Wan sma de di man tyari wan kaba kon na ogridu?

Wan pikin boi e si wan sani na gron. Te a e piki en fu si san na a sani, dan a sani e sutu fu di na wan bom. Disi e meki taki a boi kon breni èn malengri. Wan mama e libi en watrawatra beibi na wan doti-ipi na sei pasi. Wan man di lasi en wroko e go nanga wan gon na a wrokope fu en èn a e sutu ala sma di a e si, èn baka dati a e kiri ensrefi. Wan lespeki man e dwengi pikin-nengre fu abi seks nanga en.

A DE wan sari sani taki den sortu ogri disi e pasa ala dei na ini a ten disi. Ma san de moro ogri leki dati, na taki sma e kiri trawan di de fu wan tra ras èn taki sma e du ogri-ati sani fu gens tirimakti. Wan tijdschrift ben taki na ini 1995: „Te wi e luku ala den ogri di pasa na ini a yarihondro disi, dan wi kan taki dati na Satan tiri a yarihondro disi. Noiti ete libisma ben angri so fu kiri milyunmilyun trawan fu di den sma dati na fu wan tra ras, fu wan tra bribi, noso fu di den no abi a srefi posisi na ini a libimakandra.”

Boiti dati, libisma e doti a loktu, den e doti grontapu, den e pori a naturu fu di den e gebroiki ala den warti sani na ini, èn den e kiri so furu meti taki sonwan fu den meti no de fu feni moro na grontapu. Libisma kan tyari wan kaba kon na ala den ogri sani disi, èn den kan meki grontapu kon tron wan moro bun presi? Noso a muiti di den e meki na fu soso, noso na puru bruku weri bruku? Wan professor di skrifi furu tori fu na ogri di e pasa na grontapu, ben taki: „Mi ben du ala san mi man fu meki grontapu kon tron wan moro bun presi, ma a situwâsi no kenki kwetikweti.” Kande yu e si a tori so tu.

Wi kan agersi a situwâsi na grontapu nanga wan sipi di de na tapu se èn pe a watra e kon moro krasi dei fu dei. A sipi e tan drifi go na a sei fu na ogri winti, èn nowan sma kan tapu en fu go na a sei dati. Aladi nowan sma wani taki sani e waka na so wan takru fasi, toku libisma no abi bun bakapisi te den meki muiti fu kenki grontapu.

Fu taki en leti, a situwâsi disi e kon ogri dei fu dei, e kon fu di libisma abi sondu (Romesma 3:23). Ma toku den furu ogri sani di e pasa moro nanga moro, no e kon nomo fu di libisma e du den. A kan taki wan tranga ogri-ati sma de di wi no man si, èn di e meki libisma du den ogri disi? Efu a de so trutru, dan suma na en èn fa wi kan kibri wisrefi gi en? Na artikel di e kon sa taki fu den aksi disi.

[Sma di abi a reti fu a prenki na tapu bladzijde 3]

© Heldur Netocny/Panos Pictures