a grani fu tyari den bonyo fu Yosef komoto na ini a kondre Egepte (Exodus 13:19). Na a ten dati, Moses ben kon sabi Yosua di ben de moro yongu leki en. Na ini den 40 yari baka dati, Yosua ben dini leki futuboi fu Moses (Numeri 11:28). Yosua ben go afupasi nanga Moses na tapu Sinaibergi, èn a ben e wakti Moses drape di a ben saka komoto fu a bergi nanga den plata ston pe den tin komando ben skrifi na tapu (Exodus 24:12-18; 32:15-17). A no de fu taki dati na owru Moses, di ben de wan lepi man èn di ben koni, ben leri Yosua furu sani!

12. Fa Yosua ben abi bun krakti tapu den Israelsma teleki a dede?

¹² Yosua fu en sei, ben gi den Israelsma deki-ati teleki a dede. Krutuman 2:7 e taki: „A heri pisi ten di Yosua ben de na libi a pipel tan dini Yehovah. Den tan dini en sosrefi na ini a pisi ten di den owru man di ben de na libi ete, baka di Yosua dede. Den owru man disi ben si ala den bigi sani di Yehovah ben du gi Israel.” Ma baka di Yosua nanga den tra owru man dede, dan 300 yari langa furu Israelsma no ben tan getrow na ini a tru anbegi, teleki a ten fu a profeiti Samuel.

Samuel ben „du san regtfardiki”

13. Sortu ’regtfardiki sani Samuel du’?

¹³ Bijbel no e taki omeni yari Samuel ben abi  di a dede, ma te wi e luku den tori na ini a Bijbel buku fu Wan Samuel, dan den sani dati pasa na ini wan pisi ten fu sowan 102 yari. Samuel ben si fa furu fu den sani dati ben e pasa. Na ini Hebrewsma 11:32, 33 wi e leisi taki den opregti krutuman nanga den profeiti ben „du san regtfardiki”. Iya, Samuel ben abi krakti tapu den sma fu en ten, fu di a ben yepi den fu no du ogri èn a ben yepi den fu drai den libi (1 Samuel 7:2-4). Fa a ben du dati? A ben de getrow na Yehovah en heri libi langa (1 Samuel 12:2-5). A no ben frede srefi fu gi a kownu seryusu rai (1 Samuel 15:16-29). Boiti dati, di Samuel ben ’kon owru kaba, èn di en ede-wiwiri ben kon weti’, a ben de wan bun eksempre gi trawan fu di a ben begi gi den. A ben taki dati ’a no kon na ini en prakseri srefi fu tapu fu begi gi den Israelsma, bika dati ben o de wan sondu teige Yehovah’.—1 Samuel 12:2, 23.

14, 15. Fa owruwan kan de leki Samuel te den e begi?

¹⁴ Ala den sani disi e sori taki owruwan kan abi bun krakti tapu den tra futuboi fu Yehovah. Aladi den owruwan no kan du so furu fu di den swaki noso fu di wan tra sani e meki en muilek gi den, toku den kan begi gi trawan. Owruwan, unu e frustan trutru fa den begi fu unu e du a gemeente bun? Fu di yu poti bribi na ini a brudu fu Krestes, meki Yehovah feni yu bun. Boiti dati, yu horidoro someni tenti yari langa kaba di yu „kisi tesi”, èn fu dati ede a bribi fu yu kon tranga (Yakobus 1:3; 1 Petrus 1:7). Noiti frigiti disi: „Te wan regtfardiki sma e begi fayafaya, dan a begi dati abi furu krakti bika Gado yere a begi.”—Yakobus 5:16.

¹⁵ A de fanowdu taki yu e begi taki ala sani e waka bun nanga a preikiwroko èn nanga a gemeente fu Yehovah. Sonwan fu den brada nanga sisa fu wi de na strafu, fu di den no e teki sei na ini grontapu afersi. Trawan kisi fu du nanga rampu, orloku, nanga a feti di borgu e feti nanga makandra. Trawan de leti dyaso na ini wi gemeente tu, di e kisi tesi noso gens (Mateyus 10:35, 36). A de fanowdu sosrefi taki yu e begi doronomo gi den wan di e teki fesi na ini a preikiwroko èn den wan di e teki fesi na ini den gemeente (Efeisesma 6:18, 19; Kolosesma 4:2, 3). A de wan tumusi bun sani fu begi gi tra brada nanga sisa, neleki fa Epafras ben du!—Kolosesma 4:12.

Den e leri den wan di musu kon ete

16, 17. San Psalm 71:18 taki na fesi, èn fa a sani disi kon tru?

¹⁶ Den „tra skapu”, namku den sma di abi a howpu fu libi fu têgo na grontapu, e leri furu prenspari sani fu di den abi demakandra nanga den getrow-wan fu a „pikin ipi”, noso den wan di abi a howpu fu go na hemel (Lukas 12:32; Yohanes 10:16). Psalm 71:18 ben taki na fesi: „Srefi te mi kon owru èn mi wiwiri kon weti, o Gado, no gowe libi mi, teleki mi kan fruteri den bakapikin den sani di yu du nanga yu krakti, iya, teleki mi fruteri ala den sma di sa kon ete, fu a makti fu yu.” Den salfuwan de fayafaya fu leri den tra skapu fa fu tyari moro frantwortu. Den salfuwan e du dati bifo den gowe libi den tra skapu, fu kisi glori makandra nanga Yesus Krestes.

¹⁷ Soleki fa wi si kaba, Psalm 71:18 e taki dati „den wan di sa kon ete” o kisi leri. „Den wan” disi na sosrefi den tra skapu di e kisi leri fu den salfuwan fu Gado. Yehovah gi den owruwan a grani fu gi kotoigi fu en èn fu fruteri dati na den wan di e kon na ini a tru anbegi now (Yoèl 1:2, 3). Den tra skapu e si en leki wan blesi taki den e kisi leri fu den salfuwan, èn den e kisi deki-ati fu fruteri den sani di den leri fu Bijbel na tra sma di wani dini Yehovah tu.—Openbaring 7:9, 10.

18, 19. (a) Sortu tumusi moi tori furu owru futuboi fu Yehovah kan fruteri? (b) Fu sortu sani den owru Kresten kan de seiker?

 ¹⁸ Den owru futuboi fu Yehovah, namku den salfuwan nanga den wan fu den tra skapu, kan fruteri wi sortu prenspari sani pasa fositen fu di den si den sani dati. Wan tu fu den di de na libi ete, ben si fa a fosi drama di nen „Photo-Drama der Schepping” ben plèi. Sonwan fu den sabi den brada di ben teki fesi na ini a wroko èn di sma ben poti na strafu na ini 1918. Trawan ben taki na den programa di ben de na a Waktitoren radio station, di ben nen WBBR. Furu fu den owruwan kan fruteri wi fu a ten di Yehovah Kotoigi ben musu go na fesi hei krutubangi, so taki sma no gens den moro fu anbegi Gado. Tra owruwan ben tanapu kánkan na ini a tru anbegi, aladi tiriman ben poti wan lo hebi wet gi den. Iya, den owruwan kan fruteri wi fa wi kon frustan den leri na ini Bijbel moro bun. Bijbel e gi wi a deki-ati fu leri sani fu den owruwan disi di abi bun furu ondrofeni.—Deuteronomium 32:7.

¹⁹ Wi e gi den owru Kresten a deki-ati fu de wan bun eksempre gi den yonguwan (Titus 2:2-4). Kande yu no e si ete fa trawan e kisi wini fu di yu e horidoro, yu e begi gi den, èn yu e gi den rai. Noa, Abraham, Yosef, Moses, nanga trawan no ben sabi kwetikweti o furu wini a getrow fasi fu den ben o abi gi ala den sma di ben musu kon ete. Ma toku, a bribi fu den èn a fasi fa den horidoro abi furu krakti tapu sma di ben kon bakaten. Na so yu kan abi krakti tu tapu den yonguwan.

20. Sortu blesi den wan sa kisi di e howpu tapu Yehovah te na a kaba?

²⁰ Awansi yu o pasa a „bigi banawtu” libilibi, noso yu o kisi wan opobaka bakaten, yu sa prisiri trutru te yu o kisi „a trutru libi”! (Mateyus 24:21; 1 Timoteyus 6:19) Prakseri nomo fa a o de na a ten fu a Dusun Yari Tiri fu Krestes, te Yehovah sa puru ala den problema di sma e kisi te den owru. Na presi taki a skin fu wi o swaki, wi sa firi moro bun te wi opo ibri mamanten, iya, wi sa abi moro krakti, wi sa si moro bun, wi sa yere moro bun, èn a skin fu wi o moro moi! (Yob 33:25; Yesaya 35:5, 6) Den wan di sa kisi a grani fu libi na ini a nyun grontapu sa tan yongu. Awinsi omeni yari den sa abi na a ten dati, den no sa owru fu di den e libi fu têgo (Yesaya 65:22). Fu dati ede, meki wi alamala tan howpu tapu Yehovah te na a kaba èn meki wi tan dini en nanga wi heri ati. Wi kan de seiker taki Yehovah sa du ala den sani di a pramisi wi, èn den sani di a o du sa de moro leki san wi e fruwakti.—Psalm 37:4; 145:16.

San yu ben sa piki?

• Fa ala libisma kisi wini fu a fasi fa na owru Noa ben horidoro?

• Fa a bribi fu den famiri-edeman fu fositen ben abi krakti tapu den bakapikin?

• Fa den futuboi fu Yehovah ben kisi deki-ati fu Yosef, Moses, Yosua, nanga Samuel aladi den ben owru?

• Sortu prenspari tori den owruwan kan fruteri den yonguwan?

[Aksi fu a tori disi]

[Prenki na tapu bladzijde 26]

A fasi fa Abraham horidoro ben abi bun furu krakti tapu Isak

[Prenki na tapu bladzijde 28]

Yosua kisi deki-ati fu den koni rai fu Moses

[Prenki na tapu bladzijde 29]

Te yu e begi gi trawan, dan dati kan abi furu bun bakapisi

[Prenki na tapu bladzijde 30]

Yonguwan kan leri furu te den e arki den getrow owruwan