Yehovah e warderi en te wi e gi yesi na en

„Sori taki yu koni, mi manpikin, èn prisiri mi ati.”​—ODO 27:11.

1. Fa furu sma na ini a ten disi e tyari densrefi?

NA INI a ten disi, furu sma na heri grontapu e du sani soleki fa den srefi wani, èn den no e gi yesi na Gado. Na ini wan brifi di na apostel Paulus skrifi gi den Kresten na ini Efeise, a e sori fu san ede dati de so. A e taki: „Unu ben e libi soleki fa a sma wani di abi makti tapu a krakti di e tiri sma denki, namku a yeye di e wroko now na ini den sma di e trangayesi Gado” (Efeisesma 2:1, 2). Iya, Satan Didibri, ’a sma di abi makti tapu a krakti di e tiri sma denki’, meki taki sma na heri grontapu e trangayesi Gado. Na dati a ben e du na ini a fosi yarihondro, èn sensi Yesus fringi en komoto fu hemel kon na grontapu na a ten fu a Fosi Grontapufeti, a e kon abi krakti tapu a denki fu moro nanga moro sma.—Openbaring 12:9.

2, 3. Fu san ede wi musu gi yesi na Yehovah?

² Ma wi leki Kresten, sabi taki wi musu gi yesi na Yehovah Gado nanga wi heri ati, fu di a de wi Mekiman, a Sma di e hori wi na libi, a lobi-ati Tiriman fu wi, èn a Frulusuman fu wi (Psalm 148:5, 6; Tori fu den Apostel 4:24; Kolosesma 1:13; Openbaring 4:11). Den Israelsma di ben e libi na ini a ten fu Moses ben sabi taki Yehovah ben de a Sma di ben gi den libi, èn sosrefi a Frulusuman fu den. Fu dati ede, Moses ben taigi den: „Un musu sorgu taki unu e du soifri soleki fa Gado ben komanderi unu” (Deuteronomium 5:32). Iya, den ben musu gi yesi na Yehovah fu di a ben frudini dati. Ma fosi yu denki, den bigin trangayesi a Moro Hei Tiriman fu den.

³ Fu san ede wi musu gi yesi na a Mekiman fu hemel nanga grontapu? Wan leisi, Gado ben meki a profeiti Samuel taigi Kownu Saul: „A moro bun fu gi yesi, leki fu tyari ofrandi” (1 Samuel 15:22, 23). Fu san ede disi de so?

Fu san ede „a moro bun fu gi yesi, leki fu tyari ofrandi”?

4. Wan sani de di wi kan gi Yehovah?

⁴ Te yu e luku en bun, dan ala den sani di wi abi na fu Yehovah, fu di en na wi Mekiman. Sobun, wan sani de di wi kan gi en? Iya, wi kan gi en wan sani di a e warderi srefisrefi. San na dati? Den wortu fu Odo 27:11 e sori san na dati. Drape skrifi: „Sori taki yu  koni, mi manpikin, èn prisiri mi ati, so taki mi kan gi wan piki na a sma di e spotu mi.” Wi kan gi yesi na Gado. Aladi wi de na ini difrenti situwâsi èn wi kweki na difrenti fasi, toku ibriwan fu wi kan gi yesi na Yehovah. Na so wi o man sori taki Satan Didibri ben lei di a taki dati libisma no sa tan getrow na Gado te den e kisi tesi. Dati na wan bigi grani trutru!

5. Fa a Mekiman e firi te sma e trangayesi en? Gi wan eksempre.

⁵ Gado wani taki wi teki bun bosroiti. Te wi e trangayesi En, dan a e sari fu di a sabi taki a sani dati o tyari takru bakapisi kon gi wi (Psalm 78:40, 41). Kon meki wi taki dati wan sma abi sukru siki, èn a no e nyan gosontu nyanyan soleki fa datra taigi en fu du. Fa a datra fu en ben o firi? Wi kan de seiker taki Yehovah e sari te libisma e trangayesi en, fu di a sabi san o pasa te sma no e fiti den rai di a e gi den fu man tan na libi.

6. San o yepi wi fu gi yesi na Gado?

⁶ San o yepi ibriwan fu wi fu gi yesi na Gado? A bun te ibriwan fu wi e aksi Gado fu gi wi „wan ati di e gi yesi”, soleki fa Kownu Salomo ben du. A ben aksi Gado fu gi en so wan ati so taki a ben kan „si krin san bun èn san ogri”. Na so fasi a ben o man koti krutu gi a pipel fu en (1 Kownu 3:9). Wi musu abi „wan ati di e gi yesi” fu man si krin san bun èn san ogri na ini a grontapu disi pe so furu sma no e gi yesi na Gado. Gado gi wi en Wortu, a gi wi buku di wi kan gebroiki fu studeri Bijbel, a gi wi den Kresten konmakandra, èn sosrefi gemeente owruman di e broko den ede nanga wi. Ala den sani disi kan yepi wi fu kisi „wan ati di e gi yesi”. Wi e meki muiti fu kisi wini fu den lobi-ati seti disi?

7. Fu san ede a moro prenspari gi Yehovah taki wi e gi yesi na en, na presi fu tyari ofrandi?

⁷ Yehovah ben meki a pipel fu Israel kon sabi taki a ben moro bun fu gi yesi na en, leki fu tyari meti-ofrandi (Odo 21:3, 27; Hosea 6:6; Mateyus 12:7). Fu san ede Yehovah ben taki dati? Na en srefi ben gi a pipel fu en a komando fu tyari ofrandi, a no so? We, fu san ede wan sma ben e tyari wan ofrandi? Na fu di a ben wani plisi Gado? Noso na fu di a ben firi taki a ben musu du dati? Efu wan anbegiman fu Gado wani plisi en trutru, dan a musu sorgu taki a e gi yesi na Gado ala ten. Gado no abi srakti-ofrandi fanowdu, ma a e warderi en te wi e gi yesi na en.

Wan tori di e leri wi wan sani

8. Fu san ede Gado puru Saul leki kownu?

⁸ A Bijbel tori fu Kownu Saul e sori o prenspari a de fu gi yesi na Gado. Na ini a bigin, Saul ben de wan kownu di ben abi sakafasi èn di no ben e denki tumusi furu fu ensrefi. Iya ’a no ben e si ensrefi leki wan prenspari sma’. Ma baka wan pisi ten, Saul bigin teki bosroiti di ben e sori taki a ben kisi heimemre èn taki a no ben e si sani moro soleki fa Gado ben e si den (1 Samuel 10:21, 22; 15:17). Wan leisi, Saul ben musu go feti teige den Filisteasma. Samuel taigi a kownu fu wakti teleki a doro drape fu tyari ofrandi gi Yehovah èn fu taigi en moro fara san a ben musu du. Ma Samuel kon lati, èn den sma bigin hari gowe. Di Saul si dati, dan a „bigin bron a bron-ofrandi”. Yehovah no ben feni a sani disi bun. Di Samuel doro drape te fu kaba, dan a kownu du neleki a no ben man yepi taki a trangayesi Gado. A taigi Samuel taki na fu di a ben kon lati, meki a prakseri taki a ’ben musu fu’ tyari a bron-ofrandi so taki Yehovah ben kan feni en bun. Gi Kownu Saul, a ben moro prenspari fu tyari na ofrandi dati, leki fu gi yesi na Samuel di ben taigi en fu wakti teleki a ben doro drape. Samuel taigi en: „Yu du wan don sani. Yu no gi yesi na a komando di Yehovah yu Gado ben gi yu.” Fu  di Saul ben trangayesi Yehovah, meki A puru en leki kownu.—1 Samuel 10:8; 13:5-13.

9. Fa Saul trangayesi Gado difrenti leisi?

⁹ A kownu ben leri wan sani fu a tori disi? Nôno! Bakaten, Yehovah gi Saul a komando fu kiri ala den Amalèksma, fu di den ben kon feti nanga Israel sondro taki Israel ben suku trobi nanga den. Saul ben musu kiri srefi den meti fu den. Iya, a „kiri den Amalèksma di ben e libi na ini a heri kontren na mindri Hafila nanga Sur”. Ma a no ben du ala den sani di Gado ben taigi en fu du. Di Samuel kon na a kownu, dan a kownu ben breiti fu di a ben wini a feti. A taki: „Meki Yehovah blesi yu. Mi du san Yehovah taki.” Ma Saul nanga a pipel fu en no kiri Kownu Akak èn den no kiri ’den moro bun krabita nanga kaw, den fatu meti èn sosrefi ala den tra bun sani fu a kondre’. Den trangayesi Yehovah aladi a ben taigi den krin san den ben musu du. Kownu Saul gi a pipel a fowtu fu a sani di ben pasa, fu di a taki: „Den srudati teki den moro bun skapu nanga kaw fu den Amalèksma, fu di den no ben wani kiri den. Den ben abi na prakseri fu tyari den meti leki ofrandi gi Yehovah yu Gado.”—1 Samuel 15:1-15.

10. Sortu sani Saul no ben leri?

¹⁰ Di Saul taki a sani dati, dan Samuel piki en: „Yu denki taki bron-ofrandi nanga tra ofrandi e plisi Yehovah moro leki te sma e gi yesi na Yehovah? Luku, a moro bun fu gi yesi, leki fu tyari ofrandi, èn a moro bun fu arki, leki fu bron a fatu fu manskapu” (1 Samuel 15:22). Fu di Yehovah ben taki dati den ben musu kiri den meti dati, meki a no ben o feni den srakti-ofrandi bun.

Gi yesi na ini ala sani

11, 12. (a) Fa Yehovah feni en te wi e meki muiti fu anbegi en na a fasi di a feni bun? (b) Fa wan sma ben kan kori ensrefi taki a e du san Gado wani, aladi a e trangayesi en?

¹¹ Yehovah breiti trutru te a e si taki den getrow futuboi fu en e horidoro aladi den e kisi tesi èn A breiti tu te A e si taki den e preiki a bun nyunsu fu a Kownukondre aladi sma no wani arki den. Yehovah e prisiri tu te den futuboi fu en e tan go na den konmakandra aladi den musu wroko tranga fu sorgu densrefi! Den sani disi e gi Yehovah prisiri trutru! Yehovah e warderi en te wi e meki muiti na ini na anbegi fu en fu di wi lobi en. Awansi libisma no e warderi a tranga wroko di wi e du, toku Gado e si fa wi e dini en nanga wi heri ati, èn a no e frigiti dati.—Mateyus 6:4.

 ¹² Ma fu man plisi Gado dorodoro, wi musu gi yesi na en na ini ala afersi fu wi libi. Noiti wi musu kori wisrefi taki wi kan du sani di Yehovah no feni bun, solanga leki wi e du tra sani di abi fu du nanga na anbegi. Fu eksempre, wan sma ben kan denki taki te a e du wan tu prenspari sani di abi fu du nanga na anbegi, dan Gado no o strafu en te a e du hurudu noso te a e du wan tra seryusu sondu. A sma dati ben o kori ensrefi trutru!—Galasiasma 6:7, 8.

13. Fa wi kan sori taki wi e gi yesi na Gado te wi de na ini wi oso?

¹³ Dati meki wi musu aksi wisrefi, ’Mi e gi yesi na Yehovah na ini ala sani, srefi te a abi fu du nanga mi eigi tori?’ Yesus ben taki: „A sma di de getrow na ini a moro pikin sani, sa de getrow tu na ini furu sani, èn a sma di no de regtfardiki na ini a moro pikin sani, no sa de regtfardiki tu na ini furu sani” (Lukas 16:10). Wi e ’waka na ini a soifri retifasi fu wi ati’, srefi te ’wi de na ini wi oso’, pe trawan no man si wi? (Psalm 101:2). Iya, te wi de na ini wi oso, dan wi sa abi fu sori tu taki wi de getrow na Gado. Na ini furu kondre pe furu sma abi computer na oso, a makriki fu go tapu Internet fu luku fisti sani. Wan tu yari pasa, sma ben musu go na wan spesrutu presi fu man si den fisti sani disi. Yesus ben taki: „Iniwan sma di e tan luku wan uma fu kisi tranga lostu gi en, du sutadu nanga en kaba na ini en ati.” Wi sa gi yesi na den wortu disi? Iya, wi sa weigri srefi fu luku fisti prenki nanga felem? (Mateyus 5:28; Yob 31:1, 9, 10; Psalm 119:37; Odo 6:24, 25; Efeisesma 5:3-5) Fa a de nanga telefisi programa di lai nanga ogridu? Wi de leki a Gado fu wi di no ’lobi nowan enkri sma di lobi ogridu’? (Psalm 11:5) Noso wi e dringi tumusi furu sopi te wi wawan de na oso? Bijbel e krutu sma di e dringi sopi teleki den kon drungu, ma a e warskow Kresten tu fu no dringi „tumusi furu win”.—Titus 2:3; Lukas 21:34, 35; 1 Timoteyus 3:3.

14. San na wan tu fasi fa wi kan sori taki wi e gi yesi na Yehovah te a abi fu du nanga moni tori?

¹⁴ Wi musu luku bun nanga ete wan sani, èn dati na a fasi fa wi e seti moni afersi. Fu eksempre, wi ben o du kruka sani soso fu kon gudu esi-esi? Wi e prakseri fu pasa den wet fu lanti soso fu no pai belasting moni? Gado gi wi a komando fu „gi ala sma san den abi reti na tapu: efu wan sma wani taki yu musu pai belasting moni, dan pai a belasting moni” (Romesma 13:7). Wi e du dati?

Wi musu gi yesi na Gado fu di wi lobi en

15. Fu san ede yu e gi yesi na Yehovah?

¹⁵ Te wi e gi yesi na Gado, dan wi sa kisi blesi. Fu eksempre, te wi no e smoko, te wi e libi na wan fasi di fiti, èn te wi e lespeki a santafasi fu brudu, dan wi no sa kisi son takru siki. Boiti dati, te wi e fiti den rai fu Bijbel na ini tra afersi fu wi libi, dan wi o sabi fa fu gebroiki wi moni na wan koni fasi, wi o man libi bun nanga trawan, èn wi sa abi wan bun osofamiri libi (Yesaya 48:17). Den blesi disi na wan buweisi taki den wet fu Gado e tyari wini kon gi sma. Ma toku a moro prenspari reide fu san ede wi e gi yesi na Yehovah, na fu di wi lobi en. Wi no e dini Gado fu di wi e suku wini gi wisrefi (Yob 1:9-11; 2:4, 5). Gado gi wi a reti fu bosroiti gi wisrefi na suma wi o gi yesi. Wi wani gi yesi na Yehovah fu di wi wani plisi en èn fu di wi wani du san bun.—Romesma 6:16, 17; 1 Yohanes 5:3.

16, 17. (a) Fa Yesus sori taki a ben e gi yesi na Gado fu di a lobi En nanga en heri ati?(b) Fa wi kan de leki Yesus?

¹⁶ Yesus ben de a moro bun eksempre fu wan sma di e gi yesi na Yehovah fu di a lobi En nanga en heri ati (Yohanes 8:28, 29). Di Yesus ben de na grontapu, dan „den pina di miti en, leri en fu gi yesi” (Hebrewsma 5:8, 9). Fa so? Yesus ben „saka ensrefi èn a gi  yesi te na dede, iya, a dede na wan pina-postu” (Filipisma 2:7, 8). Aladi Yesus ben gwenti kaba fu gi yesi di a ben de na hemel, toku a kisi moro tesi di a ben de na grontapu. Wi kan de seiker taki Yesus bun nofo fu dini leki Granpriester gi den salfu brada fu en èn gi tra sma di e bribi na ini Gado.—Hebrewsma 4:15; 1 Yohanes 2:1, 2.

¹⁷ Fa a de nanga wi? Neleki Yesus, wi musu si en leki wan tumusi prenspari sani fu gi yesi na Gado (1 Petrus 2:21). Wi sa de koloku te wi e gi yesi na Yehovah fu di wi lobi en, awansi wi e kisi tesi (Romesma 7:18-20). Disi wani taki dati wi sa de klariklari fu gi yesi na den wan di e teki fesi na ini a tru anbegi, awansi den abi swakifasi (Hebrewsma 13:17). Yehovah e warderi en trutru te wi e gi yesi na den komando fu en, srefi te a abi fu du nanga wi eigi tori.

18, 19. Sortu wini wi sa kisi te wi e gi yesi na Gado nanga wi heri ati?

¹⁸ Na ini a ten disi, wi musu gi yesi na Yehovah tu. A kan taki wi musu horidoro aladi wi e kisi frufolgu (Tori fu den Apostel 5:29). Boiti dati, wi musu preiki a bun nyunsu èn wi musu gi leri na sma te na a kaba fu a sistema disi (Mateyus 24:13, 14; 28:19, 20). Wi musu horidoro fu man tan kon makandra nanga den brada nanga sisa fu wi, awansi wi e kisi fu du nanga den tesi fu grontapu. Wi lobi-ati Gado sabi heri bun fa wi e meki muiti fu gi yesi na en. Ma fu man gi yesi na Yehovah na ini ala sani, dan wi musu basi wi sondu skin, wi musu wai pasi gi san ogri, èn wi musu kon lobi san bun.—Romesma 12:9.

¹⁹ Te wi e dini Yehovah fu di wi lobi en èn fu di wi e warderi den sani di a e du, dan ’a sa pai wi fu di wi e suku en fayafaya’ (Hebrewsma 11:6). Yehovah e warderi en te wi e meki muiti fu du sani gi En, ma san a lobi moro, na taki wi e gi yesi na en fu di wi lobi en.—Odo 3:1, 2.

San yu ben sa piki?

• Fu san ede wi kan taki dati wan sani de di wi kan gi Yehovah?

• Sortu fowtu Saul ben meki?

• Fa yu kan sori taki yu e bribi taki a moro bun fu gi yesi, leki fu tyari ofrandi?

• Fu san ede yu e gi yesi na Yehovah?

[Aksi fu a tori disi]

[Prenki na tapu bladzijde 26]

Fa wan datra ben o feni en te wan sikisma no e teki a rai fu en?

[Prenki na tapu bladzijde 28]

Fu san ede Yehovah no ben feni Kownu Saul bun moro?

[Prenki na tapu bladzijde 30]

Yu e gi yesi na den komando fu Gado te yu de yu wawan na ini yu oso?