San na den yoisti markitiki?

DIOGENES, di sma sabi leki wan filosofiaman, ben waka nanga kokolampu na krinkrin dei fu suku wan sma di e tyari ensrefi na wan bun fasi, ma a no feni a sma dati. A man disi ben e libi na ini Ateine na ini a di fu fo yarihondro b.G.T.

Wi no sabi efu a tori disi na wan tru tori. Ma efu Diogenes ben de na libi na ini a ten disi, dan a ben o abi fu suku moro langa srefi fu feni sma di e tyari densrefi na wan bun fasi. Furu sma no e agri taki wán bun fasi nomo de fa sma musu tyari densrefi. Nofo tron nyunsu nanga koranti e sori fa sma e tyari densrefi na wan fasi di no fiti. Iya, yu kan si disi na ini na osofamiri libi, na ini a politiek, na ini spesrutu wroko, na ini sport, na ini a bisnis libi, èn na ini tra afersi fu a libi. Na ini a ten disi, sma no abi lespeki moro gi den bun markitiki di ben e tiri a libi fu sma fu fosi. Den sma disi feni taki den markitiki dati kon owru kaba, èn nofo tron den e weigri fu hori densrefi na den markitiki dati. Den e taki dati den e lespeki son markitiki, ma dati na ala.

Alan Wolfe, wan sabiman di e ondrosuku fa kerki abi krakti tapu a libimakandra, e taki: „Na ini a ten disi sma abi den eigi denki te a abi fu du nanga san bun èn san ogri.” A ben taki tu: „Sma na ini a ten disi kon si now taki a fasi fa den kweki, noso a leri di den kisi na skoro noso na kerki, no e yepi den ala ten fu tyari densrefi na wan fasi di fiti.” Wan koranti ben skrifi san wan filosofiaman, Jonathan Glover, ben taki fu den 100 yari di pasa (Los Angeles Times). A man disi ben taki dati ogri kon lai na grontapu fu di sma no e hori densrefi moro na kerkileri èn fu di den no e tyari densrefi moro na wan bun fasi.

Ma aladi furu sma no sabi moro san na a yoisti fasi fa den musu tyari densrefi, toku dati no tapu son sma fu pruberi fu kon sabi san na a yoisti fasi fa den musu tyari densrefi. Wan tu yari pasa, Federico Mayor di ben de driktoro fu UNESCO (wan organisâsi di e poti prakseri na kulturu afersi fu grontapu), ben taki dati „noiti ete so furu sma ben wani sabi san bun èn san  ogri”. Ma aladi furu sma no sabi san na a yoisti fasi fa den musu tyari densrefi, toku dati no wani taki dati den no abi fu tyari densrefi na wan fasi di fiti.

Ma a de so taki ala sma sabi san na den yoisti markitiki? Soleki fa a sori, dan dati no de so! Èn efu den no sabi soifri san bun èn san ogri, dan fa den o sabi fa den musu tyari densrefi? Na ini a ten disi, furu sma feni taki sma musu bosroiti gi densrefi san bun èn san ogri. Toku a de krin taki a denki disi, no yepi sma trutru fu tyari densrefi na wan moro bun fasi.

Paul Johnson, wan historia skrifiman fu Ingrisikondre e bribi taki a denki disi „meki taki sma e tyari densrefi soleki fa densrefi wani”, èn dati de heri tra fasi leki fa sma ben gwenti, syatu bifo a di fu twenti yarihondro.

Wi kan kon sabi dan san na „a yoisti fasi fa wi musu tyari wisrefi”? A de fanowdu taki wi e hori wisrefi na markitiki di no e kenki, so taki a libi fu wi e waka bun èn so taki wi kan abi wan howpu gi a ten di e kon. Pe wi kan feni den markitiki disi? Na ini a tra artikel wi sa poti prakseri na den aksi disi.