Wan mansma musu besnèi efu a wani de wan man-nengre trutru?

NA INI furu kondre, sma e besnèi boi te den de beibi, fu di den no wani taki den boi kon siki. Na ini tra kondre, a de a gwenti taki man-nengre noiti e besnèi. Son pipel, soleki den Dyu nanga den Moslimsma, abi a gwenti fu besnèi boi. Den no e du dati fu di den no wani meki den kisi son siki, ma fu di a sani disi de prenspari na ini a bribi fu den.

Ma son pipel e besnèi wan boi fu di den wani sori nanga dati taki a boi tron wan man-nengre trutru. Te den o du dati, dan nofo tron den e seni a boi go na wan spesrutu skoro pe a e leri moro fu den gwenti fu a pipel fu en. Na a skoro dati sma e besnèi a boi, èn den e hori en drape wan tu wiki teleki a kon betre baka. Na ini a pisi ten dati a boi no e miti tra sma. Te a boi de na a skoro, dan a musu du spesrutu seremonia èn den e leri en fa fu de wan man-nengre trutru. A de so taki wan boi musu besnèi èn du ala den sani disi fu sori taki a de wan man-nengre trutru? Meki wi go luku san Bijbel e taki fu a fasi fa Gado e si a tori disi.—Odo 3:5, 6.

A fasi fa Gado e si en te wan mansma besnèi

Son pipel fu owruten, soleki den Egeptesma, ben e besnèi mansma. Disi wani taki dati den ben koti a fesisei-buba puru fu a syenpresi fu wan man. Ma Abraham no ben kweki nanga den gwenti dati. Fu taki en leti, Abraham ben de wan bigibigi man kaba di a besnèi. Ma toku, na a ten di a no ben besnèi a sori taki a ben de wan man di abi deki-ati trutru. Abraham ben teki wan pikin grupu man fu lon baka den legre fu fo kownu di ben teki en neef Lot tyari gowe, èn a ben wini den legre dati (Genesis 14:8-16). Sowan 14 yari baka dati, Gado taigi Abraham taki a musu besnèi èn taki a musu besnèi ala den mansma na ini en osofamiri tu. Fu san ede Gado ben taigi en fu du dati?

Abraham no ben musu du disi fu sori taki a no de wan pikin boi moro èn taki a tron wan bigisma. Dati no kan kwetikweti fu di a ben abi 99 yari kaba! (Genesis 17:1, 26, 27) Gado ben taigi Abraham fu san ede a ben musu besnèi: „Unu leki mansma musu koti a fesisei-buba fu un syenpresi puru. Disi musu memre unu na a frubontu di mi meki nanga unu” (Genesis 17:11). Na ini a frubontu dati di Gado ben meki nanga Abraham, a ben pramisi en taki na Abraham sa meki taki „ala den famiri fu grontapu” kisi blesi (Genesis 12:2, 3). Sobun, te wi e luku a fasi fa Gado e si a tori, dan wan mansma no abi fu besnèi fu sori taki a tron wan man-nengre trutru. Gado ben wani taki wan mansma musu besnèi fu sori taki en na wan Israelsma, noso wan bakapikin fu Abraham, di ben abi a grani fu kisi „a santa wortu fu [Gado]”.—Romesma 3:1, 2.

Baka wan pisi ten, den Israelsma ben lasi a grani dati fu di den ben weigri fu poti bribi na ini a tru Manpikin fu Abraham, namku Yesus Krestes. Fu dati ede Gado no ben si den moro leki a pipel fu en, èn te den ben besnèi, dan dati no ben wani taki noti moro gi Gado. Ma toku son Kresten na ini a fosi yarihondro ben de nomonomo taki sma musu besnèi fu di Gado wani dati ete (Tori fu den Apostel 11:2, 3; 15:5). Dati meki na apostel Paulus ben seni Titus fu „poti den sani reti di no ben bun ete” na ini difrenti gemeente. Paulus ben taigi Titus san na wan fu den sani di no ben bun ete. A ben skrifi: „Furu trangayesi sma de, sosrefi sma di e taki soso lawlaw sani, èn sma di e kori trawan; na mindri den yu abi spesrutu den wan di e hori densrefi na a  gwenti fu besnèi sma. A de fanowdu fu tapu a mofo fu den sma disi, bika na den srefi sma disi e tan bruya heri osofamiri fu di den e leri sma sani di den no mag leri den èn den e du disi soso fu feni wini na wan fasi di no fiti.”—Titus 1:5, 10, 11.

A rai di Paulus gi e fiti sosrefi na ini a ten fu wi. A ben o de teige Bijbel gronprakseri efu wan tru Kresten e taigi wan trawan taki a musu besnèi en pikin. Na presi taki a „e bumui na ini tra sma tori”, a musu libi a tori disi gi a papa nanga a mama fu bosroiti san den wani du (1 Petrus 4:15). Boiti dati, Gado ben meki Paulus skrifi fu a besnèi di sma musu besnèi soleki fa a Wet ben taki. A ben skrifi: „A de so taki wan sma ben besnèi kaba di Gado kari en? Meki a no tron wan sma di no besnèi. A de so taki wan sma no ben besnèi di Gado kari en? Meki a no besnèi. A no wani taki noti efu wan sma besnèi noso efu a no besnèi; ma san e teri, na te wan sma e hori den komando fu Gado. Meki ibriwan sma tan soleki fa a ben de di Gado kari en.”—1 Korentesma 7:18-20.

Fa a de nanga den skoro pe boi e go fu besnèi?

Ma fa a de te papa nanga mama di de Kotoigi fu Yehovah e bosroiti fu besnèi a boi fu den? A ben o de teige Bijbel gronprakseri te den ben o seni a boi fu den go na wan fu den skoro pe den e besnèi boi? Te wan boi e go na so wan skoro, dan a no e go fu besnèi wawan. Wan tu wiki langa, a boi disi o abi krosibei demakandra nanga tra boi èn nanga skoromeester di no e anbegi Yehovah. Furu fu den sani di den e leri na den skoro disi de teige den hei markitiki fu Bijbel. Bijbel e warskow wi: „Takru kompe e pori bun gwenti.”—1 Korentesma 15:33.

Boiti dati, a e pasa moro nanga moro taki den boi di e go na den skoro disi kan kisi mankeri. Na ini 2003 wan tijdschrift ben gi a warskow disi: „Na ini 2003, a de so baka taki tumusi ogri sani pasa leki bakapisi fu a besnèi di sma e besnèi. Na heri grontapu nyunsu e bari taki boi dede noso taki den kisi hebi mankeri fu di den besnèi. . . . Fu taki en leti, na furu fu den sokari skoro pe sma e besnèi boi na ini a ten disi, den no e besnèi boi bun kwetikweti, èn den sani di den e du kan meki den boi dede srefi” (South African Medical Journal).

Ma san de moro ogri leki a mankeri di wan boi kan kisi na en syenpresi te sma no besnèi en bun, na taki en bribi kan kon swaki. Den sani di den e leri èn e du na den skoro pe sma e besnèi, abi furu fu du nanga afkodrei èn nanga na anbegi di sma e anbegi den afo. Fu eksempre, sma no feni taki den ogri sani di e miti den boi e pasa fu di trawan no besnèi den bun, noso fu di den no gebroiki krin wrokosani fu besnèi den boi. Na presi fu dati, furu fu den e bribi taki den ogri sani disi e pasa fu di wan sma wisi den boi noso fu di den afo fu den di dede kaba ben atibron na den tapu. Bijbel e taki fu falsi anbegi: „No kon na ondro a srefi tyatyari nanga sma di no de na bribi. Bika, san regtfardikifasi abi fu du nanga kruktudu? Noso, san leti abi fu du nanga dungru? . . . ’Fu dati ede, komoto na den mindri, èn poti yusrefi aparti fu den’, na so Yehovah e taki, ’èn no fasi den sani moro di no krin’; ’èn mi sa teki unu’” (2 Korentesma 6:14-17). Te wi e luku a rai disi, dan a no ben o de wan koni sani kwetikweti efu papa nanga mama di de Kotoigi fu Yehovah e seni den boi go na wan skoro pe sma o besnèi den.

San e meki wan Kresten de wan man-nengre trutru?

Awansi wan Kresten brada besnèi noso a no besnèi, a sani disi no e sori taki a de wan man-nengre trutru. A moro prenspari sani di tru Kresten wani du a no fu „plisi libisma”, ma na fu plisi Gado.—Galasiasma 6:12.

Ma efu wan Kresten wani plisi Gado, a musu „besnèi en ati” (Deuteronomium 10:16; 30:6; Mateyus 5:8). Disi no e pasa nanga wan nefi, ma wan sma e du dati te a e weigri fu du sani di no fiti, èn te a e weigri fu denki taki a bun moro trawan fu di a besnèi. Awansi wan Kresten besnèi noso a no besnèi, a sani di e sori taki a de wan man-nengre trutru na te a e horidoro aladi a e kisi tesi, èn te a e „tanapu kánkan na ini a bribi”.—1 Korentesma 16:13; Yakobus 1:12.