Markitiki di no e kenki

NA INI ala libimakandra, sma e hori densrefi na wet di e yepi den fu tyari densrefi na wan fasi di fiti. Sma lobi te trawan de opregti, te den e sori switifasi nanga sari-ati gi trawan, èn te den abi a bun fu trawan na prakseri.

Suma musu leri wi fa wi musu tyari wisrefi?

Na ini a fosi yarihondro G.T., Saulus, wan man di ben kisi heiskoro-leri, ben e libi na mindri sma fu dri prenspari kulturu, namku  a Dyu kulturu, a Griki kulturu, nanga a kulturu fu den Romesma. Den pipel disi ben abi furu difrenti gwenti nanga wet di ben e sori den fa den ben musu tyari densrefi. Ma Saulus ben si tu taki libisma abi wan tra sani di e yepi den fu kon sabi san bun èn san no bun. Dati na a konsensi fu wi. Baka di Saulus tron wan Kresten di sma ben sabi leki na apostel Paulus, a skrifi: „Te den trakondre sma di no abi wet e du den sani di a wet e taki, sondro taki wan sma taigi den, [„fu di den e firi taki dati na a yoisti fasi fu handri”, The New Testament in Modern Speech] dan den sma disi na wan wet gi densrefi awansi den no abi wet. Na den srefi sma disi e buweisi taki a wet skrifi na ini den ati, èn a konsensi fu den e buweisi dati tu.”—Romesma 2:14, 15.

Ma te wi musu bosroiti san bun èn san no bun, dan a bun fu du san wi e firi nomo? Soleki fa yu si kande, dan na ini ala den yari di libisma de na grontapu, difrenti man nanga uma, èn sosrefi grupu sma meki bun furu fowtu. A sani disi meki taki furu sma kon frustan taki den abi wan sma fanowdu di koni moro libisma, fu leri den san na a moro bun fasi fa den musu tyari densrefi. Furu sma sa agri taki a Mekiman na a moro bun sma di kan gi wi a tumusi bun leri dati. Datra Carl Jung, ben skrifi na ini a buku fu en: „Wan sma di no e bribi tranga na ini Gado, no man kakafutu gi den tesi fu grontapu” (The Undiscovered Self).

A sani dati e kruderi nanga den wortu di wan profeiti fu owruten ben skrifi: „A no de na libisma fu luku gi ensrefi sortu pasi a wani teki. A no de na wan libisma di e waka srefi, fu taki pe a wani poti en futu” (Yeremia 10:23). A Mekiman fu wi e taki: ’Mi na a sma di e leri yu fu tyari wini kon gi yusrefi, èn mi e meki yu waka na tapu a pasi di yu musu waka.’—Yesaya 48:17.

Wan buku di e gi wi bun leri

Den wortu fu den tekst di kari na fesi, skrifi na ini wan buku di e gi sma bun leri. A buku disi na Bijbel, èn sma na heri grontapu abi en. Milyunmilyun sma na heri grontapu, srefi sma di no de Kresten èn sma di no e go na kerki, suku koni rai na ini Bijbel. A Doisri puwema skrifiman Johann Wolfgang von Goethe, ben skrifi: „Mi lobi Bijbel èn mi e lespeki en tu, fu di a yepi mi doronomo fu tyari misrefi na a yoisti fasi.” A Hindu fesiman Mohandas Gandhi ben taki: „Mi e gi unu a rai fu teki leri fu a Bergitaki [wan tu fu den leri fu Yesus Krestes di skrifi na ini Bijbel] . . . Bika den leri fu a Bergitaki na gi ibriwan fu wi.”

Na apostel Paulus di wi ben kari na fesi, ben sori taki den Santa Buku fu Bijbel, na den moro prenspari buku di e leri wi fa fu tyari wisrefi na a yoisti fasi. Paulus ben taki: „Na Gado srefi ben meki sma skrifi ala den sani di de na ini Gado Buku; den sani disi bun fu gi leri” (2 Timoteyus 3:16). A sani disi tru?

A ben o bun te yusrefi e ondrosuku dati. Luku den gronprakseri di skrifi na tapu a tra bladzijde. Luku sortu bun sani wi e leri fu den. Denki dipi fa den sani di wi e leri fu den gronprakseri disi kan kenki wi libi, èn fa den e yepi wi fu libi moro bun nanga trawan.

Yu o teki a leri disi?

Den bun rai di wi kari na fesi, na wan tu nomo fu ala den trawan di skrifi na ini den Santa Buku fu Bijbel. Boiti den rai disi, Gado Wortu e warskow wi bun furu leisi fu no abi takru denki èn fu no taki noso du sani di no fiti, fu di den sani dati kan pori wi libi.—Odo 6:16-19.

Iya, den leri fu Bijbel e gi libisma wan sani di den abi tranga fanowdu. Dati na rai di e yepi den fu tyari densrefi na a moro bun fasi. Den sma di e teki den rai disi èn di e fiti den na ini den libi, e tyari bigi kenki kon na ini den libi. Den e kisi wan tra denki fu sani (Efeisesma 4:23, 24). Den e suku fu du bun. Fu di furu sma teki den bun leri fu Gado di skrifi na ini Bijbel, meki den no e desko trawan moro, den no e denki takru fu trawan,  èn den no abi bita-ati moro gi trawan (Hebrewsma 4:12). Den sani di sma leri na ini den Buku fu Bijbel meki taki den tapu fu du iniwan sortu ogri, èn den tron moro bun sma.

Iya, den leri fu Bijbel yepi milyunmilyun sma fu tapu nanga takru gwenti di pori a libi fu someni tra sma (1 Korentesma 6:9-11). Boiti taki den leri fu Bijbel yepi den sma disi fu tapu nanga takru gwenti, den yepi tu fu kenki na ati fu den, den sma disi kisi nyun howpu, èn wan moro bun osofamiri libi.  Awansi fa grontapu e kon ogri, sma na ala kondre e tan meki muiti fu tron moro bun sma. Èn a sani disi sa tan go doro. „A grun grasi kon drei, a bromki kon flaw; ma a wortu fu wi Gado sa tan te ten di no skotu.”—Yesaya 40:8.

Ma yu o teki den leri di komoto fu „a wortu fu wi Gado”? Yehovah Kotoigi sa breiti fu sori yu fa yu kan kisi wini fu den leri fu Bijbel. Te yu e hori yusrefi na den leri disi, dan Gado sa feni yu bun, èn yu sa man libi fu têgo aladi den gronprakseri fu Gado sa tiri yu libi.

[Faki/Prenki na tapu bladzijde 6, 7]

GRONPRAKSERI DI E TYARI WINI KON ALA TEN

Fa fu handri nanga trawan. „Fu dati ede, ala sani di unu wani meki sma du gi unu, na dati un musu du gi den tu; fu taki en leti, disi na san a Wet nanga den leri fu den Profeiti wani taki.”—Mateyus 7:12.

Lobi tra sma. „Yu musu lobi tra sma leki fa yu lobi yusrefi” (Mateyus 22:39). „Efu yu abi lobi, dan yu no sa du tra sma ogri; fu dati ede, te yu abi lobi, dan yu man du san a wet e taki.”—Romesma 13:10.

Sori lespeki gi trawan. „Neleki fa brada lobi makandra, na so un musu abi dipi firi gi makandra. Unu fosi musu bigin sori trawan lespeki.”—Romesma 12:10.

Suku vrede. „Tan libi na ini vrede nanga makandra” (Markus 9:50). „Efu a kan, efu a e didon na unu, dan libi na ini vrede nanga ala sma” (Romesma 12:18) „Meki wi du muiti fu du den sani di e tyari vrede kon.”—Romesma 14:19.

Gi trawan pardon. „Gi wi pardon fu den sondu fu wi leki fa wi e gi pardon na sma di du wan sondu teige wi” (Mateyus 6:12). „Tron sma di e du bun gi makandra, èn sori sari-ati na wan lobi fasi; un musu gi makandra pardon nanga un heri ati.”—Efeisesma 4:32.

De getrow. „Dringi watra fu yu eigi alenbaki, èn watra di e lon komoto na a mindri fu yu eigi peti. Den fonten fu yu musu panya go na dorosei na ala kanti, den watra di e lon komoto fu yu musu go na ini den publiki pren srefi? Meki den de gi yu wawan, èn no gi freimde sma nanga yu. Meki a watra-olo fu yu de wan blesi sani, èn prisiri nanga a wefi fu yu yongu yari, wan moi dia nanga wan stonbokoboko di e plisi na ai. Meki en eigi bobi drungu yu ala ten. Meki a lobi fu en prisiri yu pasa marki ala ten. Fu di dati de so, dan fu san ede yu, mi manpikin, musu prisiri pasa marki nanga wan freimde uma” (Odo 5:15-20). „A sma di de getrow na ini a moro pikin sani, sa de getrow tu na ini furu sani, èn a sma di no de regtfardiki na ini a moro pikin sani, no sa de regtfardiki tu na ini furu sani” (Lukas 16:10). „Fu di wi na futuboi, meki wi musu de getrow.”—1 Korentesma 4:2.

De opregti. „Mi kan de opregti te mi no abi soifri wegi èn te mi abi wan saka nanga wegi ston di e bedrigi sma?” (Mika 6:11) „Wi sabi trutru taki wi abi wan krin konsensi, fu di wi wani du ala sani na wan opregti fasi.”—Hebrewsma 13:18.

Taki san tru, de regtfardiki. „Tegu gi san ogri, èn lobi san bun, èn gi retidu wan presi na a portu” (Amos 5:15). „Te unu e krutu sani na a portu, dan unu musu du dati na wan reti fasi èn na wan fasi di e tyari vrede kon” (Sakaria 8:16). „Now unu no e lei moro, èn dati meki ibriwan fu unu musu taki san tru te unu e taki nanga trawan.”—Efeisesma 4:25.

Wroko tranga. „Yu si wan man di sabi en wroko? Na fesi kownu a sa tanapu” (Odo 22:29). „Un no musu lesi te unu e du wroko” (Romesma 12:11). „Awinsi san unu e du, du dati nanga un heri sili leki na gi Yehovah, èn no gi libisma.”—Kolosesma 3:23.

Abi safri-ati, sari-ati, nanga bun-ati. „Un musu abi trutru sari-ati, bun-ati, sakafasi, safri-ati, nanga langa pasensi.”—Kolosesma 3:12.

Wini ogri fu di yu e du bun. „Tan lobi un feanti èn tan begi gi den sma di e frufolgu unu” (Mateyus 5:44). „No meki ogri wini yu, ma tan du bun fu kan wini na ogri.”—Romesma 12:21.

Dini Gado nanga yu heri ati. „’Yu musu lobi Yehovah yu Gado nanga yu heri ati, nanga yu heri sili, èn nanga yu heri frustan.’ Disi na a fosi èn a moro bigi komando.”—Mateyus 22:37, 38.

[Prenki]

Te wi e teki den leri fu Bijbel, dan dati sa yepi wi fu abi wan koloku trowlibi, wan koloku osofamiri libi, nanga bun mati