Tan go na fesi awansi yu kon owru
Tan go na fesi awansi yu kon owru
„Den wan di prani na ini na oso fu Yehovah . . . sa tan gro bun, srefi te den ede-wiwiri kon weti.”—PSALM 92:13, 14.
1, 2. (a) Fa sma e denki nofo tron te den e yere taki wan sma kon owru? (b) San o pasa nanga den takru sani di e kon leki bakapisi fu a sondu fu Adam, soleki fa Bijbel e pramisi?
SAN yu e denki te yu e yere taki wan sma owru? A de so taki yu e denki wantewante taki a sma skin ploiploi, taki a no e yere bun, noso taki en kindi swaki? Noso yu e denki taki so wan sma kisi fu du nanga „den muilek dei”, soleki fa a skrifi na ini Preikiman 12:1-7? Efu yu e denki so, dan no frigiti taki den sani di e pasa nanga owrusma soleki fa a skrifi na ini Preikiman kapitel 12, a no sani di a Mekiman, Yehovah Gado, ben abi na prakseri gi sma. Ma den sani disi e kon leki bakapisi fu a sondu fu Adam.—Romesma 5:12.
2 A no de wan takru sani fu kon owru, bika efu wan sma wani tan na libi, a musu kon owru. Fu taki en leti, a bun te sani di de na libi e gro èn e kon lepi. Na ini den siksi dusun yari di pasa, sma ondrofeni takru sani leki bakapisi fu sondu. Heri esi ala den takru sani disi no sa de moro èn ala libisma di e gi yesi na Gado sa abi wan bun libi soleki fa Gado wani dati. Den no sa kisi den problema di e kon te wan sma kon owru èn den no sa sari fu di sma no sa dede moro (Genesis 1:28; Openbaring 21:4, 5). Na a ten dati „nowan sma di e libi drape sa taki: ’Mi siki’” (Yesaya 33:24). Owrusma sa kon ’tranga baka leki di den ben yongu’, èn den skin sa ’kon moro moi leki na ini den yongu yari’ (Yob 33:25). Now wi alamala e kisi fu du nanga den takru sani di e pasa leki bakapisi fu a sondu di wi kisi fu Adam. Ma aladi den takru sani disi e pasa, toku den futuboi fu Yehovah e kisi blesi o moro den e kon owru.
3. Na sortu fasi Kresten kan „tan gro bun, srefi te den ede-wiwiri kon weti”?
3 A Wortu fu Gado e gi wi a dyaranti taki „den wan di prani na ini na oso fu Yehovah . . . sa tan gro bun, srefi te den ede-wiwiri kon weti” (Psalm 92:13, 14). A psalm skrifiman e agersi den getrow futuboi fu Gado nanga bon di prani na ini na oso fu Yehovah èn a e sori taki aladi den kon swaki, toku den man meki muiti fu tranga a bribi fu den èn fu go na fesi na ini a tru anbegi, aladi den e kon swaki. Furu eksempre de na ini Bijbel èn na ini a ten disi di e sori taki a sani disi tru.
’Ala ten a ben de na ini a tempel’
4. Fa na owru umaprofeiti Ana ben sori taki a de getrow na Gado, èn sortu blesi a kisi?
4 Luku na eksempre fu na umaprofeiti Ana di ben libi na ini a fosi yarihondro. Ana ben abi 84 yari, èn „noiti a pasa taki a no ben de na ini a tempel, ma dei nanga neti a ben e dini drape aladi a ben e faste èn a ben e begi fayafaya”. A no ben kan de so taki Ana ben e libi trutru na ini a tempel, fu di en papa no ben de wan Leifisma, ma a ben de „fu a lo fu Aser”. Yu kan frustan o furu muiti Ana ben musu meki fu go ibri dei na a tempel, èn fu de drape fu mamanten te go miti neti te den ben e tyari bron-ofrandi. Ma Ana kisi bigi blesi fu di a tan getrow. A ben abi a grani fu si a beibi Yesus di Yosef nanga Maria tyari en kon na a tempel fu poti en na fesi Yehovah, soleki fa a Wet ben taki. Di Ana si Yesus, a „bigin taki Gado tangi èn a ben taki fu a pikin nanga ala sma di ben fruwakti a frulusu fu Yerusalem”.—Lukas 2:22-24, 36-38; Numeri 18:6, 7.
5, 6. Na sortu fasi furu owruwan na ini a ten disi de leki Ana?
5 Furu owru brada nanga sisa fu wi na ini a ten disi de leki Ana, fu di den e go doronomo na den konmakandra, den e begi Gado fayafaya fu blesi a tru anbegi, èn den lobi fu preiki a bun nyunsu. Wan brada di owru moro leki 80 yari, èn di e go doronomo na den Kresten konmakandra nanga en wefi, e taki: „Wi kon kisi a gwenti fu go na den konmakandra. Wi no wani de na wan tra presi. Wi wani de pe a pipel fu Gado de. Na drape wi e firi bun.” Disi na wan heri moi eksempre gi wi alamala!—Hebrewsma 10:24, 25.
6 Jean di lasi en masra na ini dede èn di pasa 80 yari, lobi fu taki: „Efu wan sani de fu du na ini a tru anbegi èn mi man yepi, dan mi wani du dati.” A e taki moro fara: „A tru taki mi e sari son leisi, ma dati no wani taki dati tra sma musu sari tu.” Yu kan si na Jean en fesi taki a e prisiri te a e fruteri fa a lobi fu abi demakandra nanga tra brada nanga sisa te a e go na tra kondre. Di a ben go koiri no so langa pasa, dan a taigi den sma di ben de nanga en: „Mi no wani go luku den moi presi moro, ma now mi wani go na ini a preikiwroko!” Aladi Jean no ben man taki a tongo di den sma fu a presi drape e taki, toku a ben man yepi sma so taki den ben wani sabi moro fu a boskopu fu Bijbel. Boiti dati, Jean e wroko wan tu yari kaba na ini wan gemeente pe moro preikiman ben de fanowdu, aladi disi ben wani taki dati a ben musu leri wan tra tongo èn a ben musu rèi wán yuru langa fu go na den konmakandra.
Den e tan leri sani
7. Di Moses ben owru kaba, dan san a taki fu sori taki a ben wani kon tron wan moro bun mati fu Gado?
7 O moro wan sma e owru, o moro ondrofeni a e kisi (Yob 12:12). Ma a no abi fu de so taki o moro wan sma e kon owru, o moro a bribi fu en e kon tranga. Na presi taki den getrow futuboi fu Gado e denki taki den sabi furu kaba fu di den ben leri sani na ini a ten di pasa, den e meki muiti fu ’leri sabi moro sani’ te den e kon owru (Odo 9:9). Di Yehovah ben gi Moses wan wroko fu du, Moses ben abi 80 yari (Exodus 7:7). Na ini a ten dati, a ben de wan aparti sani fu kon owru so, bika Moses ben skrifi: „Wi kan tron seibitenti yari, ma efu wi tranga wi kan tron aititenti yari” (Psalm 90:10). Ma noiti Moses ben feni taki a owru tumusi fu leri wan sani. Baka di Moses dini Gado furu yari langa, èn a kisi furu grani èn bigi frantwortu, a ben begi Yehovah: „Grantangi sori mi den pasi fu yu, fu mi kan sabi yu” (Exodus 33:13). Ala ten Moses ben wani du sani fu kon tron wan moro bun mati fu Yehovah.
8. San Danièl du fu kon sabi moro sani aladi a ben pasa 90 yari kaba, èn san ben de a bakapisi?
8 A profeiti Danièl di ben pasa 90 yari kande, ben e ondrosuku den santa buku finifini ete. Den sani di a ben kon sabi fu di a ben studeri „den buku”, kande den buku soleki Lefitikus, Yesaya, Yeremia, Hosea, nanga Amos, ben meki a taki fayafaya nanga Yehovah na ini begi (Danièl 9:1, 2). Yehovah ben piki a begi fu en fu di A meki Danièl kon sabi o ten a Mesias ben o kon èn a meki a kon sabi fa sani ben o waka nanga a tru anbegi.—Danièl 9:20-27.
9, 10. San son owru brada nanga sisa du fu tan leri sani?
9 Neleki Moses nanga Danièl wi kan meki muiti fu tan leri sani. Wi kan du dati te wi e studeri Bijbel solanga wi de na libi. Furu fu wi e du dati. Worth, wan Kresten owruman di pasa 80 yari kaba, e meki muiti fu kon sabi ala den nyun sani di „a getrow èn koni srafu” e leri wi (Mateyus 24:45). A e taki: „Mi lobi den sani di Bijbel e leri wi, èn mi feni en wan moi sani fu si fa wi e kon frustan Bijbel moro nanga moro” (Odo 4:18). Na so a de tu nanga Fred di de moro leki 60 yari kaba na ini a furuten diniwroko. Fred lobi fu bigin taki Bijbel tori nanga brada nanga sisa. A e taki: „Mi musu tan leri sani fu Bijbel. Efu yu e meki muiti fu frustan den sani di yu leisi na ini Bijbel, èn efu yu e pruberi fu si fa den ’eksempre’ na ini Bijbel abi fu du nanga tra sani di yu sabi kaba, dan yu no o sabi pisipisi nomo fu Bijbel. Yu o si taki ibri pisi fu Bijbel moi srefisrefi èn taki den alamala abi fu du nanga makandra.”—2 Timoteyus 1:13.
10 Te wan sma kon owru kaba, dan dati no wani taki dati a no man leri nyun sani nanga muilek sani moro. Sma di pasa 60, 70, èn srefi 80 yari ben man leri leisi èn skrifi, èn den ben man leri wan tra tongo. Son Yehovah Kotoigi du disi so taki den ben man preiki a bun nyunsu gi sma fu difrenti kondre (Markus 13:10). Harry nanga en wefi ben abi pikinmoro 70 yari di den bosroiti fu go yepi na ini wan gemeente pe sma e taki Potogisitongo. Harry taki: „A no de fu taki dati o moro yu e owru, o moro muilek a e kon de fu du wan sani.” Ma fu di den ben du muiti èn fu di den ben horidoro, meki den ben man hori bijbelstudie na ini Potogisitongo. Furu yari kaba Harry e hori lezing na ini Potogisitongo na den distrikt kongres.
11. Fu san ede wi e luku san son getrow owru brada nanga sisa ben du na ini a tru anbegi?
11 A no de fu taki dati a no ala sma man du den sani dati, kande fu di den no gosontu noso fu di den de na ini wan tra situwâsi. Ma dan fu san ede wi e luku san son owru brada nanga sisa ben man du? A no fu di wi wani taki ala sma musu du densrefi sani di den brada nanga sisa dati du. Na presi fu dati, wi musu si en neleki fa na apostel Paulus ben taki na ini a brifi di a skrifi gi den Hebrew Kresten. Na ini a brifi dati a ben taki fu den getrow gemeente owruman: „Un musu waka baka a bribi fu den, aladi unu e luku finifini fa a libi fu den e waka” (Hebrewsma 13:7). Te wi e prakseri na eksempre fu den sma disi di de fayafaya, dan dati kan gi wi deki-ati fu abi wan tranga bribi neleki den owrusma disi, èn fu de fayafaya tu na ini a diniwroko fu Gado. Harry, di abi 87 yari now, e taki san e gi en deki-ati fu go doro nanga en diniwroko. A e taki: „Fu di mi no o libi langa moro, meki mi wani gebroiki a ten di mi abi ete bun èn mi wani du ala san mi man na ini a diniwroko fu Yehovah.” Fred, di wi ben taki fu en kaba, kisi furu prisiri fu a wroko di a e du na Bethel. A e taki: „Yu musu kon sabi san na a moro bun fasi fa yu kan dini Yehovah èn yu musu tan dini en na a fasi dati.”
Den e tan getrow aladi a situwâsi fu den kenki
12, 13. Fa Barsilai sori taki a ben e dini Gado na wan getrow fasi aladi a ben kon owru kaba?
12 Te sma e kon owru èn a skin fu den e kon swaki, dan dati kan muilek gi den. Ma toku den sma disi kan dini Gado na wan getrow fasi aladi den skin e kon swaki. Wan moi eksempre fu disi na Barsilai, wan man fu Gilead. Di a ben abi 80 yari, dan a sori switifasi trutru gi David nanga a legre fu David, fu di a ben gi den nyanyan èn wan presi fu tan na a ten di Absalom ben opo ensrefi teige Kownu David. Di David drai go baka nanga en legre na Yerusalem, dan Barsilai go nanga den te na Yordanliba. David ben wani taki Barsilai kon tan nanga en na en kownu-oso. San Barsilai du? „Mi abi aititenti yari now. . . . Yu futuboi no man tesi san a e nyan èn san a e dringi, èn mi no man arki a sten moro fu mansma nanga umasma di e singi. . . . Luku yu futuboi Kimham dyaso. Meki a go nanga yu mi kownu, èn yu kan du nanga en san bun gi yu.”—2 Samuel 17:27-29; 19:31-40.
13 Aladi Barsilai ben kon owru kaba, toku a ben du san a man fu horibaka gi a kownu di Yehovah poti. A ben sabi taki a no ben man tesi èn si so bun moro, ma toku a no ben brokosaka. Na presi fu dati, a no ben denki ensrefi nomo, ma a ben meki Kimham kisi a sani di David ben wani gi en. Na so fasi a sori suma a ben de trutru. Neleki Barsilai, furu owrusma na ini a ten disi e sori taki den no e denki densrefi nomo èn den lobi fu du bun gi trawan. Den e du ala san den man fu horibaka gi a tru anbegi, fu di den sabi taki „den sortu srakti-ofrandi dati e plisi Gado”. A de wan blesi gi wi taki wi abi den getrow brada nanga sisa disi na ini wi gemeente!—Hebrewsma 13:16.
14. Fu san ede a bun fu sabi taki David ben owru di a skrifi Psalm 37:23-25?
14 Aladi David miti furu sani na ini en libi, toku a ben tan abi na overtoigi taki Yehovah e sorgu ala ten gi den getrow futuboi fu en. Bifo David dede, a skrifi a singi di wi sabi now leki Psalm 37. Yu e si David kaba fa a e denki dipi, aladi a e prei a harpu èn e singi den wortu disi: „Na Yehovah e sori wan tranga man a pasi di a musu waka, èn A lobi en te a man e waka a pasi dati. Aladi a kan fadon, toku sma no sa trowe en fu di Yehovah e hori en anu. Mi ben de wan yonkuman, èn now mi kon owru, ma noiti mi si taki Gado libi wan regtfardikisma en wawan, èn noiti mi si taki den pikin fu en e suku brede” (Psalm 37:23-25). Yehovah ben feni en fanowdu fu skrifi taki David ben owru di a skrifi a psalm disi. Wi kan frustan moro krin fa David ben firi di a taki den wortu disi!
15. Fa na apostel Yohanes na wan moi eksempre fu getrowfasi aladi a situwâsi fu en ben kenki èn a ben kon owru?
15 Na apostel Yohanes na wan moi eksempre tu fu di a ben tan getrow aladi a situwâsi fu en ben kenki èn a ben kon owru. Yohanes ben dini Gado sowan 70 yari kaba di a go leki strafuman na a èilanti Patmos, ’fu di a ben e taki fu Gado èn fu di a ben e kotoigi fu Yesus’ (Openbaring 1:9). Toku a no ben kaba ete nanga a wroko fu en. Fu taki en leti, na di Yohanes ben owru kaba a skrifi den buku fu en na ini Bijbel. Di a ben de na Patmos, a ben kisi a kefalek moi fisyun di skrifi na ini a buku Openbaring, èn a ben skrifi ala sani soifri (Openbaring 1:1, 2). Furu sma e bribi taki a ben komoto na ini katibo na a ten di Kèiser Nerva fu Rome ben e tiri. Baka dati, na a pisi ten fu 98 G.T., di a ben abi 90 noso 100 yari kande, dan Yohanes skrifi na Evangelie fu en èn den dri brifi fu en.
Den sori taki den horidoro furu yari langa kaba
16. Fa den sma di no man taki bun moro kan sori taki den de getrow na Yehovah?
16 Difrenti problema de di kan meki taki wi no man du so furu moro, èn sonwan fu den problema bigi moro trawan. Fu eksempre, son sma no man taki bun moro. Ma den man memre ete fa Gado sori lobi gi den èn fa a sori switifasi gi den. Aladi den sma disi no man taki so bun moro, toku den kan taigi Yehovah na ini den ati taki ’den lobi den wet fu en, èn taki heri dei den e poti prakseri na den’ (Psalm 119:97). Yehovah fu en sei sabi suma „e prakseri en nen”, èn a sabi taki den sma disi de heri tra fasi leki furu fu den sma di no e du san A wani (Maleaki 3:16; Psalm 10:4). A e meki wi firi bun fu sabi taki Yehovah e prisiri nanga den dipi prakseri fu wi ati!—1 Kroniki 28:9; Psalm 19:14.
17. Sortu moi sani den getrow futuboi fu Yehovah du someni tenti yari langa kaba?
17 A sani di wi no musu frigiti na taki den sma di dini Yehovah getrow someni tenti yari langa kaba, du wan sani di den no ben o man du efu den no ben kon owru. A sani di den du na taki den horidoro furu yari kaba. Yesus ben taki: „Te unu horidoro, dan unu o kisi libi” (Lukas 21:19). A de tumusi prenspari taki wi e horidoro te wi wani kisi têgo libi. Unu di „du a wani fu Gado” èn di tan getrow un heri libi langa, kan fruwakti fu kisi ’a sani di Gado pramisi’.—Hebrewsma 10:36.
18. (a) San Yehovah e warderi fu den owruwan? (b) San wi sa go luku na ini a tra artikel?
18 Yehovah e warderi san yu e du nanga yu heri ati na ini a diniwroko fu en, awansi dati no furu. Srefi efu ’a skin fu yu’ e kon swaki moro nanga moro fu di yu e kon owru, toku ’a sma di yu de fu inisei’ e kisi nyun krakti dei fu dei (2 Korentesma 4:16). A no de fu taki dati Yehovah e warderi den sani di yu du na ini a ten di pasa, ma a de krin fu si tu taki a e warderi sosrefi den sani di yu e du nownowde fu gi en nen glori (Hebrewsma 6:10). Na ini na artikel di e kon, wi sa go luku sortu blesi wi o kisi te wi e tan getrow.
San yu ben sa piki?
• San owru Kresten na ini a ten disi kan leri fu a moi eksempre fu Ana?
• Fu san ede a no abi fu de so taki te wan sma kon owru, a no man du so furu moro?
• Fa den owruwan kan tan sori taki den e dini Gado na wan getrow fasi?
• Fa Yehovah e si a diniwroko di owruwan e du gi en?
[Aksi fu a tori disi]
[Prenki na tapu bladzijde 23]
A grani Danièl ben kon si na ini „den buku” o langa Yuda ben o de na ini katibo
[Prenki na tapu bladzijde 25]
Furu owruwan na moi eksempre gi wi fu di den e go na den konmakandra doronomo, den e preiki fayafaya, èn den lobi fu leri sani