Saulus e miti owru mati nanga sma di ben de en feanti fosi

SAULUS, di sma kon sabi bakaten leki Paulus, ben e drai go baka na Yerusalem fu a fosi leisi, baka di a tron wan Kresten. A ben musu fu frede pikinso. * Dri yari na fesi di a gowe libi a foto, a ben e tapu skreki gi den disipel fu Yesus èn a ben de nomonomo fu kiri den. A ben kisi primisi fu grabu ala den Kresten di a ben feni na ini Damaskus.—Tori fu den Apostel 9:1, 2; Galasiasma 1:18.

Di Saulus srefi tron wan Kresten, dan sondro frede, a bigin fruteri sma fu a bribi di a ben abi na ini a Mesias di ben kisi wan opobaka. A sani disi meki taki den Dyu na ini Damaskus ben wani kiri en (Tori fu den Apostel 9:19-25). Yu denki taki den owru Dyu mati fu en na ini Yerusalem ben o breiti fu si en? A sani di ben prenspari gi Saulus, na fu miti den bakaman fu Krestes na ini Yerusalem. Dati no ben o makriki.

„Di a doro na ini Yerusalem, dan a pruberi fu moksi nanga den disipel; ma den alamala ben frede fu en fu di den no ben bribi taki a ben de wan disipel” (Tori fu den Apostel 9:26). Yu kan  frustan fu san ede dati ben de so. Den ben sabi Saulus leki wan man di ben frufolgu den na wan ogri-ati fasi. Kande den ben denki taki a ben e du nomo leki en na wan Kresten, soso fu du ogri nanga a gemeente. Na fu a sani dati ede den Kresten na ini Yerusalem no ben wani abi demakandra nanga en.

Ma wán fu den Kresten yepi Saulus. Bijbel e taki dati Barnabas tyari a man disi di ben e frufolgu den Kresten fosi, „go na den apostel” fu fruteri den fa Saulus tron wan Kresten èn fa a ben preiki na ini Damaskus. Soleki fa a sori, den apostel disi ben de Petrus (Seifas) nanga Yakobus, a brada fu Masra (Tori fu den Apostel 9:27; Galasiasma 1:18, 19). Bijbel no e taki fa a du kon taki Barnabas bigin frutrow Saulus. Kande den tu man disi ben sabi makandra kaba, èn dati meki Barnabas luku fosi efu Saulus ben de opregti trutru. Noso kande Barnabas ben sabi wan tu Kresten na ini Damaskus di ben fruteri en taki Saulus ben kenki. Awansi fa a no fa, Barnabas meki taki den Kresten brada nanga sisa no ben e denki takru moro fu Saulus. Leki bakapisi fu dati, Saulus tan 15 dei nanga na apostel Petrus.

Saulus e tan 15 dei nanga Petrus

Soleki fa Saulus ben sori den Kresten na ini Galasia, dan a no libisma ben gi en a wroko fu preiki, ma Yesus srefi ben gi en a wroko dati (Galasiasma 1:11, 12). Ma a no de fu taki dati Saulus ben frustan taki a ben musu kon sabi moro fu a diniwroko fu Yesus. Te a ben o tan  nanga Petrus, dan a ben o kon sabi moro fu a tori dati (Lukas 24:12; 1 Korentesma 15:3-8). Saulus ben o abi furu sani fu aksi Petrus nanga Yakobus, èn den apostel disi ben o abi furu fu aksi Saulus fu a fisyun di a ben kisi èn fu a wroko di a ben musu du.

Fa sma kibri Saulus gi den owru mati fu en?

Sma e taki dati Stefanus na a fosi sma di den kiri fu di a ben de wan Kresten. Den sma di ben e hari taki nanga Stefanus, ben de memre fu „a sokari Snoga fu den Friman, èn wan tu [fu den ben de] sma fu Sireine, Aleksandria, Silisia nanga Asia”. Now Saulus ben e ’haritaki nanga den Dyu di ben e taki Grikitongo’, èn a ben e gi den kotoigi sondro frede. San ben de a bakapisi? We, den ben wani kiri en.—Tori fu den Apostel 6:9; 9:28, 29.

Wi kan frustan taki Saulus ben o wani fruteri den owru mati fu en fa a du kon taki a kenki en libi, èn a no de fu taki dati a ben wani fruteri den moro fu a Mesias. Ma den Dyu di ben e taki Grikitongo ben atibron srefisrefi tapu a man disi di den ben e si leki wan toriman.

Saulus ben sabi taki ogri ben kan miti en? Bijbel e taki dati di a ben e begi na ini a tempel, a kisi wan fisyun pe a si Yesus. Na ini a fisyun dati Yesus taigi en: „Komoto esi-esi na ini Yerusalem, bika den no sa feni en bun taki yu e gi kotoigi fu mi.” Saulus piki en: „Masra, densrefi sabi heri bun taki mi ben e poti den sma di e bribi na ini yu, na strafu-oso, èn mi ben e fon den na ini ibri snoga; di den ben e kiri yu kotoigi Stefanus, dan misrefi ben de drape tu, èn mi ben feni en bun san ben pasa.”—Tori fu den Apostel 22:17-20.

Son sma feni taki den wortu fu Saulus e sori taki a ben sabi taki sma ben wani du en ogri. Trawan feni taki Saulus ben e taki: ’Neleki den, mi ben e frufolgu sma tu, èn den sabi dati. A no de fu taki dati den e aksi densrefi fa a du kon taki mi tron wan Kresten. Kande mi kan yepi den fu kon frustan a tru bribi.’ Ma Yesus ben sabi taki den Dyu dati no ben o arki wan man di den ben e si leki wan sma di ben drai baka gi a Dyu bribi. Yesus taigi Saulus: „Opo go, bika mi sa seni yu go na farawe kondre.”—Tori fu den Apostel 22:21, 22.

Di den tra Kresten kon si taki ogri ben kan miti Saulus, dan den tyari en go esi-esi na a foto Sesarea di ben de krosibei na se, èn den seni en go na a foto Tarsus di ben de 500 kilometer moro fara. Na drape Saulus ben kweki (Tori fu den Apostel 9:30). Wan tu yari pasa, fosi Saulus go baka na Yerusalem.

Kande a ben bun taki Saulus gowe libi a foto esi-esi, fu di den sma drape ben kan du ogri nanga a Kresten gemeente. Baka di Saulus gowe, dan „ala sani kon tiri baka na ini a gemeente na ini heri Yudea, Galilea, nanga Samaria, èn a gemeente kon moro tranga; fu di a gemeente ben frede Yehovah èn fu di a ben kisi trowstu fu a santa yeye, meki a ben kon moro bigi”.—Tori fu den Apostel 9:31.

Wi musu luku bun

Neleki fa a ben de na ini a fosi yarihondro, na so wi na ini a ten disi kan kon feni wisrefi na ini situwâsi pe wi sa musu luku bun. Wi no abi fu denki takru fu ala nyun sma di e kon na ini a gemeente. Ma son leisi, bedrigiman pruberi fu kori a pipel fu Yehovah, soso fu kisi wini gi densrefi, noso fu tyari bruya kon na ini a gemeente. Fu dati ede, wi musu luku bun taki den sortu sma disi no e kori wi.—Odo 3:27; 2 Timoteyus 3:13.

A fasi fa Saulus handri di a go preiki na ini Yerusalem e leri Kresten tu fu luku bun. Te wi e preiki na ini son birti noso gi son sma, iya, srefi te wi e preiki gi owru mati, dan wi musu luku bun fu di wi kan kisi mankeri, wi kan lasi wi bribi, noso wi kan tyari wisrefi na wan fasi di no fiti. Wi musu luku bun o ten wi e preiki èn pe wi e preiki.—Odo 22:3; Mateyus 10:16.

Wi kan abi a dyaranti taki fosi a kaba fu na ogri sistema disi doro, Yehovah Kotoigi sa preiki a bun nyunsu fu Gado Kownukondre na heri grontapu. Te a abi fu du nanga a preikiwroko di wi musu du, dan Saulus ben de wan bun eksempre trutru, fu di „a ben e taki sondro frede fu a nen fu Masra”, iya, a ben taki srefi nanga owru mati èn nanga sma di ben de en feanti fosi!—Tori fu den Apostel 9:28.

[Futuwortu]

[Prenki na tapu bladzijde 16]

Di Saulus doro na ini Yerusalem, dan a preiki sondro frede gi den Dyu di ben e taki Grikitongo